ھەقىقى مۇھەببەت ‹كۆرەش›

كۆرەش

                                                                                                ھەقىقىي مۇھەببەت

قايسىبىر پەيلاسوپ مۇنداق دېگەن ئىكەن: «دۇنيانىڭ شۇنچە ھاياتى كۈچكە ئىگە بولۇشى ئەلۋەتتە مۇھەببەتنىڭ ھەممە يەرنى قاپلاپ تۇرغانلىقىدا! مۇھەببەت بارچە كۈچ-قۇدرەتنىڭ مەنبەيى.»

مەن بۇ پەيلاسوپنىڭ قارىشىغا تامامەن قوشۇلىمەن. شۇ سەۋەبلىك، مەن پىداگوگىكا ئۇنۋېرسىتېتنى پۈتتۈرۈپلا، مۇنبەرگە تۇنجى چىقىشىمدىكى بىرىنچى سائەتلىك دەرىسىمدىلا، 35 نەپەر ئوقۇغۇچۇمغا ئۇلارنىڭ يۈرىگىدىكى مۇھەببەتنى بىلىپ بېقىش مەقسىتىدە ئۇلارغا بىر بەتلىك ئىمتىھان سۇئال قەغىزى تارقاتتىم. مەن تۈزگەن بۇ ئىمتىھان سۇئالى مۇنداق ئىدى:

تۆۋەندىكى بەش خىل تاللاش ئىچىدىن، ئۆزىڭىز «بىردىنبىر» دەپ قارىغان مۇھەببەتنى تاللاپ چىقىپ قالغان تۆت خىل تاللاشنى بويىۋېتىڭ: مەكتەپكە بېرىش، ۋاقىت، قۇياش، دوست، پۇل-مال. ئەگەر سىزنىڭ قەلبىدىكى «بىردىنبىر» مۇھەببەت بۇ بەش خىل تۈردىنمۇ ھالقىپ كەتكەن بولسا، بۇ بەش خىل تۈرنىڭ ھەممىسىنى بويىۋېتىڭ. ھەمدە سۇئالنىڭ ئارقىسىغا ئۆزىڭىزنىڭ قەلبىدىكى «بىردىنبىر» مۇھەببىتىڭىزنى يېزىپ قويۇڭ!

سىنىپنىڭ ئىچى تىمتاسلىققا چۆمدى. قەلەملەردىن چىققان شىرت-شىرت قىلغان ئاۋازلاردىن ھەربىر ئوقۇغۇچىمنىڭ يۈرەك قەلبىدىكى مۇھەببەتلەر قەغەز يۈزىگە قونماقتا ئىدى.

بېرىلگەن بەش مىنۇت ۋاقىت توشتى. ئىمتىھان قەغەزلەر بىر-بىرلەپ يىغىۋېلىندى. مەن جاۋابلارغا قاراپلا چەكسىز ھەيران قالدىم. 35 ئوقۇغۇچىنىڭ ئارىسىدىن 34ى بەش خىل تاللاشنىڭ ھەممىنى بويىۋەتكەنىدى ھەمدە ھەممىسى دېيىشىۋالغاندەكلا سۇئالنىڭ ئارقىسىغا «ئاپام» دەپ يازغانىدى.

مەن ئا دىن سورىدىم:

-سىز نېمە ئۈچۈن «ئاپام» دەپ يازدىڭىز؟

-ئاپام ئەڭ جاپاكەش، ئۇ ئۆزىنىڭ مېھنەت تەرى بىلەن ئۆيىمىزگە بەخت ئاتا قىلدى.

ب دىن سورىدىم:

-سىز نېمە ئۈچۈن «ئاپام» دەپ يازدىڭىز؟

- ئاپام ھەممىمىزگە كۆيىنىدۇ. ئۇ ئۆزىنىڭ ھەممە مۇھەببىتىنى ماڭا بېرىۋەتكەن بولسىمۇ، ئەمما مەندىن ھېچقانداق بىر جاۋاب تەلەپ قىلمايدۇ.

س دىن سورىدىم:

-سىز نېمە ئۈچۈن ئاپام، دەپ يازدىڭىز؟

-ئاپام ماڭا ھاياتلىق بەردى، دۇنيادا ھاياتلىقتىنمۇ ئارتۇق قەدىرلىك نەرسە يوق.

ئوقۇغۇچىلارنىڭ ھەممىسىنىڭ ئوخشىمىغان جاۋابلىرى بىر مەنىدە ئىدى. بۇ جاۋابلار بايىقى ھېلىقى پەيلاسوپنىڭ سۆزلىرىنىڭ دەلىلى ئىدى.

ئەڭ ئاخىرىدا كۆزۈم 35ىنچى ئوقۇغۇچىنىڭ، بىر بۇلۇڭدا ئولتۇرغان قىزچاقنىڭ ئىمتىھان قەغىزىگە چۈشتى. ئۇنىڭ ئىمتىھان قەغىزىدىكى تاللاشلارمۇ باشقا ئوقۇغۇچىلاردەك بويىۋېتىلگەن ئىدى. ئەمما ئۇ ئۆزىنىڭ يېڭى جاۋابىنى يازمىغان ئىدى.

-ساۋاقداش، ئەجەبا سىزنىڭ «بىردىنبىر» بولغان مۇھەببىتىڭىز يوقمۇ؟

-بار.

ئۇ قىز پەس ئاۋازدا جاۋاب بەردى.

-ئۇنداقتا سىز نېمىدەپ بۇنىڭغا يازمىدىڭىز؟

-چۈنكى مەن ھازىر ئۇنىڭدىن ئايرىلىپ قالدىم.

-ئۇ نېمە؟

-ئاپام. ئەمما ئۇ ھازىر بىزنى تاشلاپ كېتىپ قالدى.

-مۇشۇنداق بولسىمۇ، سىز يەنىلا ئۇنى ئۆزىڭىزنىڭ بىردىنبىر مۇھەببىتى دەپ قارامسىز؟

-ھەئە.

-نېمىشقا؟

-چۈنكى ـــــ ئۇ سىزنىڭ بۈگۈنكى بۇ ئىمتىھانىڭىزنى بىلگەن بولسا، چوقۇم قايتىپ كەلگەن بولاتتى!

يۈرۈگۈم بىردىنلا ئورنىدىن قوزغالغاندەكلا بولۇپ قالدى-دە شۇنداق دېدىم:

-قېنى ئەمىسە، ئۇنى چاققان يېزىپ قويۇڭ!

يۈرىكىم

بۇ تىمىغىمۇ مۇشۇنداق ئىنكاس بىرىشنى ئويلىدىم  ....

بىرسى بىر دانىشمەندىن سوراپتۇ :  ماڭا ئەڭ ياخشى ھەمراھ بولىدىغان كىشى كىم دەپتۇ ؟   دانىشمەن ئاناڭ دەپتۇ ،  ئۇ ئادەم ئاندىن قالسىچۇ دەپتۇ ؟   دانىشمەن يەنە ئاناڭ دەپتۇ ؟  ئۇ ئادەم ئاندىن قالسىچۇ دەپتۇ ؟  دانىشمەن ئاناڭ دەپتۇ ،  ئۇ ئادەم ئاندىن قالسىچۇ دەپتۇ  ؟   دانىشمەن ئاتاڭ دەپتۇ  ،   ئۇ ئادەم ئاندىن قالسىچۇ دەپتۇ  ؟   دانىشمەن  باشقا ئۇرۇق تۇققان دوسىتلىرىڭ دەپتۇ    .

دىمەك ئاتا-ئانا مېھرى باشقىچە  !!!

ئاي بەرگى

بۇ ئۆزىڭىزنىڭ يازمىسىمۇ ؟ھەقىقەتەن ياخشى يېزىپسىز

ئەلبۇم

ئەسەر ياخشى ئورۇنلاشتۇرۇلۇپتۇ، ئاتا - ئانىنىڭ بىزگە قىلغان مۇھەببىتىگە قارىغاندا بىز پەرزەنتلەر يۈزنىڭ بىرىنىمۇ قىلىپ بېرەلمەيدىكەنمىز. ھەممەيلەننىڭ كۆڭلى ئىنساپ قانائەت، ئاتا - ئانا مۇھەببىتى بىلەن لىق تولسۇن!

gvzalnur

دۇنيا مېھىر-مۇھاببەت بىلەن گۈزەلدۇر!
ئانا-ئۇ ئەينەك كەبى دوستىمىز، ئانا-دەردىڭىزگە دەرمان شىپالىق دورا، ئانا-ھەر بىر ئىنساندىن ئېرىشەلمىگەن مىھىرنى بەرگۈچى پەرىشتە، ئانا-ۋاقتى كەلگەندە ھەر قانداق بىر ئورۇندا تۇرۇپ سىزگە مەدەت بەرگۈچى مۇقەددەس ئىنسان.

gvzalnur

يەنە بىر قېتىم ئەسكەرتىش كۆرەش ——تېما يوللىغاندا مەنبەسى سىز بۇلۇڭ ۋە ياكى كۆچۈرۈلمە تېما بولسۇن مەنبەسىنى ئېنىق ئەسكەرتكەن بولسىڭىز ، ياخشى تېمىڭىز ئۈچۈن تەشەككۈر !

ئاتىكەم

ئىجادىيىتىڭىزگە  ئۇتتۇق ، بەرىكەت  تىلەيمەن !

ئاتىكەم

مىنىڭچە  ئانىنىڭ  بالىغا بولغان مۇھەببىتى ئەڭ  پاك مۇھەببەت  .

قاھىرە

ياخشى  بىر  تىما  ئىكەن ، تەشەككۈر ،  
ئانا  ھەقىقەتەنمۇ  بىر ئۇلۇغ  ئىنسان .