سۆيگۈ قەسىرى
شىلدىرلاپ شاماللار بارقلىرىمدا ،
غەپلەتنىڭ قوينىدىن سەگىتەر مېنى.
سايەمگە پۇتلاشقان بىر پۇچۇق كوزا،
ئەجداتلار تىلىدا سۆزلىتەر مېنى.
قەدەملەر چىشىغا چۈشكەندە قۇرۇت،
پۇچۇق تام يوللارغا يازار ۋەسىيەت.
شەيتانلار رەستىگە بولسا ھۆكۈمران ،
مېغىزنىڭ رولى يوق شاكىلى قىممەت .
چىغىر يول تىللىرى سۆزلىسە تارىخ ،
يالپۇزلار تۆكىدۇ بېھۇدە كۆز -ياش .
پەسىللەر قوللىرى چۈشسە قىمارغا،
يوقسۇللۇق ئەۋلاتنى ئۇرغۇزىدۇ باش.
تاملارنىڭ كەينىدە يۇشۇرۇن شەھەر ،
سىقماقتا بۇلۇڭلار گىرادۇسىنى.
ئەخلەتلەر ئازگىلى يۇتماقتا ئەنە،
بىخلانغان ئەۋلاتلار ئېرادىسىنى.
مازاردىن ياخشىلىق ئىزدىگەن ئانام ،
يوللارغا بىر ئۆمۈر سالدى ئىسىرىق.
بەك غېرىپ مۇڭلاندى بۇۋام سۆڭىكى
ئەي تەقدىر ، چاخچىقىڭ ئەمەسكەن سىلىق.
ناخشامنىڭ بۈرجىكى ئالغاندا نەپەس ،
چاپلاشتى چىۋىنلەر دىماقلىرىمغا.
سېغىنىپ مەرىسەم يايلاقلىرىمنى،
قاسساپلار ئەن سالدى قۇلاقلىرىمغا.
قۇياشنى تۇغقاندا تۇمارىس ئانام ،
ئوغۇزنىڭ بۆرىسى كەلدى سەجدىگە.
مىڭ ئەسىر خاتىرجەم سايىداش ئۈچۈن،
چىن تۆمۈر چىقىدۇ بۈگۈن سەيلىگە.
رىزۋانگۈل قېرىسا چۈشمەس ھاسىغا،
ئەتتىرگە ئايلىنىپ تۇرسا تىنىقى.
ۋەتەنگە ئايلانسا غۇرۇر ۋە ئىپپەت،
خاتىرجەم ئېچىلار سىڭلىم زىنىقى .
ئا.خالىق 《 ئويغان > دەپ بەرمەس ئىدى جان،
يات نىيەت چىقمىسا قوۋۇرغىمىزدىن .
يەنە نى ئوغلانلار كېتەر قان قوسۇپ،
رازى بوپ ياشىساق ئىمىزگىمىزدىن.
رىۋايەت رىزقىنى قىلىپ خام -خىيال،
كۈندۈزدىن زېرىكىپ بولدۇق شەپەرەڭ.
مۇقەددەس ئېتىقاد بولسىمۇ زەرەت،
ھالىمىز نە ئۈچۈن دائىم زەپرەڭ ؟
سادىرنىڭ قەبرىسى مۇڭلاندى ئەجەپ،
ئەجدادنى تونىماس شالغۇت نەۋرىسى.
ئالقانغا تەۋۋەككۈل سىزىپ خەرىتە،
بىر توختام ئېقىننىڭ توشتى سەبرىسى.
باغلارنىڭ پۇرىقى چاڭلاشتى جىمجىت،
كۆك پىتلار يامرىدى قوۋزىقىمىزغا.
ئەركەكلىك تۈكىنىڭ يۇمشاقلىقىدىن،
مىتىلەر چاڭ سالدى ئوزىقىمىزغا.
مەھمۇدنىڭ لوغىتى ھەققىدە ئويلاپ،
بالامنى ياندۇرۇپ كېتەي كەينىگە.
كىملىكىم سۈيىگە چىلاي بالامنى،
بوسوغام قۇرۇيدۇ قويسام مەيلىگە.
يۈسۈپنىڭ داستانى مۇڭلىنار ئېغىر،
ئەبجەش تىل روھىمنى قىلدى شاكاراپ.
دەرۋىشلىك بابىدا ئېلىپ دىپولۇم ،
ھەقىقەت ئوردىنى كېلىمەن تاقاپ.
كىتابلار تاختىغا تىزىلدى پەقەت ،
رومكىلار بازىرى چىقتى ئەۋجىگە.
بىخۇتلۇق ئىلكىدە بېرەمدۇ جاۋاب،
ئەۋلاتلار ئەتە يا ئۈگۈن قەۋمىگە؟
ناخشىلار ياڭرىسا يۈرەك ياشىرار،
شىلدىرلاپ سۇلارنىڭ ئاققىنى ياخشى.
كېرەكسىز ئوقىدا سېسىتار باغنى،
بۇلۇڭدا مۈكچىيىپ رودىپاي باخشى.
بارىنىڭ قەدرىنى قىلمىغاچ بۈگۈن،
تارىمىز پەدىگە دەسسىدى قىڭغىر.
خەلقىمنىڭ روھىدا كۆكلىيەلمىگەن،
چولپانلار پەقەتلا قىلىدۇ جىمىر.
تاشلاردىن خۇشاللىق ئىزدىمەي پەقەت ،
ئېتىقاد ئېرىقى ئاقسۇن شىلدىرلاپ.
تەرىمىز قالدۇرسۇن يىلتىزغا ئوزۇق،
ئەۋلادلار بەختلىك ئۈنسۈن شىۋىرلاپ.
ئا. مۇھەممەت باغۋەن شېئىرى
بۇ يازمىنى ئاخىرىدا bahwanbiz تەھرىرلىگەن. ۋاقتى 2013-1-15 12:50 AM