ئەمىر تۆمۈر باغلىرى

abaytarim

	ئەمىر تۆمۈر باغلىرى           خۇرشىد دەۋران     ساھىبقىران ئەمىر تۆمۈر ھاياتىدا 14 باغ بىنا قىلغان بولۇپ 15- باغنى ساھىبقىراننىڭ كەنجى ئوغلى ئۇلۇغبەگ مىرزىنىڭ ئاتىسى شاھرۇخ مىرزىمۇ ئەمىر تۆمۈرگە ئەگىشىپ بىر باغ بىنا قىپتۇ . باغ پۈتۈپ ، ئاتىسى بىلەن ئوغلىنىڭ شەرىپىگە ئاشۇ يېشىل باغنىڭ بىر بۇلۇڭىدا زىياپەت ،مەجلىس تۈزۈپتۇ . زىياپەتتىن كېيىن شاھرۇخ مىرزا ئاتىسىدىن :          _ پەدەرى بۇزرۈكۋار ، مېنىڭ بۇ بېغىم ھەققىدە نېمە دەيسىز ، سىزگە ياقتىمۇ ؟ دەپ سوراپتۇ . ئەمىر تۆمۈر شۇنداق جاۋاب بېرىپتۇ :      _ ئەي كۆزۈمنىڭ نۇرى ، ئوغلۇم ، سېنىڭ بېغىڭ ناھايىتىمۇ زىبالىق ۋە دىلكۇشا باغ بوپتۇ ، ئەمما دۆلىتى ، بايلىقى بار ھەر بىر كىشى مۇنداق باغنى بەرپا قىلالايدۇ . لېكىن دۇنيادا شۇنداق تەڭداشسىز ئىككى باغ مەۋجۇتتۇركى ، ئۇلارنىڭ بىرىسىنى بەرپا قىلىشقا سەنمۇ ، مەنمۇ ئىنتىلىشىمىز لازىم . ئەمما ، ئىككىنچىسىنى بەرپا قىلىشقا يالغۇز ئۇلۇغبەگ مىرزىلا مۇيەسسەر بولغۇسىدۇر .     شاھرۇخ مىرزا :    _ بىرىنچى باغ قانداق باغ ؟ _ دەپ سورىغانىكەن ، ساھىبقىران جاۋاب بېرىپتۇ :   _ ئۇ باغ ئالىملار ، پازىللار ، شائىرلار ، دانىشمەنلەر ۋە باشقا ئەخلاقلىق ، تەربىيەتلىك ئۇلۇغ ئىنسانلارنىڭ سۆھبىتىدۇر . شۇ ئۇلۇغ زاتلاردىن تەربىيەت ئېلىپ ياخشى ۋە ئىبرەتلىك ئىشلارنى بارلىققا كەلتۈرۈش بۇ باغنىڭ دەرىخى بولۇپ ، مېۋىسى _ ياخشى نامغا ئىگە بولۇشتۇر .     شاھرۇخ مىرزا :    _ ئۇلۇغبەك بەرپا قىلىشقا قادىر ئىككىنچى باغ قانداق باغ ؟ _ دەپ سورىغانىكەن ، ئەمىر تۆمۈر مۇنداق جاۋاب بېرىپتۇ :     _ سەلتەنىتىمىزنىڭ گۆھىرى بولغان ئۇلۇغبەگ بەرپا قىلىدىغان باغنىڭ نامى ئىلىم - مەرىپەت بېغىدۇر ، تەپەككۈر بېغىدۇر . بۇ باغنىڭ دەرەخلىرى كىتاب ، مېۋىلىرى ھىكمەتلەردۇر . قەلەم ۋە ئەقىل يادىكارلىقى ئۆلمەستۇر ، ئەبەدىيدۇر . مەنمۇ ، سەنمۇ بىر كۈنلەر كېلىپ بىر ئۇچۇم تۇپراققا ئايلىنىپ كېتىمىز ، لېكىن ئۇلۇغبەگ ياراتقان ئىلىم كىتابلىرى ئەبەدىلئەبەد ئادەملەرگە ھەمنەپەس بولۇپ قالىدۇ . ئەي كۆزۈمنىڭ يورۇقى ، ئوغلۇم ، يادىڭدا بولسۇنكى ، كىتاب يارىتىش ، ئۆلمەس ئىلىملەرنى مۇجەسسەم قىلغان كىتابلارنى يارىتىش _ ئەقىل - ئىدراك ۋە ئىلمۇ دانىشنىڭ ئاساسى . ھاياتنى ئۆگەتكۈچى تەربىيەچىدۇر !     ( خۇرشىد دەۋراننىڭ " ساھىبقىران نەۋرىسى" ناملىق كىتابى ئاساسىدا تەييارلاندى )    نەشىرگە تەييارلىغۇچى :   مەتقاسىم ئەكرەم . خوتەن ۋىلايەتلىك ئىسلام دىنى جەمئىيىتىدىن دەم ئېلىشقا چىققان .            مەنبە :  بۇلاق ژورنىلى 2012-يىل 1- سانىدىن ئېلىندى .      ياقتۇرۇپ يوللىغۇچى : ئەبەي تارىم .  2012-يىل 12-9 - كۈنى .  شەھىرى شىخو .

tewelgha

	بۇنىڭدا ئەمىر تۆمۈر (تۆمۈرلەڭ ) نى بەكلا مەرىپەتپەرۋەر تەسۋىرلەپ قويۇپتۇ .ئۇ چىڭگىزخاندىن كىيىن ئوتتۇرا ئاسىيانى (بۇنىڭ ئىچىدە قەشقەرمۇ بار )يەنە بىر قىتىم تالان-تاراج قىلغۇچى . شۇ ۋەجىدىن مىڭ سۇلالىسىمۇ ئۇنىڭدىن قورقۇپ سەددىچىننى ھازىرقى جايۇگۇەنگىچە ئۇزارتقان .ھەتتا ئۇلۇغبەگ ھوقۇق تۇتقان مەزگىللەردىمۇ دەككە دۇككىدە  ئۆتكەن .ئۆلۇغبەگ ئوغلى تەرىپىدىن قەست قىلىنغاندىن كىيىنلا كۆڭلى ئارامىغا چۈششكەن ......................

monix

	tewelgha يوللىغان ۋاقتى  2012-12-9 08:04 PM بۇنىڭدا ئەمىر تۆمۈر (تۆمۈرلەڭ ) نى بەكلا مەرىپەتپەرۋەر  ... باھادىرنامە ناملىق كىتابتا ئۇنداق يېزىلماپتۇغۇ  ئۇنىڭدا ئەمىر تۈمۈرنىڭ تولىمۇ ئىستىبداتلىق ھەربى قۇماندان ۋە ئىستىلاچى ئىكەنغۇ .تېخى ئۇنىڭدا ئەمىر تۈمۈرنىڭ قەشقەرنى تالان تاراج قىلغىنى توغرۇلۇق ھېچقانداق مەزمۇن يوقكەن ھەتتا مىرزا مۇھەممەد ھەيدەر كۆرەگاننىڭ تارىخي رەشىدى ناملىق كىتابىدىمۇ بۇنداق مەزمۇن يېزىلمىغان ،سىزنىڭ ئەمىر تۈمۈرگە بولغان قارشىڭىز سەل بىر تەرەپلىمىلىكمۇ ياكى مىنىڭ كۆرگەن تارىخى ماتىرىياللىرىم تازا ئىشەنچىلىك ئەمەسمۇ؟

tewelgha

	monix يوللىغان ۋاقتى  2012-12-9 08:25 PM باھادىرنامە ناملىق كىتابتا ئۇنداق يېزىلماپتۇغۇ  ئۇنى ... باھادىرنامە بولسا تارىخى رومان ،تارىخى كىتاپ ئەمەس .تارىخى رەشىدىدە تۆمۈرلەڭنىڭ مۇغۇلئىستانغا بەش قىتىم ھۇجۇم قىلغانلىغى يېزىلغان .ئۇندىن باشقا ئەرەپ ،پارىس ،غەرىپ ۋە شەرىخ تارىخى كىتاپلىرىدا بەزى تەپسىلاتلار خېلى ئىنىق  .بىز دائىم تارخنى ھۆكۈمرانلار مەككۈملەرنىڭ دۇمبىسىگە يازىدۇ دەيمىز ،تارىخى رەشىدى دەل ئاشۇ ھۆكۇمرانلار يازغان تارخ ( مىرزا مۇھەممەت ھەيدەر كوراگان --خان جەمەتىنىڭ كۈيئوغلى ، تۆمۈرلەڭمۇ كۆراگان ) ، ئۇنىڭدا ئاۋامغا دائىر ئىشلار سۆزلەنمىگەن .پۇتۇنلەي مۇغۇللارغا دائىر ئىشلار يېزىلغان ،تۈرۈك ئاۋامنى بولسا كۆپ  تىلغا ئالمىغان . ئۇرۇش ئارقىلىق تۆمۈرلەڭ ئىمپىريەسىنىڭ  تەركىبىگە قوشۇۋىلىنغان نۇرغۇن تۈرۈك ۋە باشقا ئاۋامنىڭ  ئۆزىگە چۈشلۇق دەرت ئەلەملىرى ۋە تارىخى بار .

تۈمەن0998

	ۋاھ ياخشى گەپلەركەن ،مەيلى مۇڭغۇللار بولسۇن ياكى باشقىلار بولسۇن ،ئاسلىماتسىيە قىلىنىپ كەتمەي ئاسلىماتسىيە قىلىپ كەلگەن مىللەتنىڭ ئەۋلادى بولغانلىقىمىزدىن پەخىرلىنشىمىز كىرەك.ئەتراپقا تەپسىلى دىققەت قىلساقلا بۇنىڭ ئالامەتلىرىنى بايقىيالايمىز.

xiho

	خەلقىمىزنىڭ مائارىپ ئىشلىرى ئۈچۈن تىنىمسىز تىرىشىپ، پەرزەنتلىرىمىزنى ئىلىم-مەرىپەت نۇرلىرى بىلەن يۇرۇتۇشنى ئۆزەڭنىڭ مەسئۇلىيىتى ۋە يۈكسەك بۇرچى دەپ بىلىپ كىلىۋاتقان دوستۇم، ئەنە سەن خىزمەت قىلىۋاتقان مەرىپەت ئوچىقى دەل تېمىدا ئېيتىلغان مەرىپەت بېغىدۇر ، تەپەككۈر بېغىدۇر .