تارىخنىڭ بوسۇغىلىرىدا

abaytarim

	تارىخنىڭ بوسۇغىلىرىدا     مەن تارىخقا تولىمۇ ئامراق . چۈنكى ئۇ ماڭا پارلاق ئۆتمۈشىمىزدىنمۇ ، قان - ياشلىق  كۆز - ياشلىرىمىزدىنمۇ ، ئىبرەتلىك ساۋاقلىرىمىزدىنمۇ ، كەلگۈسى تارىخنى يارىتىشىمىزدىنمۇ بىشارەت بېرىپ تۇرىدۇ . تارىخ بەتلىرىنى ھەر كۈنى ۋاراقلاپ تۇرۇش ، ئەڭ كۆڭۈللۈك ھاياتلىق پائالىيەتلىرىمنىڭ بىرى . ئەمما شۇنچە ۋاراقلاپ بېقىپمۇ ئۆزىمىز ياراتقان تارىخنىڭ بوسۇغىسىدىن ئاتلاش ماڭا نېسىپ بولمىغانىدى . شۇنداقتىمۇ تارىخ يارىتىش يولىدىكى ھەسرەتلىك ، تەكرار پاجىئەلىك ئۇرۇنۇشلىرىمىزمۇ قانداقلا بولمىسۇن ، قەلبىمنى سۇغۇرۇپ ، چاڭقاقلىقىمنى بېسىپ كېلىۋاتاتتى ...     تارىخ داۋاملىشىۋاتاتتى . خىيالىم مەڭگۈ تاشلىرىمىز تامان چېپىشقا باشلىدى ...  مەڭگۈ تاشلىرىمىزدىكى ماڭا يادا بولۇپ كەتكەن بۇ قۇرلارنى ئەسلەپ قالدىم . " ئۈستىمىزدىكى كۆك ئاسمان بىلەن ئاستىمىزدىكى قوڭۇر تۇپراق يارىتىلغاندا ، ئىككىسىنىڭ ئارىسىدا ئىنسان بالىسى يارىتىلىپتۇ . ئىنسان بالىسى ئۈستىدە ئاتا - بوۋام بۇمىن قاغان ، ئىستەمى قاغان تەختتە ئولتۇرۇپتۇ ... خاقانى بارلارنى خاقانىدىن ئايرىدۇق ، تىزى بارلارنى تىزلاندۇردۇق ، بېشى بارلارنى باش ئۇردۇردۇق ... " بۇ غالىبلىق تارىخ كىشى قېنىنى قايتا كۈۋەجىتىدۇ ، ئەلۋەتتە . شۇ تاپتا ئۇستاز ، شائىر ئابدۇقادىر جالالىدىننىڭ بۇ شېئىرىي مىسرالىرى تۇيغۇم بىلەن بىرلىشىپ كەتكەنىدى .            تاش دېمە ، باغرىمدا ئاقار ئىسسىق قان ،           شۆھرەتلىك يىللارنى سۆزلىدىم تەكرار .           پۇچۇلۇپ كەتسىمۇ مۇزلىغان جىسمىم ،           قېنىمدىن تۇغۇلار ئەزىمەت ئەنھار .                    تاش دېمە ، ئىبرەتلىك سۆزلىرىم بىلەن ،                    تۇيغۇن كۆڭۈللەرگە سىڭىپ كېتىمەن .                    قىمىرلاپ يۈرۈشكەن مۇردىدىن ئۆتۈپ ،                    جەڭلەرگە ئاتلىنىپ مېڭىپ كېتىمەن .     تارىخ داۋاملىشىۋاتاتتى . ئۇ مەڭگۈ داۋاملىشىدۇ . تالاي سەلتەنەتلىك تارىخلىرىمىز قەلبلىرىمىزدىن چۇڭقۇر ئورۇن ئېلىپ بولغانىدى . ئەللامە زەمەخشەرى ئېيتقاندەك " دۇنيا ئىبرەت بىلەن تولغان ، شۇنداقلا ئىبرەت ئالمىغۇچىلارنىڭ كۆز ياشلىرى بىلەنمۇ تولغان . " ئەلۋەتتە تارىخىمىزمۇ بۇنىڭدىن مۇتەسىنا ئەمەس . ..      تارىخ داۋاملىشىۋاتاتتى . يېڭى - يېڭى شەھەرلەر ئۈزلۈكسىز بارلىققا كەلدى . تارىخ كىتابلىرىنى بەزىدە چاڭ - توزانلارمۇ يۇتۇۋەتكىلى تۇردى . چۈنكى يېڭى - يېڭى تارىخىي كىتابلارمۇ ئاز ئەمەس ئىدى . مەن ناھايىتى قەدىمكى تارىخىمىزغا دائىر كىتابلارنى ئىزلەپ ئاۋارە ئىدىم . ئوقۇغانلىرىمنى ئەتراپىمدىكىلەرگە سۆزلەپ بەرگەنلىرىمدە ئۇلار ماڭا ئىشەنمەيتتى ، مەن ئاشۇ كىتابلارنى دەلىل قىلىپمۇ ئۇلارنى قايىل قىلالمىدىم . ئۆزىنىڭ تارىخىغا ئىشەنمەيدىغانلارغا ئامال قىلالمايۋاتاتتىم . مەن ئۇلارغا مەغلۇبىيەتلىك ، قان - ياشلىق تارىخىمىزنى سۆزلەپ بەرگەندىلا ئۇلار ئىشىنىشتى . خۇددى شانلىق تارىخىمىز بولۇپ باقمىغاندەك ...     تارىخ داۋاملىشىۋاتاتتى . كۆز ئالدىمدىن تارىخىمىزدىكى مىڭلىغان شىر يۈرەك ئەزىمەتلەر ئۆتتى . كۆز ئالدىمغا تارىخىمىزدىكى ئەشۇ ئەزىمەتلەرنىڭ گۆرىنى كولىغان ، ئەزىمەتلىرىمىزنى بىر - بىرىگە سوقۇشتۇرۇپ كۆزىگە توپا توشتۇرغان مەلئۇنلار كەچتى . كۆز ئالدىمغا سىرتتىكى دۈشمەن بىلەن ئېتىشقان ۋاقتىمىزدىن ، ئىچىمىزدىكى دۈشمەن بىلەن ئېتىشىپ ھالىمىزدىن كەتكەن ۋاقىتلىرىمىز كۆپ بولۇپ كەتكەنلىرى كەلدى ...     تارىخ داۋاملىشىۋاتاتتى . مەن يەنىلا تارىخ بەتلىرىنى ۋاراقلاۋاتاتتىم . قانچىلىك ۋاراقلىغىنىمنى ئۆزۈممۇ بىلمەيمەن . تۇپراق ئاستىغا كىرىپ كەتكەنلەرنىلا تارىخقا ئايلاندى دەپ تونۇپ كەلگەنلىكىمدىن خىجىل بولدۇم ، تېخىچە ھەقىقى تارىخنى چۈشەنمەي كېلىۋېتىپتىمەن . چۈنكى مەنمۇ ئاللىقاچان تارىخقا ئايلىنىپ بوپتىمەن ئەمەسمۇ ؟ ئوخشىمايدىغىنى " تىرىك تۇرۇپ تارىخ " قا ئايلىنىش ، تۇپراق ئاستىغا كىرىپ كەتمىگەنلىكىم ، تىرىك مۇردا ئىكەنلىكىم ،  باشقىلار ئاللىقاچان مېنىڭ تارىخىمنى يېزىپ بوپتۇ . مېنىڭ پەقەت ئۆلۈپلا كېتىش ۋەزىپەملا قاپتۇ ، مەن پەقەت تارىخنىڭ بوسۇغىسىدا ئارتۇقچە تىرەجەۋېتىپتىمەن ... بوسۇغىدىن ئاتلاشتىن خىجىل بولۇۋاتاتتىم . چۈنكى مېنىڭ تارىخىم ئۈن - تىنسىز ، تەرىپلىگۈدەك ھېچنىمە يوق تارىخ ئىدى . پۈتكۈل ھاياتىمدا بىرەر قېتىم پىداكارلىق يولىدا تىرنىقىممۇ زەخمىلىنىپ باقمىغانىدى ...       مەنبە : ئۆزۈم .    2013-1-30 .   ئەبەي تارىم .    شەھىرى شىخو .     ئەزىمەت ۋە ئۆلمەس تارىخنى ئېسىڭدىن چىقارمىغىن ، ئۇنىڭ ئالدىدا جاھالەت ئاتامانلىرى نامازشام پاشىلىرىدىن ئىبارەت ، خالاس .        _ ئابدۇشۈكۈر مۇھەممەتئىمىن .