غەيرەتلىك ئىدىڭ - غەيرىتىم ...

abaytarim

	بۈگۈنكى بىر كۈننى ئۆتكۈزمەك مەن ئۈچۈن شۇنچىلىك تەسكە توختىغانىدى .  خۇددى ئاتاقلىق دۇنياۋېي يازغۇچى چىڭغىز ئايتماتوفنىڭ " ئەسىردىن ھالقىغان بىر كۈن " دېگىنىدەكلا بىلىنىپ كەتتى ، سەھەردىلا باشلانغان سېغىنىش ، ھېجران ئازابلىرىم كۆزۈمنى ياشلاشقا باشلىغانىدى ، مۇشۇ قۇرلارنى بېسىۋاتقىنىمدىمۇ بېسىقمىدى ... بۇ ئايرىلىش ، مەڭگۈلۈك ئايرىلىشنى ئويلىسام يۈرەك باغرىم پارە - پارە بولۇپ كېتەتتى . شۇنداق ، دۇنيادا يىراققا سەپەرگە كېتىپ ئايرىلىش بىلەن ، تۇپراق ئاستىغا كەتمەنلىنىپ ئايرىلىشنىڭ ئالەمچە پەرقى بار ئىدى . مەن سەندىن ئالدىنقىسىدەك ئايرىلىشنى نەقەدەر ئارزۇ قىلاتتىم- ھە ، ئەپسۇس ... مەن سېنى ئۆز قولۇم بىلەن كەتمەنلەپ  مەڭگۈلۈك ئايرىلغان ئىدىم . بۇنداق بولارىنى كىم ئويلىغان...       سەن ھەقىقەتەنمۇ ئىسمى - جىسمىڭغا لايىق غەيرەتلىك ئىدىڭ . گۈلسۈم ھەدەم ھەر قېتىم " غەيرەت " دەپ ئىسمىڭنى چاقىرغاندا ئاجايىپ سۆيۈنۈپ كېتەتتى . مەنمۇ غەيرەت دەپ قېرىنداش ئىنىم ، ياخشى دوستۇم بار دەپ يۈرۈگۈم توق يۈرەتتىم ، ئەمەسمۇ ؟! ... ئاڭلاۋاتامسەن قېرىندىشىم ، سەن ئۈچۈن قانچە كۈنلەرنى ئازابلىق ئۆتكۈزۈپ ، كۆزلىرىمنى ياشلىغانلىرىمنى ، سېنىڭ ئاياغ ئىزلىرىڭ ، جۇشقۇن سىمايىڭ ، شوخ كۈلكىلىرىڭ قالغان كوچىلارنى، مەيدانلارنى مۇسىبەتتە باسقانلىرىمنى ، سېنى تىرىكلەر قاتارىدىن تاپالماي قەبرىستانلىقلارغا سېغىنىپ تەكرار بارغانلىرىمنى ، ئەپسۇس سېنىڭ قەبرەڭمۇ بۇ يەردىن يىراقلاپ كىندىك قېنىڭ تۆكۈلگەن ، سەن دائىم پەخرلىنىپ تىلغا ئالىدىغان ئىلىدا بولسىمۇ ، سېنى بىر كۈنمۇ ئەستىن چىقارمىدىم قېرىندىشىم . چۈنكى سەن ھەر دۇئايىمدا زىكىر قىلىنىپ كېلىۋاتىسەن .  مانا بۈگۈن 2010-يىل 11- 28- كۈنىدىكى دەھشەتلىك شۇم خەۋەرنى ئاڭلىغان قارا كۈنگە  نەق 2 يىل توشتى .  كېسىلىڭ ئېغىرلىغان كۈنلەردىكى سۆزلىرىڭ ھازىرقىدەك ئېسىمدە : ھەي ، ئەبەي ئادەمنىڭ ھاياتى ئاجايىپ بولىدىكەن قارا ، مەن ئەمدى تازا ھاياتنى ، تۇرمۇشنى ، تېجارەتنى چۈشىنىپ شۇنداق ئىلگىرلىگىلى تۇرغاندا بۇ كېسەلنىڭ بېسىۋالغىنىنى ، مۇشۇنچىۋالا دەرىجىگە بېرىپ قالغىنىمنى بىلمەي يۈرگىنىمنى ، جېگىرىم زەئىپلىشىپتۇ ، ئەمەسمۇ ؟ ياخشى بولۇشۇم تەس ئوخشايدۇ ، مېنىڭ . ...     -بولدى كۆڭلۈمنى ياسىما ، ئەشۇ قىزىم تۇمارىسنىڭ بەختىنى كۆرىۋالغان بولسام - ھە! ...  شۇ گەپلەرنى قىلىپ بولۇپ تەتۇر قاراپلا يېتىۋالغانىدىڭ . ھەممە ئارىلاشقان دوست - بۇرادەرلىرىڭنىڭ گەپلىرىنى ناھايىتى قىسقا خۇلاسىلەپ چىققانىدىڭغۇ ... غەيرەت.   -  غەيرەت، مانا كۆز ئالدىمدا ھازىرلا تۇرۇپ كېتىدىغاندەكلا ياتىسەن ، ئەمما سەن مەڭگۈ تۇرالمايتتىڭ . سەندەك زەبەردەست ، قاۋۇل ، جۇشقۇن ، ھاياتقا كۈلۈپ باقىدىغان بىر قېرىنداش دوستۇمنىڭ مەڭگۈلۈك ياتقىنىنى كۈرۈپ ، ئۆزۈم بەرداشلىق بەرسەممۇ ، ئەمما يۈرۈگۈم بەرداشلىق بېرەلمىدى ... ئىلگىرى پەقەتلا كۆرۈلۈپ باقمىغان ئەھۋال يۈز بەردى ،يۈرۈگۈمنى بىرى ناھايىتى چىڭ قاماللاۋاتاتتى ، مەن پەقەتلا بولالمايۋاتاتتىم ... دوستلىرىم ھىببۇل ، ماخمۇت ، قادىرلار دەرھال دوختۇرغا ئاپاردى ، دوختۇر ھىچنىمە تاپالمىدى ... دوختۇرلار يۈرەك كېسىلىنى تاپقىنى بىلەن يۈرەك ئازابىنى تېپىشقا چارىسىز قالدى ، مېنىڭ يۈرەك ئازابىم سەندىن ئايرىلىشنى قۇبۇل قىلالمىغاندىكى جەريان ئىدى ...  قەبرىستانغا بارغاندا يەنە بولالمىدىم . چۈنكى سېنى كۆمۈۋاتاتتۇق . بۇ ئىشلارنىڭ شۇنداق بولىدىغانلىقىنى بىلسەممۇ ، يۈرۈگۈم يەنە قوزغالغانىدى . قەبرەڭگە بىر نەچچە كەتمەن توپىنى شۇنچىلىك تەسلىكتە تاشلىدىم .  قادىرغا يۆلىنىپ ، ئۇنىڭ رىغبىتى بىلەن ئاران ئەسلىمگە كەلدىم . .. بۇ ۋاقىتلىق ئەسلىمگە كېلىشىم ئىكەن ، چۈنكى مەن ۋاقىت ئۆتكەنسېرى ساڭا ئېچىكىپ كېتىۋاتاتتىم ... سەن ئاغرىپ قالغاندا شىخودىن شۇنچىلىك كۆپ دوستلىرىڭ ئارىلىقنى يىراق كۆرمەي غولجىغا يوقلاپ بېرىپ تۇغقان قېرىنداشلىرىڭنى ھەيران قالدۇرغانىدى ... ئەمەسمۇ ؟!     مانا بۈگۈن يەنە چەكسىز قايغۇ ، ئازابتا سېنى ئەسلىمەكتىمەن ، مېنىڭ قولۇمدىن كېلىدىغىنىمۇ شۇ ...نېمە دەيمەن غەيرىتىم 35 يېشىڭدىلا يېتىۋالدىڭ ، غەيرەتلىك ئىدىڭ - غەيرىتىم ... ئەلۋېدا ...           غەيرەتلىك ئىدىڭ ، بەكمۇ غەيرىتىم ،           سەندىن ئايرىلىپ كۆڭلۈم بەك يېرىم .          تۇغقان ، دوستلارنى قالدۇردۇڭ يېتىم ،           مېنىڭمۇ توختايدۇ بىر كۈن يۈرىكىم .           مەنبە : قېرىندىشىم ، دوستۇم غەيرەت ۋاپاتىنىڭ 2 يىللىقىنى ئەسلىشىم .                    ئەبەي تارىم .    2012 - يىل 11- 28 - كۈنى .   شەھىرى شىخو .

ئۆل

	مۇشۇ ئادەمگە ئۇرۇق تۇققان ،يىقىن ئادملەردىن ئايرلشتىن خالى قىلسۇن .بىراق نە چارە جاھان شۇنداقكەن .دوستىڭىزىنىڭ ياتقان يېرى جەنئەتتە بولسۇن.

1764993085

	ھاياتنى كەدىرلەيلى

oyqan0999

	راس ئادەمگە ئۆز يىقىنلىرىدىن ئايرىلىش تولىمۇ ئازاپلىق.ئەمما بۇ بىر رىئياللىق بۇنى،چوقۇم قوبۇل قىلىشىمىز كېرەك.چۈنكى ھەممىمىز بۇ دۇنياغا مىھمان.

OTيۈرەك

	ھاياتنى قەدىرلەيلى

ANSWER

	1764993085 يوللىغان ۋاقتى  2012-11-28 08:04 AM ھاياتنى كەدىرلەيلى ئىملانى تۈزىتىپ ئانا تىلنى قەدىرلىمىسە بۇ ھاياتنى قەدىرلەشنىڭ ئورنى قالماسمىكى ناتىق غوجام !

www.315kino.com

	ھەممىمىز نى  ئاللاھ  ئۆز  پاناھىدا  ساقلىسۇن!!!!!

aynur801

0908220

	ھاياتلىقىمىزنى  قەدىرلەيلى     بولۇپمۇ ياشلىقىمىزنى  ياشلىق كەتسە قايتا كەلمەس  قېرلىق كەلسە قاتىپ كەتمەس

kukhelal

	ANSWER يوللىغان ۋاقتى  2012-11-29 08:04 AM ئىملانى تۈزىتىپ ئانا تىلنى قەدىرلىمىسە بۇ ھاياتنى قە ... بەزىدە شۇنداق بولۇپ قالىدۇ .بۇ دىگەن ئىملا مەسىلىسى بۇنى ئانا تىلنى قەدىرلىمەسلىك دەپ پىرىنسىپقا كۆتۈرۈش ياخشى ئىش ئەمەس.