 |
 |
 |
 |
كارخانىچىلىق بىردەملىك ھاياجاننىڭ تۈرتكىسىدە ئېلىپ بېرىلىدىغان ئىشلاردىن ئەمەس، ئۇ سىستېمىلىق ۋە پىلانلىق يۈرگۈزۈشنى تەلەپ قىلغاندىن سىرت، مۇكەممەل قۇرۇلمىغا ئىگە بولۇشنى شەرت قىلىدۇ. بۇ نۇقتىدىن ئېيتقاندا، مۇۋەپپەقىيەت قازانغان كارخانىچى بولۇشنىڭ ئۇنچە ئاسان ئەمەسلىكىنى ھېس قىلىپ يېتەلەيمىز. مۇۋەپپەقىيەت قازانغان بىر كارخانىچى بولۇش ئۈچۈن، مۇكەممەل بولغان بىلىم قۇرۇلمىسىغا، كەسپىي ساپاغا، سەگەكلىككە، چوڭقۇر تەپەككۇرغا ئىگە ۋە توغرا بولغان رىقابەتكە ئىگە بولۇشى كېرەك. ئەگەر كارخانىچىلاردا سەمىمىيەت، دۇرۇس نىيەت، مۇكەممەل بىلىم قۇرۇلمىسى ۋە يىراققا نەزەر تاشلايدىغان سەگەك بىر كاللا بولمىسا، ئۇنىڭ رىقابەتتە ئۈزۈپ چىقىشى ئەسلا مۇمكىن ئەمەس!
قانداق قىلغاندا، يۇقىرىدا تىلغا ئېلىنغان كەسپىي ساپاغا، مۇكەممەل بىلىم قۇرۇلمىسىغا ئىگە بولغىلى بولىدۇ؟ بۇنىڭ ئۈچۈن كەسپىي ماتېرىياللارنى كۆپرەك كۆرۈش، ئۇنىڭدىن ياخشى پايدىلىنالايدىغان بولۇش، كارخانىنىڭ ئومۇمىي ھالىتىنى ۋە دەۋرنىڭ ئىھتىياج تەلىپىنى چىقىش قىلىدىغان، سۈپەتنى ئالدىنقى ئورۇنغا قويىدىغان ئىلغار ئىدىيەنى ئۆزىگە يېتەكلىك قىلىش بىلەن بىرگە، ئەخلاقىي جەھەتتىمۇ يېتىلىش زۆرۈر.
چۈشىنىش كېرەككى، نۆۋەتتە ئۇيغۇر تىل-يېزىقىدا نەشر قىلىنغان ئادەمگە نەپ بېرەلىگۈدەك كەسپىي ماتېرىياللارنى تاپماق بەسى مۇشكۈل. شۇڭا خەنزۇ تىلىدىكى باشقۇرۇششۇناسلىق، بازارشۇناسلىق، ئىقتىسادشۇناسلىق، بازار ئىگىلىكى... ھەققىدىكى كىتابلارنى كۆرۈشكە توغرا كېلىدۇ. بۇنىڭغا قاراپ ئېيتىشقا بولۇدىكى، روناق تېپىشنى ئارزۇ قىلىدىغان كارخانىچىلار خەنزۇ تىل – يېزىقىنى پۇختا ئىگىلىشى كېرەك.
دەۋر تەلىپىنى ئۆلچەم قىلىپ تۇرۇپ ئېيتقاندا، بىر قىسىم مىللىي كارخانىچىلىرىمىزنىڭ بىلىم قۇرۇلمىسى دېگەندەك يۇقىرى ئەمەس، كارخانا باشقۇرۇش ۋە باشقا تەرەپلەردىكى ساپاسىمۇ نىسبەتەن تۆۋەن. ئۇلار ئاللاھنىڭ ھىممىتى بىلەن ئازراق پۇل تاپقاندىن كېيىن، ئەتراپىدىكىلەرنىڭ ھە دەپ شىركەت قۇرۇۋاتقانلىقىنى كۆرۈپ، ئۇلاردىمۇ شىركەت قۇرۇش ئىستىكى تۇغۇلۇپ دەرھال بىر شىركەتنى ئەنگە ئالدۇرۇپ، ئالدى-كەينىنى ئويلىماستىنلا ئىش باشلايدىغان ئەھۋاللار خېلى زور سالماقنى ئىگەللەيدۇ، ئەمما ئۇلاردا شىركەت بىلەن ئەنئەنىۋىي سېتىقچىلىقنىڭ پەرقى نېمە؟ شىركەت دېگەن نېمە؟ ھازىرقى زامان كارخانىچىلىقى دېگەن نېمە؟ ئىلمى باشقۇرۇش دېگەن نېمە؟ بازارشۇناسلىق دېگەن نېمە؟ شىركەت مەدەنىيىتى دېگەن نېمە؟... دېگەندەك بىر تالاي كەسپىي سوئاللارغا نىسبەتەن ئازراق خېمىر تۇرۇچمۇ يوق، بۇ سوئاللارغا نىسبەتەن ئاساسىي جەھەتتىن كۆپ نەرسە بىلىپ كەتمەيدۇ، بۇ ھەرگىزمۇ ئۇلارنىڭ خاتالىقى ئەمەس، بەلكى نەشرىياتلاردەك مەدەنىيەت ساھەسىدىكىلەرنىڭ مەسئۇلىيىتىدۇر.
نەشرىياتلار بۇ ھەقتىكى نەپ يەتكۈدەك كىتاب-ماتېرىياللارنى نەشردىن چىقارمىغاندىكىن، بۇ بىزنىڭ «ساپاسىز» كارخانىچىلىرىمىز ئۆزىنىڭ ساپاسىزلىقىنى تۈگىتىشكە ئامالسىز، ئۇلار كۆرەي دېسە كىتابخانىلاردا نەپ بەرگۈدەك كىتابلار يوق. ئەگەر ئۇلار خەنزۇچە ماتېرىياللارنى كۆرسىچۇ؟ يۇقىرىدا تىلغا ئالغىنىمىزدەك، دىيارىمىزدىكى كۆپ ساندىكى كارخانىچىلارنىڭ بىلىم قۇرۇلمىسى دېگەندەك يۇقىرى ئەمەس، ئۇلارنىڭ كۆپ ساندىكىلىرى تېخى ئالىي مەكتەپ يۈزى كۆرمىگەن، خەنزۇچە سەۋىيەسى يۇقىرى ئەمەس. مۇشۇنداق بولغان ئىكەن ئادەتتە كۈندىلىك تۇرمۇشتا خەنزۇچىنى تولۇق چۈشىنەلمەي يۈرگەندە خەنزۇچە يېزىلغان كەسپىي ماتېرىياللارنى ئوقۇپ چۈشىنىش ئۇلار ئۈچۈن چوڭ بىر مەسىلە. شۇڭا بۇ خىل ئەھۋالدا بىزنىڭ «ساپاسىز» مىللىي كارخانىچىلىرىمىزدىن ئاغرىنىشنىڭ ئورنى يوق. ئۇلار ھېلىمۇ زور كۈچ بىلەن تىرىشىۋاتىدۇ، مىللىي كارخانىچىلىقىمىزدا ساقلانغان مەسىلىلەرنى كۈچىنىڭ بارىچە ھەل قىلىشقا تىرىشىۋاتىدۇ. ئەمما دەۋرنىڭ ئۇچقاندەك تەرەققىي قىلىشى ئۇلارنى ھالسىرىتىپ قويىۋاتىدۇ، ئەسلىدىنلا بىلىم قۇرۇلمىسى، كەسپىي ساپاسى يۇقىرى بولمىغاچقا ئۇلار ھامان زور دەرىجىدە قىيىنچىلىقلارغا دۇچ كېلىۋاتىدۇ. كارخانىچىلارنىڭ بۇ جەھەتتىكى بوشلۇقلىرىنى تولدۇرۇش ئۈچۈن، ئۇلارنى تەربىيەلەش كۇرۇسلىرى ئېچىلىۋاتقان بولسىمۇ، لېكىن يەنىلا كەملىك قىلىۋاتىدۇ.
«ئىلقۇت كارخانىچىلار تورى»نىڭ قۇرغۇچىسى يۇقىرىقىدەك مەسىلىلەرنى تونۇپ يەتكەندىن كېيىن، مىللىي كارخانىچىلىقىمىزدىكى ساقلانغان مەسىلىلەرنى ھەل قىلىشنىڭ تۈپ ئاچقۇچىنىڭ كارخانىچىلىرىمىزنىڭ كەسپىي ساپاسى، بىلىم قۇرۇلمىسى، توغرا رىقابەت ۋە ئەخلاق ئېڭىنى يۇقىرى كۆتۈرۈشتە ئىكەنلىكىنى ھېس قىلىپ، ئۇزاق مۇددەتلىك تىرىشىش، ئەتراپلىق پىلانلاش، تولۇق تەييارلىق كۆرۈش ئارقىلىق ئاخىرى «ئىلقۇت كارخانىچىلار تورى»نى ۋۇجۇدقا كەلتۈردى.
«ئىلقۇت كارخانىچىلار تورى»نىڭ تۈپ مەقسىتى دىيارىمىزدىكى مىللىي ئىگىلىكنىڭ تېخىمۇ راۋاجلىنىپ گۈللىنىشى ئۈچۈن تېگىشلىك ھەسسە قوشۇپ، مىللىي كارخانىچىلارنى بىمالال ھالدا ئۆز ئانا تىل-يېزىقىدا تەييارلانغان كەسپىي بىلىملەر بىلەن تەمىن ئېتىپ، مىللىي ئىگىلىكنىڭ تەرەققىياتىنى ئىلگىرى سۈرۈشكە بىر كىشىلىك ھەسسە قوشۇپ، مىللىي ئىگىلىكنىڭ تەرەققىياتىنى قولغا كەلتۈرۈشتە ئۆزىنىڭ ئەجرىگە چۈشلۇق ئىقتىسادىي قىممەت يارىتىپ، دىيارىمىزنىڭ، جۈملىدىن ۋەتىنىمىزنىڭ تېخىمۇ گۈللەپ قۇدرەت تېپىشى ئۈچۈن ئۆزىنىڭ تېگىشلىك بۇرچىنى ئادا قىلىش.
|
 |
 |
 |
 |
|
يوللىغان ۋاقتى 2012-12-12 01:19:14 AM
