مارشال شېئىرلىرى

مارشال

سەپىرىڭگە تىلىدىم ئاق يول،
سېغىنىشنى قۇچاغلاپ تەنھا.
پىشانەمنى سۆيۈپ جۇدالىق،
ھىجرانلاردىن راسلىدى سوۋغا.

سەپىرىڭگە تىلىدىم ئاق يول،
كېلىشىڭنى تىلەپ ئەڭ بۇرۇن.
سېغىنىشتا تىپىرلاپ يۈرەك،
كۈتۈشلەرگە قالدۇردى ئورۇن.

سەپىرىڭگە تىلىدىم ئاق يول،
كۆزلىرىڭدىن ئۈزمەي كۆزۈمنى.
ئاستا-ئاستا كەتتىڭ يىراقلاپ،
بەزلىمەكچى بولدۇم ئۆزۈمنى

كېچە..
پەپىلەيمەن ئۇيقۇلىرىمنى
چۈشلىرىم تۈنلەردە قالغان ئېزىقىپ.
ئۆز-ئۆزۈمنى ئالدايمەن يەنە
زۇلمەتكە قوشۇپ زۇلمەت.

يالغان رېئاللىق
مەۋھۈملۈكتە سۆيەر ئۆزىنى
چۈشلەردە چاقناپ.

يۇمۇلۇپ كۆزلەر
ئالقىشلايدۇ زۇلمەتنى.
ئۆز-ئۆزۈمنى ئالدايمەن يەنە
چۈشلىرىمگە
باشلىماقچى بولۇپ كۈندۈزنى.

شۇنداق
مەن ئۆلۈمنى كۈتكەن بىر غېرىپ
ئۆز-ئۆزۈمنى ئالدايمەن يەنە
ھاياتىمنى قۇچاقلاپ تۇرۇپ.





ئامالىم شۇ ئامالسىز ئۆلۈش،
تېپىش ئۈچۈن ئۆلگەن تۇيغۇمنى.
ئۆز - ئۆزۈمنى ئازابلاپ قەستەن،
قۇچاقلىدىم يۈتكەن سۆيگۈمنى.

تمتاس جىسمىم چۇقانغا تولغان،
كوچىلاردا يۈرىدۇ لەيلەپ.
بىر يىل بۇرۇن ئۆلگەن ئۆزۈمنى،
خىيالىمدىن تاپتىم ئەزۋەيلەپ.

مەن نېمىنى كۈتتۈم بىلمىدىم،
كۆز قىسىشىپ ھاياتىم بىلەن.
كەچكى شەپەق بولارمۇ ھەيران،
قۇچاقلاشسام قۇياشىم بىلەن.




يىراقلاردا تامچىغان كۆز ياش،
تىتىرتىدۇ گۈلنىڭ بەرگىنى.
توزىتىدۇ ياپراقلارنىمۇ،
ئاشىق بايان قىلسا دەردىنى.

تەنھا كۆڭۈل مۇز تۇتقان دەريا،
ئۈششۈك چۈشكەن بىچارە يۈرەك.
مۇزلىتىدۇ زىمىستاننىمۇ،
تومۇز ھەتتا بولالماس يۆلەك.

سالام خېتىم يېزىلغان ۋاراق،
سۈرىتىدۇ كۆزياشلىرىنى.
بارالمىغاچ سېنىڭ يېنىڭغا،
ئاڭلىمايدۇ بەزلەشلىرىمنى.

يىراقلاردا پاتىدۇ قۇياش،
ئەلەم بىلەن كۆزىنى يۇمۇپ.
قىرغاقلىرى چاك - چاك يېرىلغان،
ئاقالمىغاچ دەريامۇ تولۇپ.

خىياللىرىم ئېغىر تىنىقتا،
چىقالمىغاچ تۆمۈر قەپەستىن.
تەلمۈرىدۇ يوللار كۆزۈمگە،
ئاھ ئۇرىدۇ ھەربىر نەپەستىن.

كالىندارنىڭ يۈزىدىكى سان،
تىكىلىدۇ ماڭا ئالىيىپ.
خېلى بولدى باقمىدى كۈلۈپ،
مەن نېمىگە قالدىم ئايلىنىپ.




ئازابلارنىڭ ھوزۇرى بىلەن،
كۆز ياشلىرىم كۈلگەن شۇ كېچە.
ئۆلىۋاتقان ئارمانلىرىمنىڭ،
ئايىقىغا تۆكۈلدى غۇنچە.

گاچىلاشقان سۆيۈشۈشلىرىم،
ئۆز مېھرىنى قويدى دالدىدا.
ئۆز - ئۆزىنى يادلىدى تەكرار،
ۋەدىلىرىم دارنىڭ ئالدىدا.

قەسەملەردىن تامچىماقتا قان.
جۇدالىققاچەككەندەك نەقىش.
ھىجرانلارغا بولدۇم ساھىبخان،
ئازابلارنى قىلغاندەك پەرۋىش.

.



تەلۋىلەشكەن بىر توپ ئاياللار
كوچا -كويلاردا
ئىزدىمەكتە ئەر.

مىڭ يىللىق توغراقنىڭ
ئېگىز شېخىدا
غەمگە پاتار بىر ئەر
كولىماقتا دەرەخ تۈۋىنى
يىڭنە بىلەن
قىرىق ئايال.

يېڭىلا تۇغۇلدى بىر ئوغۇل بوۋاق
ئاتىسىز.

دوختۇرخانىدا ئەرلەر ئۆچرەتتە
ئەرلىكنى ئىستەپ؛
يېشىل ئەرلىك خىرىسقا تولدى،
قىرانلار ئەجەلسىز ئۆلۈپ بولدى.
‹‹غۇرۇرى›› ئۈچۈن
قىزلار ئۆز تېنىنى سېتىپ بولدى.
...................................






ئۇچقۇنلاپ ئاسماننىڭ روجەكلىرىدىن،
تۆكۈلدى قەلبىمگە تۇنجى ياغقان قار.
دىكابىر سۆيۈملۈك بېقىپ ھەممىگە،
ئوتلۇق بىر سۆيگۈگە قىلدى ئىنتىزار.

تۇنجى قار ئاستىدا مۇڭلانغان يۈرەك،
زارىققان كۆزلەردىن قالدىغۇ پىنھان.
ۋەسلىمنى سۆيگۈمگە قالدۇردۇم يەنە،
ئارمىنىم ۋىسالغا بەرگەندەك ئىمكان.

سۆزلەيسەن بىرھازا لەپىلدەپ تۇرۇپ،
ئاشىقتىن بىگانە قالغان كۆڭۈلگە.
تۇيۇلدى ئۇچقۇنۇڭ بولۇپ كۆپ چېكىت،
سوئاللار ياغدۇرۇپ شۇ قىزىل گۈلگە.

كېچىنى ئاقلىقىڭ بىلەن يورۇتۇپ،
ھەممىگە بارىڭنى ئاتمىغىن زىنھار.
چاڭقىغان لەۋلەرگە سىڭمە ئوت بولۇپ،
ۋىسالىم سۆيگۈمدىن بولغاندەك بىدار


تىمتاس چۇقان


يالتايدىم ئەتىنى ئويلاشتىن يەنە،
بۈگۈنگە بىر رومكا ئازابنى لىقلاپ.
قارىدىم ئۇپۇقنىڭ قانلىق كۆزىگە،
گۈللەرنىڭ بەرگىدەك توزۇشنى ئويلاپ.


كۆمۈلدى پىنھانغا ئۇنتۇش چۇقانى،
ئۆلۈممۇ بۇ كېچە كەتكەندەك ئۆلۈپ.
بىر ئىللىق ئازابتا ئىسسىندىم گويا،
ۋەيرانە كۆڭۈلدە ئامالسىز كۈلۈپ.


ئىسيانغا بويالدى سۆيۈملۈك تۇيغۇ،
سەكراتتا جان بەردى ئۈمىدسىز كۈتۈش.
سۆيۈشۈپ ئېسىنى يوقاتقىنىدەك،
كۆرسىتەر ئازابنى لەۋلەردە كۈلۈش.


باھاردىكى كەچكۈز لىرىكىسى

بىر گۈزەل تۇيغۇ
بىر تاتلىق ئازاب
سۆيۈشمۇ ھەتتا...
مۇقەددەس گۇناھ.

نەمخۇش ھىدقا تويۇنغار باھار
يىغلايدۇ قارلار
ئۇنتۇلماقتا ئۇزۇن كېچىلەر
ئۇنتۇلماقتا
يۇمۇلغان كۆزلەر ئارا
ئۇيقۇلار ھەتتا..

تارقالماقتا ئۆلۈم پۇرىقى
ئاپئاق چۈشتەك ئۈمىدلىرىمدىن
زامانلاردىن ھالقىغان سۆيگۈ
قەلىبلەردىن جان بېرەر كۈلۈپ
ئۇ باھاردىن ئۈنچىلەر تىزىپ
غېرىپ قەبرەمگە.

مەن

بىرتاتلىق سۆيگۈ

بىردۆۋە ئازاپ

تۈن قوينىنىڭ جىمجىتلىقىدا،

سەن

پەقەتلا ئۆزۈڭ

ھېچنىمە تېخى

قەلبىڭمۇ ھەتتا،

زارىقىپ كۈتمەيمەن

كۈتمەيمەن زىنھار

جۈپ قېشىڭنىڭ ئوتتۇرلىقىدا

قىسىلىپ قېلىشنى.

غەمسىز كۆزلىرىڭ

سۆزلىتىدۇ ئاھ سۆزلىتىدۇ

مىسكىن قەلبىمنى

ئەيلىتىپ نىدا:

سۆيىمەن سېنى.

مارشال.

باغۋەن

ئويغاق قەلىمىڭ بىلەن ئۆزۇڭگە تەۋە بولغان دۇنيانى يورۇتۇپ چىققىن ، سېنىڭ ئۆزۈڭگە ئىشىنىدىغان خاراكتىرىڭ مېنى قايىل قىلدى ، شېئىرلىرىڭدا ئىشلىتىلگەن تىلدا مەنە يېڭىلىقى بار ئىكەن ،ئىلگىرىكى تەكرارلانغان سۆزلۈكلەر بىر قەدەر كۆپ بولسىمۇ ، لىكىن قەلىمىڭ ئىچىدە باشقا بىر رەڭدە بوياپ چىقىشقا كۈچ چىقرىپسەن ، بەزى مىسرالىرىڭدا  قان تەرىڭ ئېقىپ تۇرۋاتقانلىقىنى كۆردۇم . ئاكاڭ سېنى مەڭگۈ قوللايدۇ ، توپلا م چىقىرىشقا ماڭا ۋەدە بەرگىن قانداق ؟

ئاي بەرگى

بۈگۈنكى تور سۈرىتىنىڭ ناچارلىقى كەيپىياتىمغا بەك تەسىر قىلدى.ئەسلى شئېرلاردىن تازا ھوزۇرلىنىپ ئولتۇرۇپ بىر ئىنكاس يازارمەن دىسەم،....قالغىنىنى ئۆزىڭىز بىلىسىزغۇ ھە؟
شئېرلىرىڭىز توغرىسىدا بىر نەرسە دىيىشكە منىڭ قەلىمىم ئاجىزلىق قىلىدۇ.
مەن پەقەت بۇنىڭدىن كېيىنكى ئىجادىيىتىڭىزگە ئۇتۇق تىلەيمەن.

مارشال

باغۋەن يوللىغان ۋاقتى  2014-3-19 23:26
ئويغاق قەلىمىڭ بىلەن ئۆزۇڭگە تەۋە بولغان دۇنيانى يورۇ ...

بولىدۇ ئاكا بەرگەن باھالىرىڭىزغا رەھمەت. ئاللا خالىسا شۇنداق قىلىمەن. بۇ شېئىرلار ۋاقىت تەرتىپى بويىچە ئورۇنلاشتۇرۇلغان.  شېئىرىي ھەۋىسى بار مۇنبەرداشلارنىڭ ئىجادىيەت دەۋرىمگە باھا بېرىشىنى ئۈمىد قىلىپ رەتلىگەن ئىدىم.

مارشال

گۈلمىسال يوللىغان ۋاقتى  2014-3-19 23:29
بۈگۈنكى تور سۈرىتىنىڭ ناچارلىقى كەيپىياتىمغا بەك تەسى ...

رەھمەت سىزدەك ھەدەمنىڭ قوللىشىدا ۋە سىزگە ئوخشاش يېقىنلىرىمنىڭ قوللىشىدا چوقۇم تىرىشىمەن بولسا تەنقىدى پىكرلىرىڭلارنىمۇ قەئىي ئايىماڭلار. سىزنىڭ تەكلىپىڭىز بىلەن رەتلىدىم ھەدە يەنىلا سىلەردەك ئۇستازلىرىم ماڭا ياخشى يول كۆرسىتىپ بېرەلەيدۇ سىلەرگە ئىشىنىمەن.

ياسنجان

ھەقىقەتەن بەك  چوڭقۇر  ھىستۇيغۇ بىلەن يېزىپسىز شىئىرنىڭ پۇراقلىرمۇ شۇنداق ياخشىكەن ، يەنمۇ تىرشىپ  يىڭى نەتىنجلەرنى قولغا كەلتۇرۇشكە  تىرىشقايسىز !!!

ئوقۇ

ئەسەرلىرىڭدە ئۆزۇڭگە خاس بولغان تىما ۋە بەدىئى خۇسۇسىيەتنى يىتىلدۇرۇشكە تىرىشقىن

چولپان

شىئېرنىڭ يىزىلىش ئۇسلۇبى ھەجەپ ئۆزگىچە ئىكەن ھە. نادىر تىما بولۇشقا مۇناسىپ ئىكەن ، ھەممىسى بىر بىرىدىن ئىسىل چىقىپتۇ ، ياخشى تىمىلىرىڭىز مۇنبەرنىڭ كۆركى بوپتۇ ، يەنىمۇ تىرىشىڭ مارشال قارى.. مارشال قايسى قىسىمنىڭ مارشالىكىن دىسەم ئەدەبى قوشۇننىڭ مارشالىكەندە.

رۆشەن

بىز -بىرىدىن ياخشى يېزىلغان شئېرىلار ئىكەن.تۈزۈي قىلمايلا ساقلىۋالدىم ئەمىسە ھە؟

نۇرلۇق

ئىجادىيىتىڭىز قۇتلۇق بولغاي