يوللار سۆزلەيدۇ ...

abaytarim

	يوللار سۆزلەيدۇ      يوللار سۆزلىمەكتە . مېنىڭ قىسسەلەرنى سۆزلەپ كېلىۋاتقىنىغا قانچىلىك ۋاقىت كالىندارلىرىنىڭ يېرتىلىپ تۈگىگەنلىكىنى ھىچكىم بىلمەيدۇ . يوللار قان - ياشلىق قىسمەتلەرگىمۇ ، شەرەپلىك ھىممەتلەرگىمۇ تويۇنغان . بىز يولغا چىقىپ كەتكەنلەردىن بىر تەرەپتىن ئەنسىرىسەك ، بىر تەرەپتىن ئىپتىخارلىنىمىز . ئۆمۈر بويى يولغا چىقىپ باقماي مەڭگۈ قايتقىلى بولمايدىغان ئاخىرقى سەپەرگە ئاتلىنىپ كېتىش كىشى تېنىنى شۈركەندۈرىدۇ ....       يوللار سۆزلىمەكتە .يوللار يىلسېرى راۋانلىشىپ كەتتى . ئىشلار بارغانسېرى يۈرۈشۈپ كەتتى . مەنزىللىرىمىزگە يېتىش شۇنچىلىك ئاسان . شۇنداقتىمۇ تالاي يولىمىزغا قارايدىغانلارنى مۇشۇ راۋان يوللاردا يولىمىزغا قارىتىپ قويىدىغان ئىشلىرىمىزمۇ يوق ئەمەس . يول شۇنداق دېدى : ھەممە گۇنا ئۆزۈڭدە ، سەن مېنى ھەقىقىي چۈشىنىشتىن خېلى يىراقتىسەن . مېنى چۈشەنگەنلەر ئاللىقاچان مەنزىلىگە يېتىپ بولدى ...     يوللار سۆزلىمەكتە . مەن مېڭىپ تۇرغانلارنى ، مېنى چۈشەنگەنلەرنى ھېچقاچان نائۈمىد قويۇپ باقمىدىم . ئەمما تۈپتۈز يولدا نىشانىنى توغرىلىماي ماڭغانلارنى ۋاقتىدا تازىلاپ تۇرىمەن . مىغىلداپ يۈرگەن كىشىلەر ئىچىدە نۇرغۇنلىرى مېنى دەسسەپ تۇرۇپ ئىزدەشمەكتە . مەن بەزىلەرنىڭ ئالىقىنىدا بولسام ، بەزىلەرنىڭ يانچۇقىدا ، يەنە بەزىلەرگە ھەرقاچان قويۇق تۇمانلىق ، بوران - چاپقۇنلۇق ، ئەگرى - بۈگرىمەن ، يەنە بەزىلەرگە شۇنداق ئاسان يەتكىلى بولىدىغان پارلاق مەنزىلمەن ...      يوللار سۆزلىمەكتە . مېنىڭ ئۈستۈمدە ھەممە تائىپىدىكى ئىنسانلار مېڭىپ ئۆز مەقسەتلىرىگە يەتمەكتە . بۇلار ئارىسىدا بىر - بىرىنى يولغا چىقارماسلىق ، يول بەرمەسلىك ئۈچۈن مېڭىۋاتقانلارمۇ ئاز ئەمەس . مەن راۋان ئەمەس يىللاردا مەن توغرىلىق ئاجايىپ قىسسەلەر ، ناخشىلار ، قوشاقلار توقۇلغان ، ئابىدىلەرمۇ تىكلەنگەن . ھازىرقى ئەۋلادلار بۇلاردىن قانچىلىك خەۋەرداردۇ ؟...     يوللار سۆزلىمەكتە . ئەي ئىنسانلار مېنى سەل چاغلىماڭلار ! مېنىڭ يۆنىلىشىمنىڭ ئۆزگىرىشى ناھايىتى زور تەرەققىياتتىن ، ياكى ئارقىدا قېلىشتىن دېرەك بېرىدۇ . قان - ياشلىق ھەسرەتلىك كەلگۈسىدىن ، مەڭگۈ ئەسلىنىپلا ئۆتىلىدىغان شانلىق پارلاق مەدەنىيەتتىىنمۇ دېرەك بېرىدۇ . ئۇنداقمۇ ئۈمىدسىزلەنمەڭلار ! مېنى يەنىلا ئىنسانلار ئاپىرىدە قىلغان ئەمەسمۇ ؟...     يوللار سۆزلىمەكتە . مەن ياسىلىۋاتىمەن . تۈزىلىۋاتىمەن ، ئۇزىراۋاتىمەن . ئەمما ئىنسانلارنىڭ ماڭىدىغان مۇساپىسى مەندىن كۆپ ھالقىپ كەتكەن . ئۇلار مېنى بېسىپ بولالماي ھارماقتا . تېخى يولغا چىقالمىغان ئۇزۇنراق مۇساپىنى بېسىپ باقمايلا ئارماندا قالغان قانچە ئىنسانلار باردۇ - ھە!..     يوللار سۆزلىمەكتە . پالانچى يول تېپىپ كېتىپتۇ - ھە ؟ بىز چوڭ يولدا يۈرگەندە ئۇ تېخى چېغىر يولغىمۇ چىقالمىغان . بەزىدە ھەممە ئادەم بىرلا يۆنىلىشىمگە قىستىلىۋالسا ، بەزىدە تەۋەككۈلچىرەك بېرەرسى شۇنچىۋالا ئادەمنىڭ ئوتتۇرىسىدىن ھېچكىمنى قىستىماي ، ھېچكىمگە دەخلى قىلماي يېڭى بىر يولنى ئېچىپ كېتىۋېرەتتى . بەزىلىرى يەنىلا ئۆزىنىڭ شۇنچە ئۇزۇن يىللار يول ماڭغانلىقىدىنلا ماختىناتتى ...      يوللار سۆزلىمەكتە . مەندە تالاي ئوت يۈرەك ، باتۇر ئەزىمەتلەر بىرلا قېتىملا مېڭىپ باققان ، ئەمما مەن ئۇلارنى پەقەت ئۇنتۇيالمىدىم . مەندە تالاي ئىختىراچىلار ماڭغان . ئۇلارمۇ ئېسىمدە . مەندە يەنە ئاجايىپ جەسۇر جەڭچىلىرىمىز ماڭغان ، ئۇلارمۇ ئېسىمدە . مەندە تالاي قات - قېتىمنى ئېچىپ ئىلگىرلىگۈچىلەر ماڭغان . ئۇلارنى قانداقمۇ ، ئۇنتۇي . مەندە يەنە شۇنداقمۇ ئىنسانلار مېڭىپ ، ئەشۇلارنىڭ ھايات شامىنى ۋاقىتسىز ئۆچۈرۈپ تاشلىغان . مەن ئۇلارنى ئۇنتۇيالماي ئاۋارە ... ھەي ! ئۇنتۇپ كېتىش سېنىڭ بۇنچىۋالا سۆيۈملۈك ئىكەنلىكىڭنى قارا ... ھەسرىتا ...     يوللار سۆزلىمەكتە . مەندە بوۋاڭلار ماڭغان ، مەندە بوۋاڭلارنىڭ بوۋىسى ماڭغان . بوۋاڭلارنىڭ ناھايىتىمۇ بۇرۇنقى بوۋىسى تۇنجى ئىز سېلىپ مېنى ھاسىل قىلىپ بەلگە سالغان . مەندە ھېكمەت بار ، مەندە قىممەت بار ، مەندە خىسلەت بار ، مەندە جاراڭلىق ، ئۈزۈلمەس كولدۇرما بار . قۇلىقىڭلارنى زامانىۋى قاتناش ، ئۇچۇر ۋاستىلىرىنىڭ ساداسى قانچە بېسىۋالسىمۇ ، دىققەت قىلىپ يۈرىكىڭلارنى تىڭشىساڭلار مېنىڭ چىقىرىقىمنى ئاڭلىيالايسىلەر ، كۆزۈڭلار ئىچىدە كۆز بولسۇن ، بوۋاڭلارنىڭ ئىزىنى كۆرەلەيدىغان . پۈتۈن دۇنيا تورلاشسىمۇ كۆزۈڭلار تورلاشمىسۇن ...  يوللارنىڭ گېپى تۈگەيدىغاندەك قىلمايتتى...       مەنبە : ئۆز قەلىمىم .  سەپەر ھاسىلاتلىرىم .   ئەبەي تارىم . 2013- 1- 16 . شەھىرى شىخو .       يوللار - تارىخ ،  يوللار - تەھرىر ،  يوللار - زەرداستان .   ئابدۇشۈكۈر مۇھەممەتئىمىن .

ئىپارە

	يوللار -بىزگە ئەڭ سۈيۈملۈك ئابىدىلەرنى قالدۇرغۇسى!ئامىن! ياخشى يىزىپسىز، تىخىمۇ تىرىشىڭ.

abdulahad

	يول...............................................

ANSWER

	يوللار سۆزلەيدۇ ، يامان يولنىڭ سۆزى ھەتتا گاچىنىڭمۇ قۇلىقىغا كىرىپ شۇ يوللارغا راۋان بولىدۇ ، نۇرانە ، ھىدايەتلىك يوللار ۋە تەۋبە يوللىرىدا قەدەملەرنىڭ ئىزى ئاللىبۇرۇن ئۆچكەن بىراۋ ماڭمىغىلى نۇرغۇن زامان بولۇپ كەتكەن . . . . بۇ ئازغۇن جەمىيەت ، گۇمراھ ئىنسانلار قاچان ئەقلىنى تاپار ؟!

Gulxat08

	ھاياتلىق بىر سەپەر،سەپەر دىمەك يول دىمەكتۇر،بۇ يول شۇنداق بىر يولكى:-ئازاپلىق يىغىلار،تاتلىق كۈلكىلەر،بەخىت ئامەت ۋەئوڭۇشسىزلىق ئېلىمتلىرىدىن تەركىپ تاپقان ،ئەگر-توقايلىق زىچ گىرەلەشكەن بىر سناق مەيدانى. لىكىن بۇ يولدىكى كارۋانلارنىڭ ئاخرقى بېكىتى پەقەت بىرلا................................................... ئەسرىڭىز شۇنچىلىك ياخشى يېزىلىپتۇ،ئەجرىڭىزگە تەشەككۈر!

xiho

	دوستۇم تېماڭ ناھايىتى ئىسىل چىقىپتۇ-بارىكاللا! ئۇلۇغ اللە ھەممىزنى توغرا يول ئۈستىدە قىلغاي ئامىن .

kadam1

	ھەر كىمنىڭ،ھاياتلىق مۇساپىسىدە، قانداق قەدەملەرنى باسقانلىقىغا،ماڭغان يوللىرى گۇۋا بولالايدۇ.                                                              ھەممىگە قادىر ئاللا يوللىرىمىزنى راۋان قىلغاي ئامىن.

kadam1

	ھاياتلىقتىكى ياخشى-يامان قەدەملىرىمىزگە،ماڭغان ‹يوللىرىمىز›گۇۋا بولالايدۇ.         ھەممىگە قادىر اللە يوللىرىمىز راۋان قىلغاي ئامىن

naznigar

	مۇئەللىم قەلىمىڭىز بەك ئۆتكۈركەن