شىڭ شىسەينىڭ ئىلاجىسىزلىقى

abaytarim

	شىڭ شىسەينىڭ ئىلاجىسىزلىقى      ئۈرۈمچى .  شەرقى باغ .   تۈنۈگۈن چۈشتىن كېيىن ئايرۇپىلان بىلەن كەلگەن مەركەزنىڭ تولۇق ھوقۇقلۇق ۋەكىلى جۇشياۋلياڭ شەرقى باغقا چۈشكەنىدى . بىرەر سائەت ئۆتكەندىن كېيىن شىڭ شىسەي ھىجىيىپ كېلىپ كۆرۈشتى . ئۇ " چارچاپ كەلدىڭىز ، بۈگۈن دەم ئېلىڭ ، ئەتە سۆزلىشەيلى ! " دەپ قۇيرۇقىنى تىكىۋەتتى . ئۇ بۈگۈن ئەتتىگەندىمۇ ئالاھىدە تېلىفۇن بېرىپ ، چۈشتىن بۇرۇن بارالمايدىغانلىقىنى ئېيتىپ ، كەچۈرۈم سوراپ ، چۈشتىن كېيىن چوقۇم بارىمەن ، دېدى . دېگىنى بويىچە ، سائەت ئىككى يېرىملەردە كەلگەن شىڭ شىسەي جۇشياۋلياڭ بىلەن جۇشياۋلياڭ ياتقان تاشقىرىقى ئۆيىدە ساپا ئۈستىلىنىڭ ئىككى تەرىپىدە بىر - بىرىگە قارىشىپ ئولتۇرۇپ پاراڭلىشىۋاتاتتى . بايا خىزمەتچى قىز قۇيۇپ قويغان ئىستاكانلاردىكى چاي شۇ پېتى تۇراتتى .    قاتتىق قوللۇق ئادەملەر تېخىمۇ يۇمشاق قول كېلىدۇ ، گېدەيگەننى ھىجايمايدۇ دەپ ، قېنى ، كىم ئېيتالايدۇ ؟! ھەر ئىككى قولى يۈز مىڭلىغان تەڭرىتاغلىقلارنىڭ قىزىل قېنى بىلەن بويالغان ، بۆرە كۆزلىرىدىن ھۆكۈمرانلىق ياۋۇزلۇقى چىقىپ تۇرىدىغان شىڭ شىسەي شۇ تاپتا جۇشياۋلياڭغا ھىجىيىپ ، خوشامەت قىلىپ ، قىلىدىغان قىلىق تاپالماي قېلىۋاتاتتى . خېلىدىن بېرى بۇ كۈننىڭ كېلىدىغانلىقىنى تۇيۇپ يۈرگەن بۇ كاززاپ گومىنداڭ شىنجاڭ ئۆلكىلىك پىرقىسىنىڭ باشلىقى خۇاڭ رۇجىن قاتارلىقلارنى قولغا ئېلىپ ، يەنە ستالىننىڭ قوينىغا ئۆزىنى ئېتىپ ، بۇ تەقدىردىن قۇتۇلۇشنى ئويلىغانىدى ؛ لېكىن بۇ قېتىم تەقدىر كۈلۈپ قارىمىغان شىڭ شىسەي ئەمدى ئۆزىنىڭ ھىيلە - مىكىرگە تايىنىپ بۇ تەقدىردىن قۇتۇلۇشنى ، ئەڭ بولمىغاندا بىر مەزگىل كېچىكتۈرۈشنى ئويلىدى . شىڭ شىسەي ئۆزىنىڭ ئالدىدا كېرىلىپ ، جىددىي ،سوغۇق قىياپەتتە ئولتۇرغان جۇۋشياۋلياڭغا ھىجىيىپ ، ئۇنى قولغا كەلتۈرۈش ئۈچۈن ، يوقىرىدا دېيىلگەن ئويى بىلەن بار ھۆنىرىنى ئىشقا سېلىۋاتاتتى . شۇ تاپتا قىلىۋاتقان پەسكەش خوشامەتلىرى بىلەن ھەرقانداق شەرمەندىلىكنى ۋە نۇمۇسسىزلىقنى قىلىشتىن يانمايدىغان رەزىل قىياپىتىنى كۆرسىتىۋاتاتتى . مەركەزنىڭ تەلەتى سۆرۈن تولۇق ھوقوقلۇق ۋەكىلى كۆزلىرىنىڭ ئاق پاختىسىنى چىقىرىپ ، بۇ ساختىپەزنىڭ خوشامەت ۋە ھىجىيىشلىرىغا قىلچە پەرۋا قىلماي ، ئىككى پۇتىنى ئالماشتۇرۇپ ، جىددىي قىياپەتتە سۆزلەۋاتاتتى .    _ بىلىڭكى ، سىزنىڭ بىردىنبىر چىقىش يولىڭىز ، _ دېدى جۇشياۋلياڭ سۆزلىرىنى ئالدىرىماي ، سالماقلىق بىلەن سۆزلەپ يوغان ئېچىلغان كۆزلىرىنى ئالدىدا ئۆزىگە قاراپ ھىجايغان شىڭ شىسەيگە بېگىزدەك قاداپ ، - خىزمىتىڭىزدىن ئىستىپا بېرىپ ، دەرھال نەنجىڭگە كېتىش ، جياڭ جېشى جانابلىرى يەنە كەڭ قۇرساقلىق بىلەن ئىنئام قىلغان دېھقانچىلىق - ئورمانچىلىق مىنىستىرلىقىنىڭ مىنىستىرى بولۇشتىن ئىبارەت . ئەقىللىق بولسىڭىز ، " خوپ " دەيسىز ! مەن سىزگە كۆيۈنۈپ ، گەپنى ئوچۇق قىلدىم ، قارشىلاشسىڭىز يامان ئاقىۋەتتە قالىدىغانلىقىڭىزنى زادىلا ئۇنۇتماڭ !    شىڭ شىسەي يەنە بىر ھىجايغاندەك قىلدى ، لېكىن ئۇنىڭ بۇ قېتىمقى ھىجىيىشى پەقەتلا ھىجىيىشقا ئوخشىمىدى . ئۇ ھىجىيىۋاتامدۇ ياكى ئۈمسەرەۋاتامدۇ ، بۇنى زادىلا بىلگىلى بولمايتتى : كۈلدى دېسە كۈلگەنگە ، يىغلىدى دېسە يىغلىغانغا ئوخشىمايدىغان بىر قىياپەتتە قارايتتى . ئۇنىڭ بۆرە كۆزلىرىدىكى ۋەھشىيلىك تامامەن تۈگەپ ، بېچارە تۈلكىنىڭ شىر ئالدىدىكى ئېچىنىشلىق ھالىتى ئەكس ئېتەتتى .    - ھۆرمەتلىك گېنېرال ! سىزدىن خۇش بولۇپ كېتەي ، سىزنى چوقۇم كۆڭلىڭىز خۇش بولغىدەك رازى قىلاتتىم ! - دەيتتى شىڭ شىسەي بېشىنى ئالدىغا سوزۇپ جۇشياۋلياڭغا يېلىنىپ ، - ئۆلكە رەئىسى بولمىساممۇ مەيلى ، باشقا بىرى كېلىپ رەئىس بولسۇن ، مەن شىنجاڭ چېگرا مۇداپىئە دۇبەنى بولساملا بولاتتى . سىز جياڭ جېشىنى سۆزىڭىزگە كۆندۈرەلەيسىز ، ئۇنىڭغا بىر دەپ باققان بولسىڭىز . مەن شىنجاڭدىن كەتمىسەم ، شىنجاڭغا راستىنى دېسەم ئۆگىنىپ قاپتىمەن !    ئۆزى بەگ ، ئۆزى خان بولۇپ ، بۇ يۇۋاش ، ئاق كۆڭۈل ، سەمىمىي خەلقنى ، باي ۋە گۈزەل ئۆلكىنى خالىغانچە سوراپ ، خالىغىنىچە بۇلاپ - تالاپ يېگەن بىر مۇناپىقنىڭ شىنجاڭدىن قانداقمۇ كەتكۈسى كەلسۇن ! ئۇ نەنجىڭگە بېرىپ ، دېھقانچىلىق - ئورمانچىلىق مىنىستىرلىقىنىڭ مىنىستىرى بولسىمۇ ، شىنجاڭدىكىدەك ھۆركىرەپ دەۋران سۈرەلەيتتىمۇ !؟ قۇرۇق قول كەلگەن بىر تەلۋە سەرگەرداننىڭ ئۆزىنى دۇنيادىكى ئەڭ باي دۆلەتمەن ئادەمگە ئايلاندۇرغان زېمىندىن كەتكۈسى كېلەرمۇ !؟ بۇنداق توققۇزى تەل ، سەمىمي ، ئاق كۆڭۈل زېمىنغا ئۆگېنەلمەيدىغان ئادەممۇ بولۇرمۇ !؟ تۈنۈگۈنلا گېدىيىپ يۈرگەن بۇ كاززاپ شۇ تاپتا تاماكىسىنى پۇرقىرىتىپ چېكىپ ، ئىككى پۇتىنى ئالماشتۇرۇپ، غادىيىپ ئولتۇرغان مەركەزنىڭ تولۇق ھوقۇقلۇق ۋەكىلىگە تەكرار - تەكرار يالۋۇرۇپ - يېلىنىپ ، " ئۆگىنىپ قالغان " شىنجاڭدىن كەتمەسلىك ئۈچۈن جېنىنىڭ بارىچە تىرىشىۋاتاتتى .   - بولمايدۇ ! - دېدى جۇشياۋلياڭ قوشۇمىسىنى تۈرۈپ كېرىلگەن قىياپەتتە ، - ئەمدى شىنجاڭ ئۆلكىلىك دۇبەن مەھكىمىسى ئەمەلدىن قالدۇرىلىدۇ . شىنجاڭدىكى بارلىق ھەربىي قىسىملار ھەربىي ئىشلار كومىتىتىغا بېۋاستە قارايدىغان بولىدۇ . دۇبەن مەھكىمىسىنىڭ ئىشلىرىنى شىنجاڭ ئۆلكىلىك ئامانلىقنى ساقلاش گارنېزۇنى ئۆتكۈزۋالىدۇ . سىزگە شۇنى ئېنىق قىلىپ دەيكى ، جياڭ جېشى جانابلىرى مەن بىلەن كۆرۈشكەندە ، قەتئىي قىلىپ : شىڭ شىسەي خىزمىتىدىن ئىستىپا بەرسۇن ، شىنجاڭدا قالىمەن دېگەن خىيالدا بولمىسۇن ! - دېدى . سىزنىڭ شىنجاڭدا قېلىشىڭىزغا زادى بولمايدۇ .    شىڭ شىسەي بېشىنى ساڭگىلىتىپ ، قولتۇقىدىن تاۋۇزى چۈشكەن ئادەمدەك خىيال سۈرۈپ ئولتۇرۇپ كەتتى . ئۇ ئاۋۋال ئىچىدە ستالىننى مىڭ بىرنى تىللىۋەتتى ، ئارقىدىن چۇڭقۇر ئۇھ تارتىپ ، بىر ھازادىن كېيىن بېشىنى كۆتۈرۈپ سۈرلۈك گېنىرالغا قارىدى .   - بولىدۇ ، نەنجىڭگە كەتسەم كېتەي ! - دېدى شىڭ شىسەي ، ئۇنىڭ چىرايى ، خۇددى جېنىنى بىرى سۇغۇرۇپ ئېلىۋاتقاندەك ، تاتىرىپ ۋە پۈرۈشۈپ كەتكەنىدى ، - لېكىن ، ماڭا بىر ئاز ۋاقىت كېرەك ! ئالتە ئاي چامىسىدا بولسا بولىدۇ . مېڭىشتىن بۇرۇن ئۆزۈم بىر تەرەپ قىلمىسام بولمايدىغان مۇھىم ئىشلار بار ...   ئۇنىڭ ئۆزى بىر تەرەپ قىلمىسا بولمايدىغان " مۇھىم ئىشلىرى " نېمىدۇ ؟! يېقىندا " جىددىي يىغىن " چاقىرىپ قولغا ئالغان گومىنداڭ ئۆلكىلىك پىرقىنىڭ كاتىۋاشلىرى بىلەن ئەزالىرىنىڭ ئىشىمىدۇ ؟! يەنە ، شىنجاڭغا ھۆكۈمرانلىق ۋە زوراۋانلىق قىلغان ئون بىر يىلدا ، ئون بەشمىڭدىن ئارتۇق ئادەمنى قولغا ئېلىپ ، يۈزمىڭدىن كۆپرەكىنى ئۆلتۈرۋەتتى . شۇ قولغا ئېلىنغان ، ئۆلتۈرۈلگەن بېگۇناھ تەڭرىتاغلىقلارنىڭ ئىزىنى ئۆچۈرۋەتمەكچىمىدۇ ؟ يا " شىنجاڭ خەلقىنى نېمە دېسەم خوپ ، دەپ تۇرىدىغان قۇللىرىمغا ئايلاندۇرۇشۇم ئۈچۈن ، يۈرىكىنى مۇجۇۋېتىشىم كېرەك " دەپ ۋەھشىيلەرچە قىينىغان ، ھەر خىل دەھشەتلىك ئۇسۇللار بىلەن ئادەم ئۆلتۈرگەن جىنايىتىنى بىلىدىغان قولچۇماقلىرىنى ئۇ ئالەمگە ئۇزاتماقچىمۇ ؟! يا دۇنيادا پۇل بىلەن سېتىۋالغىلى ، ئەڭ دەھشەتلىك قىيىن - قىستاقلار بىلەن ئۆزگەرتكىلى ، شەرمەندە ھىيلە - مىكىر بىلەن ئالداشلار ئارقىلىق بويسۇندۇرغىلى بولمايدىغان نەرسە قەلب ئىكەنلىكىنى بىلمەي (ئەكسىيەتچىلەرغۇ بۇنى بىلمەيدۇ!) ، ئالدى بىلەن شىنجاڭلىقلارنىڭ قولىدىن ئىش كېلىدىغان ، مۇنەۋۋەر ، دانىشمەن ، قابىلىيەتلىك ئوغۇل - قىزلىرىنى ئۆلتۈرۋەتكەن جىنايىتىنىڭ ئارخىپلىرىنى كۆيدۈرۋەتمەكچىمىدۇ ؟! (ئەمەلىيەتتە شىڭ شىسەي يۆتكىلىدىغانلىقى ھەققىدىكى خەۋەرنى ئاڭلاپ كەتكۈچە بولغان ئارىلىقتا ، 300 دىن كۆپ تۈرمە خادىملىرىنى ئۆلتۈرۋەتكەن ، ئارخىپلارنى كۆيدۈرگەن .) شىڭ شىسەي ئوچۇق - ئاشكارىلا ئۆزىنىڭ قىلىۋالغان ، خائىن ، قوزغىلاڭچى ، ئاقچى - كۆكچى دەيدىغان ھەر خىل بەدناملارنى چاپلاپ قولغا ئالغان ۋە ئۆلتۈرگەن تەڭرىتاغلىقلارنىڭ دەپنى - دۇنياسىنى ، بېھىساپ ئالتۇنلىرىنى ، قاشتېشى ، ياقۇت تېشى قاتارلىق قىممەت باھالىق تاشلىرىنى ، بۆكەن ۋە بۇغا مۈڭگۈزلىرىنى ، مېھرىگىياھ ۋە ئىپارلىرىنى ، تاي - تاي گىلەم ۋە باشقا قىممەت باھالىق ماللىرىنى ئىچكىرىگە قانداق يۆتكەپ كېتىش غېمىمۇ ؟!    - جياڭ جېشىدىن سوراپ باقاي ! قوشۇلامدۇ ، يوق ، بىلمەيمەن ! قوشۇلمىسا ، مېنىڭمۇ ئامالىم يوق ! - دېدى جۇشياۋلياڭ " گەپ تۈگىدى " دېگەندەك ئورنىدىن تۇرۇپ .    شىڭ شىسەي چۇڭقۇر بىر ئۇھ تارتىپ ئورنىدىن تۇردى . ئۇ مەيۇس ۋە غەمكىن قىياپەتتە مەركەزنىڭ ۋەكىلىگە قول بېرىپ ، ئۇنىڭ بىلەن خوشلىشىپ ئىشىككە يول ئالدى .    - ئاھ ، تەڭرىم ! مېنىڭ شىنجاڭدىن ئايرىلىشىمنى راۋا كۆردۈڭمۇ ؟ بېشىمغا قونغان بەخت قۇشىنى ئۇچۇرۋېتىدىغان بولدۇڭمۇ ؟! مېنى شىنجاڭدىن ئايرىۋەتكۈچە جېنىمنى ئالساڭ بولمامدۇ ؟! - شىڭ شىسەي خۇددى دۇئا - تىلاۋەت قىلىۋاتقان راھىبنىڭ يىغلاڭغۇ ۋە مۇڭلۇق ئاۋازىدەك چىققان ئۈنى ئىچكىرى ئۆيگە كىرىپ كېتىۋاتقان جۇشياۋلياڭنى ئېختىيارسىز قاراتتى .       مەنبە :   " زۇلپىقار " (3)   رومان . ئاپتورى : مۇھەممەتجان سادىق . شىنجاڭ خەلق نەشرىياتى 2000 -يىل 7 - ئاي 1 - بېسىلىشى ، 1- نەشرى .      ياقتۇرۇپ يوللىغۇچى : ئەبەي تارىم .  2013 - 2- 5 .   شەھىرى شىخو .

nimjan0903

	ھېچنىمە دىگۈم يوق .

awatbag

	تېمايوللىغان قوللىرىڭىزھارمىسۇن قېرىندىشىم،بۇتوڭگۇزنىڭ ئىسمىنى ئاڭلىساملاپۈتۈن ۋۇجۇدۇم غەزەپكەتولىدۇ!!!!!!!!

axek13999649893

	نۇرغۇنلىغان دىىنى ئالملىرىمىزنى يوقاتقان  بۇ        نىمى دىسەم بۇلا

kaisar809

	مۇشۇنداق ياۋۇز، قانخور جاللاتنىڭ ئۆز ئەجىلى بىلەن ئۆلگىنىنى دەيمەن... شۇ زامانلاردا نەنجىڭغا، كېيىن تەيۋەنگە بېرىپ ئۇنى قەستلەپ ئۆلتۈرۈشكە ئۇرۇنغان شىنجاڭلىقلار يوقمىدۇ دەيمەن.

!UYGHURJAN

	‹بىزنىڭ شىنجاڭ ياخشى جاي › يالاڭ كەلگەنلەر ، باي بۇلۇپ قايتىشىدۇ .

ALDIRAX

	خەنلەر بۇ‹‹زاتنى›› ئالدىمىزدا تىللاپ قويغىنى بىلەن ھازىر ‹‹قەھرىمان ›› دەپ قايسى بىر يەردە ئۇنىڭ ھەيكىلىنى تىكلەپ بولدى كىم بىلىدۇ .  ؟ ئىشقىلىپ بۇ گۈنكىدەك ‹‹ خاتىرجەم ، پاراۋان ، ئۆز - ئۆزىمىزگە خوجا بۇلۇپ ›› ياشايدىغان زامانغا كىلىشىمىزدە بۇ ‹‹زات››زور تۆھپە قوشقان .

yasinawut

	مەن يەنىلا سۈكۈتتە تۇرۇپ ، باشقىلارنىڭ ئىنكاسىنى كۆرۈپ باقاي ....

abux

	قېرىنداشلار  ‹‹ زۇلپىقار›› دىگەن روماننىڭ ئۇچۇرىنى بىرىڭلار