ئۈنسىز چۇقانلار

abaytarim

	ئۈنسىز چۇقانلار      جىم يۈرسەم مېنى  "ئۈنسىز ئىنسان " دەپ مەسخىرە قىلدىڭ ، بىلەمسەن ئورۇنسىز ئاۋازلىق چۇقاندىن ئۈنسىز چۇقاننىڭ كۈچىنى سەل چاغلاشقىمۇ بولمايدىغانلىقىنى مەن خېلى چۈشىنىپ قالدىم . بىر كۈنلەردە سەنمۇ چۈشىنىپ قالارسەن . قانچىلىغان ئىنسانلار ئۈنسىز چۇقان ئىچىدە ياشاۋاتقاندۇ ، - ھە!...      مەن ئۇزۇن يىل ناھايىتى دەبدەبىلىك چۇقانلارنى ياسىغان ، توۋلىغان ، ئۈنسىز چۇقانچىلارنى مەسخىرە قىلغان بىرىنى بىلەتتىم ، ئۇنىڭدىن پەخىرلىنەتتىم . ئەمما ئۇ تازا ھەقىقي چۇقان سالىدىغان ئەڭ ھالقىلىق پەيت كەلگەندە ھەممە ئادەم قىلالايدىغان " ئۈنسىز چۇقان " سېلىشقىمۇ يارىمىغانىدى . مەن ئۇنىڭ ئۈنسىز چۇقان سالغاندىكى ھالىتىنىمۇ كۆرەلمىدىم . چۈنكى ئۇ ئاللىقاچان مەيداندىن ئايرىلغانىدى ....     ھاياتلىق چۇقانغا تولغان . چۇقانسىز ھاياتلىق ئۆز رېتىمىنى يۇقىتىدۇ ، ئەلۋەتتە . بىز تالاي يىللار ئاجايىپ چۇقانلارنى باشتىن ئۆتكۈزۈپتۇق . مانا ھازىر جەڭگىۋار چۇقانلارنى توۋلىغان چاغلىرىمىزنى ئەسلەپ ھوزۇرلىنىدىغان بولۇپ كەتتۇق . چۇقانلار تېشىمىزدىن ئىچىمىزگە كۆچۈپ كەتتى ، بىز ئۇنى ئىزدەپ ئاۋارە ...     چۇقانلار توختىماي كۆچمەكتە . ئۆز ۋەزنىنى توختىماي ئۆزگەرتمەكتە . قەلبلەرگە مەڭگۈ ئورۇنلاشقان چۇقانلار ئازلىماقتا . مېنى شۇنداق بىر چۇقان - سۈرەنلەر قەيەرلەرگىدۇر سۆرىمەكتە . مەن ئەگەشمەيمەن دەيمەنۇ ، ئەمما ئاللىقاچان ئەگىشىپ يېڭى - يېڭى چۇقانلار ئىچىدە تەمتىرەيمەن ...    مەن ئاخىرى تېلىفۇنىمنى ئېتىۋەتتىم ، كومپىيوتېرىمنى ، قۇلاقلىرىمنى ئېتىۋالدىم . چۇقانلارنى ئاڭلىماسقا ئۇقماسقا سېلىۋالدىم . كىم بىلسۇن ئاللىقاچان چۇقانلارغا تولۇپ كەتكەن ، چۇقانلارنى ئاڭلىمىسا ئارامى بۇزۇلىدىغان ، ئىلگىرى ناھايىتى كۆپ قاچىلىنىپ كەتكەن چۇقانلار يەنە ئارامىمىنى بۇزدى . قانداقلا بولمىسۇن مېڭەمنىڭ ئازراق ئارام ئالغانلىقىنى يۇشۇرالمايمەن . قۇلىقىمغا شۇنداق يېقىملىق ئۈنسىز چۇقان تۇيدۇرماي ئېقىپ كىردى . " قۇلىقىڭنى تارت " ... ( ئابدۇشۈكۈر مۇھەممەتئىمىن سۆزى )      تۇرۇپلا ئەخمەقلەرچە توك يوق چاغلارنى ئەسلەپ ، قەلبلەرنى مەڭگۈ لەرزىگە سالالايدىغان چۇقانلارنى ئاڭلىغان چاغلارنى ئەسلەپ قالدىم .  چۈنكى مېنىڭ ئاڭلاۋاتقان چۇقان - سۈرەنلىرىمنىڭ كۆپلۈكىگە ئېسىمدە قالغانلىرى تولىمۇ ئاز ئىدى . ھەر خىل زامانىۋىي ، ئىلغار چۇقانلارنى ئاڭلىغىنىمدا ئازابلىناتتىم . چۈنكى شۇنچىۋالا تەرەققىيات چۇقانلىرىنىڭ ئاڭلىغۇچىسىلا بولۇپ كەلگەنلىكىم ، ياراتقۇچىسى بولۇپ باقماي ئۆتۈپ كېتىۋاتقان ئۆمرۈم مېنى تەگسىز سۇئاللار قاينىمىغا تاشلىماقتا ... توك يوق چاغلاردا بەك نوچىمىكەنمىز - تاڭ..     مەن چۇقانلارنىڭ ئەڭ ئاكتىپ ئاڭلىغۇچىسى ، تارقاتقۇچىسى ، قىزغىن خېرىدارى بولۇپ كەپتىمەن . ئەشۇ چۇقان - سۈرەنلەر رېئاللىققا ئايلانغاندا ئۈستى - ئۈستىلەپ قەرزدار بولۇپ ياشاپ كەپتىمەن . مەن چۇقانلارنىڭ يېڭىلىنىشىغا يېتىشەلمەيلا كېلىۋېتىپتىمەن . ھەم بۇلارنى تاللاپ قۇبۇل قىلىشتىمۇ كۆپ كېچىكىپتىمەن . مەن ئۇنى تاللاپ بولغىچە ئۇ ئاللىقاچان مېنى تاللاپ بوپتۇ . تۇيدۇرۇلماي تاللىنىپ كېتىشمۇ ، مېنىڭ قىسمىتىم بولۇپ كەپتۇ . ھەي ...    مەنمۇ چۇقان سېلىشنى ئويلاپ قالدىم . ئەمما ھېچ ئىش قىلماي چۇقان سېلىشمۇ ئاسان ئەمەس ئىكەن . چۇقانمۇ ئەمەلىي ھەرىكەتتىن ، ئەجر - ئەمگەكتىن ، ھاياتىي كۈچىنى يوقاتمىغان ئىجادىيەتتىن كېلىدىكەن ، ئەمەسمۇ ؟! ئىلگىرى كىچىك ئىشلىرى ئۈچۈن ئانچە - مۇنچە چۇقان سالغانلارنى زاڭلىق قىلغانلىقىمدىن  خىجىل بولدۇم ...     مەن يەنىلا چۇقان سېلىشنى ئويلىدىم . مەۋجۇتلۇقىمنى بىلدۈرمەكچى بولدۇم . ئەمما قايسى ئىشلىرىمغا چۇقان سالاي . مەن شۇنداق ئويلاپ بولغىچە نۇرغۇنلىغان چۇقانلار مېنى مەسخىرە قىلماقتا . مەن يەنىلا چۇقان سالىمەن ، بىراق ئۇ " ئۈنسىز چۇقان " ... ئۇنى پەقەت ئۈزۈملا ئاڭلىيالايمەن . ھەي ! ئۈنسىز چۇقان !!!..          مەنبە :  ئۆزۈم .  ئۈنسىز چۇقانلىرىم .   2013 -يىل 1- 5-كۈنى .

kawa

	ئادەمنى چۇڭقۇر ئويغا سىلىپ قۇيىدىكەن.

othor

	ئۈمسىز چۇقانلارنىڭ  پەيتى بار  ...  چوقۇم  ئۈنلۈك توۋلايمىز  ، ھامان بىر كۈنى  ......

ئايچىن

	ئۈنسىز چۇقانلار كىشى قەلبىنىڭ جاراڭلىق نىداسى .... ، كىشىنى ئويلاندۇرىدىكەن..

umut47

	سەۋىرنىڭ تىگى ئالتۇن ................

kadam1

	چوقان سالماقچى بولدۇم.لېكىن سالالمايمەن.چوقان سالماسلىققا بانايىم كوپ ئويەم بار،بالام كالام...........!