پارلاق:ئاخىرقى تەبەسسۇم

پارلاق

	ئاخىرقى تەبەسسۇم (مىكرو كىنو سېنارىيىسى) پېرسوناژلار: نىگارە:تولۇق ئۈچىنچى يىللىقنىڭ ئوقۇغۇچىسى،باش پېرسوناژ،شادىمان،تىرىشچان قىز ئېليار: :تولۇق ئۈچىنچى يىللىقنىڭ ئوقۇغۇچىسى،باش پېرسوناژ،كەم سۆز،تەنتەربىيىگە قىزىقىدىغان،تىرىشچان بالا مەردان: :تولۇق ئۈچىنچى يىللىقنىڭ ئوقۇغۇچىسى،نىگارەنىڭ ئوغۇل دوستى،شەخسىيەتچى،بەگزادە مىجەز بالا زۇلمىرە :قوشۇمچە باش پېرسوناژ،نىگارەنىڭ دوستى باشقا قاتناشقۇچىلار: نىگارەنىڭ ئاتا-ئانىسى،ئېليارنىڭ ئاتا-ئانىسى،نىگارەنىڭ ساۋاقداشلىرى،مۇئەللىمىلىرى،نىگارە قۇتقۇزۇۋالغان كىچىك قىزۋە ئۇنىڭ ئاتا-ئانىسى،مەرداننىڭ ئاتا-ئانىسى،دوختۇر-سېستىرالار 1-كۆرۈنۈش ئورۇن:شەھەرنىڭ ئاۋات كوچىسى ۋاقىت:سەھەر(7-ئىيۇن،ئالىي مەكتەپ ئىمتىھانىنىڭ تۇنجى كۈنى) بوينىغا ئىمتىھانغا قاتنىشىش كىنىشكىسى ئېسىۋالغان ئون نەچچە قىز يولدا كۆرۈنىدۇ. نىگارە:قىزلار تېزراق بولايلى،ياتاقتائېزلەڭگۈلۈك قىلىپۋاقىتنى ئالدىڭلار،ئەمدى بولسىمۇ تېزرق مېڭىڭلارچۇ بىر،ئىمتىھانغا كېچىكسەك ئۈچ يىللىق ئارمىنىمىز يوق بولىدۇ-دەيدۇ ئەڭ ئالدىدا ماڭغاچ. -سەندىن باشقىمىز ئالدىرىمايمىز،ئاداش-دەيدۇئېگىز بويلۇق بىر قىز-ئەمما سەن كېچىكسەڭ-زە،بۇ يىللىق ئەلىيۇل ئەلا باشقىلارنىڭ بولۇپ كېتىدۇ! -ئاغزىڭنى ئۈشۈتمىگىنە-دەيدۇزۇلمىرە-ھېچقايسىمىز ئىمتىھانغا قاتنىشالمايدىغان ئىش بولمىسۇن. نىگارە بېشىنى يول تەرەپكە بۇرايدۇ-يۇ،چىرايىدا جىددىيلىك پەيدا بولىدۇ.ئۇ پۈتۈن كۈچى بىلەن يولغا يۈگىرىدۇ. كۆزنى يۇمۇپ-ئاچقۇچە دەقىقىدە نىگارە ماشىنا ئالدىغا كېلىپ قالغان كىچىك بىر قىزنى ئىتتىرىۋېتىپ ،ئۆزى ماشىنا ئالدىغا يىقىلىدۇ. قىزلارنىڭ ھەممىسى ۋاقىرىشىپ كېتىدۇ؛ نىگارە! 2-كۆرۈنۈش ئورۇن:دوختۇرخانىنىڭ جىددىي قۇتقۇزۇش بۆلۈمىنىڭ ئالدى كارىدوردا ئۇياقتىن-بۇياققا مېڭىۋاتقان نىگارەنىڭ ئاتىسى،شوپۇر ،بايىقى كىچىك قىزنىڭ ئاتىسى ۋە قىزىنى قۇچاقلاپ ئولتۇرغان ئاپىسى كۆرۈنىدۇ. ئالاھەزەل بىر سائەتلەردىن كېيىن،جىدىي قۇتقۇزۇش بۆلۈمىنىڭ ئىشىكى ئېچىلىدۇ،ھەممىسى دوختۇرنىڭ ئالدىغا يۈگۈرىدۇ. -ھېلىمۇ ياخشى ماشىنا تېزتورمۇزلانغاچقا،بەك سوقۇلماپتۇ.سول بىلىكى سۇنغاننى ھېسابقا ئالمىغاندا چوڭ ئىش يوق.لېكىن بىمار نەچچە سائەت ھۇشسىز يېتىشى مۇمكىن-دەيدۇ دوختۇر. -بىچارە قىز ئىمتىھانىدىن قېلىپ قالدى-دە! ھەممىسى مېنىڭ كاساپىتىم،قىزىمنى چىڭراق تۇتقان بولسام،ئۇمۇ ماشىنا ئالدىغا يۈگۈرمەيتتى،نىگارەمۇ ئۇنى قۇتقۇزىمەن دەپ بۇ پېشكەللىككە ئۇچرىمايتتى-دەپ قىزىنى باغرىغا بېسىپ يىغلايدۇ كىچىك قىزنىڭ ئاپىسى. -بولدى،ئۆزىڭىزنى ئەيىبلەۋەرمەڭ،بۇمۇ خۇدانىڭ ئىرادىسى،ئىمتىھاننى كېلەر يىلى بەرسە بولىدۇ-دەيدۇ نىگارەنىڭ ئاتىسى غەمكىن ئاھاڭدا. ئۇلار نىگارەنىڭ يېنىغا كىرىدۇ.نىگارە بىر قولى تېڭىق ھالدا ھۇشسىز ياتىدۇ. 3-كۆرۈنۈش ئورۇن:مەكتەپ ئوقۇتۇش بىناسىنىڭ ئالدى ئىمتىھان مەيدانىدىن چىقىۋاتقان ئوقۇغۇچىلار كۆرۈنىدۇ. -ھەي،نىگارەنى ئەجەبمۇ نەس باستى دېسە!ئويلىساملا ئىچىم سېرىۋاتىدۇ-دەيدۇ ئەتىگەنكى ئېگىز بوي قىز. -شۇنى دېمەمسەن،بۇ پېشكەللىكنى قارا-دەيدۇ يەنە بىر قىز -ئوغۇللار بولسىمۇ ماشىنا ئالدىغا ئۆزىنى ئاتقۇچە ئىككىلىنىپ قالار بولاتتى،ئۇنىڭ جاسارىتىگە قايىل بولىۋاتىمەن-دەيدۇ بىر ئوغۇل بالا مەردان ئۇلارنىڭ گېپىگە ئارىلاشماي جىممىدە كېتىپ قالىدۇ. -ئەمدى ئىككىسىنىڭ ئىشى قانداق بوپ كېتەر؟بىرى ئالىي مەكتەپكە كەتسە،برى بۇ يەردە قېلىپ قالسا-دەيدۇ باىقى ئوغۇل بالا. -شۇڭا دەيمەنغۇ مەن ،تولۇق 3-يىللىققا چىققاندا يۈرگەنلەرنى ساراڭ دەپ-دەيدۇ ئېگىزرەك بىر بالا بايىقى بالىنىڭ مۈرىسىگە قولىنى قويۇپ. -مەرداننىڭ ۋىجدانى قارار چىقىدۇ بۇ ئىشقا-دەيدۇ بىر قىز -بۇ بالىدا ۋىجداننىڭ بارلىقىغا گۇمان بىلەن قارايمەن جۇمۇ ،بالىلار-دەيدۇ بايىقى ئېگىز بالا ئەڭ ئاخىرىدا غەمكىن ھالدا كېلىۋاتقان ئېليار كۆرۈنىدۇ. 4-كۆرۈنۈش دوختۇرخانا ئېليار،زۇلمىرە قاتارلىق بىر نەچچەيلەن قولىدا مېۋە-چېۋە كۆتۈرگەن ھالدا دوختۇرخانا كارىدورىدا كۆرۈنىدۇ.بىر ياتاقنىڭ ئىشىكى ئېچىلىپ،نىگارەنىڭ ئاتىسى چىقىدۇ ۋە: -ئېليار،سىلەرمۇ كەپسىلەردە؟ قېنى بۇ ياتاققا كىرىڭلار،نىگارە گېپىڭلارنى قىلىپ تۇراتتى-دەيدۇ. ئېليار قاتارلىق نەچچە ئوغۇل نىگارەنىڭ ئاتىسى بىلەن قول ئېلىشىپ كۆرۈشكەندىن كېيىن،ياتاققا كىرىدۇ. ئاپىسى بىلەن نىگارە كۈلۈپ ئۇلارنى قارشى ئالىدۇ. -قېنى ئولتۇرۇڭلار-دەيدۇ نىگارە –ئىمتىھاننى قانداق بەردىڭلار؟ -ۋوي ئاۋال ئۆزۈڭنىڭ ئەھۋالىنى سۆزلىگىنە-دەيدۇ بىر قىز  نارازى بولۇپ-قاچان ساقىيىدىكەنسەن؟ -سول بىلىكىم سۇنۇپتۇ شۇ،باشقا ئىش يوق-دەيدۇ نىگارە. -قېنى بۇ تاۋۇزغا ئېغىز تېگىڭلار ،بالىلىرىم–دەيدۇ نىگارەنىڭ ئاپىسى بىر پەتنۇس تاۋۇزنى ئۇلارنىڭ ئالدىغا قويۇپ. -ئەجەبمۇ قاملاشمىغان ئىش بولدى،سېنىڭ ئورنۇڭدا مەن يولۇقسامچۇ بۇ ئىشقا –دەيدۇ ھېلىقى ئېگىز قىز-مېنىڭ ئىمتىھان بەرگىنىم بىلەن بەرمىگىنىمنىڭ پەرقى بولمىغاندىكىن -ساراڭ-دەيدۇ نىگارە دەرھال نارازى بولۇپ-ئۇنداق دېمە ،ئۆزۈڭگە ئىشەن،چوقۇم ياخشى بېرەلەيسەن ئىمتىھاننى -ئىككى پەننى دەتتىكام دەپلا ئېتىپ چىقتىم،قالغانلىرىنىمۇ بېرىشىم تايىنلىق-دەيدۇ ئۇ قىز . ئىمتىھاننى تۈگىتىپ كەلسەڭلارمۇ بولاتتى –دەيدۇ نىگارەنىڭ ئاپىسى-بىكار ئاۋارە بولۇپ كەپسىلەر،ئارام ئالساڭلار بولاتتى. -كۆڭلىمىز ئۇنىمايدۇ،ئەتىگەندە ھەممىمىز ئىمتىھاننى تاشلاپلا كەلگۈدەك بولۇپ كەتتۇق.ئىمتىھاندا ئىسمىمنىمۇ خاتا يازغىلى قىل قالدىم-دەيدۇ زۇلمىرە. -ئەتىگەندە پەزىلەت مۇئەللىملەر كەلدى،مانا ئەمدى سىلەر كەپسىلەر.مەن بەك خۇش.كېلەر يىلى ئىمتىھان بەرسەم،سىلەر ماڭائاكا-ئاچا بولىسىلەر،سىلەردىن ياشراق تۇرىدىغان بولدۇم-دەيدۇ نىگارە. ھەممىسى تەڭلا كۈلۈشۈپ كېتىدۇ. 5-كۆرۈنۈش مەرداننىڭ ئۆيى كرىسلودا ئولتۇرغان مەردان ۋە ئۇنىڭ ئاتا-ئانىسى كۆرۈنىدۇ. -مۆلچەرلىگەن نومۇرۇڭغا قارىغاندا،كاناداغا گەپ يوق چىقالايسەن،ئوغلۇم-دەيدۇ ئاتىسى كۈلۈپ-نومۇرى تۆۋەن چىقىپ قالسا جىقراق پۇل خەجلەرمەن دەپ ئولتۇراتتىم،مېنى جىق چىقىمدارمۇ قىلمىغۇدەكسەن.يارايسەن -چەتئەلگە چىقىدىغان ئىشىڭ ھەل بولايلا دەپ قالدى،تولۇق3-يىللىققا چىقىپلا،ھەقىقەتەن ياخشى ئۆگەندىڭ،مۇئەللىملىرىڭمۇ بەك ماختىغانتى،ئەمدى نەتىجىسىنى كۆرىدىغان چاغ كەلدى،مېنىڭ تاتلىق ئوغلۇم-دەيدۇ ئاپىسى مېۋە ئاقلىغاچ. -مەن ياتاق ئۆيۈمگە كىرىپ،بىرئاز ئارام ئېلىۋالاي-دەيدۇ مەردان ئورنىدىن تۇرۇپ. -ياخشى ئارام ئال،ساڭا ئوخشىتىپ ئۆز قولۇم بىلەن تاماق قىلىپ بېرىمەن-دەيدۇ ئاپىسى . 6-كۆرۈنۈش مەرداننىڭ ياتاق ئۆيى كارىۋاتتا ياتقان مەردان كۆرۈنىدۇ. مەردان كۆزىنى تورۇسقا تىككەن ھالدا خىيال سۈرىدۇ. تۆۋەندىكى كۆرۈنۈشلەر ئۇنىڭ خىيالى بولۇپ كۆرۈنىدۇ: كۇتۇپخانىدا،سىنىپتا،مەيداندىكى تاش ئورۇندۇقلاردا بىللە ئۆگىنىش قىلىۋاتقان مەردان بىلەن نىگارە؛ -مەردان،نىگارە بىلەن يۈرىۋېلىپلا تىرىشچان بولۇپ كەتتىڭ دېسە-دەيدۇ بىر بالا. -مەرداننىڭ كاللىسى ئىشلەيدىكەن جۇمۇ بالىلار-دەيدۇ يەنە بىرى مەرداننىڭ مۈرىسىگە قولىنى قويۇپ-مەكتەپ پۈتتۈرىدىغان يىلى دەرستە ياخشى بىر قىز بىلەن يۈرۈپ،ياخشى ئالىي مەكتەپكە ئۆتۈشنىڭ ئۇلىنى سېلىۋاتىدۇ ،مانا! -تۈزۈك گەپ قىلە، نىگارەنى راستلا ياخشى كۆرىمەن-دەيدۇ مەردان ئۇنىڭ قولىنى ئىتتىرىۋېتىپ. -قېنى ئايچېچەككە كۆيدۈم، ئۇنىڭ ئۈچۈن ئۆلىمەن،ئۆچىمەن دېگەنلىرىڭ؟!-دەيدۇ يەنە بىرى بالىلار كۈلۈشۈپ كېتىدۇ؛ -مەردان –دەيدۇ نىگارە ئۇنىڭغا تىكىلىپ تۇرۇپ-مېنى راستىنلا ياخشى كۆرەمسىز؟ -تېخىچە ماڭا ئىشەنمەمسىز-دەيدۇ مەردان نىگارەنىڭ بۇرنىنى چىمدىپ قويۇپ-ياخشى كۆرىمەن،بەكلا ياخشى كۆرىمەن. نىگارە يەرگە قاراپ تاتلىق كۈلىدۇ. مەرداننىڭ خىيالىدىن بېرىلگەن كۆرۈنۈشلەر ئاخىرلىشىدۇ. مەردان ئورنىدىن تۇرۇپ ،ئىشكابىدىن بىر پارچە خەتنى ئالىدۇ،نىگارەنىڭ ئاۋازىدا خەت ئوقۇلىدۇ: سالام،مەردان،مەندىكى مۇھەببەتكە قورغان ياساپ،ئىلىم ئۈچۈن سوقىۋاتقان ئاددىي بۇ يۈرەك بىلىپ-بىلمەي سىزنىڭ قەلبىڭىزگە تەسلىم بولۇپ،قورغان تاملىرىنى بۇزۇپ تاشلىدى.خىيالمىدا ياشلار ئۈچۈن ئىلىم ئېلىشتىن باشقا كۆڭۈللۈك ئىش يوق دەپ يۈرەتتىم.لېكىن مۇھەببەتتىن ئىبارەت بۇ تاتلىق ھېسنى سىز ئارقىلىق بىلىپ يەتكەندىن بېرى،بۇرۇنقى دۇنيايىمنىڭ تولىمۇ ئاددىي،رەڭسىز ئىكەنلىكىنى ھېس قىلدىم. مەردان،تولۇق ئوتتۇرىنىڭ ئەڭ ھالقىلىق پەيتىدە يۈرۈپ قالدۇق.سىز بىلەن تەڭ قول تۇتىشىپ،ئالىي مەكتەپتىن ئىبارەت تېخىمۇ خۇشپۇراققا تولغان ئىلىم باغچىسىنىڭ دەرازىسىدىن كىرىش مېنىڭ ھازىرقى ئەڭ ئالىي نىشانىم ۋە ئەبەدىيلىك ئارمىنىم.كېلىڭ،مەردان،قولىڭىزنى بېرىڭ،بىللە ئۆگىنەيلى،گۈزەل ئارمان-غايىلىرىمىز،پارلاق كەلگۈسىمىز ئۈچۈن تىرىشايلى! ئاجايىپ تاتلىق تۇيغۇلار بىلەن قوشۇلۇپ قالدۇق،ھايات دەرياسىدا داۋاملىق بىللە ئاققىلى بىزگە نېسىپ بولسۇن!                               ئۆمۈرلۈك نىگارىڭىز:نىگارەدىن خەت ئاخىرلىشىدۇ.مەردان خەتنى يىرتقاچ ئۆز-ئۆزىگە سۆزلەيدۇ: -نىگارە،مېنى كەچۈرۈڭ،سىز بىلەن تەڭ ھايات دەرياسىدا ئاقالمايمەن! 7-كۆرۈنۈش دوختۇرخانا نەرسە-كېرەكلىرىنى يىغىشتۇرىۋاتقان نىگارەنىڭ ئاتا-ئانىسى،بىر چەتتە ئۇلارغا قاراپ تۇرغان نىگارە كۆرۈنىدۇ. -ئاخىرى ئۆيگە قايتىدىغان بولدۇم-دەيدۇ نىگارە-بۇ يەردە خويمۇ زېرىككەنتىم -ھېلىمۇكۈندە ساۋاقداشلىرىڭ كېلىپ ،سېنى زېرىكتۈرمىدى-دەيدۇ ئاتىسى-بولمىسا ،ھوشۇڭغا كېلىلا قاچاتتىڭكەنسەن بۇ يەردىن-ھە؟ ئاتىسىنىڭ گېپىنى ئاڭلاپ،نىگارە ئورنىدىن تۇرۇپ دېرىزە ئالدىغا كېلىدۇ ۋە ئۆزىگە پىچىرلايدۇ: -ھاياتىمدا مەردان دەپمۇ بىرى بولىدىغان،توۋا،ئۇ مېنى يوقلاپمۇ قويمىدى،بىرەر تېلىفونىمۇ يوق ئۇنىڭ ئاۋازىغا يىغا ئارىلىشىدۇ -نىگارە،ماڭدۇق قىزىم-دەيدۇ ئاپىسى. نىگارە دەرھال چىرايىغا كۈلكە يۈگۈرتۈپ،كەينىگە ئۆرۈلىدۇ. 8-كۆرۈنۈش دوختۇرخانىنىڭ ئالدى -ئۈلگۈرۈپلا كەپتۇق-دەيدۇ ئېليارنىڭ ئاتىسى ماشىنىدىن چۈشۈپلا-ئېليار ،نەرسىلەرنى ماشىنىغا سالغىن. -كەلمىسەڭلەرمۇ  بولاتتى-دەيدۇ نىگارەنىڭ ئاتىسى-كىرا ماشىنىسىدىلا كېتەتتۇق،نەرسىلىرىمىزمۇ جىق ئەمەستى. -شۇ ئەمەسمۇ،دائىملا سىلارنى ئاۋارە قىلىمىز،خۇددى ماشىنا ئالغاندا بىز پۇل قوشۇپ بەرگەندەك-دەيدۇ نىگارەنىڭ ئاپىسى. -ۋوي،قولۇم-قوشنا،دوست-يارەن دېگەن مۇشۇنداق چاغدا ئەسقاتمىسا ،نېمە قىلىدۇ ئۇنى؟يەنە ئىككى ئېغىز گەپ قىلساڭلار،مېنى يات كۆردى دەپ سىلەردىن رەنجىيمەن-دەيدۇ ئېليارنىڭ ئاتىسى-قېنى ماشىنىغا چىقىڭلار! ھەممىسى كۈلۈشۈپ ماشىنىغا چىقىدۇ. -ئېليار،نەچچە ئاپسەن بالام-دەيدۇ نىگارەنىڭ ئاتىسى-بۈگۈن نەتىجىلەر چىقىدۇ دەۋاتاتتى ماۋۇ بتەلەي قىزىم. -50نومۇر قوشۇلۇپ،590 ئاپتىمەن-دەيدۇ ئېليار-نىگارە كېلەريىلى تولۇق نومۇر ئېلىۋېتىسەنغۇ؟ -ماڭغىنە ،ۋوي-دەيدۇ نىگارە-سەنچىلىك ئالالىسام چوڭ گەپ.مۇبارەك بولسۇن،لېكىن مانۋېر ئىمتىھانلاردىن تۆۋەنرەك ئېلىپ قاپسەن،ئىمتىھان تەس چىقىپتىمۇ نېمە؟ -ياق،سەن بەرگەن بولساڭ،مەنمۇ ساڭا قاراپ ياخشىراق بېرەتتىم،سەن يوق،مۇنداقلا بېرىپ قويدۇم-دەيدۇ ئېليار كۈلۈپ -بۇنداق يېرى بولغان بولسا،نىگارە قولىنى ئېسىپ ،يېنىڭدا ئولتۇرۇپ،ئىمتىھان قەغىزىگە قاراپ قايتىپ كەلسىمۇ بوپتىكەن-دەيدۇ ئېليارنىڭ ئاتىسى -ئۇ قاراپ قويۇپلا بولدى قىلمايدۇ،سوئاللارنى ئىشلىگۈسى كېلىپ كېتىپ،قولىدىكى گېپىسنى ئۆزىلا ئېلىۋېتىپ ئىشلەپ چىقىدۇ-دەيدۇ ئېليار -مۇشۇ نومۇرۇڭ بىلەن نەلەرگە ئۆتۈپسەن بالام؟-دەيدۇ نىگارەنىڭ ئاپىسى. -شاڭخەيگە مېڭىپ قالارمەن-دەيدۇ ئېليار. -فۇدەنگە گەپ يوق ماڭىسەن-دەيدۇ نىگارە. -ياخشى مەكتەپما ئۇ؟-سورايدۇ نىگارەنىڭ ئاتىسى. -ھەئە،جوڭگودىكى ئون داڭلىق مەكتەپنىڭ بىرى،ئالدىنقى قاتاردا تۇرىدۇ.دەيدۇ نىگارە. -كېلەر يىلى سەنمۇ شۇ مەكتەپنى يازغىن-دەيدۇ نىگارەنىڭ ئاتىسى-بىللە ئوقۇساڭلار غەم قىلمايمىز.مۇشۇ ماشىنىغا چۈشۈپ بىزمۇ كۆرۈپ كەلسەك شاڭخەي ساھىلى دېگەننى! -پويىز بىلەن بارارمىز ئۇنداق يىراق يەرگە-دەيدۇ نىگارەنىڭ ئاپىسى. -ئايروپىلان بارىمىز ئۇچۇپ-دەيدۇ ئېليارنىڭ ئاتىسى-مۇشۇنداق كاتتا بالىلارنى تەربىيلىگەن بىزدەك ئاتا-ئانىلار ئۇچۇشقا ھەقلىق جۇمۇ! -شۇ شۇ-دەيدۇ نىگارەنىڭ ئاتىسى-بىزنىڭ بالىلىرىمىز بىزنى ئۇچۇرىدۇ. ئېليار بىلەن نىگارە بىر-بىرىگە قاراپ كۈلىدۇ. 9-كۆرۈنۈش ئېليارنىڭ ھويلىسى قازان بېشىدا تاماق ئېتىۋاتقان ئېليارنىڭ ئاپىسى كۆرۈنىدۇ.دەرۋازا ئېچىلىپ،بىر قولى ئېسىقلىق نىگارەكىرىپ كېلىدۇ. -ۋوي جېنىم قىزىم،بۇ ئىسسىقتا قولىڭىز ساقايماستا قالدى،قانداق چىداۋاتىسىز؟-دەيدۇ ئېليارنىڭ ئاپىسى سۇپىدىكى كۆرپىنى ئوڭشىغاچ-كېلىڭە قىزىم سۇپىغا . -كۆنۈپمۇ قالدىم،تولۇق ساقايسۇن دەپ تېخىچە ئېسىپ يۈرىمەن شۇ.ئېليارنىڭچاقىرىقى كەپتۇ دەپ ئاڭلاپ ،تەبرىكلەي دەپ كىرگەنتىم-دەيدۇ نىگارە ئولتۇرغاچ. -ھېلىلا بارتى،ئۆگزىدىكى كەپتەرخانىغا چىقىپ كەتتى ھەقىچان-دەيدۇ ئېليارنىڭ ئاپىسى. -مەن يېنىغا چىقىپ باقاي –دەيدۇ نىگارە تۇرۇپ. -سىزگە ئەپسىز بولارمىكىن، مەن چاقىراي چۈشسۇن. -بولدى،ئۆيدىكى ئۆگزىگىمۇ كۈندە نەچچە قېتىم چىقىپ چۈشىمەن،ئۆزۈم چىقاي. -ئەمىسە ئېھتىيات قىلىڭ. نىگارە ئاۋايلاپ شوتىدىن چىقىدۇ.كەپتەرلەرگە دان بېرىۋاتقان ئېليار ئۇنى كۆرۈپ ھەيران بولىدۇ. -سەن نېمە بۇ يەرگە چىقىپ قالدىڭ؟ -ھەيران بولمىغىنە،مەن دائىم چىقىدىغان يەرغۇ بۇ؟ قېنى مېنىڭ كەپتىرىم؟-دەيدۇ نىگارە كەپتەرلەرگە قاراپ-ھە.ماۋۇ شۇكەن،بەك ياخشى بېقىپسەن  بۇنى! -نۇرغۇن قىزىقىشلرىم ئۆزگىرىپ كەتتى،لېكىن مۇشۇ كەپتەرلەرگە بولغان ھەۋىسىمنى تاشلىيالمىدىم. -نېمىشقا؟ -چۈنكى سەنمۇ كەپتەرگە ئامراقتە! -ھە راست،چاقىرىق قەغىزى كەپتۇ دەپ ئاڭلاپ،تەبرىكلىگىلى كىرگەنتىم. -رەھمەت،سەن ئۈچۈن ئەپسۇسلىنىۋاتىمەن،سەن قانداق ئويلاۋاتىسەن؟ -مەنمۇ ئازراق بىئارام بولدۇم،سىلەر كەتسەڭلەر مەن قالىدىغان بولدۇم،لېكىن ئۇ قىزنىڭ ھاياتى بىلەن ئۆزۈمنىڭ ئارمىنىنى بىر يىل كېچىكتۈرگەننى سېلىشتۇرسام ،يەنىلا توغرا قىلدىم دەپ ئويلايمەن. -توغرا دېدىڭ،نىگارە،سەندىكى جۈرئەتكە قايىلمەن،ئۇنداق چاغدا ئوغۇللارنىڭمۇ سەنچىلىك جۇرئەتكە كېلەلىشى ناتايىن. نىگارە كۆزلىرىنى ئوينىتىپ،كۈلۈپ قويىدۇ. -بىر گەپ سورىسام،كۆڭلۈڭ يېرىم بولۇپ قالماس-دەيدۇ ئېليار بېشىنى سىڭايان قىلىپ ئۇنىڭغا تىكىلىپ. -سوراۋەر،سەندىن يوشۇرغىدەك ئىشىم بارمۇ مېنىڭ؟ -مەردان بىلەن قانداق بولۇپ كەتتىڭلار؟ نىگارە بېشىنى كۆتۈرۈپ ئاسمانغا قارايدۇ-دە! -ئايرىلىپ كەتتۇق. -ئىمتىھاندىن كېيىن ئۇنى كۆرمىدىم،سېنى يوقلاپ كەلگىنىنىمۇ بىلمەيمەن. -يوقلاپ كەلمىگەن  تۇرسا، قانداق كۆرەتتىڭ؟ نەچچە كۈن ئاۋال زۇلمىرەدىن بىر پارچە خەت ئەۋەتىپتۇ، كاناداغا چىققۇدەك،ئۇزۇن يىل ئازاب چەككەندىن ھازىرلا بىر تەرەپ بولايلى،رىسقىمىز بولسا قايتا تېپىشىپ قالارمىز ،سىزگە قارىغۇدەك جۈرئىتىم يوق،شۇڭا يوقلاپ بارالمىدىم ،دەپتۇ.نېمە دەيمەن؟ ئېسىلىۋېلىشنىڭ ئورنى بارمۇ؟ماقۇل دەپ جاۋاب خەت يېزىپ زۇلمىرەدىن ئەۋەتكۈزدۈم.زۇلمىرەدىن نۇرغۇن نەرسە-كېرەكلەرنى ئەۋەتىپتىكەن،خېتىنى كۆرۈپ زۇلمىرەمۇ ئاچچىقلاپ كەتتى، ئىككىمىز كۆتۈرۈپ چىقىپ ئۆستەڭگە تاشلىۋەتتۇق. -كۆڭلۈڭنى يېرىم قىلىپ قويدۇم، كەچۈرگىن! -ھېچقىسى يوق، سورىمىساڭمۇ ساڭا ھامان دەيتتىم،قارىغاندا يۈرۈشكە تېگىشلىك بولمىغان بىرى بىلەن يۈررۈپ قالغان ئوخشايمەن،لېكىن تۇنجى مۇھەببىتىمنىڭ بۇنداق مەغلىبىيەت بىلەن ئاخىرلىشىشىنى ئويلاپمۇ باقماپتىكەنمەن. -كېلەر يىلى سەنمۇ مېنىڭ مەكتپىمنى يازغىنە ئارزۇيىڭغا، تەڭ ئوقۇيلى. -ئۆتەلىسەملا! -ئادەمنى مەسخىرە قىلىۋاتامسەن؟ مەن ئۆتكەن يەردە سېنىڭ ئۆتەلمەسلىكىڭ مۇمكىنمۇ؟ -كېلەر يىلى يەنە بىرەر ئىش يۈز بېرىپ... -ئاغزىڭنى ئۈشۈتمە،ئەمدى ئۇنداق بولمايدۇ-دەيدۇ ئېليار دەرھال نىگارەنىڭ ئاغزىنى قولى بىلەن توسۇپ.ئىككىسىنىڭ كۆزلىرى ئۇچرىشىدۇ. -ئېليار،نىگارە تاماق پىشتى بالىلىرىم-ئېليارنىڭ ئاپىسىنىڭ ئاۋازى ئاڭلىنىدۇ. -مانا ،چۈشتۇق-دەيدۇ ئېليار-پەسكە چۈشكەندە ساڭا بېرىدىغان بىر نەرسە بار،ئۆيۈڭگە چىقىپ كۆرگىن –ھە،يۈرە چۈشەيلى! ئېليار پەسكە چۈشۈپلا، ئۆيىگە كىرىپ كېتىدۇ،بىردەمدىن كېيىن بىر كونۋېرتنى كۆتۈرۈپ چىقىپ نىگارەگە سۇنىدۇ. نىگارە كونۋېرتنى ئېلىپلا ،سىرتقا ماڭىدۇ. -ۋۇي،قىزىم تاماق يېمەيلا ماڭامسىز؟-دەيدۇ ئېليارنىڭ ئاپىسى دەرۋازا يېنىغا بېرىپ قالغان نىگارەنى كۆرۈپ. -ئۆيدىكىلەرگە دېمەيلا چىققان، مېنى ئىزدەپ كەتمىسۇن،تاماق يېگىلى كېيىن كىرەي-دەيدۇ نىگارە. 10-كۆرۈنۈش نىگارەنىڭ ئارقا ھويلىسى نىگارە ئېرىق بويىغا قويۇلغان كارىۋاتنىڭ ئۈستىدە ئولتۇرۇپ ،ئېليار بەرگەن كونۋېرتنى ئاچىدۇ.كونۋېرتنىڭ ئاغزى ئوچۇق بولۇپ ،بىر پارچە خەت سىيرىلىپ چۈشىدۇ. ئېليارنىڭ ئاۋازىدا خەت ئوقۇلىدۇ: نىگارە،قەلبىمدە ئۇزۇندىن بۇيان جىمجىت كۆيۈۋاتقان ئوتنىڭ سەۋەبكارى ،جېنىم نىگارە،ئاخىرى ساڭا بۇ خەتنى يازىدىغان جۈرئەتكە كەلدىم. ئېسىمنى بىلسەملا،دوستلىرىم ئارىسىدا سەن بار،سېنىڭ تاتلىق كۈلكەڭنى،جاھىل يىغاڭنى،بالىلارچە ئوماق قىلىقلىرىڭنى كۆرۈپ چوڭ بولدۇم.سېنىڭ جىمى قىلىقلىرىڭ ماڭا چىرايلىق كۆرۈنەتتى،ئۆزۈممۇ بىلىپ-بىلمەي ساڭا ئامراقلىق قىلاتتىم.قاچاندىن باشلاپ،ساڭا بولغان ئامراقلىقىم مۇھەببەتكە ئايلاندى،شۇندىن بۇيان كەم سۆز،جىمغۇر،خىيالچان بولۇپ قالدىم.سېنىڭ شادلىقلىرىڭدىن مەن جىمجىت ھۇزۇر ئېلىپ، سەندىن ئۆتە شادلىناتتىم،ئازابلىرىڭغا كېچە-كېچىلەپ ئاھ ئۇرۇپ چىقاتتىم.يېنىڭدىكى بارلىق ئوغۇللاردىن سېنى قىزغىناتتىم. مەردان بىلەن يۈرۈپ قالدىم دېگەن چېغىڭدا،دۇنيا ماڭا قاپقاراڭغۇ بىلىندى،مەكتەپ دېگەن نەرسە كۆزۈمگە دوزاختەك بىلىندى،نەچچە ھەپتىگىچە گېلىمدىن تاماق ئۆتمىدى.لېكىن سېنىڭ شادىمان،بەختتىن نۇر تۆكۈلۈپ تۇرغان كۆزۈڭنى كۆرۈپ،«سۆيگەن ئادىمىنىڭ بەختىنى كۆرۈشمۇ بىر خىل بەخت»دەپ ئالىجاناپلارچە ئۆزۈمگە تەسەللىي بېرىپ يۈردۈم.لېكىن بۇنىڭلىق بىلەن ساڭا بولغان مۇھەببىتىم ئۆچۈپ قالمىدى. ئەمدى ساڭا كۆڭلۈمدىكى گەپلەرنى دەۋالمىسام،سەن ئۈچۈن قوقاس بولىۋاتقان يۈرىكىمگە يۈز كېلەلمەيمەن. نىگارە،يادىڭدا بولسۇن: مەيلى سەن ھازىر كىمنىڭ ئادىمى بول، ياكى كەلگۈسىدە كىمنىڭ ئادىمى بولۇپ كەتكىن،سەن مەڭگۈ مېنىڭ قەلبىمدىكى بىردىنبىر ئادىمىم! ھەي،نىگارە،كۆزلىرىڭدە كىرپىكىڭ دائىم كۆرمەيسەن!                                    سەن كۆرمەيۋاتقان  ئېتىبارسىز ئېلياردىن نىگارەنىڭ كۆزلىرىدىن مۇنچاق ياشلار تۆكۈلىدۇ.ئەسلىمە ئورنىدا تۆۋەندىكى كۆرۈنۈشلەر كۆرۈنىدۇ: ئېرىق بويىدا لاي ئويناۋاتقان،بىر قاچىدىكى تاماققا تەڭ قول سېلىپ يەۋەتقان كىچىك ئېليار بىلەن نىگارە؛ شاخقا چىقىۋېلىپ مېۋە ئۈزۈۋاتقان كىچىك ئېليار، يەردە مېۋىلەرنى تېرىۋاتقان كىچىك نىگارە؛ كىچىك نىگارەنىڭ پۇتلىرى قاناپ كەتكەن، كىچىك ئېليار ئۇنى يۈدۈپ يۈگۈرۈۋاتقان؛ سەھنىدە ئۇسۇل ئويناۋاتقان نىگارە،پەستە بولىشىچە چاۋاك چېلىۋاتقان ئېليار؛ مەردان بىلەن مەكتەپ مەيدانىدىكى تاش ئورۇندۇقتا كىتاب كۆرۈۋاتقان نىگارە،ياندىكى پوتبۇل مەيدانىدا جان-جەھلى بىلەن توپ تېپىۋاتقان ئېليار؛ نىگارە بېشىنى ياستۇققا  قويۇپ بولىشىچە يىغلايدۇ. 11-كۆرۈنۈش نىگارەنىڭ ھويلىسى -مەخمۇت،ھوي مەخمۇت-سىرتتىن ئېليارنىڭ ئاتىسىنىڭ ۋارقىرىغان ئاۋازى ئاڭلىنىدۇ.كەينىدىنلا ماشىنىنىڭ سىگنال ئاۋازى ئاڭلىنىدۇ. نىگارە ئاتا-ئانىسى بىلەن تەڭلا سىرتقا يۈگۈرۈپ چىقىدۇ. ئىشىك ئالدىدا يوغان بىر مىنىبۇس توختىغان بولۇپ،ئىچىدە لىق ئادەم بار ئىدى.مىنىبۇسنىڭ ئەڭ كەينىدە ئولتۇرغان ئېليار كۆرۈنىدۇ.ئېليارنىڭ ئاتىسى ماشىنا ئەينىكىدىن بېشىنى چىقىرىپ: -قوشنا ناھىيىگە كەلكۈن كەپتۇ، بىز ياردەمگە ماڭدۇق، قېنى گۈرجىكىڭنى كۆتۈرۈپ ماشىنىغا چىققىن،جىددىي ماڭمىساق بولمايدۇ. نىگارەنىڭ ئاتىسى تېز سۈرئەتتە ئۆيىدىن بىر گۈرجەكنى كۆتۈرۈپ چىقىپ مىنىبۇسقا چىقىدۇ. ئېليار كەينىگە بۇرۇلۇپ ،نىگارەگە سوئال نەزىرىدە قارايدۇ،نىگارە تاتلىق تەبەسسۇم قىلىدۇ، ئېليارمۇ تاتلىق تەبەسسۇمدىن كېيىن ئالدىغا قارىۋالىدۇ،مىنىبۇس توپىلىق يولدا ئۇچقاندەك تېز غايىب بولىدۇ.   12-كۆرۈنۈش نىگارەنىڭ ھويلىسى -ئاتاڭلار كەتكىلى ئۈچ كۈن بولدى،ئەجەب بىر قايتىپ كەلمەيدا-دەيدۇ نىگارەنىڭ ئاپىسى. -شۇنى دەيمەن،كەلكۈن شۇنداق جىق كەلدىمىكىنا؟-دەيدۇ نىگارە-ئادەمنى ئەنسىرىتىپ -قالايمىقان ئويدا بولما،ھېچ ئىش بولمايدۇ قىزىم. دەرۋازا ئېچىلىپ نىگارەنىڭ ئاتىسى كىرىپ كېلىدۇ.ۋە جىددىي تەلەپپۇزدا: -تېز مېنىڭ دوپپامنى ئاچىققىن-دەيدۇ -نېمە ئىش بولدى؟ -ئېليار كەلكۈندە ئېقىپ كەتكەن بىر بالىنى قۇتقۇزىمەن دەپ...- نىگارەنىڭ ئاتىسىنىڭ ئاۋازى تىترەپ كېتىدۇ-بۈگۈن ئاران جەسىتىنى تاپتۇق،تېز بول،نامىزىنى چۈشۈرگىلى بارىمىز. -ۋوي جېنىم بالام، ئالتۇنغا بەرگۈسىز بالا بولغانتىغۇ ئۇ-نىگارەنىڭ ئاپىسى يىغلاپ ئۆيىگە كىرىپ كېتىدۇ. نىگارە تۇرغان جايىدا قېتىپ قالىدۇ.ئۇنىڭ كاللىسىدا پەقەت ئېليارنىڭ مىنىبۇستىكى تەبەسسۇملۇق چىرايى بىلەن تۆۋەندىكى گېپىلا قايتا-قايتا نامايان بولىدۇ: نىگارە،يادىڭدا بولسۇن: مەيلى سەن ھازىر كىمنىڭ ئادىمى بول، ياكى كەلگۈسىدە كىمنىڭ ئادىمى بولۇپ كەتكىن،سەن مەڭگۈ مېنىڭ قەلبىمدىكى بىردىنبىر ئادىمىم! 2012-6-17 گۇاڭجۇ

پارلاق

	ئەمدى نورمال بوپتۇ-دە ،بۇ تېما

ap~qilam

	ئەجەپ جىقكىنا، تېزدىن سەھنىلەشتۈرەيلى بۇ مىكرو كىنونى، مىسرانىمدا ئادەنلەر جىق بولغانكىن ،رولچىنىمۇ تاپالايمىز، مەن ئۆزەملا 5 رولنىڭ ھۆددىسىدىن چىقاي

qiqakkiz

	ئەمىسە كىنونى  ئىشلەشكە باشلاڭ  ئەپچىلەم .   مۇنبەردە  ئېلان قىلىشنى ئۇنۇتماڭ . بازارلاردا  بارلىق روللارنى ئەپچىلەم ئالغان   كىنو  دەپ توۋلايدىغان بولدىدە ئەمدى .

kanat

	پارلاقنىڭ تېمىلىرىنى كۆرمىگىلى ئۇزۇن بوپتىكەن،لىرىك شېئىرلىرىڭىزدىن يوللاپ تۇراسىز.

يولتۇز

	نىمە دىگەن تەسىرلىك يىغلىغىم كەلدى . نىمىشقا ياخشىغا كۈن يوقتۇ .

turk119

	yahxikan

naildin

	نېمىدېگەن   ياخشى  چىققان  دېمىسىمۇ  دەرھال   سەھنىلەشتۈرۈشكە  ئەرزىگۈدەك  جۇمۇ!    قەلەم  قۇۋىتىڭىزگە  بارىكاللا !!!    لېكىن  ھەي......   بىر  تىراگىدىيە  بىلەن  ئاخىرلاشتى !

ap~qilam

	qiqakkiz يوللىغان ۋاقتى  2012-12-18 09:30 PM ئەمىسە كىنونى  ئىشلەشكە باشلاڭ  ئەپچىلەم .   مۇنبەردە  ئ ... سەھنە تەييارلىغىنى قىلغاچ تۇرايلى ئەمسە ، كۆرۈنۈشنى نەدە ئالساق بولاكىن ؟،  چولپان بۇلۇشنى خالايدىغانلار ، تېمىغا ئىنكاس يېزىڭلار، پۇرسەت غەنىمەت ، ياخشى روللار تۈگەپ كەتمىسۇن  يانا ، ئالاقىلاشقۇچى :پارلاق ، ئەپچىلەم

چېچەك

	جانىم،كۆرمىگىلى ئۇزۇن بولغان سىزنى،،نېمە ئىش قىلۋاتدىكىن دېسەم،ئەل قاتارى كىنو ئىشلەۋاتقان گەپمىدى؟ ئەزەلدىن ۋىسالغا يەتكەنلەر كۆپ يېزىلدىغان قەلمىڭىزدە،تىراگىدىيەنى كۆرۈپ ماۋۇ كۆڭۈل يېرىم بۇلۇشقا تەييار تۇرىۋاتىدۇ.. باش رولنى مەن ئالماي،نىگارەنىڭ ئاپسى بۇلۇپ بەرسەم قانداق دەيسىز؟بولالمىغان كۈيئوغلۇمغا ھازا ئېچىشنى باشلىۋەتتىم ئەمسە...،ئۆزۈمنىڭمۇ يىغلىغۇسى كېلىپ تۇرغان. (بۈگۈن كۆڭلۈم يېرىم،شۇڭا قاملاشمىسمۇ ئۆزۈمگە ئۆزۈم چاقچاق يېزىپ ئولتۇرۇپتىمەن،ئەپۇ قىلىڭ ھە.)