قانائەتلىك بول ، دوستۇم

kar0923

	قانائەتلىك بول ، دوستۇم      ئەي ، قەدىرلىك دوستۇم ساڭا نېمە بولدى ؟ تېخى تۈنۈگۈنلا ساپساق ، تېمەن ئىدىڭغۇ ؟ سېنىڭ قاقىلداپ كۈلۈشلىرىڭ نەگە كەتتى ؟ ئۆيگە قايتىش يولىدا ئۇچرىغان ھېلىقى پۇتى ئاجىز قىزنى مەسخىرە قىلىپ دوراپ ماڭغان ئاشۇ ساغلام بىر جۈپ پۇتۇڭ قېنى ؟ ئويناقلاپ ، توختىماي چىمچىقلىتىپ تۇرىدىغان قاپقارا كۆزلىرىڭنىڭ رەڭگى قېنى ؟ تۈنۈگۈنلا مەكتەپتىن بىللە قايتقانىدۇق  ئەمما بۈگۈن مېنى يالغۇز تاشلاپ قويدۇڭ ، كارىۋاتتىن زادى چۈشكىلى ئۇنىمايۋاتىسەن ، بۇ زادى نېمە ئۈچۈن ؟      ئېسىڭدىمۇ ؟ مەن ساڭا قانچە قېتىملاپ دېگەن ، ئۆزۈڭدە بارىنى قەدىرلە ، يوقتىن ئاغرىنما . بۈگۈن ئىگە بولغان نەرسەڭدىن ئەتە ئايرىلىپ قېلىشىڭ مۇمكىن ، ياكى بۈگۈن ئېرىشەلمىگەنگە ئەتە ئېرىشىپ قىلىشىڭ مۇمكىن .      ئەي ، كۈلگۈنچەك دوستۇم ، سەن دائىم ئاجىزەلەرنى كۆرۈپ ئۇلارنى دوراپ ھەرىكەت قىلغىنىڭدا ئۇلارنى مازاق قىلماسلىققا چاقىردىم ، زېرىكمىدىم ، داۋاملىق ئۇ جەھەتتىن سېنى توسۇپ كەلدىم ، ئەمما سەن پەرۋا قىلمىدىڭ .      دوستۇم ، ئويلاپ باقتىڭمۇ ؟ شۇ ئاجىزىلەردە كۆڭۈل يوقمىدۇ ؟ ئۇلاردا بېجىرىم كىشىلەرگە ئوخشاش ھايات پەيزىنى سۈرۈش ئىستىكى يوقمىدۇ ؟ ياق ، ياق ، ئۇنداق ئەمەس، ئۇلارمۇ ساڭا ۋە ماڭا ئوخشاش يورۇقلۇقنى كۆرەلەيدىغان بىر جۈپ كۆزى ، يۈگرەپ - تاقلاپ ئوينىيالايدىغان بىر جۈپ پۇتى ، قەلەم تۇتۇپ خەت يازالايدىغان بىر جۈپ قولى ، پۈتكۈل ۋۇجۇدى بىلەن " دادا ، ئاپا " دېيەلەيدىغان ئېغىزى ، قۇشلارنىڭ يېقىملىق سايراشلىرىنى ئاڭلىيالايدىغان قۇلىقى بولىشىنى ئارزۇ قىلىدۇ . ئۇلار ئەنە شۇنىڭغا تەلپۈنىدۇ . ئەمما ئۇلار ھاياتلىقتىن ئىبارەت ئاللاھ بەرگەن بۇ قىممەتلىك ۋە ئازابلىق بۇ سوۋغىدىن ھەرگىزمۇ ئاغرىنمايدۇ . ئەكسىچە تەبەسسۇم بىلەن قۇبۇل قىلىپ مەڭگۈ قەدىرلەيدۇ . قارا ، ئۇلار نېمىدىگەن قانائەتچان ، كەمتەر _ ھە !      سەن بەزىدە تېرەڭنىڭ ئاپئاق بولمىغىنىدىن ، چېچىڭنىڭ پارقىرىمىغانلىقىدىن ، ئالىمەن دېگىنىڭنى ئالالمىغانلىقىڭدىن ئاغرىنىسەن ، ئەنە شۇ چاغدا ھال كۈنى ئاران ئۆتىۋاتقان كەمبەغەل بالىلارنى ، ماڭالمايدىغان ، كۆرەلمەيدىغان ، تۇتالمايدىغان ، ئاڭلىيالمايدىغان ، سۆزلىيەلمەيدىغا ئاشۇ بىزگە ئوخشاش كىشىلەرنى ئويلاپ باقتىڭمۇ ؟ ياق ، سەن ئويلاشنى بىلمەيسەن . چۈنكى سەندە ھەممە تولۇق ، شۇڭا سەن ئورۇنسىز ئۆزۈڭدىن ئاغرىنىسەن .      دوستۇم ، ئۆزۈڭدە بارىنى قەدىرلە ، كۆز ئالدىڭدىكىلەرگە سەپسېلىپ قارىغىن ، ئۆزۈڭگە تەقلىد قىل ، شۈكرى - قانائەت قىلىشنى بىل ، يوقتىن ئاغرىنما ، پەقەت يوقنى بار قىلىش ئۈچۈن تىرىشقىن ، چۈنكى سەن بېجىرىم بىر ھايات ئادەم .     مەنبە : ئۆز قەلىمىم

قېيۇم

	ئاللادىن سەۋېر تىلەيمەن!!!!!