سۆيگۈ قەسىرى

bahwanbiz

	سۆيگۈ قەسىرى شىلدىرلاپ شاماللار بارقلىرىمدا ، غەپلەتنىڭ قوينىدىن سەگىتەر مېنى. سايەمگە پۇتلاشقان بىر پۇچۇق كوزا، ئەجداتلار تىلىدا سۆزلىتەر مېنى. قەدەملەر چىشىغا چۈشكەندە قۇرۇت، پۇچۇق تام يوللارغا يازار ۋەسىيەت. شەيتانلار رەستىگە بولسا ھۆكۈمران ، مېغىزنىڭ رولى يوق شاكىلى قىممەت . چىغىر يول تىللىرى سۆزلىسە تارىخ ، يالپۇزلار تۆكىدۇ بېھۇدە كۆز -ياش  . پەسىللەر قوللىرى چۈشسە قىمارغا، يوقسۇللۇق ئەۋلاتنى ئۇرغۇزىدۇ باش. تاملارنىڭ كەينىدە يۇشۇرۇن شەھەر ، سىقماقتا بۇلۇڭلار گىرادۇسىنى. ئەخلەتلەر ئازگىلى يۇتماقتا ئەنە، بىخلانغان ئەۋلاتلار ئېرادىسىنى. مازاردىن ياخشىلىق ئىزدىگەن ئانام ، يوللارغا بىر ئۆمۈر سالدى ئىسىرىق. بەك غېرىپ مۇڭلاندى بۇۋام سۆڭىكى ئەي تەقدىر ، چاخچىقىڭ  ئەمەسكەن سىلىق. ناخشامنىڭ بۈرجىكى ئالغاندا نەپەس ، چاپلاشتى چىۋىنلەر دىماقلىرىمغا. سېغىنىپ مەرىسەم يايلاقلىرىمنى، قاسساپلار ئەن سالدى قۇلاقلىرىمغا. قۇياشنى تۇغقاندا تۇمارىس ئانام ، ئوغۇزنىڭ بۆرىسى كەلدى سەجدىگە. مىڭ ئەسىر خاتىرجەم سايىداش ئۈچۈن، چىن تۆمۈر چىقىدۇ بۈگۈن سەيلىگە. رىزۋانگۈل قېرىسا چۈشمەس ھاسىغا، ئەتتىرگە ئايلىنىپ تۇرسا تىنىقى. ۋەتەنگە ئايلانسا غۇرۇر ۋە ئىپپەت، خاتىرجەم ئېچىلار سىڭلىم زىنىقى . ئا.خالىق 《 ئويغان > دەپ بەرمەس ئىدى جان، يات نىيەت چىقمىسا قوۋۇرغىمىزدىن . يەنە نى ئوغلانلار كېتەر قان قوسۇپ، رازى بوپ ياشىساق ئىمىزگىمىزدىن. رىۋايەت رىزقىنى قىلىپ خام -خىيال، كۈندۈزدىن زېرىكىپ بولدۇق شەپەرەڭ. مۇقەددەس ئېتىقاد بولسىمۇ زەرەت، ھالىمىز نە ئۈچۈن دائىم زەپرەڭ ؟ سادىرنىڭ قەبرىسى مۇڭلاندى ئەجەپ، ئەجدادنى تونىماس شالغۇت نەۋرىسى. ئالقانغا تەۋۋەككۈل سىزىپ خەرىتە، بىر توختام ئېقىننىڭ توشتى سەبرىسى. باغلارنىڭ پۇرىقى چاڭلاشتى جىمجىت، كۆك پىتلار يامرىدى قوۋزىقىمىزغا. ئەركەكلىك تۈكىنىڭ يۇمشاقلىقىدىن، مىتىلەر چاڭ سالدى ئوزىقىمىزغا. مەھمۇدنىڭ لوغىتى ھەققىدە ئويلاپ، بالامنى ياندۇرۇپ كېتەي كەينىگە. كىملىكىم سۈيىگە چىلاي بالامنى، بوسوغام قۇرۇيدۇ قويسام مەيلىگە. يۈسۈپنىڭ داستانى مۇڭلىنار ئېغىر، ئەبجەش تىل روھىمنى قىلدى شاكاراپ. دەرۋىشلىك  بابىدا ئېلىپ دىپولۇم ، ھەقىقەت ئوردىنى كېلىمەن تاقاپ. كىتابلار تاختىغا تىزىلدى پەقەت ، رومكىلار بازىرى چىقتى ئەۋجىگە. بىخۇتلۇق ئىلكىدە بېرەمدۇ جاۋاب، ئەۋلاتلار ئەتە يا ئۈگۈن قەۋمىگە؟ ناخشىلار ياڭرىسا يۈرەك ياشىرار، شىلدىرلاپ سۇلارنىڭ ئاققىنى ياخشى. كېرەكسىز ئوقىدا سېسىتار باغنى، بۇلۇڭدا مۈكچىيىپ رودىپاي باخشى. بارىنىڭ قەدرىنى قىلمىغاچ بۈگۈن، تارىمىز پەدىگە دەسسىدى قىڭغىر. خەلقىمنىڭ روھىدا كۆكلىيەلمىگەن، چولپانلار پەقەتلا قىلىدۇ جىمىر. تاشلاردىن خۇشاللىق ئىزدىمەي پەقەت ، ئېتىقاد ئېرىقى ئاقسۇن شىلدىرلاپ. تەرىمىز قالدۇرسۇن يىلتىزغا ئوزۇق، ئەۋلادلار بەختلىك ئۈنسۈن شىۋىرلاپ. ئا. مۇھەممەت باغۋەن شېئىرى

1kilixkan

	ئاللا رەھمەت قىلسۇن قېرىندىشىم .مۇشۇنداق تىمىلىرىڭىزنى ئايىمغايسىز....

يولتۇز

	ئىىسل شىئېركەن ئىسىل رەھمەت

كارۋان

	تېتىملىق ئەسەردىن يەنە بىرنى ئوقىدىم.

Gulxat08

	بۇلدۇقلاپ چاچرىغان فونتان بۇلاقتەك، قاينىدى بىر ئىلھام دىلدا ھاياجان، قەلەملەر تىترىدى سۈكۈت باغاشلاپ، ئاق قەغەز تۈس ئالغاچ بولۇپ تەلەپچان. ئات سېلىپ مېڭىپتۇ زەپەردەست ئوغلان، تىنىقى ئوت پۈركۈپ تۇغلىرى جەۋلان، ئۈمۈدى نۇرانە  پىكىرلەر ئويغاق، بولغۇسى بىز ئۈچۈن ھاتىمى پەلۋان. ھارمىغىن ساڭا قۇت بولسۇن مەڭگۈ يار، يامان كۆز ئەبەدى قىلالمىسۇن كار، سۇنغۇنىڭ كەۋسىرى زەم-زەم بۇلاقتىن، تەشنالىق خەلقىڭدە بولۇپ كەتسۇن خار.

bahwanbiz

	Gulxat08 يوللىغان ۋاقتى  2013-1-15 03:02 PM بۇلدۇقلاپ چاچرىغان فونتان بۇلاقتەك، قاينىدى بىر ئىلھا ... ھەجەپ تېتىملىق لىرىكىدىن بىر كەلتۈررۈپسىز ، قەلىمىڭىز كۈچلۈككەن ، قېرىندىشىم ، ھارماڭ ، مەڭگۈ مۇشۇنداق يېزىپ تۇرۇڭ

Gulxat08

	bahwanbiz يوللىغان ۋاقتى  2013-1-15 07:16 PM ھەجەپ تېتىملىق لىرىكىدىن بىر كەلتۈررۈپسىز ، قەلىمىڭى ... ئىلھام بەرگىنىڭىزگە رەھمەت!