قەبرىستاندىكى مۇڭدىشىش

abaytarim

	داۋاملىق قەبرىستانلىقنى زىيارەت قىلىپ تۇرۇش مېنىڭ دائىملىق ئادەتلىرىمنىڭ بىرى . نېمىشقىدۇر بىكار كۈنلىرىم قەدەملىرىم ئېختىيارسىز مېنى شۇ تەرەپكە ئالدىرىتاتتى . بۇ ئەلۋەتتە قايتىپ كەلگىلى بولىدىغان سەپەر بولغاچقا باشقىچە ئويلىنىشلاردىمۇ بولمايتتىم . ھەر قېتىم چىقسام قەبرىستان يېنىدا ئۆيى بار ئەشۇ بوۋاي ئۇچرىماي قالمايتتى ، ھەم ماڭا مەدەت بەرمەكچى بولغاندەك ھاياتلىق ، ئۆلۈم ، ئىنسانچىلىق توغرىسىدىكى خۇلاسە خارەكتىرلىق يەكۈنلىرىنى ئېيتماي قالمايتتى . مەن بوۋاينىڭ سۆزلىرىنى دىققەت بىلەن ئەستايىدىل ئاڭلاپ ھىكمەت ئىزدەيتتىم . گەرچە بوۋاي بۈگۈنكى زامانىۋىي مەدەنىيەتتىن ئانچە خەۋەردار بولمىسىمۇ ئەمما ئۇنىڭ بۇ توغرىسىدىكى ئېغىزىدىن چىقىرۋاتقان سۆزلىرىنى تازا ئويلاپ بېقىشقا ئەرزىيتتى .      - بالام ، دېدى بوۋاي . سۆزىنى داۋاملاشتۇرۇپ : سېنىڭچە مۇشۇ قەبرىستانلىققا سېنىڭ ئاتا- ئاناڭ بىرىنچى تۈركۈمدە قويۇلغانلارمىدۇ؟ .. دەپ سوراپ قالدى .    مەن نېمە دېيىشىمنىمۇ بىلەلمىدىم . ھەم بىلمەيتتىم .  بوۋاي مېنىڭ تىڭىرقاشلىرىمنى چۈشەنگەچكىمۇ ، ئارتۇقچە زىغىرلاپ كەتمەي كۈلۈمسىرەپلا بولدى قىلاتتى .    بوۋاي كەتتى ..  جىمجىت قەبرىستانلىق يۈرىكى توختىماي سوقۇپ تۇرغان مېنى ئۆز قوينىغا سۆرىمەكتە . مېنىڭكىدىن باشقا يۈرەكلەر تامامەن ھاياتلىقتىكى ۋەزىپىسىنى ئاخىرلاشتۇرۇپ بولغانىدى .  ئىنسانلار سوقۇپ تۇرغان يۈرەك توغرىسىدا بېھىساپ تەتقىقاتلارنى ، يازمىلارنى ، كېسەللىك ناملىرىنى ئىجاد قىلىپ تەتقىق قىلىۋاتاتتى . قانچىلىغان ھەرىكەتسىز يۈرەكلەر ئارىسىدا يۈرۈش كىشىنى بىر خىل شۈركۈندۈرەتتى .  ئەكسىچە تەڭ سوقۇۋاتقان بەزى يۈرەكلەرمۇ ئوخشاشلا ئادەمنى تېخىمۇ شۈركەندۈرەلەيتتى . ئەمەلىيەتتە ھاياتلىقنىڭ يېشىلمەي كېلىۋاتقان نۇرغۇن سۇئاللىرىغا قەبرىستانلىقتىن جاۋاب تاپقىلى بولاتتى .  بۇنى ماڭا ھېلىقى بوۋاي دېگەن . كۆز ئالدىمدىن  بەھەيۋەت قەسىرلەر ، كاتتا زەردارلار ، ھۆكۈمرانلار ، ئاددىي ئىنسانلار كەچمەكتە . ئۇلار بۇ يەردە ئۆز ئېختىيارىنى تەبىئەتكە تاپشۇرغان ھالدا ياتماقتا . ئۇلارنىڭ ئەۋلادلىرى جىددىي كۈرەشتە ۋاقتىنى ، ئۆمرىنى يەتكۈزەلمەي ھاياتلىق رېلىسىدا چاپماقتا . مازارلىقتىن باشقا ھەممە جاي بازارلىققا ئايلانغان . جىم تۇرغان ئادەملەرنى ھەرىكەتچان ئادەملەر بايقىمىسا سېتىپمۇ قوياتتى . ئادەملەر ئۆزلىرىنىڭ بىلىندۈرمەي سېتىۋېتىلىشىدىن  ئەنسىرەيتتى . قەبرىستانلىقتىكى قانچىلىغان ئادەملەر بۇ كۈنلەرنى باشتىن كەچۈرۈپ بۇ يەرگە يەتكەندۇ -ھە !؟... جىمجىت قەبرىستانلىقتا سودا بولۇۋاتاتتى .  ئۇكام ، بەش يۈز كويدىن بىر تىيىن كەم بولسا بۇ گۆرنى كولىمايمەن!... بوپتۇ كولاڭە . ..    بۇ قەبرىستانلىققا ئۆلۈك توشۇپ كېتىپتۇ ، ئەمدى قەيەردىنمۇ كولارسىز ، دىدى -يىگىت .      _ خاتىرجەم بولۇڭ ئۇكام ، تىرىك پاتمىغان بىلەن ئۆلۈكتىن قانچىسى بولسىمۇ پېتىۋېرىدۇ ... ماڭا گۆمبەزلەردىن ھەممە مۇردا بېشىنى كۆتۈرۈپ بۇ گەپنى ئاڭلىغاچقا قاراۋاتقاندەك بىلىنىپ كەتتى . ئالدىمدىكى قەبرىدىكى كىشىنى بەك بالدۇر يېتىۋالغاندەك ھېس قىلسام ، ئارقامدىكى قەبرىدىكى كىشى بەك ئۇزۇن ياشاپ كەتكەندەك بىلىنىپ كەتتى . ئەمەلىيەتتە ئارقامدىكى قەبرىدە ياتقان كىشى ئالدىمدىكىسىدىن خېلىلا  ياش بۇ يەردە يېتىۋالغان . شۇندىلا مەن " ئادەم ئۆلۈكى بىلەن مازارنى ، تىرىكى بىلەن بازارنى ئاۋات قىلىش "ئۈچۈنلا  ياشىسا بولمايدىغانلىقىغا  تېخىمۇ چىن پۈتتۈم . ئەتراپ جىمجىت ، شۇندىلا ئۆزۈمنىڭ قەبرىستانلىقتا ئىكەنلىكىم ئېسىمگە كېلىپ بازار تەرەپكە يول ئالدىم . بازاردا ئادەملەر مىغىلدايتتى ... بۇ يەرمۇ توشۇپ كېتىپتۇ . مەن ئۇنى تېخىمۇ ئاۋات قىلىۋەتكەنىدىم....       مەنبە :  ئۆزۈم ، قەبرىستانلىق .      2012-12-20.     شەھىرى شىخو .

xaban010

	بەكمۇ  ئىسىل   نادىر  تېمىدىن بىرنى يېزىپسىز     ئاللاھ سىزگە  ھىدايەت ئاتا قىلسۇن

kawa

	ئىسل ئەسەركەن.

qirakpay

	بۇ تېما قىسقا ھەم ئىخچام ياخشى يېزىلىپتۇ...ئەمما يىلى ...

مسكىنÍÍ

	چوڭقۇر پىكىرلىك ياخشى ئەسەر ئىكەن

OTيۈرەك

	ئويلىنىش قاتىگىشلىك ئەسەركەن

مىرشاپ

	ئادەم ھامىنى ئۆلۈپ كىتىدۇ.شۇڭا، ياشاپ كۈلگەن ۋاقىتتا ئۇدۇنيانىمۇ ئويلاپ تەييارلىق قىلىپ قۇيۇش كېرەك.بولمىسا دوۋزاقنىڭ ئىشىگى ھەر ۋاقىت ئۇچۇق....تېما ئىگىسىگە رەخمەت ئەھمىيەتلىك تېما يوللاپسىز......

okoguqi9

	ئادەم تىرىكى بىلەن بازارنى، ئۆلىكى بىلەن مازارنى ئاۋات قىلىدۇ . . . .

poyuz

	بۇ ئەسەردە ئادەم تىرىكلىكى بىلەن بازارنى، ئۆلىكى بىلەن مازارنى ئاۋات قىلمايلى دەپتۇ، بۇ گەپنىڭ ۋەزنى شۇنچىلىك چوڭقۇر، بۇنى ئورۇنداش ئۈچۈن ئىنسانلار بۇ دۇنيادا بىھۇدە ياشىماي، بەلكى قىممەت يارىتىپ ، توختىماي كۈرەش قىلالىسا، ھاياتلىقىدا كېيىنكىلەرگە ئۆرنەك بولغۇدەك ئىز قالدۇرىلالىسا بولىدۇ.

nazi0997

	تىما ئىگىسىگە رەخمەت...