ئەرەپنىڭ غورۇرى –<<ئەرەپ مۇنارى>>!
قاراخان
ھەزرىتى ئەلىنىڭ قىلىچىمۇ ئۇ،
ئەرەپ چۆلىدە يالتىراپ تۇرغان.
ئەلمەكتۇم خەلىپە* كىرىچىمىدۇ؟ ،
ھەسەتخور كۆزىگە قادىلىپ تۇرغان.
يا تەڭرى ئەقىلگە سۇنغان مۆجىزە،
پەلەكتە يۈكسەكلىك تالىشىپ تۇرغان.
يا كەڭرى زېمىنگە ئارمان ئەقىدە .
يۈرەككە ئەستىلىك تارىتىپ تۇرغان .
يەر -كۆكنى مەست قىلدى <<ئەرەپ ئەپسۇنى>>،
ئەنقادەك بىر يەلكەن بوشلۇقنى قۇچۇپ.
ئومماننى ئويغاتتى <<ئەرەپ ئەزىنى>>،
ئەجنەبى<< ئۇۋىسى>> كەتتى چۈگۈلۈپ.
يەمەندىن - يەسرىپكە،ئەرمەن -ئەجەمـگە،
يوللاندى تەسىرلىك نۇسرەت ئۇچۇرى.
پاناما،توكيو ھەم لوندۇن ھەرەمگە،
ئۇلاندى ئەسىرلىك دوستلۇق تومۇرى.
يەتتە ئىقلىم ،كۆردى سەككىز مۆجىزە،
قايرىلدى زەپ ئەھلى سەلىپ* بېلىمۇ.
چالدى ئەرەپ يېشىل قۇمدا سەلىقە،
مۇشرىكلارنىڭ چىقتى بىردىن جېنىمۇ.
ئەرەپ ئېتى مىنگەن ئاشۇ بەدەۋى ،
غەۋۋاس بۈگۈن سۈزدى سەدەپ دېڭىزدىن.
قىززىق قۇمدا قۇياش، ئايغا ئەبەدى،
جۆر بولماققا ئورۇن ئالدى ئىگىزدىن.
ئەلەمدارنىڭ ئەرشتىكى چۈشىمۇ،
ئىزلىرىدىن يولۋاس قالدى داڭ قېتىپ.
‹‹شاھ››قا سادىق سۇلتان* دىگەن كىشىمۇ،
كىرپىك قاقماي كەتتى نەچچە تاڭ ئېتىپ.
دىدى:<< تاغدەك ياكى دەجلە -فراتتەك،
رىسقىڭ تۈگەر نەپسى-بالا ئالدىدا>>.
نېفىتمۇ ھەم تۈگەر پۇل -مال -بىساتتەك،
ئەرەپنى كىم ئالۇر شۇ چاغ يادىغا...
ئۈچ ئەبۇلنىڭ* روھى شۇندا تىرىلدى،
سۈنئى ئارال تۈغدى ‹‹مىڭ بىر كېچە››نى.
دۇبەيلىكنىڭ چۈشى ئوڭغا ئۆرۈلدى،
قولنى چىشلەپ، يۇلدى كىملەر چېچىنى...؟
ياشا ئەرەپ قۇم قوينىدا تاش بولۇپ،
ئالدىڭدا مات بولدى،مەغرۇر ‹‹ئاق›› ساقال.
ئۇچ قىتئە*گە كەتكىن ھەتتا باش بولۇپ،
ئار-نومۇسنىڭ تۇزىنى يەپ تاپ ۋىسال.
ئېففىل بىلەن بابىلنىڭ تۇر، مۇنارى،
دوست سەزگۈدە باقار ساڭا قاچاندا؟
ئەرەپ ئېلى بولغىن مەمۇر دىيارى،
چېچەك ئاچسۇن ئارزۇيۇڭ قۇم بارخاندا.
مۇنار ئەمەس روھىڭ مېنى رام قىلغان،
‹‹خانتەڭرى›› دەپ چوقام بار كۆر! مېنىڭمۇ.
تۇمار ئەمەس مېنى شائىر، ‹‹خان ›› قىلغان،
پېقىر سۆيگەن غورۇرۇڭ بار سېنىڭمۇ.
ئوھۇد تېغى كۈلدى ئۇلۇغ ئەرەپكە.
كۈلدى چۆللۈك،كۈلدى شاھ ۋە تۆرىمۇ.
مىللەت ئۈچۈن ئىپتىخارلىق شەرەپكە،
دورا ئىكەن غورۇر دىگەن تولىمۇ؟!
ئىلاۋە:
*ئۈچ ئەبۇل-ئەرەپ تارىخىدا ئۆتكەن شائىر،تارىخچى، جۇغراپىيە ئالىملىرى.
*سۇلتان-خەلىپەنىڭ مۇنار قۇرۇلىشىغا ئاۋاز قوشقان مەسلىھەتچى.
*ئەھلىسەلىپ-ئىسلامغا قارشى سەككىز قېتىم جەڭ ئېلىپ بارغان كىرىست بەلگىلىك قوشۇن.
*ئەلمەكتۇم مۇھەممەت ئوغلى-مۇنار سېلىشنى قارار قىلغان خەلىپە.
*ئۈچ قىتئە-ئاسىيا،ياۋروپا،ئافرىقا قىتئەلىرى .
2012-يىلى 1-سىنتەبىر.
بۇ يازمىنى ئاخىرىدا كەپتەر تەھرىرلىگەن. ۋاقتى 2013-1-4 08:04 PM