تېڭىرقىغان ھېسلار ...

abaytarim

	تېڭىرقىغان ھېسلار ...          مەن سېنى ھەقىقەتەن تونۇيالماي قېلىۋاتاتتىم ، ياق تونۇدۇم ، بىراق سېنىڭ تونۇماسقا سېلىشىڭ بىلەن ئىككىمىز تونۇشمايدىغان باشقا - باشقا ئادەمگە ئايلىنىپ كەتكەنىدۇق . ئىنساننىڭ كارامەتلىرىنى چۈشەنمەك نېمىدىگەن تەس - ھە! . شۇڭلاشقىمۇ ئىنسانلار بىر- بىرنى چۈشىنىشنىڭ ئورنىغا نەزىرىنى ماددىي دۇنيانى چۈشىنىشكە يۆتكىۋەتتىمۇ قانداق . ..      ئىككىمىز  ھاياتىمىزنىڭ ئەڭ غۇبارسىز چاغلىرىنى بىللە ئۆتكۈزگەنىدۇق . مەيلى سەن ھازىر قانچىلىك مەئىشەتكە ئېرىشىپ كەتكەن بولساڭمۇ ، ئەشۇ غۇبارسىز چاغلىرىمىزدىكىدەك كۈلەلىشىڭ ناتايىن . چۈنكى ئەتراپىڭدا يۈرگەن دوسلىرىڭنىڭ ھەممىسى يېڭى ئىكەن . توغرا سەن ھەممىنى يېڭىلاپسەن . ھەتتا ئىدىيەڭنىمۇ ، يۈرىكىڭنىمۇ ،دوستلىرىڭنىمۇ ...       مەن سېنىڭ ئۆزگىرىپ كەتكىنىڭدىن ئازابلانمىدىم، سەندەكلەرنىڭ كۆلەملىشىپ كېتىۋاتقانلىقىدىن ئازابلىنىۋاتىمەن . بۇ كۆلەملىشىش قەدىناسلارنى بىر بىرىدىن ئايرىپ ، قەدىناسلىقنىڭ قەدرىنى سۇسلىتىۋېتىشىدىن ئازابلىنىۋاتىمەن. شەھەرلىرىمىز ئاللىقاچان قەدىناسلىرىنى تاشلاپ تەرەققىي قىلماقتا . ئۆز شەھىرىدە ئېزىپ قالىدىغانلار كۆپەيمەكتە ...     مەن سېنى نېمىشقىمۇ قەدىناسىم ، دەپ ئالدىڭغا باشقىلارنى باشلاپ كەلگەندىمەن،- ھە ! ... يېڭىلىنىپ كەتكىنىڭنى نېمىشقا پەرەز قىلمىدىم . مەن سېنى يەنىلا ھېلىقى ئېغىر كۈنلەرنى بىللە ئۆتكۈزگەن دەپ ئىزدەپ كەلگىنىمنى ، سەن ئاللىقاچان بەختىيار كۈنلەردە تېپىشقانلار بىلەن قەدىناس بولۇپ بوپسەن . ..     مەن يەنىلا سېنى ئەيىبلىيەلمەيمەن . چۈنكى مەنمۇ ئىدىيەمنى ساڭا لايىقلاشتۇرساملا  بولىدىكەن ئەمەسمۇ ؟! مەنمۇ چىرايىمنى ، ئىدىيەمنى ، يۈرىكىمنى  يېڭىلايمەن . بىراق يۈرەكلىرىم بۇنىڭغا بەرداشلىق بېرەلەرمۇ ؟...      مەن ئۆزگىرىشكە باشلىدىم . پۈتكۈل ۋۇجۇدۇم تېزلا ماسلاشماقتا ، مەن ئەسلى ئۆزۈمنى چۈشەنمەپتىمەن ، ئۆزۈمنى بايقىماپتىمەن ، يېڭىلىققا ئىنتىلمەپتىمەن ، ئەسلى مەنمۇ بۇرۇنلا  ئۆزگىرىپ بولغانىكەنمەن ، مەن بۇنى ئۆزگىرىش جەريانىدا بىلدىم . توۋا ، ئۆزگەرمەك نېمىدىگەن ئاسان - ھە؟  .. ئىلگىرى ئۆزگىرىپ كېتىشتىن قورقاتتىم ، ئەمدى شۇنچە يىل ئۆزگەرمەي قانداق ياشىغان بولغىيتتىم ، دەيدىغان بولدۇم ...       _ ئېسىت ! ساڭا بەرگەن شۇنچە يىللىق تەربىيىلىرىم ، مۇشۇما ئاخىرىدا بولۇشۇڭ ؟!   - مەن دادامنىڭ بۇ گەپلىرىنى چۈشىنەلمەيۋاتاتتىم .  دادامنى قانداق ئۆزگەرتەرمەن ، ئەجەپ تىڭىرقىدىم ...           مەنبە : ئۆزۈم. ئەبەي تارىم .       2012 - يىل 12- 7.    شەھىرى شىخو .

baykiz

	ئۆزلۈكتىكى تېڭىرقاش... ئويغاق تەپەككۈر. قەلىمىڭىزگە بەرىكەت ياغسۇن!

zumrettash

	دەسلەپتىكى ھېسلىرىڭىز مىنىڭ ھېسلىرىمغا ئوخشاش بىلىندى.....ئەمما مەن ئۇنىڭغا ماسلىشىشنى ھەرگىز تاللىمايمەن،مەن ئۆزەمنىڭ يولىدا ماڭىمەن.چۈنكى بۇ ھەق يول............ئۆزگەرمەيمەن...بەلكىم ئۇنى ماڭا ئوخشاش قىلىش ئۈچۈن تىرىشچانلىق كۆرسىتىشىم مۇمكىن........ تىرىشىڭ.

tulpirim

	ئەيتاۋۇر مۇشۇنداق تونۇماسقا سالىدىغان كىشلەر كۆپىيىپ كەتتىغۇ زادى