يېڭى يىلغا كىرىش

abaytarim

	يېڭى يىلغا كىرىش        يىللار بىر - بىرىنى ئىتتىرىپ يېڭى بىر يىلغا كىرىش ئالدىدا تۇرۇۋاتىدۇ . بۇنىڭدىن بىر نەچچە يىل ئالدىدا ئەتە يېڭى يىل كىرىدۇ ، دەپ تۇرغان دەقىقىلەردە بىر ئىقتىدارلىق كەسپدىشىمىزدىن ئايرىلىپ يۈرەكلىرىمىز خۇن بولغانىدى . ئۇ يېڭى بىر يىلغا كىرەلمىگەنىدى . ھاياتلىقتا ھەممە ئادەمنىڭ يېڭى يىلغا مۇۋەپپەقىيەتلىك كىرەلىشىمۇ ئاسان ئەمەس ئىكەن . ئىنساننىڭ ھاياتى كۆپ قىسىملىق تېلىۋېزىيە - تىياتىرىغا بەك ئوخشىشىدىكەن . شۇ فىلىمنىڭ قانچىنچى قىسمدا ۋاپات بولىدىغان رولغا چىقىشنى رېژىسورلار كىنو ئىشلەشتە بەلگىلىيەلىگىنى بىلەن ، ھاياتلىقتىكى رېئال فىلىمنىڭ رېژىسسورى بولۇپ بۇنى بەلگىلەشكە رېژىسسور كەتمەيدىكەن . ..    ئويلاپ باقسام ۋاقىت توغرىسىدىكى ھېكمەتلىك سۆزلەرگە تولىمۇ باي ئىكەنمەن . ۋاقىتنى قەدىرلەش توغرىسىدا سائەتلەپ لېكسىيەمۇ سۆزلىيەلەيمەن ، ھەم سۆزلەپ كەپتىمەن . " ۋاقتىڭ كەتتى ، بەختىڭ كەتتى " ، " ۋاقىت ئالتۇندىن قىممەت " ، " ۋاقىت ئاتقان ئوق " دېگەندەك .  ئەمما ئۆزۈمنىڭمۇ شۇنچە ئۇزۇن  ،دەقىقىسىنىمۇ قايتۇرۋالغىلى بولمايدىغان ۋاقىتلىرىمنىڭ قەدرىگە يەتمەي ئۆتكۈزۋەتكەنلىكىمدىن ئۆكۈنىمەن . ۋاقىتنىڭ قىممىتىنى ئەقىل بىلەن كۈزۈتمەي ھېسىيات بىلەن كۆزىتىپ يۈرگەنلىكىمنى بايقىغىنىمدا ، مانا مۇشۇنداق يېڭى يىل كىرىش دەقىقىلىرىدە چۈشەنگىنىمدە چۆچۈدۈم . بۇ سۆيۈملۈك چۆچۈش ، ئەلۋەتتە . كېچىكىپ ، تولىمۇ كېچىكىپ چۆچۈش ، ئەپسۇس ...     قولۇمدا ۋاقىت ھەققىدە يېزىلغان كىتابلار تۇرۇپتۇ . ئىلگىرى مۇنداقلا ۋاراقلىنىپ چۈشىنىلگەن بۇ كىتابلار ئۇشبۇ دەقىقىلەردە ماڭا يېپيېڭى بىلىم ، ھاياتلىق ، ۋاقىت ھەققىدە ئاڭلاپ باقمىغان دەرسلەرنى سۆزلەۋاتاتتى . " ۋاقىت ساڭا ئۆز ئىختىيارىنى تاپشۇرغان ۋاقىت پەقەتلا بۈگۈندىن ئىبارەت . تۈنۈگۈن سېنى مەسخىرە قىلىشى مۇمكىن . ئۇ ئىختىيارىڭدىن ئازاد قىلىنغان . ئۇنى مەڭگۈ قۇل قىلالمايسەن . ئەتە سېنى تونۇماسلىقىمۇ مۇمكىن . ئۇ ئۆز ئىختىيارىنى ساڭا بەرمىگەن . پەقەتلا بۈگۈن سېنىڭ ئىلكىڭدە . ئۇ سېنى سىنايدۇ ! ( ئا. مۇھەممەتئىمىن ) قانچىلىغان بۈگۈنلەرنى ناھايىتى يەڭگىلتەكلىك بىلەن ئۆتكۈزۋەتتىم - ھە؟!!    ۋاقىتنى ھەقىقىي چۈشىنىپ ياشىغان ، ۋاقىت ئالدىدا مەغرۇر تۇرالىغان ، تۇرۇۋاتقان كىشىلىرىمىزنىڭ ھاياتلىق شەجەرىلىرىنى ۋاراقلاپ باقتىم . بۇلارنىڭ ئارىسىدا ھەممە ساھەنىڭ كىشىلىرى بار ئىدى . بىراق ئۇلارغا ئۆزۈمنى سېلىشتۇرۇشتىن خىجىل بولدۇم . شۇنچە يىللارغا تۈزۈك جاۋاب قايتۇرماي تۇرۇپ بۇلارغا ئۆزۈمنى سېلىشتۇرۇش ئەخمەقلىق ، ئەلۋەتتە . بىراق ئۇلارنىڭ يىللارغا سوۋغا قىلغانلىرى ھەقىقەتەنمۇ مېنى قايىل قىلدى .  " مۇشۇ يېشىڭغىچە ھاياتلىققا سوۋغا قىلغۇدەك ، يىللارغا جاۋاب بەرگۈدەك نېمىش قىلالىدىڭ ؟ كېلەر يىلى نېمە ئىش قىلماقچى ؟ " دەپ سورىلىپ قالسا يېڭى بىر يىلنىڭ ئەمەس ، ئەتىنىڭ ، ھەپتىنىڭ ، ئايلارنىڭ ، قىسقىسى ۋاقىتنى قانداق ئۆتكۈزۈش ھەققىدە پىلان تۈزۈپ باقمىغان مەندەك بىر " ۋاقىت ئوغرىسى ، ۋاقىت پارىخورى " نېمىدەپمۇ جاۋاپ بېرەلىسۇن ... ؟    يېڭى بىر يىل ھاياتلىق ئورمامنى ئورماقتا ، قەلب ئىشىكىمنى ، يۈرەك تارلىرىمنى چەكمەكتە ، پىلانسىز تاشلانغان يەنە بىر مەنزىلگە باشلىماقتا . مەن يىللارغا ئەگىشىپلا مېڭىۋاتقىلى ئۇزۇن بولغانىدى . ئەگەشمەيمۇ ئامالىم يوق ، مەن ئەگەشتۈرۈلۈپ يىللار تەرىپىدىن ئاللىقاچان كۆندۈرۈلۈپ بولۇنغانمەن . يىللارنى ئەگەشتۈرۈپ مېڭىش ماڭا نېسىپ بولمايدىغان ئوخشايدۇ . داۋۇت ئوبۇلقاسىم ئېيتقاندەك : " بىز تېخى ئۆزگەرمىدۇق . بىنالار ئۆزىچە سېلىنىپ قالدى ، يوللار ئۆزىچە ياسىلىپ كەتتى ، تېلىفۇنلار ئۆزىچە ئورنىتىلىپ قالدى ، ماشىنىلار ئۆزىچە پەيدا بولدى ، تۆمۈرلەردىن ئۆزىچە ئاۋاز چىقتى ، چىراغلار ئۆزىچە تورۇستىن ساڭگىلاپ چۈشتى . " يىللارنىڭ ماڭا سوۋغا قىلغانلىرى ئەشۇنداق كۆپ ئىدى ...     مانا يېڭى يىلغا " بۇ يىلمۇ ياخشى ئۆتتى " دەپ ئۆزۈمنى بەزلەپ كىرىپ كەتتىم . كەچتىكى بەزمىمىزنىڭ بۇ خۇشاللىقىمنى ئەۋجىگە چىقىرىدىغانلىقىغا ئىشىنىمەن . چۈنكى يىللار مېنى نائۈمىد قويۇپ باقمىغان - دە . ھېچنىمەم بولمىسىمۇ تاغدەك باشقىلاردا يوق ئۈمىد بار ، مەندە ...               نېمىشقا بىر خىللا تۇرىسەن ياپياش ،               نە خىسلەت بار سەندە ، ئېيتقىنا قۇياش .              بىر شېرىن چۈش كۆرۈپ ئويغىنىپ باقسام ،              سەن تېخى ئۆز پېتى مەن بولسام ئاقباش .                   - ئابلىمىت مۇھەممەت ئەمىن .     ھەممىڭلارنىڭ يېڭى يىلىنى قىزغىن تەبرىكلەيمەن . يېڭى يىلىڭلارغا مۇبارەك بولسۇن !!!        مەنبە : ئۆزۈم .   يېڭى يىلنىڭ ھاياتىم ئىشىكىنى چېكىشى .                   ئەبەي تارىم . 2012 - 12- 22- كۈنى .   شەھىرى شىخو .

faruk063

	«قىيمەتۇززامان (ۋاقتنىڭ قىممىتى» دېگەن كىتابتا ئىسلام ئۆلىمالىرىنىڭ ۋاقتقا بولغان كۆز قارىشى خاتىرلەنگەن بولۇپ، ئۇنىڭدا مۇنداق قۇرلار خاتىرلەنگەن:  دىيارىمىزدىكى دىندا ئوقۇيدىغانلار دەسلەپتە ئوقۇيدىغان تەپسىر جەلالەيىن دېگەن كىتابنىڭ مۇئەللىپى ئىمام سۇيۇتى 40 ياشتىن ئۆتكىچە 500 پارچىدىن ئارتۇق كىتاب يېزىپ، قالغان ئۆمرىنى ئاللاھقا ئىبادەت قىلىپ، زاھىدلىق بىلەن ئۆتكۈزگەن، 40 ياشتىن ئاشقان بۇ ئالىمنىڭ ۋاقتنى ناھايىتى چىڭ تۇتقانلىقىدىن، ھەم ئىلىم سەرمايىسىنىڭ يۇقۇرلىقىدىن ئەنە دىنىمىز ئۈچۈن شۇنداق كاتتا ئەسەرلەرنى يېزىپ قالدۇرغان. ئۇ كىتابتا يەنە بەزى ئالىملارنىڭ تاماق يېيىش ئۈچۈن ۋاقت كېتىدۇ دەپ، تاماق يېگۈزۈشكە مەخسۇس خىزمەتچى ياللاپ، خىزمەتچى بىر چەتتىن تاماق يېگۈزسە، بىر چەتتىن ئۆزى كىتاب ئوقۇپ، كىتاب يېزىپ ئۈلگۈرگەن، قارىماققا بۇ كۈلكىلىك تۇيۇلغاندەك قىلغان بىلەن، لېكىن ئۇلار ۋاقتقنى ئەنە ئاشۇنداق تېجىگەن. بىزچۇ؟!.... ھەي.....

fireman

	يەنە بىر ياش قىرىيدىغان بولدۇم، اللە كۈنلىرىمگە بەرىكەت بەرگەي....

baytura

	يىڭى يىل تۈگەپلا نەچچە پەندىن ئىمتىھان بېرىدىغان گەپ ،قارىغاندا يېڭى يىلغا ئۇيقۇسىزلىق ئازابلىرى بىلەن كىرىپ كېتىدىغان ئوخشايمەن .

kukhelal

	رەھمەت ..............ھەمىڭلارنىڭ يىڭى يىلىغا بەركەت تىلەيمەن..............

yasinawut

	يېڭى يىلنىڭ كىرشىگە پەقەت ساناقلىقلا كۈن قاپتۇ  ، مەنمۇ بارلىق مۇنبەرداشلارنىڭ  يېڭى يىلنى قىزغىن تەبرىكلەيمەن . .........

ۋاقتىم

	baytura يوللىغان ۋاقتى  2012-12-22 01:54 PM يىڭى يىل تۈگەپلا نەچچە پەندىن ئىمتىھان بېرىدىغان گەپ ، ... ئەگەشتىم...

خۇش

	پېقىر بۇداقى يىڭى يىلغا ھەر ھالدا تەنھا كىرمەيدىغان بولدۇم

mastura5200

	بارلىق مۇنبەرداشلارنىڭ  يېڭى يىلنى قىزغىن تەبرىكلەيمەن . ......... ئۇلۇق ئاللاھ  پۇتكۇل  مۇسۇلمانلارنىڭ  يىڭى يىلىغا خاتىرجەملىك  ۋە  بەرىكەت  ئاتا  قىلغاي!