ئارتۇچ ناخشا تېكسىتلىرى

ئارتۇچ

خۇشخۇي دىدار ئېسىل پەزىلەت

ئەمەتجان زۇنۇن ئارتۇچ


خۇشخۇي دىدار ئېسىل پەزىلەت ،
سالاملاردىن  يورۇيدۇ كۆڭۈل  .
خۇش چىرايلار جاھانغا بېزەك ،
ئىناقلىقتىن ياشنايدۇ پۈتكۈل .

تۆكۈلىدۇ ئالەمچە بەركەت ،
شاتلىق سىڭغان ئوت يۈرەكلەردىن .
ئاتا قىلغاي ئىنسانىي قىممەت ،
ئۈمىد قونغان ساپ تېلەكلەردىن .

ئۆمۈر قىسقا بىباھا ھىممەت ،
رىشتىمىزدىن كۆكلەيدۇ ھايات .
ئىزىمىزدىن پارلىسا نۇسرەت ،
بەخىت قۇشى قاقىدۇ قانات .

قەدىرلەنسە مېھرى - مۇھەببەت ،
كۈلكىمىزگە جۈر بولغاي جاھان .
پاكلىق بىلەن ئۇلۇغ ھەقىقەت ،
چېچەكلەيدۇ دىللاردا ئارمان .

ئارتۇچ

كۆزۈڭ سۆزلەيدۇ

ئەمەتجان زۇنۇن ئارتۇچ


يۈرەكلەرنى ئوينۇتۇپ كۆزۈڭ سۆزلەيدۇ ،
غەش كۆڭلۈمنى يورۇتۇپ كۆزۈڭ سۆزلەيدۇ .
كىرپىگىڭ تىكلەيدۇ تۇغ ، تىنىقلىرىم چوغ  ،
ئوتلۇق سۆيگۈ قوزغۇتۇپ  كۆزۈڭ سۆزلەيدۇ .

قارا كۆزۈڭ نۇرىدىن بولدۇم مەس -ئەلەس  ،
قايتا كەلدىم دۇنياغا مۇھەببەت پەۋەس ،
پايانىدا ھاياتنىڭ  سەۋدالىق ئۆچمەس ،
ۋاپا - غورۇر  ئويغۇتۇپ كۆزۈڭ سۆزلەيدۇ .

كۆيۈك ، غەم سەيناسىدا سۈيۈپ ھىجرانلار  ،
چىن ۋىسال تەشناسىدا  يورۇق ئارمانلار ،
پاكلىق ، ھەق  دەۋاسىدا ئاشقاي دەرمانلار ،
ئېزگۈ روھنى ئۇرغۇتۇپ كۆزۈڭ سۆزلەيدۇ  .

ئارتۇچ

بالامغا نەسىھەت


ئەمەتجان زۇنۇن ئارتۇچ


ئەل -ۋەتەن ئىشقىدا كۆيگىن جان بالام ،

جېنىڭدەك ئەزىزلەپ سۆيگىن جان بالام .

مەرىپەت يولىدا ئىزلەن توختىماي ،

ئۈمىدلىك ، مەردانە يۈرگىن جان بالام .



ھاياتقا زىننەتتۇر پاكلىق ۋە ئەخلاق  ،

دىيانەت ، ئادالەت مەنزىلگە چىراق  .

ياماندىن ،ناداندىن يىراق تۇر ، يىراق  ،

ياخشىلار سۆزىگە كۆنگىن جان بالام  .



جاپادا تاۋلانغىن ئارمانلار كۆزلەپ ،

روھىڭنى پاكلاپ تۇر نۇسرەتلەر ئىزلەپ ،

ۋاقتىڭنى  قەدىرلە ، بۇرچۇم كۆپتۇر دەپ ،

مەنزىلدە قۇت ، شاتلىق سۈرگىن جان بالام .



ھالال تەر ، مىھنەتنىڭ بەركىتى ئۇلۇغ ،

ئىلىم - پەن  نۇرىنىڭ شەۋكىتى ئۇلۇغ ،

ئىناقلىق مېھرىنىڭ  شەپقىتى  ئۇلۇغ  ،

بەخىتكە  چۈمۈلۈپ  كۈلگىن جان بالام  .

ئارتۇچ

ئانا قەسىدىسى

ئەمەتجان زۇنۇن ئارتۇچ


مېھرىڭىزدىن نۇرانە تاڭلار ،
چېھرىڭىزدىن كۆكلىگەن باغلار .
بالام دەيسىز بىر ئۆمۈر تىنماي ،
جىسمىڭىزدىن مەزمۇتتۇر تاغلار .

قولىڭىزدا تەۋرەنسە دۇنيا ،
ئەجرىڭىز بار تامامى جاندا .
پەرىشتىدەك بەركەت ياغىدۇ ،
ھايات ئەزىز ئويغانغان ئاڭدا .

بالامنىڭ دەپ تاپقان تەرگەننى ،
بالامنىڭ دەپ ئېگەم بەرگەننى .
سىزنى يۈدۈپ مەككىگە بارسام ،
ئادا بولماس بىر رەت ئەمگەننى .

ئىزىڭىزدا جەننەت جىلۋىسى ،
روھىڭىزدۇر سۆيگۈ قىبلىسى .
مەڭگۈ سىزگە قەرزىدار ئىنسان ،
ئۈزۈلمەيدۇ ئوتلۇق رىشتىسى .

ئارتۇچ

ئۆمۈر دېگەن ئەزەلدىن شۇنداق

ئەمەتجان زۇنۇن ئارتۇچ


يۈرەكلەرنى نەمدەيدۇ شاتلىق ،
ئۆمۈر دېگەن ئەزەلدىن شۇنداق .
ھالال يېگەن زاغرا نان تاتلىق ،
ئۆمۈر دېگەن ئەزەلدىن شۇنداق .



زىمىستانسىز كەلمەيدۇ باھار ،
سۆيگۈ ، نەپرەت دىللاردا ئىزھار .
ئاقىل روھى ئۇيقۇدىن بىدار ،
ئۆمۈر دېگەن ئەزەلدىن شۇنداق .



قېرى تەقدىر قىلمايدۇ شەپقەت ،
ياخشى يولدا كۈتىدۇ قىسمەت ،
مەنزىللەردە ئەل كۆزى ئەلگەك ،
ئۆمۈر دېگەن ئەزەلدىن شۇنداق .



دۇنيا ئىزدەپ تاپقىنىڭ قالار ،
چاچقۇ ، ئىزلار چاچقىنىڭ قالار ،
قۇت دەپ قۇچاق ئاچقىنىڭ قالار ،
ئۆمۈر دېگەن ئەزەلدىن شۇنداق .

ئارتۇچ

ياخشىلار

ئەمەتجان زۇنۇن ئارتۇچ


گۈل ھاياتقا ئېسىل بېزەك ياخشىلار ،
قۇت بېغىدا خۇشبۇي گۈلدەك ياخشىلار .
نىيىتى ساپ ، دىلى ئاپئاق نۇرانە ،
مېھرى ئىللىق مىسلى كۈندەك ياخشلار  .


تۆكۈلىدۇ ئىزلىرىدىن بەركەتلەر ،
مېھنىتىدىن ياغدۇرىدۇ ئامەتلەر ،
تىنىقىدىن بېغىشلايدۇ شەپقەتلەر ،
مەنزىللەردە ئوتلۇق يۈرەك ياخشلار .


بېغىشلايدۇ بارلىغىنى ئەلگە دەپ ،
قىينىسىمۇ جاننى قىسمەت ئىكەكلەپ ،
كۆكلەر روھى ئارمانلىرى چېچەكلەپ ،
سۈزۈك تاڭدەك كۆيگەن تىلەك ياخشىلار .

ئارتۇچ

قـاراڭ

ئەمەتجان زۇنۇن ئارتۇچ


بەندىگە باقماسكەن ھايات ،
قەبرىگە ، ئەرۋاھقا قاراڭ .
ناداندا بولماسكەن ئۇيات ،
تىلەمچى  مەدداھقا قاراڭ .



نامەرتكە نە سوزۇلدى قول ،
تارىخي گۇۋاھقا قاراڭ .
پاراسەتتىن ئېچىلدى يول ،
مەردانە سەيياھقا قاراڭ .



جاسارەتتىن ئۈمىد بولغاي ،
چۆلدىكى گىياھقا قاراڭ .
ئويغاق روھلار قۇتقا تولغاي ،
ھەق يولى جەڭگاھقا قاراڭ .



كىملەرگە باقىي مال -دۇنيا ،
مەيلى بايغا ، شاھقا قاراڭ .
نەپسىگە يانداشتى ۋاپا ،
كەبىرى گۇناھقا قاراڭ .

ئارتۇچ

ياشاڭ

ئەمەتجان زۇنۇن ئارتۇچ


بۇ ئۆمۈر باقىي ئەمەس ،
مېھرى -شەپقەتلىك ياشاڭ .
بەخىت دېگەن ساقىي ئەمەس ،
ھالال مىھنەتلىك ياشاڭ .

تەقدىردىن قاخشاش نۇمۇس ،
خالىس نىيەتلىك ياشاڭ .
ئاقىل بولماقلىق دۇرۇس ،
ئىزى ھېكمەتلىك ياشاڭ .

ياخشىلىقتىن كۈلگەي جان ،
ئېسىل خىسلەتلىك ياشاڭ .
كۆكلىگەي ئۇلۇغ ئارمان ،
يولى نۇسرەتلىك ياشاڭ .

ھەر قەدەمدىن ئۇنسۇن گۈل ،
ئەجرى بەركەتلىك ياشاڭ .
يايراپ سۈيۈنسۇن پۈتكۈل ،
شانۇ -شەۋكەتلىك ياشاڭ .

ياشلىق گويا ئاتقان ئوق ،
قەدرى - قىممەتلىك ياشاڭ .
پۇشايمانغا دورا يوق ،
ساپ دىل  ھىممەتلىك ياشاڭ .

ئارتۇچ

ھايات ۋەسلى ئېھتىمال شۇنداق

ئەمەتجان زۇنۇن ئارتۇچ


كۆنىدىكەن ھەممىگە ئادەم ،
ھايات ۋەسلى ئېھتىمال شۇنداق .
كۆمىدىكەن ئارمانغا ئەلەم ،
ھايات ۋەسلى ئېھتىمال شۇنداق .


ھالىڭ چالما  ئويغاق تۇرمىساڭ ،
روھىڭ مېيىپ  قۇتقا تولمىساڭ ،
گويا ئايسەن  قۇياش بولمىساڭ ،
ھايات ۋەسلى ئېھتىمال شۇنداق .


ئوخشاش بولماس ئالغان خامىنىڭ ،
يورۇق تۇرماس دائىم ئايۋىنىڭ ،
كۈندە باقماس نۇسرەت كارۋىنىڭ ،
ھايات ۋەسلى ئېھتىمال شۇنداق .


ئوڭ ئىشىڭدا كۈلپەت بار بەزەن ،
گۈل تېرىساڭ سانجىلىپ تىكەن ،
رەسۋا قىلغاي ۋاپاسىز لېۋەن ،
ھايات ۋەسلى ئېھتىمال شۇنداق .


جاندىن ئۆتسە ئاھانەت گاھى ،
خوش قىلىدۇ ئۈمىد نىگاھى ،
بەخىت مەڭگۈ ئەمەسكەن ساقىي ،
ھايات ۋەسلى ئېھتىمال شۇنداق .

مېھرىيە

ئورۇن ئالغاچ تۇراي دېدىمغۇ ، ئىنكاسىمنى تەھرىرلەيمەن ، ئىشىم چىقىپ قالدى .
يارايسىز ئارتۇچ !