دادام خاتىرىسىدىن :دوستۇم ھەققىدە مۇخەممەس

saba01

	دوستۇم ھەققىدە مۇخەممەس (بىر دوستۇمغا بېغىشلايمەن) مۇھەممەتئىمىن توختىمۇھەممەت پاساھەتتە تۆۋەندۇرمەن شۇڭا ئەپۇ سوراي دوستۇم، سىنىڭ بار بىساتىڭنى ئەلگە مەن ياياي دوستۇم ، ئەگەر يازغانلىرىم تۆھمەت بولسا ئۆلەي دوستۇم ، يالغاننى قۇشۇپ قويسام دوزاقتا گۈيەي دوستۇم ، ئۆزۈڭ قىلغان مىڭ ئىشتىن بىرىنى يازاي دوستۇم ؛ شۇڭا مەن باشلىدىم ئەپۇ ھەم قەسەملەردىن ، ئۆزۈمگە بالا تاپماي يارۇ –دوست ھەقەملەردىن ، قىلىپ يۈرسەممۇ ھەر ئىشتا ئىھتىيات پەكەملەردىن ، تاپار ھەتتاكى جىنايەت مەن يازغان رەقەملەردىن، شۇڭا دەيمەن ھەر ئىشتا ئىمكان مەن قالدۇراي دوستۇم؛ ياڭاق چاققاندا ئايرىلدۇق دوست ئىدۇق پادا باققاندا ، يىيىشكە تەنھا قىيمايتتۇق پۇچۇق مېغىزنى تاپقاندا ، بىر كىگىزدە تەڭ ياتقان قار-يامغۇرلار ياققاندا ، تەڭ تۆككەن ئىدۇق ياشنى قىيان سۇلاردا ئاققاندا ، ئۆتۈنۈپ بىز دىيىشكەن سىنى ساق قالدۇراي دوستۇم؛ ئەگەر ئۇچراشمىساق بىر كۈن دىمەيتتۇق ئەتىگە مەيلى ، ئەيىپلەپ ئۆزىمىزنى قىلاتتۇق بىز نۇمۇس خەيلى ، كىچىلەر بۇلۇپ مۇڭداش قىلاتتۇق باغ ئارا سەيلى ، ئۈتۈشكە مەڭگۈگە شۇنداق چىن دىلدىن قەسەم دەيلى ، ئەگەر سەندىن ئايرىلسام تىنىم تاپماي ئۆلەي دوستۇم ؛ سىنى بىر خېزىر بىلدىم مىنىڭ قاشىمگە كەلگەندە ، ئىززىتىڭنى قىلاي دىدىم مىنىڭ قەدرىمنى بىلگەندە، ئۆزۈمنى چاغلىماي قالدىم ماڭا باققاندا كۈلگەندە ، يۈرەكتە چوڭ ھۇزۇر بىلدىم كۈلۈپ شادلىقتا يۈرگەندە ، دىدىم شۇ چاغدا سەن ئۈچۈن زەھەرنى مەن يۇتاي دوستۇم ؛ بېشىڭغا تاجى قونغاندا سىنىڭ شۆھرەتلىرىڭ ئازدى ، بېشىڭ غەملەرگە پاتقاندا رەقىبكە ھۆر باھار يازدى ، قالساڭ ئەگەردە مۈشكۈلدە رەقىبنىڭ چالغىنى سازدى ، گەر ماڭساڭمۇ تۈز يولدا دەيتتى سىنى يامان ئازدى ، قەسەم قىلغان ئىدىم شۇندا ساڭا ھەمدەم بۇلاي دوستۇم ؛ ساڭا كىملەر رەقىپ بولسا ئاڭا قارشى ئوت ئاچتىم ، سىنىڭ دوستۇڭنى كۆرگەندە ئاڭا قۇچاقنى كەڭ ئاچتىم ، سىنىڭ ئارقاڭدا سۆز قىلسا يۈز-كۆزىگە توپا چاچتىم ، سىنىڭ ئالدىڭدا گېدەيگەننى بىلىنى پوكلىدىم باستىم ، دىدىم شۇچاغدا مۈشكۈلدە ھىماتىڭ بولاي دوستۇم . سىنىڭدەك بىر قانات بار دەپ ئاسمان قەھرىدە ئۇچتۇم ، يېنىمدا تاغ كەبى يۆلەك سىنىڭدەك ياخشى بىر دوستۇم ، رەقىپلەر ئالدىدا مەغرۇر ئوينىدى تۆمۈر مۇشتۇم ، قۇيۇپ مەيلىمگە پەرۋاسىز ئەلنىڭ نەزىرىدىن چۈشتۈم ، نىمىشقا دەر ئىدىم شۇ چاغ رەقىپنى مەن ئۇراي دوستۇم . بېشىڭغا ئامەت قونغاندا مىنىڭ ئۈستۈمگە ئاتلاندىڭ ، ماڭا كەلگەن ئاپەتتىن كۈلۈپ- يايراپ شاتلاندىڭ ، دىدىڭ :ئۆزۈڭنى چوڭ چاغلاپ ئەجەپ ياخشى باپلاندىڭ ، سىنىڭدىن قاچتى يارەنلەر ئۆزۈڭ نەزەردىن تاشلاندىڭ ، كىلەرسەن ئاقىۋەت بىر كۈن قولۇڭغا مەن سۈيەي دوستۇم . بېشىمغا كۈلپەت چۈشكەندە مىنى نامەرت ئوسال بىلدىڭ ، گىپىدە تۇرماس بىر پىخسىق ساقىلى يوق سوكال بىلدىڭ ، قىلساممۇ بىر توغرا ئىشىنى گۇمان بىلەن سوئال بىلدىڭ ، جاھان ئىچرە بىر ئاخماق ئەقلى يوق مىسال قىلدىڭ ، سەن دىگەندەك مەن بولسام ئۈزۈم رەسۋا بولاي دوستۇم . مىنى سۇندۇرسا رەقىپلەر سىنىڭ كۆڭلىڭگە خوش ياقتى ، ئەرزىگەچكە قىلغىنىڭ كىچە يۇ-تۈن ئىشىك  قاقتى ، ئېتىپ ئۆيىدە پولو- مانتا سىنى داڭلىدى باقتى ، مىنىڭدىن ئۆتسە سەۋەنلىك كۆپتۈرۈپ ساڭا چاقتى ، دىدىڭ شۇ چاغدا دەككىنى تازا ئەپلەپ بىرەي دوستۇم . ئۆيۈمدە چىقسا غەۋغالار كۆرمەي دەپ يىراق قاچتىڭ ، ئەگەر پۇرسەتنى تاپقاندا ئوت ئۈستىگە ياغ چاچتىڭ ، ئۆتۈپ خالىيغا بارغاندا شىكايەتتىن ئېغىز ئاچتىڭ ، قۇيۇڭ ئۇنداق نامەرتنى دەپ غەزەپتە قاينىدىڭ تاشتىڭ ، ئۇنىڭ ئۆيىدە يىگەننى ياندۇرۇپ قۇساي دوستۇم . ئاڭلىسام دەپ يۈرۈپسەن ئارقىمدىن قىلىپ غەيۋەت ، ئەگەر بىر چىن چاي ئىچسەڭ تويغۇزار قىلىپ مىننەت ، توۋا دەيمەن يىگەنتىڭ ئۆيۈمدە تۈگىمەس نىممەت ، ئىچىمنى قاينىتار شۇنچە دۆت –ئاخماق دىگەن تۆھمەت ، شۇ قىلغان گىپىڭگە مەن بىر كاچات سالاي دوستۇم . يېقىن بىلدىڭ ئۈزۈڭگە ساڭا سىنچاينى قۇيغاننى ، ۋاپادار بىلىپ يۈردۈڭ سالام تەزىملەر قىلغاننى ، دۈشمىنىڭ رەقىپ بىلدىڭ يامان يولدىن توسقاننى ، قالارسەن بىلمەيلا بىر كۈن رەقىپ تىرەڭنى سويغاننى ، قالساڭ ئەشۇ ھالەتكە مەن قانداق كۆرەي دوستۇم . كۆرەڭلەپ بىر مەھەل سەكرەپ تىرەڭگە پاتمىدىڭ دوستۇم ، ئىزدەپ ئۈلپەت يارەننى ئۆيۈڭدە ياتمىدىڭ دوستۇم ، ئىزلەپ مەندىن ھەر گۇناھ مۇراتقا قانمىدىڭ دوستۇم ، بىراق ئالدىمغا سەن ئاتلاپ دىدىڭ يا ئاتمىدىڭ دوستۇم ، دىدىڭ شۇ چاغدا بۇ يۇرتتا مەن قانداق تۇراي دوستۇم . رەقىبىم سەكرىشىپ كەتسە ئۆزۈڭ سەۋرى سۈكۈت قىلدىڭ ، كىچىلىرى ئۇخلىماي ئىزلەپ پاراسەت ئۈگۈت قىلدىڭ ، قىز بولسىمۇ باش ئۇرسا ئۇنى نوچى يىگىت قىلدىڭ ، مىنى غەملەردە پارچىلاپ چەيلىدىڭ چىگىت قىلدىڭ ، دىدىڭ بىراق ئۈزۈڭ ئاقلاپ :سىنى قانداق ئۇراي دوستۇم . كىچىك ئەيۋىمنى كۆپتەردىڭ كىچىك ئىشنى يۇغان قىلدىڭ ، قەدەمدە بىر قۇرۇپ قاپقان ئالدىمغا تۇغان قىلدىڭ ، جاكالاپ ئەل ئىچرە ئەيىۋىم ئىشىمنى سەن چۇقان قىلدىڭ ، دىدىڭسەن ھەر بالا ئەيلەپ كۆڭلۈمنى پىغان قىلدىڭ ، بىراق قاچتىڭ ساڭا ئەمدى مەن قانداق قاراي دوستۇم . ئوت قويغاندا كارىڭ يوق چىراق ياقسام گۇناھ تاپتىڭ ، نەسىھەت ئەيلىسەم توغرا ئۆزۈڭ باشقا مەنا تاپتىڭ ، چەيلەپ مىنىڭدەك دوستنى سەن ئەقىللىق دەنا تاپتىڭ ، قەلبىڭگە يېقىن سىرداش شىرىن سۆز رەنا تاپتىڭ ، يازغىنىم ھەرگىز ئەمەس قارا مەن سۇراي دوستۇم . سۆزىڭگە كىرمىسە كىم گەر ئۇنىڭ بەختىگە قەست قىلدىڭ ، قىسىپ بۇرنىڭنى ھەر دائىم ئۆزگىلەرنى پەس قىلدىڭ ، ئېيتىپ ئەللەي مۇقامىڭنى ئۇنىڭ ئەقلىنى مەست قىلدىڭ ، خاراپ ئەيلەپ جاھان ئىچرە كىرەكسىز نەرسە خەس قىلدىڭ ، نەسىھەت ئەيلىسەم ھەر چاغ دىدىڭ قانداق ئازاي دوستۇم . كىشىنى كۆزگە ئىلمايسەن پاتمىدىڭ  تىرەڭگە ھازىر ، ئابرويلۇق كىشىدۇرسەن سىنى ماختاپ يۈرەر نازىر ، ئۆيۈڭگە كەلسە گەر باشلىق تەيياردۇر پولو گازىر ، شۇڭا بولدى يۈزۈڭ يورۇق ھەر ئىشقا بولۇپ قادىر ، شۇڭا دەيمەن قىلىپ سەۋرى غەزەپنى باساي دوستۇم . كۆرەڭلەشكە ھەقلىقسەن يۇقۇردا تىرىكىڭ بار دۇر ، تۆۋەندە دوستلىرىڭ كۆپ يۆلەنچۈك شىرىكىڭ باردۇر ، كىشى ئالداشقا كامىلسەن ھەييارلىق سىرىگىڭ باردۇر ، تاماخور بەندە باشلىققا سىنىڭمۇ كىرىگىڭ باردۇر ، شۇڭا مەن يىنىكلىك قىلىپ قانداقمۇ تاشاي دوستۇم . مەن يۇرتۇمدىن پالانسام دەردىڭ چىقتىمۇ دوستۇم ، رەقىپلەر سەن ئۈچۈن بايلىق سوڭلاپ تىقتىمۇ دوستۇم ، مىنىڭدىن يىگەن تۇز –تائام گېلىڭدىن سىقتىمۇ دوستۇم ، رەقىبىم سىنى قۇتلاپ تون –سەرپاي تىكتىمۇ دوستۇم ، شۇڭا دىلدىكى ئاچچىقتىن مەن قانداق ياناي دوستۇم. مەن بوستانغا كۆچكەندە ئىككى ئايلىق بالام بار ئىدى ، سەكسەن ياشتىن ھالقىغان قېرى ئاجىز دادام بار ئىدى ، ئۆزۈم يالغۇز ئوغۇل ئەردىم كىسەلچان ئانام بار ئىدى ، يوق ئىدى ھېچ يۈلەنچۈك ماڭا قانداق ئامال بار ئىدى ، دىدىم ئۇشبۇ بالالارغا  مەن قانداق چىداي دوستۇم . دىدىم باشلىققا گۇناھسىزمەن مىنىڭ ئىشىم كىچىك ئىشتى ، دىدى باشلىق كەسكىن قىلىپ بولدى قوي قارار پىشتى ، سەن بوستانغا لازىمدۇر ئېھتىياج ساڭا چۈشتى ، دىسەممۇ ئۆتمىدى سۆزۈم ئون ئىككىنجى ئاي سوغۇق قىشتى ، دىدىم ئەپۇ قىلماققا تەشكىلدىن مەن سۇراي دوستۇم . ئەشۇ چاغدىمۇ ئىچىڭ ئاغرىپ دىمىدىڭ بۇ كىرەك بىزگە ، تەنقىدنى قىلىپ قاتتىق تەربىيە بىرەي ئۆزگە ، تىرىشچانتى ھەر ئىشتا كىرەتتى ئەڭ بۇرۇن سۆزگە ، بۇنى ھازىر قوغلىساق بىرەر تەسىر يامان ئۆزگە ، بىزلەر چىڭ ياران تۇرساق مەن كىمگە چاقاي دوستۇم . سوغۇق قىشتا ئامالسىز يېنىپ چىقتىم بوستانغا ، دىدىم دوستۇمنىڭ ۋىجدانى قالارمۇ ھەسرەت –پۇشمانغا ، دەپسەن تېخى يەنە قانماي ھەقلىق بۇرۇن قىلغانغا ، مەندىن كۆرۈپ يۈرۈپتۇ ئۆزى رەسۋا بولغانغا ، دىدىڭمۇ شۇ چاغدا بىر ئېغىز سىنى مەن ئۇزۇتاي دوستۇم . ئۆزىگە تىلەپ تاپتى نەسىھەتكە قۇلاق سالماي ، ئۆزىنى چاغلىماي قالدى ئېغىزغا تۇراق سالماي ، چوڭ سۈرەت سىزار بولدى رەڭگارەڭ بۇياق سالماي ، ئۆزىگە بالا تاپتى ئۆيىگە سۇۋاق سالماي ، ئۇنىڭ ئەيىپ –گۇناھىنى مەن قانداق ياپاي دوستۇم . مەن شۇنداق گۈناھكارمەن سەن شۇنداق ئۇلۇغدۇرسەن ، كىچىپ ئۆتسەڭمۇ دەريادىن سۇ يۇقماس قۇرۇغدۇرسەن ، ئۆزۈڭنى كاتتا چاغلايسەن شۇنچە پاك يورۇقتۇرسەن ، كەمسىتەرسەن ئۆزگىنى لاي پاچاق چورۇقدۇرسەن ، دەيسەن ئاقلاپ ئۆزۈڭنى مەن قانداق قىلاي دوستۇم . بوستانمۇ يامانمەسكەن يوللىرى توقاي ئەگرى ، ئادەملەر شالاڭ ئىكەن مەھەللە ئارلىقى كەڭرى ، سوغۇق ھەم ئۇزۇن يوللار سالاركەن زۇلۇم –جەۋرى ، ۋەلېكىن ئۇشبۇ دەرتلەرگە مەمتىمىن قىلار سەۋرى ، چىداملىقنىڭ تۇمارىنى بوينۇمغا ئاساي دوستۇم . باردۇر ئۇشبۇ يۇرتلاردا ئىماملارنىڭ مازار –قەۋرى ، كۈلەرمەن شاد –خۇرام بۇندا تېپىپ يولنى ئۆزۈم كەڭرى ، كىلەر دەپ مەن ئۈچۈن بىر كۈن كۈلۈپ ياشاشنىڭ دەۋرى ، ماڭا شادلىق ئېلىپ كەلگەي چىداملىقنىڭ ئەلچىسى خەۋرى ، قىلىپ سەۋر  جاسارەتتە داۋانلاردىن ئاشاي دوستۇم . سىنىڭ ئۆستى شەرەپ- شانىڭ ئۈستىلەپ ئەمەل –مەنسەپ ، ۋاپاغا ئەيلىدىڭ جاپا ئۆزگىلەرنى سەن قەستلەپ ، جاھانغا پاتمىدىڭ تاشتىڭ باشقىلارنى سەن پەسلەپ ، بىر مەھەل يۈرۈپ تۇرغىن ئىگىز- پەس ئالا دەسسەپ ، شەرەپنىڭ تاجىنى تاقاپ توۋلىدىڭ ھاي –ھاي دوستۇم . ئەقىلىڭنى سېتىپ يىدىڭ نام –شۆھرەتكە تاماغا ، ۋاپاغا سەن جاپا ئەيلەپ دوستۇڭنى قويدۇڭ بالاغا ، ھاراقنى قۇيمىسا گەر كىم بەردىڭ سوتقا داۋاغا ، خۇشامەت قىلسا  ئەگەر كىم سۈكۈت قىلدىڭ ھەر گۇناغا ، ھەسەتخور كۆرەلمەسكە دىدىڭ:گۆرنى قازاي دوستۇم . شۇڭا ئويلايسەن سەن ھازىر ئۆزۈڭنى غالىپ بىر كاتتا ، سىنىڭدەك كىشى يوقتۇر ئىناۋەتلىك بۇ يۇرتتا ، ئەل سەندىن گۇمانلانماس بولساڭمۇ گەر بىر ساختا ، چىقارسەن تىرىك ئاخىر چۈشۈپ قالساڭمۇ دۇزاخ ئوتقا ، بىراق ھىيلە تونىڭغا ئوتنى مەن ياقاي دوستۇم . كىرەك قىلمايسەن دوستلۇقنى سەن ئۈچۈن ھاراق لازىم ، ۋاپادار يارەن بۇلۇر ساڭا قىلسا كىم تازىم ، چۆچۈرىنى خام ساناپ يۈردىڭ مەڭگۈ دەپ باھار –يازىم ، جاراڭلار توختىماي دەمسەن خۇشال ناخشا ناۋا سازىم ، قۇرۇق ئارزۇ ھەۋەسلەردىن سېلىپسەن ساراي دوستۇم . گەر كۆيدۇرمىسە نەپسىڭ ئىتەرسەن ھاپ دوزاق ئوتنى ، نام –مەنپەئەت تاماسىدا ئۇنتۇپسەن ئانا يۇرتنى ، ۋاپاغا سەن جاپا ئەيلەپ ياندۇرۇپ زۇلۇم جۇتنى ، ئۆزۈڭگە جاپا تاپتىڭ بىشىڭدىن ئاغدۇرۇپ قۇتنى ، كىيىننى ئويلىماي دەمسەن نىمە بولسام بۇلاي دوستۇم . خۇشامەت قىلمىسا كىم  گەر بەرمەيسەن ئاڭا سەن ئۆي ، خوش ياقىدۇ قۇلىغىڭغا خۇشامەتنىڭ مۇقامى –كۈي ، سىنىڭ ئالدىڭدا ئادەم ئەمەس پۈكىلىپ ئەگمىسە كىم بوي ، دەپ قالما كىيىن دوستۇم قىلغىنىڭغا ئەمدى توي ، ئالدىڭغا كىلەر ئىشنى سەمىڭگە سالاي دوستۇم . سۈرۈپ دەۋران يۈرۈپ تۇرغىن ئەنە شۇنداق ساما ئەيلەپ ، كۆرەڭلەپ خۇدىڭ بىلمەي ۋاپاغا سەن جاپا ئەيلەپ ، ئەنە شۇنداق ئۆتۈپ تۇرغىن ھەر ئىشقا بانا ئەيلەپ ، كىلەرسەن  ئاخىر بىر كۈن دەردىڭگە داۋا ئەيلەپ ، ئاشۇ كۈننى سەۋر بىلەن سۈكۈتتە كۈتەي دوستۇم . قىساس تۇتماس دەپ ئويلامسەن سىنىڭ قىلغانلىرىڭ ئازمۇ ، سىنىڭ ئۈچۈن بۇ زامان مەڭگۈلۈك باھار يازمۇ ، غېرىپلارنىڭ كۆز يېشى سەن ئۈچۈن مۇقام –سازمۇ ، بۇلار سىرىڭ ئاخىر پاش پارا بەرسەڭمۇ قوي –غازمۇ ، ساڭا نەپرەت قىيان سۇدەك دەپ قالدى تۇشاي دوستۇم . ئۆلەرسەن نۇمۇس- دەرتتە ئەگەر چاۋاڭنى مەن يايسام ، سىنىمۇ قىلاتتىم سەرسان ئەگەر ۋىجداندىن مەن تايسام ، يۈرەلمەيسەن بۇ يۇرتتا توغرا يولدىن مەن تايسام ، ئۆزۈڭ قىلغان مىڭ ئىشتىن ئەگەر مەن بىرىنى قىلسام ، ساداقەت لەۋزىدىن قىلغان ۋەدەمدە تۇراي دوستۇم . ئوقۇپ ئۇشبۇ مۇخەممەسنى چىچاڭشىپ كەتمىگىن دوستۇم ، يۈزۈم قالمىدى ئەلدە دەپ ھەسرەتلەر چەكمىگىن دوستۇم ، تۈزەتكىن ئەسكى ئىللەتنى يەنە داۋام ئەتمىگىن دوستۇم ، دوستلىرىڭنى قاقشىتىپ يېشىنى سەپمىگىن دوستۇم ، سىنىڭدەك قىلمىدىم خىيال چاۋاڭنى چۇۋاي دوستۇم . بولدى بەس! سۆزۈم ئەمدى شۇنچىلىك يىتەر دوستۇم ، سەن ئۈچۈن بۇ سۆزلەر بەك ئارتۇق كىتەر دوستۇم، بەك ئارتۇق يېزىۋەتسەم خەق زاڭلىق ئىتەر دوستۇم ، ئىچى تار ھەسەتخور دەپ كۆتىمگە تىپەر دوستۇم ، ساڭا ئارتۇق تۆھمەتنى دىمىدىم مەن سۇۋاي دوستۇم . يېزىپ مەمتىمىن شۇنچە ئۇزۇن بىر مۇخەممەسنى ، قىلدى ئاشكارە ئۆزىگە قىلىنغان تۆھمەت سۈيقەستنى ، ئەمدى ھەرگىز دوست دىمەس بەدنىيەت تىگى پەسنى ، ئەقلىنى ساتقان ھاراققا ۋاپاسىز ئاشۇ مەستنى ، سۆزۈمنى بەس قىلىپ ئەمدى مەشەدە توختىتاي دوستۇم . 1991-يىلى 1-ئاي مەنبە: دادام قەلىمى

kalamiy

	پاساھەتتە تۆۋەندۇرمەن شۇڭا ئەپۇ سوراي دوستۇم، سىنىڭ بارمال -بىساتىڭنى ئېچىپ بىر -بىر ياياي دوستۇم ، ئەگەر يازغانلىرىم تۆھمەت بولۇپ قالسا ئۆلەي دوستۇم ، يالغاننى قۇشۇپ قويسام كۆيۈپ دەۋزەخ بولاي دوستۇم ، ئۆزۈڭ قىلغان مىڭ ئىشتىن پەقەت بىرىنى يازاي دوستۇم ؛ سەل ئاھاڭسىزلىق بولمىغىننى ھېسابقا ئالمىغاندا ھەقىقەتەن ياخشى يېزىلغان مۇخەممەسكەن . دادىڭىزنىڭ تېنى ساق بولسۇن .

saba01

	kalamiy يوللىغان ۋاقتى  2012-11-25 03:15 PM دوستۇم ھەققىدە مۇخەممەس قەلەمىي ئاكا ، شۇ تاپتا كۆزلىرىمدە لىق ياش ھالەتتە سىزنىڭ ئاتامغا تىلىگەن تىلەكلىرىڭىزگە رەھمەت -ھەشقاللا ئېيتماقتىمەن . ئاللا سىزگە ئاتامغا تىلىگەندىن ئاشۇرۇپ بەرگەي .  ئەپسۇس ، مەزگۇر شىئېرنىڭ ئاپتۇرى ئاللىبۇرۇن بۇ ھەسرەتلىرىنى ئېلىپ ياراتقۇچىغا ئامانىتىنى تاپشۇردى ، بۇ شىئېر پەقەت ئەسلىمە قاتارىدا ماڭا قېلىپ قالدى ، مۇمكىن بولسا تۈزىتىپ قۇيارسىلەر ، رەببىمدىن سىز ئەزىزلەرنىڭ سالامەتلىكىنى تىلەيمەن .

kukhelal

	نەدىكىنى  ئاھاڭدارلىقى بەك ياخشىغۇ .بەك ئىسىل ساتىرا ئكەن. ئەھمەتشاھ قاراقاشنىڭ ئات ھەققىدە دىگەن ئەسىرىنى ئوقۇغاندەك ھىسياتقا كىلىپ قالدىم.تۇنجى قىتىم  مۇشۇنداق ئۇزۇن شىېرنى بىر مىسرانىمۇ تاشلىماي ھوزۇرلۇنۇپ ئوقۇشۇم.توۋا ئەل ئارىسىدا كۆمۈلۈپ قالغان كىشىلەر ھەقىقەتەن كۆپ كەن جۇمۇ. ئاللاھ دادىڭىزنىڭ روھىنى جەننەتتە قىلغاي. بولسا بىرەر ژورنالغا ئەۋەتىپ بىقىڭ

fireman

	ياخشى يىزىلغان شىئېركەن، جىقلىقىغا قارىماي ئوقۇۋەتتىم ......

kalamiy

	saba01 يوللىغان ۋاقتى  2012-11-25 03:20 PM قەلەمىي ئاكا ، شۇ تاپتا كۆزلىرىمدە لىق ياش ھالەتتە سى ... دادىڭىزنىڭ ياتقان يېرى جەننەتتە بولسۇن ،تەقدىرداشكەنمىز ..تىرىشچانلىق خاتىرجەملىك ،سالامەتلىك سىزگە يار بولسۇن .ئىشلىرىڭىزغا ئۇتۇق تىلەيمەن .

saba01

	kalamiy يوللىغان ۋاقتى  2012-11-25 07:02 PM دادىڭىزنىڭ ياتقان يېرى جەننەتتە بولسۇن ،تەقدىرداشكە ... رەھمەت سىزگە ، سىزگىمۇ سالامەتلىك تىلەيمەن .

دىيارىم

	بۇ  دادىڭىزنىڭ ھايات سەرگۈزەشتىسىمۇ قانداق ، ئاللاھ ئىگەم قۇرۇق تۆھمەتلەردىن ساقلىسۇن . تەغدىرداش ئىكەنمىز ، دادىڭىز يولىدىن مىڭىپسىز ، سىزگە ئاپىرىن . داۋاملىق تىرىشىڭ ، ئاللاھ دادىڭىزنىڭ ياتقان يىرىنى جەننەتتە قىلسۇن .

saba01

	دىيارىم يوللىغان ۋاقتى  2012-11-25 10:02 PM بۇ  دادىڭىزنىڭ ھايات سەرگۈزەشتىسىمۇ قانداق ، ئاللاھ ئى ... شۇنداق بۇ دادامنىڭ كەچمىش خاتىرىسىنىڭ بىر بېتى ، يەنە نۇرغۇنلىرىنى يوللاشقا ئۈلگۈرمەيلا يۇيۇلۇپ كەتتى . تىلەكلىرىڭىزگە رەھمەت .

Tuzturahk

	بارىكاللا . سىزمۇ دادىڭىزدەك يازارسىز !