قاغا (ھىكايە)

faryad

	قاغا (ھىكايە) ۋاھاپجان قۇربانقۇل تەۋەررۈك (تاجىك)       خۇدايارخان بوۋاي مەسچىتتىن قايتىپ كېلۋاتاتتى ، مەسچىت بىلەن ئۇنىڭ ئۆيىنىڭ ئارىلىقى ئانچە يىراق ئەمەس . ئۇنىڭ مەسچىتكە بارار يولى كەنت مەكتپىنىڭ ئالدىدىن ئۆتەتتى . مەكتەپ ئالدىدىكى ئېرىقنىڭ ئىككى تەرىپىگە سېلىنغان قاتار-قاتار يوغان تېرەكلەردە بىر توپ قاغىلار قونۇشۇپ تۇراتتى . ئۇ ئادىتى بويىچە مەكتەپ ئالدىدىكى يولدىن ئۆتكەچ ، ئوڭ قولىدىكى تەسۋىسىنى سول قولىغا ئېلىپ ،ئوڭ قولىنى يانچۇقىغا سېلىپ بىر سىقىم داننى ئېلىپ ئۇنى يولنىڭ بويىنى ئازراق قارىدىۋىتىپ چاچتى . - يەڭلار قاغىلىرىم ، يەڭلار، سىلەرمۇ خۇدانىڭ جاندارلىرى ... دەرەخكە قونۇۋالغان يۈزدەك قاغا ئىككىدىن- ئۈچتىن يوپۇرۇلۇپ كېلىپ «ئەتىگەنلىك ناشتا» غا ئۆزلىرىنى ئېتىشتى . ئۇ قاغىلارنىڭ ئۆزى چاچقان دانغا ئاچكۆزلۈك بىلەن ئېتىلغىنىنى كۆرۈپ ، ھوزۇرلىنىپ كۈلۈپ قويدى ، ساقىلىنى سىلاپ تۇرۇپ « -بىچارىلار ،سىلەرگىمۇ جان » دەپ قويدى . -توۋا، قېرىغاندا ئادەم ئۇنۇتقاق بولۇپ قالدىكەن، ئاتا- ئانامنىڭ ، بوۋىلىرىم ۋە ئۇرۇق-تۇققانلىرىمنىڭ روھىغا دۇئا قىلىپ كېلەي ،-كۇسۇلدىدى ئۇ. بۆگۈن پەيشەنبە كۈنى بولغاچقا خۇدايارخان بوۋاي ئۇدۇل ئۆيىگە ماڭماي ، ئايلىنىپ قەبرىستانلىققا قاراپ يول ئالدى. ئۇنىڭ قارىشىچە ھەر پەيشەنبە كۈنى ئەتىگىنى ئۆلگەنلەرنىڭ روھ-ئەرۋاھلىرى ئۇرۇق-تۇققان، يار-بۇرادەرلىرىنىڭ قەبرىستانلىققا كېلىپ دۇئا قىلىشنى كۈتۈپ تۇرارمىش . ئۇلار كەلسە ئىنتايىن خوشال بولارمىش ، ئەگەر كەلمىسە غېرىپسىنىپ ئۇلارنىڭ چۈشىگە كىرەرمىش . «تاس قاپتىمەن ئۇنتۇپ قالغىلى ، قېرىپ پۇتۇم گۆرگە ساڭگىلىغاندا قارغىش قېپى بولاركەنمەن » دەپ ئويلىدى ئۇ . ئۇ ئاتا-ئانا، ئۇرۇق تۇققانلىرىنىڭ قەبرىلىرى ئالدىغا كېلىپ ئۈستىدىكى قارلارنى ئورۇق قوللىرى بىلەن قارىداپ سۈپۈردى ھەم قەبرە ئالدىدا يۈكۈنۈپ ئولتۇرۇپ ئۇزاق قىرائەت قىلىپ ، دۇئاغا قول كۆتۈردى. ئاتا-ئانا، ئۇرۇق-تۇققانلىرىنىڭ گۇناھى سەغىر ۋە كەبرىلىرىنىڭ مەغپىرەت قىلىنىشىنى ، روھلىرىغا جەننەت تىلەپ قورايدەك قېتىپ قالغان قوللىرى بىلەن كوسا ساقىلىنى سىلىدى. -قاق قاق ! قەبرە بېشىدىكى تۇغ-شەددەلەرگە ، قەبرىستانلىق ئەتراپىدىكى قېرى توغراقلارغا قونۇۋالغان قاغىلار قاقىلىدىدى. خۇدايارخان بوۋاي ئورنىدىن ئاستا تۇرۇپ پىچىرلىدى. -ھە نىمە بولسا جۇپ قاقىلدىدى . چوقۇم يارىشىدۇ . ئۇ يانچۇقلىرىنى ئاختۇرۇپ بىر سىقىم داننى ئېلىپ قەبرە ئۈستىگە چاچتى . -يەڭلار قاغىلىرىم يەڭلار، سىلەرمۇ خۇدانىڭ جاندارلىرى ... ئۇنىڭ قارىشىچە قەبرىگە چېچىلغان يىمەكلىكلەرنى قاغا-قۇزغۇنلار يېسە شۇ ئۆلگەن ئادەمنىڭ روھى خوش بولۇپ، ئالەمچە مىننەتدار بولارمىش . ئۇ قەبرىستانلىقتىن ئايرىلىپ ، يىراقتىن كەينىگە بۇرۇلۇپ قارىدى. ئۇ دان چاچقان قەبرىگە يىگىرمە-ئوتتۇزغا يېقىن قاغا ئولىشۋالغانلىقىنى كۆرۈپ كۈلۈپ قويۇپ ئۆيى تەرەپكە بۇرۇلۇپ كېتىپ قالدى . رەۋەخان موماي ھەر كۈنى ئۇ كەلگۈچە ئەتكەن چاينى تەييارلاپ تۇراتتى . ئۇ ئۆيگە كىرىپ داستىخانغا ئولتۇرۇپ ناشتا قىلدى . «خۇداغا شۇكرى » دىدى ئۇ دۇئادىن كېيىن . -ھوي كەمپىر ، تۈنۈگۈن ئالغان چاي-سوپۇنلارنى مەرغۇپتىن نودەرلەرگە ئەۋەتىپ بەرگىن ، ئۇ بۆگۈن ماڭماقچى. - ماقۇل ، ئۇنداقتا مەن ھازىرلا ئاپىرىپ بېرەي . خۇدايارخان بوۋاينىڭ ئوغلى نودەرلەر يايلاقتا ئىدى . نودەرنىڭ ئون بىر ياشلىق بىر بالىسى بار، كېلىنى گۈلجاھانمۇ ياخشى ئايال ئىدى .بوۋاي نەۋرىسىنى ئويلاپ ئۇنى سېغىنغانلىقىنى ھېس قىلدى . -راست ، دەپ قوي ، فازىلنى ئەۋەتۋەتسۇن ، نەۋرەمنى سېغىندىم. -ماقۇل . رەۋەخان موماي تەييارلىغان نەرسە كېرەكلەرنى ئېلىپ چىقىپ كەتتى . خۇدايارخان بوۋاي نەۋرىسى فازىلنى ۋە ئونىڭ شوخ قىلىقلىرىنى ئويلاپ كۈلۈپ قويدى ،-دە تەسۋىسىنى قولىغا ئالدى . ئۇنىڭ كوسا ساقاللىرى يىنىك تىترەيتتى ، لەۋلىرى بىلىنەر - بىلىنمەس مىدىرلايتتى ... - يەڭلار قاغىلىرىم ،يەڭلار سىلەرمۇ خۇدانىڭ جاندارلىرى يەنە بىر پەيشەنبە كۈنى ئادىتى بويىچە قاغىلارغا دان چېچىپ بەردى ، قەبرىستانغا باردى ، ئۇ يەردىمۇ دان چاچتى . قاغىلار داننى يىدى ، بوۋاي خۇشال بولدى . ئۇ قەبرىستانلىقتىن ئۆيگە قايتىپ كەلگەچ ئەتراپقا قارىدى ،كۆردىكى قەبرىستاندىكى داننى يەپ بولغان قاغىلار بوۋاينىڭ كەينىگە كىرۋالغاندى . - قو ... بوۋاي كەينىگە كىرۋالغان قاغىلارنى قولىنى شىلتىپ ھەيدىدى. بىراق قاغىلار قاچقاندەك قىلىپ يەنە بوۋاينىڭ كەينىدىن سوكۇلدىشىپ مېڭىۋەردى . بوۋاي ئۆيىگە كىرىپ ناشتىسىنى قىلدى . تورۇسقا قاراپ ئولتۇرۇپ تەسۋى سىرىشقا چۈشتى . -قاق ، قاق - قاق ، قاق -جۈپ - تاق ، جۈپ ، ئاغزىڭغا ياغ دىدى بوۋاي. ئۇ ئەتىگەندە قاغىلارنىڭ قاقىلىدىشىنىڭ شۇملۇقنىڭ بىشارىتى ئىكەنلىكىنى بىلسىمۇ ، جۇپ قاقىلىدىشىنى خۇشاللىق ، خۇشلۇق دەپ چۈشىنپ كۆڭلىنى خوش قىلاتتى . ئۇ ئۆيدىن ئازراق دان ئېلىپ چىقىپ قاغىلارغا چېچىپ بەردى . قاغىلارنىڭ زۇۋانى جىم بولدى. بوۋاي ئۆيىگە كىرىپ كەتتى . بىر چاغدىن كىيىن قاغىلار يەنە قاقىلدىدى. «جۈپ-تاق، جۈپ -تاق» -ئاغزىڭغا پوق ، دىدى بوۋاي قاغىنىڭ قاقىلدىشىنى ساناپ . ئۇ يەنە سىرتقا چىقتى ، بۇ قېتىم ئۇ قاغىلارغا دان تاشلمىدى، قولىغا بىر تاشنى ئېلىپ قاغىلارغا قارىتىپ ئاتتى . قاغىلار يەردىن ئۇچۇپ دەرەخلەر قوندى . -قاق،قاق ، قاق «جۈپ- تاق، جۈپ-تاق» - ئاغزىڭغا پوق دىدى بوۋاي . بوۋاي ئۆيگە كىرىپ كەتتى ، سۇپىدا ئولتۇرۇپ تەسۋى سىرىشكە چۈشتى . قاغىلار بولسا قاقىلدىماقتا ئىدى . بوۋاي قاغىلارنىڭ قاقىلدىشىنى سانىماقتا ئىدى . -جۈپ -تاق ... - ئاغزىڭغا پوق . دىدى بوۋاي. « قاغا تاق قاقىلدىدى ، بۇ شۇملۇقتىن دېرەك . ئۆتكەندە غۇلاممەمەتنىڭ ياڭىقىغا بىر توپ قاغا قونۇپ تاق قاقىلدىغان ، ئارىدىن تۆت-بەش كۈن ئۆتە-ئۆتمەي ياش ئوغلى يايلاقتا تاغدىن غۇلاپ تۈگىدى ، بىچارىنىڭ جەسىتىمۇ چۇل-چۇل بولۇپ كەتكەندى ، ھەي، يەنە نىمە شۇملۇقلار بولىدىكىن ! بوۋاي يۇرت مەھەللىدىكى ئاغرىق -سىلاقلارنى بىرمۇ بىر ئويلاپ چىقتى. «راست ، مەھەللىدىكى شايىپ ئوغلى بەگيارنى دۇختۇرخانىغا ئېلىپ كېتىپتىكەن، ئۇ ساقايغانمىدۇ؟» ئۇ يۈرىكىنىڭ تۇيۇقسىز بىر يەرلىرى ئاغرىغاندەك ھېس قىلدى . چۈنكى قاغىنىڭ تاق قاقىلدىشى ، يەنە كېلىپ ئۇنىڭ ئىشىك ئالدىدا قاقىلدىشى ئۇنى سەل ئەنسىرىتىپ قويدى . قاغا يەنە قاقىلدىدى ، يەنە كېلىپ تاق ... تۇيۇقسىز كاللىسىغا يايلاقتا تۇرۋاتقان ئوغلى كەلدى. -نودەرلەر تىنچ-ئامانمىدۇ؟ ئۆتكەندە يايلاققىمۇ قار خېلى كۆپ يېغىپتىكەنمىش ، باللىرىم سالامەتمىدۇ؟ئۇ قىيىن يوللارغا كىرمىگىدى، ئۇلۇغ ئاللاھ، ئۆزەڭ ساقلىغايسەن. باللىرىمنى تىنچ-ئامان قىلغايسەن. بوۋاي ئەمدى يايلاقتىكى بالىلىرىدىن ئەنسىرەشكە باشلىدى. ئۇ پۇت قولىدىن جان كېتىۋاتقاندەك ، ماغدۇرسىزلىنۋاتقاندەك ھېس قىلدى . - موماي نەگە كەتكەندۇ؟! دىدى ئۇ پىشانىسىدىكى تەرلەرنى سۈرتكەچ. دادىسىنىڭ ئېيتىپ بېرىشىچە، قاغا خەۋەر يەتكۈزگۈچى بولۇپ ، جۈپ قاقىلدىسا خوشلۇق ، تاق قاقىلدىسا شۇملۇق بولىدىكەن. -جۈپ قاقىلدىغىدى ئىلاھىم ... ئۇ ئۆزىنىڭ تومۇرىنى تۇتۇپ باقتى ، تومۇرى ياخشى سوقۇۋاتاتتى . «نىمە بولغاندىمەن، پۇت قوللىرىمدىن جان كېتىۋاتقاندەك بولۇۋاتىمەنغۇ!؟» دەپ ئويلىدى ئۇ . ئاڭغىچە پايپاسلاپ رەۋەخان موماي كىرىپ كەلدى ، ئۇ خۇدايارخان بوۋاينىڭ چىرايىنىڭ سارغىرىپ كەتكەنلىكىنى كۆرۈپ ،يېنىغا كېلىپ سورىدى. - نىمە بولدى سىلىگە، چىرايلىرى بىر دەمدە سارغىرىپ قاپتىغۇ؟ -شۇم قاغا، تاق قاقىلداۋاتىدۇ. نىمە شۇملۇقلارنى ئېلىپ كەلگەندۇ؟ - ئاغزىغا پوق ، قاقىلداۋىرىدۇ. سىلىمۇ زە قاغىغا دان بېرىپ ئۆزەڭلىگە ئۈگىتىپ قويغان گەپ . -ئەنسىرەپ قالدىم . بالىلارغا خەۋەر قىل، قايتىپ كەلسۇن، ئاۋايلاپ ماڭسۇن. كۆڭلۈم بىر شۇملۇقنى سېزىپلا تۇرىدۇ . -يوق گەپنى قىلمىسىلا ، سىلى ساپساق تۇرسىلا -بولدى، مەن دىگەندەك قىل . بوۋاينىڭ كېچىچە ئۇيقۇسى كەلمىدى ، ئۇنىڭ كاللىسىدا ھۆكۈم سۈرۋاتقىنى يايلاقتا تۇرۋاتقان ئوغلى، نەۋرىسى... قاغىنىڭ تاق قاقىلدىشى ، يەنە كېلىپ ئىشك ئالدىدا . تاڭغا مەھەل ئازراق كۆزى يۇمۇلىۋىدى - خوراز چىللاپ ئويغىتۋەتتى . ئورندىن تەسلىكتە تۇرۇپ ئارانلا تاھارەتكە چىقتى -دە، ئۆيدىلا ناماز ئوقۇدى،ئۇزاق قىرائەت قىلىپ دۇئاغا قول كۆتۈردى. - ئۇلۇغ ئاللاھ ئېگەم، باللىرىمنى بالا-قازادىن يىراق قىلغايسەن...باللىرىمغا تىنچلىق ، خاتىرجەملىك ئاتا قىلغايسەن ...ماڭا ئاز ئاغرىغ ، ئاسان ئۆلۈم بەرگەيسەن ...باللىرىمنىڭ ئالدىغا كىرىشكە نېسىپ قىلغايسەن.... بوۋاي كۆزلىرىدىن تامچە-تامچە ياش تۆكۈپ ئۇزاق دۇئا قىلىپ كوسا ساقاللىرىنى سىلىدى. ناشتىدا گىلىدىن غىزامۇ تۈزۈك ئۆتمىدى . تەسۋى سىرىپ ئولتۇردى ، بىر چاغدا قاغا قاقىلدىدى. «جۈپ-تاق، جۈپ -تاق» -ئاغزىڭغا پوق دىدى بوۋاي. بوۋاينىڭ كۆڭلى تىخىمۇ يېرىم بولدى . ئۇ ئورندىن تەستە تۇرۇپ ئازراق دان ئېلىپ سىرتقا چىقتى . ئۇنىڭ ئۆيىنىڭ ئالدىدىكى دەرەختە ئون- يىگىرمىدەك قاغا بويۇنلىرىنى سوزۇشۇپ تۇراتتى . خۇدايارخان بوۋاي داننى چاچقاچ پەس ئاۋازدا سۆزلىدى. -قاغىلىرىم، داننى يەپ يىراقلارغا كېتىڭلار، مىنى بىسەرەمجان قىلماڭلار. قاغىلار يوپۇرۇلۇپ كېلىپ چېچىلغان دانغا ئۆزلىرىنى ئاتتى . بوۋاي ئۆيگە كىرىپ كەتتى . بىر چاغدىن كيىن قاغىلار يەنە قاقىلدىدى.بۇ قېتىم بوۋاي قاغىنىمۇ تىللىمىدى . بوۋاينىڭ روھىدا ھۆكۈم سۈرۋاتقان نامەلۇم بالا-قازا ئۇنىڭغا دەھشەتلىك تۇيۇلدى.كۆز ئالدىغا شاھىپنىڭ يىگىرمە ياشلىق ئوغلى بەگيار كەلدى، « ئۇلۇغ ئېگەم، ياشلارنىڭ ئالدىدا مېڭىشقا نېسىپ قىلغايسەن.» دىدى ئۇ. بوۋايغا پۇت- قوللىرى جانسىزلىنۋاتقاندەك ،تومۇر سوقۇشىمۇ رېتىمسىزدەك تۇيۇلدى.ئۇ ئاغزى قۇرۇغاندەك تۇيۇلۇپ، چايداندىن ئازراق قايناقسۇ قۇيۇپ ئىچمەكچى بولۇپ ئورنىدىن تۇردى- تۇردىيۇ كۆزلىرىگە قاراڭغۇلۇق تىقىلىپ سەنتۈرۈلۇپ ئولتۇرۇپ قالدى. رەۋەخان موماي كالا-ئۇلاغلارغا ئوت- سامان تاشلاپ بولۇپ ئۆيگە كىردى. بوۋاينىڭ خامۇش ھالىتىنى كۆرۈپ سەل ئەنسىرىدى. - زادى نىمە بولدى سىلىگە ؟ تۈنۈگۈنلا ساق ئىدىلە ، بىر قىسمىلا تۇرىلىغۇ؟ -بولدى، بالىلاردىن ئەنسىرەۋاتىمەن. بالىلارغا خەۋەر قىلغانمۇ؟ -قىلغان. -ماڭا ئورۇن سەپ بەرگىن. -ماقۇل رەۋەخان موماي ھاسراپ تۇرۇپ ئورۇن سالدى ، بوۋاي يوتقانغا كىرىپ ياتتى . ئۇ كۆزلىرىنى تورۇسقا تىككىنىچە نىمىلەرنىدۇ ئويلىغاچ ياتتى . بىر چاغدىن كىيىن قاغا يەنە قاقىلدىدى . «جۈپ-تاق، جۈپ -تاق»-پىچىرلىدى بوۋاي. - ئاغزىڭغا پوق، دىدى رەۋەخان موماي ئۇن ئۇماچلاۋىتىپ. -بولدى تىللىما ، ئۇمۇ خۇدانىڭ جاندىرى، يەنە كېلىپ خەۋەرچىسى. بوۋاي چۈشتىمۇ ئاشتىن بىر قوشۇقمۇ ئىچكىلى ئونىمىدى، ئۇنىڭ گىلىدىن غىزا ئۆتمەيۋاتاتتى . «سالامەت قايتىپ كەلگىيدى !» كۆز ئالدىغا يالغۇز ئوغلى نودەر، نەۋرىسى ، كېلىنى ، قاتارلىقلار كېلىپ، نۇرسىز كۆزلىرىدىن ئىككى تامچە ياش مەڭزىنى بويلاپ كوسا ساقاللىرى ئارىسىغا كىرىپ كەتتى . چۈشتن كېيىن نودەر، گۈلجاھان، فازىل قاتارلىقلار يايلاقتىن قايتىپ كەلدى. نودەر ئەنسىرىگەن ھالدا دادىسىنىڭ يېنىغا يۈگۈرۈپ كەلدى، ئۇنىڭ پىشانىسىنى تۇتتى. - نىمە بولغانسەن دادا، بىزگە بالدۇرراق خەۋەر قىلساڭلار بولمامتى! بوۋاي نۇرسىز كۆزلىرىنى جانسىز چىمىلدىتىپ نودەرگە قارىدى.چىرايىدا خىرە تەبەسسۈم ئەكىس ئەتتى. كۆز قارچۇقىدىن بىر تامچە ياش سىرىلىپ تەكيىگە چۈشتى. - ھە نىمە بولسا سالامەت كېلۋاپسىلەر ، بەك ئەنسىرىدىم . -ئانا ، دادامنى دۇختۇرخانىغا ئېلىپ كىرىپ ئاسما سالدۇرايلى. - بولدى، ھاجىتى يوق. خۇدادىن كەلسە دۇختۇر نىمە قىلالايتتى بالام. مەن قېرىپ قالغان ئادەممەن.پىشانەمگە پۈتۈلگىنىنى كۆرەي، ئىمانىم بىلەن ماڭاي. بوۋاي پەس ئاۋازدا ئىڭرىدى. ئۇنىڭ نەزىرىدە دۇختۇرنىڭ دورا-ئوكۇللىرى كىشىنىڭ ئىمانىنى بۇلغايتتى. بوۋاي كەچتىمۇ ئاغزىغا بىر قوشۇق غىزامۇ ئالمىدى. پەقەت بىر قوشۇق قايناقسۇ ئىچتى . بوۋاينىڭ بالا -چاقىلىرى كېچىچە ئۇنىڭ بېشىدا ئولتۇردى. بۇۋاي كېچىچە كىرپىك قاقماي چىقتى ، ئۇ بارغانسىرى ماغدۇرىدىن كېتۋاتاتتى. -بۆگۈن كۈن نىمە؟ بوۋاي پەس ئاۋازدا جانسىز ئىڭرىدى. -جۈمە دەل شۇ چاغدا قاغا قاقىلدىدى. -جۈپ-تاق، جۈپ -تاق بوۋاينىڭ ساقىلى يىنىك تىترىدى، جانسىز دەمدە قاغىنىڭ قاقىلدىشىنى سانىدى. چىرايىدا سۇس تەبەسسۇم جىلۋە قىلدى . چۈنكى بوۋاينىڭ نەزىرىدە جۈمە كۈنى جېنى چىققانلارغا ئۇ دۇنيادا سۇئال-سوراق يوق بولۇپلا قالماي، بەلكى يەنە ئۇدۇل جەننەتكە كىرەتتى . -دان ... دان چاچ دىدى ئۇ زەئىپ ئاۋازدا رەۋەخان مومايغا شەرەت قىلىپ. رەۋەخان موماي چىقىپ كەتتى . خۇدايارخان بوۋاي بۆگۈن چۈشتىمۇ ھىچنەرسە ئىچمىدى. چۈشتىن كېيىن يۇرت ئاقساقاللىرى خۇدايارخاننى كۆرۈش ئۈچۈن كىرگەندى. -توۋا بۇ قاغىلارنىڭ سىلەرنىڭ ئىشككىلا كېلۋالغانلىقىنى كۆرۈپ ئەنسىرىدىم.كىيىن ئاڭلىسام خۇدايارخان بىتاپ بولۇپ قاپتۇ.-دىدى مەسچىت ئىمامى ساھىپ موللام . - خۇدايىم شىپالىق بىرەر . -پىرە ئويناتساق بوپتىكەن. -رەۋەخان ئوتلاپ قاقتىلىمۇ ؟ -ياق . - كەچتە بىر ئوتلاپ قېقۋەتسىلە . -ماقۇل . ئۇلار چىقىپ كېتىشتى . بۆگۈن كېچىچە خۇدايارخان بوۋاي دادىسى نەجمىدىن موللامنىڭ ئىسمىنى ئاتاپ چىقتى . بالىلار خۇدايارخاننىڭ ئەتراپىدا ئولتۇرۇشاتتى، تاڭ يورۇدى . قاغا يەنە قاقىلدىدى . خۇدايارخان بوۋاي ئاخىرقى نەپىسىنى يىغىپ « جۈپ-تاق، جۈپ-تاق» دەپ سانىدى -دە، قېتىپ قالغان قوللىرى ساڭگىلاپ ، كوسا ئىڭەكلىرى چۈشۈپ قالدى ...   2012-يىلى ئاقتۇ

يا

	ھېكايىڭىز ياخشى چىقىپتۇ ، قەلەم قۇۋىتىڭىزمۇ ياخشى ئىكەن . سىز چوڭلاردىن ئاڭلىغانمۇ ئاڭلىمىغانمۇ بىلمىدىم ، لېكىن چوڭلارنىڭ تۇپراق بېشىنى ھەر پەيشەنبە كۈنى يوقلاپ تۇرماق لازىم . شۇڭا مىش پىش دېگەن گەپلىرىڭىزنى نېرى ئاپىرىڭ ، ما مۇنبەرگە ياشلارمۇ كىرىدۇ ، ئەتە ئۆگۈن ئاتا ئانىسىنىڭ قەبرىسىگە چىقماي بۇ خۇراپىيلىق دەپ تۇرىۋالمىسۇن . پەرزەنتنىڭ ئەڭ چوڭ ۋەزىپىلىرىنىڭ بىرى ئاتا ئانىسىنىڭ ھەققىدە دۇئا قىلىش . شۇڭا ھېكايە بولسىمۇ قىلىشقا تېگىشلىك ئىشلارنى بۇرمىلىمايلى .

esyankar75

	ھىكايە ناھايىتتى ياخشى يىزىلىپتۇ ، بىرىگە ئاتا ئانىلارنىڭ بالىلارنىڭ غىمنى قىلىپ يۈرۈيدىغانلىقى تەسۋىرلەنسە يەنە بىرگە خۇراپاتلىق نادانلىقنى ياخشى قامچىلاپتۇ ، ياخشىراق تۈزۈتۈلۈپ گىزىت ژورناللارغا ئەۋەتىپ باقسا بولىدىكەن.

sawapkar

	خۇراپاتلىق گۇناھنى شىركنى تاپسا مىھرىبانلىق غەم ئۇنى يۇيالمايدۇ

turk119

	yakxi hikayikan

dolantograk004

	بىچچارە بوۋاي

parlak/889

	ھېكايە يامان ئەمەس چىقىپتۇ، لېكىن ھېكايىدە ئىنتايىن بىدئەت ئىشلار سۆزلىنىپتۇ

albax

	بۇرۇن بىر يەردە كۆرگەندەكلا قىلىمەن ، لېكىن ئېنىق يادىمغا ئالالمىدىم . بىراق كۆرگىنىم ئېنىق !

erxat627

	نەرى بىدئەت بولىدۇ . سىز يىڭى زاماننىڭ ئاكتىپ شۇئارچىلىرىدىن ئوخشايسىز ھە!

yasinawut

	ھىكايىڭىز ياخشى يىزلىپتۇ ، ئەمما تۇقارقىلار ئىيىتقاندەك بەزى تەرەپلەردىن دىققەت قىلسىڭىز بولغىدەك ...