مۇلايىم ئايالدىن كۆڭۈللەر خۇش

bugaltir

	مۇلايىم ئايالدىن كۆڭۈللەر خۇش    مۇلايىملىق ئىنسان ۋۇجۇدىنىڭ مېۋىلىك بېغىدۇر، ئەخلاقلىق ئايالنىڭ قىممەتلىق لىباسىدۇر. مۇلايىم ئايال ھەرقانداق ئادەمنىڭ ئىززەت-ھۆرمىتىگە، ئىلتىپات-مەرھىمىتىگە ئېرىشىپ بەختلىك تۇرمۇش كەچۈرەلەيدۇ. ھازازۇل ئايال ھەمىشە ئېرىدىن ياكى باشقىلاردىن دەككىسىنى يەپ، غەم-ئەندىشىدە كۈن ئۆتكۈزىدۇ. ھەر قانداق ئايال ئۈچۈن ئائىلە بىر قورغاندۇركى، ئۇنىڭ خۇشلۇق-ئاراملىقى ياكى قايغۇ-ئازابى ئەنە شۇ ئائىلە بىلەن چەمبەرچەس باغلانغان بولىدۇ. بۇ ئائىلىنىڭ ئۇلىنى چىڭىتىش ئايالدىن مۇلايىم پەزىلەتنى تەلەپ قىلىدۇ. ناھايىتى مەرتىۋىلىك، باي بىر ئادەم بولۇپ، تەرسا، ئاچچىقى يامان بىر ئوغلى بار ئىكەن، بۇ يىگىت توي قىلىش يېشىغا يەتكەندە، ئاتىسى ئۇنىڭغا نۇرغۇن لايىق تونۇشتۇرۇپ يېقىپتۇ، بىراق بۇ لايىقلار ئۇ ئادەمدىن ئوغلىنىڭ مىجەزىنىڭ تەرسا، ئاچچىقى يامانلىقىنى بىلگەندىن كېيىن-تويلىشىشتىن يالتىيىپتۇ. ئوغلىنىڭ تەرسا مىجەزىنى يوشۇرۇپ تۇرۇپ لايىق تاللاشنى بۇ ئاتا قوبۇل كۆرمەپتۇ. شۇ كۈنلەرنىڭ بىرىدە يىگىتنىڭ ئانىسى ئېرىنىڭ ئالدىغا بىر قىزنى باشلاپ كەپتۇ. بۇ ئاتا قىزدىن:«ئوغلۇم باشقا جەھەتتىن ياخشى، بىراق مىجەزى تەرسا، ئاچچىقى يامان، سىلەر توي قىلغاندىن كېيىن، مۇبادا ئوغلۇم تەرسالىق قىلىپ، سىزگە كايىپ كەتسە، قانداق قىلىسىز؟»دەپ سوراپتۇ. قىز ھېچبىر ئىككىلەنمەيلا ئۇنىڭغا؛ «بۇنىڭ چارىسى ناھايىتى ئاسانغۇ، ئوغلىڭىز ئاچچىقلىنىپ كەتكەندە، ئاغزىمنى يۇمۇپ، گاس-گاچا بولۇۋالىمەن، باشقا گەپنى ئۇنىڭ ئاچچىقى يانغاندىن كېيىن، مۇلايىملىق بىلەن دېيىشىمەن»دەپ جاۋاب بېرىپتۇ. قىزنىڭ جاۋابىنى ئاڭلىغان ئاتا قىزغا چەكسىز ئاپىرىن ئوقۇپتۇ ھەمدە كاتتا توي مەرىكىسى ئۆتكۈزۈپ، قىزنى كېلىن قىپتۇ. قىز تەرسا يىگىت بىلەن توي قىلغاندىن كېيىن، دېگىنىدەك قىپتۇ. بۇ راست بولغان ئىش. بۇ قىز قەلبىگە مۇلايىملىقتىن ئىبارەت گۈزەل خۇلقىنى ساقلىغانلىقى ئۈچۈن، تەرسا ئېرى بىلەن بىر ئۆمۈر ياخشى ئۆتەلىگەن. ئۇنداقتا، مۇلايىم ئايال قانداق بولىدۇ؟ ئاياللار قانداق قىلغاندا ئۆزىدە مۇلايىملىقتىن ئىبارەت گۈزەل پەزىلەتنى يېتىلدۈرەلەيدۇ؟ - مۇلايىم ئايال ئائىلە ئەھۋالىنى ياخشىلاشتا قىلچە يەڭگىللىك قىلمايدۇ. ئۇنىڭدا ئاق قارىنى پەرق ئېتىش ئىقتىدارى بولىدۇ. ئېرىنىڭ رازىلىقىنى ئېلىپ ئاتا-ئانىسىغا، قېرىنداش، ئۇرۇق-تۇغقانلىرىغا، بۇرادەرلىرىگە ھۆرمەت ئېھتىرام كۆرسىتىدۇ. تېجەشلىك بولۇپ، ئىسراپچىلىقتىن ساقلىنىدۇ. ئېرىنىڭ مېلىغا خىيانەت قىلماي، مۇمكىنقەدەر ئائىلىسنىڭ كەلگۈسى ئۈچۈن ئىقتىساد جۇغلايدۇ. ئېرى خىزمەتتىن قايتىپ كەلگەندە ۋە ئۇنى كۆرگەندە خۇش مۇئامىلىلىك بولىدۇ، ئۇنىڭغا قارىشى سۆزلەشكە، ئۇنىڭ پىكىرىنى چالغىتىشقا ئەسلا ئۇرۇنمايدۇ، بىراق ئېرىگە قارىغۇلارچە بويسۇنىۋېرىشتىنمۇ ساقلىنىدۇ، چۈنكى ئۇ بۇنىڭ ھەقىقىي مۇلايىملىق ئەمەسلىكىنى بىلىدۇ. ئېرىنىڭ بىرەر خاتا پىكىرگە كەلگەنلىكنى بايقىغاندا،«بۇنداق دېيىلسە قانداق بولار؟»ياكى«مۇنداق دېيىلسە مۇۋاپىقىراق بولارمىكىن»دەپ سەمىمىي مەسلىھەت بېرىدۇكى، ئېرىنى مەسخىرە قىلىپ، چىشىغا تەگمەيدۇ. بىلدۇرگەن پىكىرنى ئېرى قوبۇل قىلسا، خۇش بولۇپ، قوبۇل قىلمىسا ئاچچىقلىنىپ، غۇم ساقلاشتىن ساقلىنىدۇ. ھوقۇق-ئىمتىيازنىڭ يۇقىرىلىشىغا ئەگىشىپ، ئۆزىنىڭ ئاياللىق نازاكىتىنى يوقىتىپ قويمايدۇ، ھەم ئېلاستىكلىقى بار، ھەم ئۆز قارىشىدا چىڭ تۇرالايدىغان، مۇستەقىللىقى يېتلىگەن بولىدۇ. ھازازۇل ئايال ئېرىنى، بالىلىرىنى، خىزمەتداشلىرىنى ۋە ئەتراپتىكىلەرنى ياخشى كۆرمەيدۇ. ئائىلە تۇتۇشتا تەلۋىلەرچە ئىش كۆرىدۇ. زۆرۈرىيەت تۇغۇلمىغاندىمۇ كىيىم-كېچەك، زىبۇ-زىننەت تەمەسى قىلىپ، ئېرىنى قېيىن ئەھۋالدا قويىدۇ.شۇڭلاشقا،بىر ئايالدا،تەرەققىياتنىچۈشىنەلەيدىغان، ئېرى ۋە بالىلىرىنى بىلىم ھەم ئەخلاق جەھەتتىن يىتەكلىيەلەيدىغان، پەرزەنتلىرىنىڭ ھالىغا يېتەلەيدىغان، ئۇلارنىڭ تەرەققىي قىلىشىغا ياردەم بېرەلەيدىغان روھ بولۇشى كېرەك. شۇندىلا ئۇ ئۆزىدە مۇلايىملىقتىن ئىبارەت گۈزەل پەزىلەتنى يېتىلدۈرەلىگەن بولىدۇ. مەنبە  :  جۇڭگو رادىيو تورى شىنجاڭ تارماق تورى  .      http://www.radioxj.com/n19321c27.aspx

AYGUZAL007

	راست     دەيسىز

AYGUZAL007

	ئاللا    بارلىق  ئاياللارنى  مۇلاينم  ئاق  كۆڭۈل   ، ئىپپەتلىك ،ئىشچان   قىلغىلى   نېسىپ   قىلغاي

bugaltir

	ياخشى ئايال ئەرنى ئۆزگەرتەلەيدۇ.بۇلۇپمۇ ئەرنىڭ قىزغىنلىقىنى قوزغىيالايدۇ.ئەرلەرنىڭ قىزغىنلىقى  ھەم قىممەتلىك ھەم قورقۇنۇچلۇقتۇر.بۇ خىل قىزغىنلىق ئەرلەرنى تۇلۇپ -تاشقان كۈچ-قۇۋۋەت بىلەن ئالغا باستۇرىدۇ شۇنداقلا مەلۇم بىر ئىشنى ئەسسەبىلەرچە قىلىشقا مەجبۇرىلايدۇ.بۇنداق ئەھۋالدا ئەرلەر ئىشنىڭ ئاقىۋىتىنى كۆز ئالدىغا كەلتۈرمەيدۇ.ئەگەر مۇشۇنداق چاغدا ئۇنىڭ يىنىدا ياخشى ئايال بولسا،ئۇ ئېرىنىڭ ئالدىراقسانلىق، دىلخەستلىك،قارغۇلارچە ئىش كۆرۈشتەك روھى ھالىتىنى تىزگىنلىيەلەيدۇ ھەمدە ئېرىدىكى قىزغىنلىقنى مۇلايىملىق،ئېغىر-بىسىقلىق بىلەن ھاياتلىقنىڭ ھەقىقى ھەركەتلەندۈرگۈچ كۈچىگە ئايلاندۇرىدۇ. ياخشى ئايال ئەرنىڭ قەلبىنى پاكلىيالايدۇ.ئەرلەرنىڭ قەلبى بىر پارچە مۇنبەت تۇپراق،بۇ تۇپراقتا ئەقىل-پاراسەت،باتۇرلۇق ئاسان يىتىلىدۇ.لىكىن تۇپراق بەك مۇنبەت بولغانلىقتىن،ئۇنىڭدا ياۋا ئوت-چۆپلەرمۇ شىددەت بىلەن تىز ئۆسىدۇ.ياخشى ئايال بىر ياخشى دېھقان.ئۇ جان دىلى ۋە ھالال ئەمگىگى بىلەن  ياۋا ئوت-چۆپلەرنى ئۇتاپ،يۇمران مايسىلارنى سەۋرىچانلىق بىلەن پەرۋىش قىلىپ، چىچەك ئاچقۇزۇپ مىۋە بەرگۈزىدۇ.ئەرلەر دۇنيانىڭ يېرىمىنى تەشكىل  قىلسا،ياخشى ئايال دۇنيانىڭ يەنە بىر يېرىمنى تەشكىل قىلىدۇ. ئەرلەرنىڭ يېرىم دۇنياسىنى تۇلۇقلىغاندىلا ئاندىن ھەسەن-ھۈسەنلەر چىقىپ ،بۇ دۇنيانى پارلاپ تۇرغان يورۇق دۇنياغا ئايلاندۇرىدۇ.ياخشى ئايالنىڭ دۇنياسى پۈتۈن بولىدۇ، ئۇ ياردەمگە مۇھتاج ئەرلەرگە ياردەم بېرىدۇ،ئۆزگەرتىشكە تىگىشلىك ئەرلەرنى ئۆزگەرتىدۇ.

bugaltir

	ئاياللار ئەڭ شىپالىق دورا * ئوماق ئايال – دولانە كومىلىچى، ئادەمنى روھلاندۇرۇپ، تۇرمۇشقا بولغان قىزغىنلىقنى ئاشۇرۇدۇ. * جەزبىدار ئايال – روھلاندۇرغۇچى دورا، تىنىچ تۇرغان نېرۋىڭىزنىڭ ئارامىنى بۇزىدۇ. * ئەقىللىق ئايال ئاسپىرىن – ساغلام بولمىغان ئوي پىكىردىن خالاس قىلىپ، مەسىلىلەرگە توغرا پىكىر قىلىشىڭىزغا يول كۆرسۈتۈپ بېرىدۇ. * مۇلايىم ئايال– ئەرلەرنىڭ مىجەزىنى تەڭشەپ، كەيپىياتنى تۇراقلاشتۇرىدۇ. * سىرداش ئايال – ئاغرىق توختىتىش دورىسى، گەرچە ماسىلىلەرنى تۈپ يىلتىزىدىن ھەل قىلالمىسىمۇ، لېكىن مەلۇم دەرىجىدە توغرا يول كۆرسۈتۈپ بېرەلەيدۇ. * ئاق كۆڭۈل ئايال– ئىسپىرت، قەلبىڭىزنى ئىللىتىپ، روھىڭىزنى ئۇرغۇتىدۇ، گۈزەل ئەخلاق– پەزىلىتى دۇنيانى دېزىنفىكسىيەلەيدۇ. * كەڭ قوساق ئايال– تېز ئۈنۈم بېرىدىغان يۈرەك دورىسى، چۈشكىنلەشكەن كىشىلىك ھايات يولىڭىزنى ئۆزگەرتىدۇ. * ياسالما ئايال– سۇيۇق دورا، ئېغىزنىڭ ئۇچىدىلا تەكەللۇپ سۆزلىرىنى قىلىپ، ئوڭۇشسىزلىققا ئۇچرىغاندا ساختا تەسەللى بېرىدۇ.

bugaltir

	ئەقىللىق ئاياللار يۈرۈش-تۇرۇشىغا ھەر ۋاقىت دىققەت قىلىشى، مۇلايىم، ئاچچىقىمۇ، تاتلىقىمۇ بولۇشى لازىم. ئەقىللىق ئاياللار ئەقىل-پاراسىتىگە تايانغاندا، ئېرىنى ئۆزىگە رازىمەنلىك بىلەن كۆندۈرەلەيدۇ. بۇنداق ئاياللاردا ئەقىل-پاراسەت بىلەن گۈزەللىك مۇجەسسەملەشكەن دېيىشىكە بولىدۇ.

bugaltir

	مېھرىنى ھەممىگە، سۆيگۈ-مۇھەببىتىنى بىرلا ئادەمگە بېغىشلىيالىغان ئايال ھەقىقىي مۇھەببەتلىك ئايال؛ ھەم جىسمانىي جەھەتتىكى ئاجىزلىقىنى تەن ئالىدىغان، ھەم روھىي جەھەتتىكى كۈچلۈكلىكىنى جارى قىلدۇرالايدىغان ئايال ھەقىقىي قۇدرەتلىك ئايال؛ ھەم پۇل ئۈچۈن ئۆزىنى بۇلغىمايدىغان، ھەم ھالال پۇلى بىلەن مەئىشەت سۈرەلەيدىغان ئايال ھەقىقىي ئەخلاقلىق ئايال؛ گۈزەللىكنى جاھان ئەھلى ئالدىدا نامايەن قىلالايدىغان، لېكىن ئۇنى ھەرگىز بازارغا سالمايدىغان ئايال ھەقىقىي نومۇسلۇق ئايال؛ كۆڭلى بولمىسا، ھەتتا پادىشاھنىمۇ رەت قىلىپ، ئىشقى باغلانسا، كۆك نامراتنىڭمۇ ئايىغىغا باش قويالايدىغان ئايال ھەقىقىي ئىپپەتلىك ئايال؛ ھالۋىنى تولا يېگۈزۈپ زاڭ تېتىتىپ قويمايدىغان، ۋاقتى كەلگەندە كەكرىنىمۇ شېرىن ھېس قىلدۇرالايدىغان ئايال ھەقىقىي خۇلقلىق ئايال؛ ھەم سۆيگەن يارىنىڭ مەيدىسىگە يۆلىنىشنى بىلىدىغان،ھەم يىقىلغان يارىنى پۈتۈن جىسمى بىلەن يۆلەشنى بىلىدىغان ئايال ھەقىقىي ۋاپادار ئايال؛ راستنى ھامان راست دەيدىغان، لېكىن ئۆزگىنىڭ زىل كۆڭلىنى ئايايدىغان يەردە، چىن مەۋقەسىنى باشقىچە شەكىلدىمۇ ئىپادىلەشنى بىلىدىغان ئايال ھەقىقىي سەمىمىي ئايال؛ ئىچى قاينىغاندا توغاندەك ئىچىگە يىغالايدىغان، ئىچى توشۇپ كەتكەندە تاشقىندەك تاشالايدىغان، شۇنداقتىمۇ ئەتراپنى، يىراقنى نەزەردە تۇتالايدىغان ئايال ھەقىقىي سالماقلىق ئايال؛ چوغنى پۈۋلەپ ئوت قىلىپ، ھۇۋۇلداپ قالغان ئائىلىنى ئىللىتالايدىغان، لېكىن لاۋۇلداپ تۇرغان ئوتقا ماي چېچېپ ئۆينى يانغىنغا ئايلاندۇرۇۋەتمەيدىغان ئايال ھەقىقىي ئەقىللىق ئايال؛ ئۆزىنى قەدىرلىگەنگە قۇللارچە ئىتائەت قىلىشنى بىلىدىغان، ئۆزىنى خارلىغانغا باتۇرلارچە قارشى چىقىشنى بىلىدىغان ئايال ھەقىقىي غورۇرلۇق ئايال؛ ھېجران ئازابى ئىچىدە ئۆمۈر بويى يارىنى كۈتۈپ ئولتۇرالايدىغان، بېشىغا جۇدالىق كەلسە، كۆز ياشلىرىنى سۈرتۈۋىتىپ، يەنە يېڭىۋاشتىن ھاياتنى سۆيەلەيدىغان ئايال ھەقىقىي ساداقەتمەن ئايال؛ بالا ئۈچۈن ئانا زېمىندەك بارلىق ئېغىرچىلىقىنى كۆتۈرۈپ ئىڭرىمايدىغان، ھەتتا قورساقتىكى بالىسىنىڭ ئامان-ئېسەن تۇغۇلىشى ئۈچۈن كۈلۈپ تۇرۇپ جان بېرەلەيدىغان ئايال ھەقىقىي پىداكار ئايال؛ پەرزەنتىنى تۇنجى ھەم ئۈمۈرلۈك ئۇستاز سۈپىتىدەتەربىيلەشنى بىلىدىغان ھەم ئۆزىنىمۇ شۇنىڭغا لايىق ئۈزلۈكسىز تەربىيلەپ ماڭالايدىغان ئايال ھەقىقىي كۆيۈمچان ئايال... مانا سېنىڭ مۇكەممەللىكىڭ، مۇشۇلارنىڭ ھەممىسى سەندە تاكاممۇللاشسا، سەن ھەقىقىي ئايال، ھەقىقىي كۆيۈمچان ئايال...سەن ھەقىقىي ئايال، ئەڭ ھەقىقىي ئايال

turk119

	yah xi alla ga xukri

nazi0997

	بۇغالتىر ئېيتقان لارنىڭ ھەممىسى مۇجەسسەملەنگەن ئايال ، ھەقىقى ئايال.

يولتۇز

	بىراق شۇ دىمەك ئاسان ئۇرۇنلىماق تەس