|
كەچۈرۈڭ، بۇ يەردە تەڭرى سېتىلامدۇ؟ 
بىر كىچىك بالا قولىدا بىر دوللارنى سىقىمدىغىنىچە، كوچىنى بويلاپ بىر دۇكاندىن بىر دۇكاندىن ئارىلاپ ئۇلاردىن :« كەچۈرۈڭ، بۇ يەردە تەڭرى سېتىلامدۇ؟» دەپ سورىماقتا ئىدى، دۇكان ئىگىلىرىنىڭ بەزىلىرى يوق دەپ جاۋاب بەرسە، بەزىلىرى ئۇنى چاقچاق قىلىۋاتىدۇ دەپ ئويلاپ دۇكاندىن قوغلاپ چىقىراتتى.
قاراڭغۇ چۈشەي دەپ قالغاندا، يىگىرمە توققۇزىنچى دۇكاننىڭ خوجايىنى بالىنى قىزغىنلىق بىلەن كۈتۈۋالدى.
خوجايىن ئاتمىش ياشلاردىن ئاشقان بوۋاي بولۇپ، ئاق چاچلىق، كۆزلىرىدىن مېھىر تۆكۈلۈپ تۇراتتى. ئۇ كۈلۈمسىرەپ تۇرۇپ بالىدىن:« بالام، ئېيتقىنە، سەن تەڭرىنى سېتىۋىلىپ نېمە قىلاتتىڭ؟»دەپ سورىدى.
بالا يىغلاپ تۇرۇپ بوۋايغا ئۇنىڭ ئىسمىنىڭ باننى ئىكەنلىكىنى، ئاتا-ئانىسى ئاللىبۇرۇن ۋاپات بولغان بولۇپ، ئۇنى تاغىسى پاترۇفنىڭ بېقىپ چوڭ قىلغانلىقىنى، ئۇ قۇرۇلۇش ئىشچىسى بولۇپ، نەچچە كۈن بۇرۇن جازىدىن يىقىلىپ چۈشۈپ، ھازىرغىچە ھوشىغا كەلمىگەنلىكىنى ئېيتىپ بەردى. دوختۇرلار باننىغا پەقەت تەڭرىلا ئۇنى قۇتقۇزالايدىغىنىنى ئېيتقان ئىدى.باننىچە، تەڭرى چوقۇم بىر سېھىرلىك نەرسە بولۇپ، ئۇ تەڭرىنى سېتىۋىلىپ، تاغىسىغا يېگۈزسەم، ئۇنىڭ كېسىلى چوقۇم ياخشى بولۇپ كېتەتتى دەپ ئويلايتتى.
بوۋاي بۇنى ئاڭلاپ كۆزلىرى نەمدەشتى، ۋە باننىدىن نەچچە پۇلى بارلىقىنى سورىدى. « بىر دوللار»دېدى باننى جاۋاب بېرىپ.
- سەن بەك تەلەيلىككەنسەن، تەڭرىنىڭ باھاسى دەل بىر دوللار ئىدى-، دېدى بوۋاي پۇكەيدىن «تەڭرىنىڭ سۆيگۈسى» ماركىلىق ئىچىملىكنى ئېلىپ باننىغا سۇنغاچ،-بۇنى ئېلىپ تاغاڭغا ئىچكۈزگىن، ئۇ چوقۇم ساقىيىپ كېتىدۇ. باننى ناھايىتى خوشال بولدى، ۋە ئىچىملىكنى كۆتۈرگىنىچە دوختۇرخانىغا كەلدى. ئۇ كېسەلخانىغا كىرىپلا خوشاللىقىدىن:«تاغا، مەن تەڭرىنى سېتىۋىلىپ كەلدىم، سەن چوقۇم تېزلا ياخشى بولۇپ كېتىسەن» دېدى.
نەچچە كۈن ئۆتكەندىن كېيىن، داڭلىق مۇتەخەسسىسلەردىن تەركىب تاپقان داۋالاش گۇرۇپپىسى دوختۇرخانىغا كەلدى ۋە پاترۇفنىڭ كېسىلىگە دىئاگنوز قويدى.
ئۇلار دۇنيادىكى ئەڭ ئىلغار تىبىبىي تېخنىكىلارنى قوللىنىپ ئاخىرى پاترۇفنىڭ كېسىلىنى ساقايتتى. پاترۇف دوختۇرخانىدىن چىققاندا داۋالاش قەغىزىدىكى ئاسمان پەلەك داۋالاش ھەققىنى كۆرۈپ ھوشىدىن كەتكىلى تاس قالدى.
لېكىن دوختۇرخانا ئۇنىڭغا بىر بوۋاينىڭ ئۇنىڭ بارلىق داۋالاش چىقىملىرىنى تۆلىۋەتكەنلىكىنى ئېيتتى. بۇ بوۋاي بىر مىلياردېر بولۇپ، بىر دۆلەت ھالقىغان شىركەتنىڭ باش لېدىرلىق ئورنىدىن ئىستىپا بەرگەندىن كېيىن، بۇ شەھەرگە كېلىپ تۈرلۈك ماللار دۇكىنى ئېچىپ ۋاقىتنى ئۆتكۈزىۋاتقان ئىكەن. ھېلىقى داۋالاش ئەترىتىنى بۇ بوۋاي نۇرغۇن پۇل خەجلەپ تەكلىپ قىلىپ ئەكەلگەن ئىكەن.
پاترۇف ناھايىتى ھاياجانلاندى ۋە باننىنى ئېلىپ بۇ بوۋايغا مىننەتدارلىقىنى بىلدۈرۈشكە بارماقچى بولدى. لېكىن بوۋاي ئاللىقاچان دۇكىنىنى سېتىۋىتىپ، چەتكە ساياھەتكە چىقىپ كەتكەن ئىدى.
كېيىن، پەترۇف بىر پارچە خەت تاپشۇرۇۋالدى، بۇنى ھېلىقى بوۋاي يازغان بولۇپ، خەتتە:« يىگىت، سىزنىڭ باننىغا ئوخشاش بىر جىيەنىڭىز بولۇشى راستتىنلا سىزنىڭ تەلىيىڭىز، سىزنى قۇتقۇزۇش ئۈچۈن، ئۇ بىر دوللارنى كۆتۈرۈپ ھەممە يەرنى ئىزدەپ تەڭرىنى سېتىۋالماقچى بولغان ئىدى...تەڭرىگە رەھمەت، ئۇ سىزنىڭ ھاياتىڭىزنى قۇتقۇزۇپ قالدى.لېكىن، ئېسىڭىزدە بولسۇن، ھەقىقىي تەڭرى بولسا كىشىلەرنىڭ ياخشى كۆڭلىدۇر!» دېيىلگەن ئىدى.
مەيلى سىز دىققەت قىلغان ياكى قىلمىغان بولۇڭ، ھايات مەڭگۈ داۋام ئېتىدۇ.كىشىلەر بېرىپ كېلىشنىڭ بېلىتىنى سېتىۋالالمايدۇ، يوقاتقانلىرى مەڭگۈ قايتا قايتىپ كەلمەيدۇ.ھاياتتىكى كۆپلىگەن گۈزەللىكلەر تولىمۇ قىسقا بولىدۇ، ئۇلاردىن ھوزۇرلىنىڭ. ئەتراپىڭىزدىكىلەرگە ياخشى مۇئامىلە قىلىڭ، ھازىرىڭىزنى قەدىرلەڭ، كۈنلىرىڭىز ھەرگىز زىلىكىشلىك ، ئۈمۈتسىزلىك ، مەنىسىزلىك ، كۈتۈش ئىچىدە ئۆتمىسۇن.
مەنبە :- نۇر تورى
| 
بايلىق
شۆھرەت
ۋاقتى: 2015-1-1 00:53:59
ساقلاش
ھەمبەھر
قېزىلما
قوللاش
قارشى
ۋاقتى: 2015-1-1 08:21:03
ۋاقتى: 2015-1-1 14:34:36
