ئەل قاتارى

6788

	بۇ قوشنامنىڭ ئىسىمى سەمەت. گەرچە يېشى مەندىن خېلىلا چوڭ بولسىمۇ، كىرىش -چىقىشىمىز بەكلا قۇيۇق. بۇلۇپمۇ ئۇنىڭ مىنىڭكىگە كىرىشى بەكلا تولا. بىر كۈنى پۇل ئۆتنە ئالغىلى كىرسە، بىر كۈنى بىرەر جابدۇق - سايماننى، ھىچ بولمىسا ئۈچ چاقلىق توك سىكىلىتىمنى سوراپ كىرىدۇ. يېقىنقى يىللاردا ئۇنىڭ ئۆيىدە ئۈزۈلمەي مەرىكە بۇلۇپ تۇردى. ئۇنىڭ ئۈچ قىزى بار ئىدى. ئۆتكەن يىلى چوڭ قىزىنى ياتلىق قىلىپ بولغان ئىدى. بۇ يىلنىڭ بېشىدا ئوتتۇرانچى قىزىنى ياتلىق قىلىدى. مانا ئەمدى چوڭ قىزىنىڭ يېڭى تۇغۇلغان بالىسىغا بۆشۈك توي قىلىشقا تەييارلىق قىلىۋىتىپتۇ. - بىراۋ سىزنى ئالدىراتمىغانىكىن سەمەتكا ،- دېدىم بىر كۈنى،- بالىلېرىڭىزنىڭ مەرىكىسىنى يىل ئاتلاپ قىلسىڭىزمۇ بوپتىكەن؟ - قانداق دەيسىز؟- سورىدى ئۇ ھەيرانلىق كۆزلېرىنى ماڭا تىكىپ. -يۇرت- مەھەللە سىزنى پۇل -پۈچەك يىغىۋىلىش ئۈچۈن مەرىكە قىلىدىكەن، دېمىسۇن يەنە؟ -خەق بىلەن نېمە كارىم،- دېدى ئۇ كايىغاندەك قىلىپ،- نېمىلا بولمىسۇن مەنمۇ ئەل قاتارى قىلدىمغۇ؟ - ئۇنىڭ ئۈستىگە كۈندۈزى ئۆيىڭىزدە، كەچتە رېستۇراندا قىلىدىكەنسىز. نېمىمۇ قىلارسىز ئۇنچىلىك ھەشەم قىلىپ؟ -بۇمۇ ئەل قاتارى بولغان ئىش ئۇكام، ئۇمۇ ھازىرقى يېڭى يۈزلىنىش تۇرسا؟ مانا مۇشۇنداق ئۇ نېمىلا قىلسا ئاشۇنداق ئەل قاتارى قىلىدۇ. ئارىدىن ئۇزۇن ئۆتمەي ئۇ يەنە كىچىك قىزىنىڭ تويىنى قىلماقچى بولۇپ، بىر تۇتام باغاقلارنى كۆتىرىپ ئۆيۈمگە كىرىپ كەلدى. -باغاقلارنى تارقىتىشىپ بەرسىڭىز ئۇكام؟ ماقول دىمەي ئامال يوق قوشنىدارچىلىقتا، باغاقلارنى ئۇنىڭ قولىدىن ئېلىپ كۆرۈپ چىقتىم. -ۋاي بۇ قانداق يازغىنىڭىز سەمەتكا، باغاقلارنىڭ ھەممىسى بىر ئادەمگە ئىككىدىن يېزىلىپ قاپتىغۇ؟- سورىدىم ھەيران بۇلۇپ. -ئەمدى ئۇكام بۇمۇ ئەل قاتارى دەڭە، بىرى ئۆزۈمنىڭ نامىدا، بىرى قىزىمنىڭ نامىدا شۇ. ئادەمگەرچىلىك دىگەننى كېيىن چوقۇم قايتۇرىدىغان گەپ. شۇڭا شۇنداق يېزىپ قويدۇم. -ھە چۈشەندىم. ئادەمگەرچىلىكنى ئىككى كىشلىك يىغاي دەپسىز- دە؟ ئۇنداقتا ماڭىمۇ ئىككىنى يېزىپسىزغۇ؟ -ئۇكام ئەمدى شۇ قوشنىدارچىلىقتا ئەل قاتارى دەپ .....- ئۇ گېپىنىڭ ئاخىرىنى يۇتىۋەتتى. -بولىدۇ. مەنمۇ <<ئەل قاتارى>> قىزىڭىزغا بىر كىشلىك، سىزگە بىر كىشلىك ئادەمگەرچىلىك قىلاي. -ئۆزۈمنى تەستە بېسىۋېلىپ. كۈزگە يېقىن مەنمۇ توي قىلىدىغان بۇلۇپ قالدىم. بۇ <<ئەل قاتارى>>ئىش قىلىدىغان قوشنامنىمۇ ئۇنتۇپ قالمىدىم. مەن رەڭ ۋە گۈل نەقىشلېرى ئوخشىمايدىغان ئالتە دانە باغاقنى سېتىۋېلىپ، يېزىپ ئۇدۇل ئۆيىگىلا كىردىم. -ۋۇي بۇ .........ئۇكام، ھەممىسىنىلا ماڭا يېزىپسىزغۇ؟ دېدى ئۇ چىرايى تاتارغىنىچە. -ئەل قاتارى يېزىپ قويدۇمغۇ سەمەتكا!- شۇنداق جاۋاپ بېرىپلا كەينىمگە ئۆرۈلۈپ چىقىپ كەتتىم. ئۇ ئۆڭسۇلى ئۆچكەن ھالدا بوسوغۇسىدىلا قالدى. ئىشىنىمەنكى ئۇنىڭ شۇ چاغدىكى ھېسياتى كىشىلەرنىڭ ئۇنىڭ بىر ئادەمگە ئۈستى - ئۈستىلەپ بىر ئادەمگە يېزىپ ئەۋەتكەن باغاقلېرىنى تاپشۇرۋالغان چاغدىكى ھېسياتى بىلەن ئوپمۇ -ئوخشاش مۇقەررەر شۇنداق! تۇرپان گېزىتىدىن ئېلىندى.

tapalmidim

	مۇشۇ ئەل قاتارى دەپ كۆپ پۇل ،ۋاقىت ۋە، زىھنىمىزنى ئىسراپ قىلۋېتىپ بارىمىز مەنمۇ ئەل قاتارى ئىنكاستىن بىرنى يىزىپ قوياي ئەمسە

nazakat888

	جەمىيىتىمىزدە ھەقىقەتەن مۇشۇنداق ئادەمنى بىزار قىلىدىغان ئىشلارنى يوق دىگىلى بولمايدۇ.نىمىدىگەن سەتچىلىك -بۇ...... تېمىڭىزغا رەھمەت.

mahatjan

	ئەل قاتارى ئاشۇ توي-مەرىكىلەرنى قىلالماي قالساق ئەل قاتارىدىن چىقىرىۋەتمەس.