ئۇل سېلىپ ئەۋلاد ئۈچۈن ،بولدۇڭ ئەجىرلەر باغىدا،
سازلىرىڭ ناۋاسى ياڭراق مېھنىتىڭ گۈل شاخىدا.
تامچىغان تەرلەر تامان ،ئاچقاچقا يۈز رەڭدار چىچەك،
ئاينىدى خۇشبۇي چىمەن زەپ زەرلىرىڭدىن چالىدا.
زەرلىرىڭ فونتان بۇلاق، گويادۇر ئۆچمەس نۇر چىراق،
ھىكمىتىڭدىن ‹‹قالدى ئىز يۇلغۇن قىزارغان دالىدا››.
ئاشتى ھەۋەس دىلدا شۇ دەم، ئىز سېلىپ ماڭدىم بۈگۈن،
جىلۋە ئەيلەپ نۇر تۈكۈپ كۈلگەچكە مېھرىڭ بارچىدا.
ئىزدىنىشلەر تاپقاچقا يول، مېھنىتىڭ ئەھكامىدىن،
ئەگدى نادانلىق بېشىنى قەلبى ئويغاق بالىدا.
ھەر ۋاقىت ئۆتتۈڭ ھاياتتا، نۇرانە خىسلەت يار قىلىپ،
مەنزىلىڭدە ھەر نەپەستە ،قالمىدى ھىچ دالدىدا.
ئەل ئۈچۈن سۇنغان گۈلۈڭ زەپ ،چاچتى ھەريان خۇشپۇراق،
دېدى ئەل بوۋاي كارامەت ياش قىرانلار ئالدىدا.
كۈي تۆكۈپ ماڭغاچ زەپەردەست، شۇل تەپەككۈر يولىدا،
ئۆزگىچە چاچتىڭ زىيا ئۇشبۇ بىلىملەر كانىدا.
لىقلىدىڭ قىسمىتىڭدىن، روھىڭغا چىدام جاسارەت،
تار قىلىپ ناۋا ئەيلەپ، كۈلدۈڭ ھاياتلىق باغرىدا.
ئېيتقىنىڭ ئۆلمەس ئاھاڭ،‹‹سۆيگۈ ئۇپۇقى››نۇر زىلال،
گويا ئوينايدۇ كائىنات نەزمىلەر جۈپ تارىدا.
ئىزدىنىش يانغاچ قەلبىڭدىن، چاقنا مەڭگۈ چولپان بول،
نۇر چېچىپ ئۆتكىن ئەبەت بۇ ھاياتلىق قاينامىدا.
غەيۋەتخولار مارشى
(ساتىرا)
غەيۋەتخور دەپ ئۇنۋان ئالدۇق كىمنى كۆرسە تالايدىغان،
يۇندا ئۈچۈن ھەر جايلاردا تىماي يالاق يالايدىغان،
چىۋىن چاقسا ۋاي دات ئاللا ئوق تەگدى دەپ سانايدىغان
ئۆيمۇ-ئۆيگە قاتراپ يۈرۈپ گەپتە قۇلاق يامايدىغان،
تۆھمەت قىلىپ ئۆزگىلەرگە يۈرىكىنى چانايدىغان.
شەرەپ قۇچقان تۆھپىكارلار كۆزگە مىقتۇر بىزگە دۈشمەن،
پۇتلىمىساق تۇرالمايمىز دىلدا يانغاچ پەۋەس ئۆچمەن،
زىدىيەتكە ئۇرۇق چاچار بولىمىز بىز بىر توپ كۆچمەن،
دىيەلمىسۇن ھىچكىم كۆكتە پەرۋاز قىلغان غالىپ قۇشمەن،
غەيۋەتخوردۇر ئۇنۋانىمىز ھەسەت قىلىپ تالمايدىغان.
ئۆزگە كۈلسە بىزگە ماتەم قايغۇرىمىز تۇرالماستىن،
كۈلكىسىگە ھەسەتلەردە ياكى تەڭكەش بولالماستىن،
شاتلىق ھارام يىغلىتىشقا ئەپلىك پىلان قۇرالماستىن،
توختىمايمىز نەشتەر سانچىپ تۆھمەت بىرلە ئۇرالماستىن،
غەيۋەتخوردۇر ئۇنۋانىمىز شاتلىق كۈيى چالمايدىغان.
ئۇزنى كۆرسەك ئېغىز پۈرۈپ ھالى يامان دوڭغاق دەيمىز،
قېلىن كىيسە قېرىپ قالغان ئوتى يوق بىر توڭغاق دەيمىز،
كۈلۈپ يۈرسە خۇشامەتچى،تاماخور بىر مۇڭغاق دەيمىز،
تىرىشچاننى مەنسەپ ئۈچۈن بېشىچىلاپ شۇڭغاق دەيمىز،
غەيۋەتخوردۇر ئۇنۋانىمىز سۆزلەپ تىنىم تاپمايدىغان.
نىشانىمىز: غەيۋەت ئاتلىق ئوقلىرىمىز ئۆتسە جاندىن،
ئازاپ بىرلە ئاتسا موللاق دوست-يارەنلەر ئارقا-ياندىن،
بۇ تاماشا بولسا ياتقا تىنماي چاۋاك چالسا ئاندىن،
بەرسە بىزگە چوڭ مۇكاپات<نوچى>ناملىق شەرەپ-شاندىن،
غەيۋەتخوردۇر ئۇنۋانىمىز قېرىنداشنى چانايدىغان.
ئويلىمايمىز نۇزۇگۇمنى،رىزۋانگۈلنى،مايىمخاننى،
ئۆزگىلەرنىڭ ئايدا ئۇچۇپ ئۆچمەس شەرەپ تاپقىنىنى،
بىزدىكى غەم زىدىيەتكە يوغان سېلىپ دەستۇرخاننى،
ئىتتەك تالاپ يوقىتىمىز تۆھپىكارنى،مەستۇرخاننى،
غەيۋەتخوردۇر ئۇنۋانىمىز بىز نوچى دەپ سانايدىغان.
ئارزۇيۇم
بۇ ھايات باغرىدا ئۇچراتتىم ،تالاي ئاقىل دانالارنى،
شەرمىي ھايا ئىپپىتىدىن چىچەك ئاچقان رەنالارنى.
ئاقنى ئاق دىمەستىن ھەتتا ،ئۇ قارا دەپ سانايدىغان،
ھەقىقەت ياقلاشتا دائىم تىلى كۆيەر ئەمالارنى.
شۇل سەۋەپتىن ھەق يولىدا، قالساممۇ كۆپ دىل رەنجىگە،
ئەھلى ناداندىن تارتمىدىم خوشلۇق ئۈچۈن تامالارنى.
ئاقىل دانالار ئىزىدىن تاپتىم يۇرۇقلۇق ئۆزگىچە،
ئەتراپتا جۇت نەرە تارتىپ سالسىمۇ شوق سامالارنى.
قالارمۇ دىلىمدا ئارمان ،باھار ھۆسنىدە يۈز ئاچسام،
ئەتسەم ھىم نۇرلىرىم بىرلە مېھىرسىز سوغ كامالارنى.
ئۈگەن ياشلىق باھارىڭدا
(ئۇستاز ھاجى ئەھمەد كۆلتېگىننىڭ غەزىلىگە تەخمىس)
ئىرادە قەۋمىدە تاۋلان دىل رىشتىڭنى ئاڭا چاتقىن،
تەرلىرىڭدە ئاچسۇن چېچەك مېھنەتلەرگە باغرىڭ ياققىن،
تەشنالىقى ئاۋام ئۈچۈن شەربەت كەۋسەر بولۇپ ئاققىن،
ئىلىم-پەن كۆكىدە پەرۋاز قىلىپ ئەركىن قانات قاققىن،
ئۈگەن ياشلىق باھارىڭدا بىلىمنىڭ قەنتىنى چاققىن.
بىشارەتتۇر مەنمەنچىلىك ئىنسانغا روھى گادايلىقتىن،
رىيازەت يەتمىسۇن ھەرگىز شۇل سەۋەپ ساڭا يامانلىقتىن،
نۇر بولۇپ چاچقىن جۇلا جىلۋە ئەيلەپ ئامانلىقتىن،
ھاياتنىڭ قەدرىگە يەتسەڭ ھەزەر ئەيلە نادانلىقتىن،
ئەقىل نۇرىدا قەلبىڭنى يۇرت ئۆچمەس چىراق ياققىن.
باغلىغىن بېلىڭنى مەھكەم ئۇلۇغۋار بىر نىشان كۆزلە،
ئۇنۇتما ئەسلىڭنى ھەرگىز خەلقىڭ ئۈچۈن راۋان سۆزلە،
خىسلىتىڭ شەۋكىتى بىرلە بولغاي شۇندا يۇرۇق يۈزلە،
ئەمەس پەننىڭ يۇلى تەكشى تىرىشقىن چوققىغا ئۆرلە،
كۆرۈنگەي شۇندىلا مەنزىل ئۈمۈتۋار كۆز بىلەن باققىن.
مەنزىل تامان سەپەرلەردە نى قىسمەتلەر ئۆتەر باشتىن،
كۈتەر دەۋىر چىدام-غەيرەت كارۋان ئارا قېرى- ياشتىن،
ئەجىرسىز كەلگەن نىممەتلەر پەرقى يوق بىتەم ئاشتىن،
ماقال بار<<كىم جاپا چەكسە گۆھەرنى شۇ ئالۇر تاشتىن>>
بىلىم ئوكيانىغا شۇڭغۇپ ئېسىل مارجان سەدەپ تاپقىن.
تالاي ئارزۇ چېچەكلىگەن جاسارەتتىن بولۇپ نازىل،
ئىرادىسىز مەغلۇپلۇققا باش قويغۇسى بولۇپ غاپىل،
غەيرىتىڭدە يېقىلغۇسى يوللىرىڭدا توساق پاسىل،
ئەجىر قىلساڭ تۆكۈپ ساپ تەر مۇرادىڭ بولغۇسى ھاسىل،
ئاتاق شۆھرەتنى قوغلاشما قانائەتتىن يىراق قاچقىن.
ئاگاھ بولغىن ئەقىل بىرلە يىراققا تاشلا غەپلەتنى،
ئايرىغىن سەن ۋىجدانىڭدا مۇھەببەتنى ھەم نەپرەتنى،
خىيال قىلما جاپا تارتماي ئەجىرسىز ئامەتنى ،نۇسرەتنى،
قولۇڭدىن بەرمە پۇرسەتنى،تىرىشچانلىقنى جۈرئەتنى،
ئىلىم-پەن ئاچقۇچى بىرلە چېگىش تىلسىم سىرىن ئاچقىن.
ھوسۇل بەرگەي ھالال مېھنەت تۆكۈپ ئالتۇن ئانا يەرگە،
بولمىغان ھىچ سەپەردە قۇت،بولمىسا گەر نىشان بەلگە،
ئالغا باس ۋايسىما ھەرگىز چۆمگەندىمۇ قارا تەرگە،
ئىجاد قىل ئەھمىدى ھارماي،كۈچۈڭنى تۆھپە قىل ئەلگە،
ئەگەر زەررە ئوتۇڭ بولسا ئۇنىڭدىن زەررە نۇر چاچقىن.
مەنبە: يېڭى ئىجادىيىتىم.
ئەسكەرتىش: ئەسەرنى خالغان تور بەتلەرگە كۈچۈرۈشكە رۇخسەت قىلىنمايدۇ.