رەڭلىك يوشۇرۇن كۆزئەينەكنى سىزمۇ تاقىدىڭىزمۇ؟

شاتئاي

	رەڭلىك يوشۇرۇن كۆزئەينەكنى سىزمۇ تاقىدىڭىزمۇ؟ شىنجاڭ قانۇنچىلىق گېزىتىدىن مەھبۇبە مۇنىردىن يېقىندا قىزىمنىڭ چېچىنى ياسىتىش مەقسىتىدە ئۆيۈم ئەتراپىدىكى بىر ساتىراشخانىغا كىردىم. ئۆچىرەت كۈتۈپ تۇرغاچ ساتىراچ ئۇستام بىلەن چاچ بۈدرە قىلىۋاتقان ياش قىزنىڭ سۆھبىتىگە قۇلاق سالدىم. ــ ئۆتكەندە سىزدىن سېتىۋالغان يوشۇرۇن كۆزئەينەكنى تاقىسام دوستلىرىم كۆرۈپ بەكلا ياقتۇرۇپ قېلىشتى، ئۇلارمۇ سېتىۋالماقچى بولۇۋاتىدۇ. ــ ياخشىغۇ، ئۇلارغا قانداق رەڭدىكىسى لازىمكەن، مەندىكى بۇ كۆزەينەكلەر كورىيەنىڭ، ھازىر تازا مودا بولۇۋاتقىنى، باھاسىمۇ ئەرزان... نەزىرىمدە كۆزەينەك سەپلەش بىر خىل تېببىيلىكى ۋە تېخنىكىلىقى يۇقىرى ئىش ئىدى، 10كۋادرات مېتىرمۇ كەلمەيدىغان كىچىككىنە دۇكاندا ساتىراچلىق قىلىۋاتقان بۇ ساتىراچ ئۇستامنىڭ بىر ئۆرۈلۈپلا «كۆزئەينەك سەپلىگۈچى « بولۇپ قالغانلىقى مېنى بەكمۇ ھەيران قالدۇرغان ئىدى. «كەسپىي كېسىلىم›› يەنە قوزغىلىپ بۇ ساتىراچ ئۇستامدىن گەپ كوچىلاشقا باشلىدىم. ئۇقتۇمكى، ئۇ بىر دوستىغا ياردەملىشىپ يوشۇرۇن كۆزەينەك سېتىشىپ بېرىۋېتىپتۇ. بۇنداق كۆزەينەكلەر ئۈرۈمچىنىڭ شياۋشىمىن، سودا شەھەرچىسى قاتارلىق ئاۋات بازارلاردىكى دۇكانلاردىمۇ سېتىلىۋاتقان بولۇپ، ئۇ ئانچە مۇنچە كىرىم قىلىش مەقسىتىدە دوستىنىڭ ھاۋالىسى بويىچە «كۆزەينەك سەپلىگۈچى« بولۇپ قالغان ئىكەن. مەن سىڭلىمغا يوشۇرۇن كۆزەينەك سېتىۋالماقچى دېگەن باھانە بىلەن شياۋشىمىندىكى بىر نەچچە دۇكاننى ئارىلىدىم. دېگەندەك بۇ دۇكانلارنىڭ ھەممىسىدىلا يوشۇرۇن كۆزەينەك سېتىلىۋاتقان بولۇپ، باھاسى 40يۈەندىن 150يۈەنگىچە ئىكەن.مەن بىر دۇكان خوجايىندىن سورىدىم: ــ بۇ يەردە كۆزنى تەكشۈرۈپ، گىرادۇسىنى ئۆلچەپ كۆزەينەك سېتىپ بېرەمسىلەر؟ ــ ياقەي، بىز كۆزنىڭ گىرادۇسىنى ئۆلچىيەلمەيمىز ھەم ئۇنداق شارائىتىمىز ۋە ئەسلىھەلىرىمىزمۇ يوق. ــ ئۇنداقتا كۆزەينەكنى قانداق سېتىۋالىمىز؟ ــ سىز دوختۇرخانىلاردا ئۆلچىتىپ كېلىپ گىرادۇسىنى دەپ بەرسىڭىزلا بولدى، قانچە گرادۇسلىقى لازىم بولسا شۇندىقى بار. مەن يوشۇرۇن كۆزەينەك سېلىنغان قاپتىكى خەتلەرنى خېلى كۈچەپ ئوقۇپمۇ ھېچ يەردىن ئىشلەپچىقىرىلغان زاۋۇت ئىسمى، ئادرېسى، ئىشلەپچىقىرىلغان ۋاقتى دېگەندەكلەرنى تاپالمىدىم. بەزىلىرىدە پۈتۈنلەي ئىنگلىزچە خەت يېزىلغان بولۇپ بۇنىڭغا قارىتا دۇكان خوجايىنى چۈشەنچە بېرىپ: ــ بۇ ھەممىسى چەتتىن كىرگەن مال، ماۋۇ كورىيەنىڭ، ماۋۇ ئامېرىكىنىڭ، سۈپىتىدە مەسىلە يوق، خاتىرجەم بولۇڭ،-دېدى. مەن جۇڭشەن يولى، قىزىلبايراق يوللىرىدىكى بىر نەچچە مۇنتىزىم كۆلەملەشكەن كۆزەينەك دۇكانلىرىنى ئارىلىدىم. بۇ دۇكانلارنىڭ يوشۇرۇن كۆزەينەك تىزىلغان پەشتاختىسىنىڭ ئۈستىگە سەھىيە مىنىستىرلىقى تارقاتقان »داۋالاش ئۈسكۈنىلىرى تىجارىتى بىلەن شۇغۇللىنىش كىنىشكىسى« قەغەز چاپلانغان ئىدى. خاۋيا كۆزەينەك دۇكىنىنىڭ خادىمى رىزۋانگۈل مۇنداق دېدى: ــ يوشۇرۇن كۆزەينەك داۋالاش ئۈسكۈنىلىرىگە كىرىدىغان بولۇپ، بۇ تىجارەت بىلەن شۇغۇللىنىش ئۈچۈن چوقۇم سەھىيە تارماقلىرىنىڭ تىجارەت قىلىشقا رۇخسەت قىلىش گۇۋاھنامىسى بولۇشى كېرەك، ئۇندىن باشقا تىجارەت سورۇنى ئۆلچەمگە يېتىشى، مەخسۇس كۆز تەكشۈرىدىغان ئۈسكۈنىلەر، كۆز تەكشۈرگۈچى سەپلىنىش، چوقۇم مۇنتىزىم، كۆلەملەشكەن مال كىرگۈزۈش مەنبەسى بولۇش تەلەپ قىلىنىدۇ. ھازىرقى باھاسى 150يۈەندىن 500يۈەنگىچە ئوخشىمىغان دەرىجىدە بولىدۇ. چەتتىن ئىمپورت قىلىنغان بولسىمۇ چوقۇم خەنزۇچە چۈشەندۈرۈلۈشى، زاۋۇت ئادرېسى، ئىشلەپچىقىرىش ۋاقتى قاتارلىقلار يېزىلغان بولىدۇ. مەن شياۋشىمىندىكى دۇكاندىن سېتىۋالغان 40يۈەنلىك يوشۇرۇن كۆزئەينەكنى ئېلىپ ئۈرۈمچى شەھەرلىك كۆز كېسەللىكلىرى دوختۇرخانىسى كۆز بۆلۈمىنىڭ مۇدىرى كوڭ ناغا كۆرسەتتىم، ئۇ تەپسىلىي كۆرگەندىن كېيىن: ــ بۇ كۆزئەينەكنىڭ گىرۋەكلىرى ئىنتايىن تۇتۇق، رەڭمۇ كېيىن بېرىلگەن، ئۇندىن باشقا بۇ كۆزئەينەكنىڭ سۇ مىقدارى يېتەرلىك ئەمەس بولۇپ، ئېنىق ئېيتقاندا لاياقەتسىز مەھسۇلات دېيىشكە بولىدۇ. كىشىلەر بۇنداق كۆزئەينەكنى تاقىغاندا كۆز پەردىسى قۇرغاقلىشىدىغان، كۆز مۈڭڭگۈز پەردىسى ياللۇغلىنىش، ئېغىر بولغاندا قارىغۇ بولۇش ئەھۋاللىرىنى كەلتۈرۈپ چىقىرىدۇ، يوشۇرۇن كۆزئەينەكنىڭ ئادەتتىكى كۆزئەينەكتىن كۆزگە ئېلىپ كېلىدىغان خەتىرى ئەسلىدىنلا مەۋجۇت، ئادەتتە دوختۇرلارمۇ ئامال بولسا يوشۇرۇن كۆزئەينەك تاقىماسلىقنى تەۋسىيە قىلىدۇ، شۇنداق تۇرۇقلۇق بۇنداق ناچار، سۈپەتسىز يوشۇرۇن كۆزئەينەكنىڭ كۆزگە بولغان زىيىنى تېخىمۇ زور بولىدۇ،-دېدى. ئۈرۈمچى شەھەرلىك دورا ۋە يېمەكلىك نازارەتچىلىك ئىدارىسى قانۇنچىلىق بۆلۈمىنىڭ باشلىقى دوڭ يىڭ مۇنداق دېدى: ــ كۆزئەينەك سەپلەش ۋە سېتىش تىجارىتى بىلەن شۇغۇللىنىش ئىلمىيلىكى، تېببىيلىكى يۇقىرى كەسىپ، ئادەتتىكى ئۇنىڭ كىچىك دۇكانلار ھەرگىزمۇ بۇ تىجارەت بىلەن شۇغۇللىنىش سالاھىيىتىنى ھازىرلىغان بولمايدۇ. بۇ ئېنىقلا قانۇنسىز تىجارەت. كەڭ ئوقۇرمەنلەر بۇنداق يەرلەردىن كۆزئەينەك سېتىۋالماسلىقى ۋە كىنىشكىسى يوق تۇرۇپ مۇشۇنداق تىجارەت بىلەن شۇغۇللانغانلار بولسا دەرھال مۇناسىۋەتلىك تارماقلارغا مەلۇم قىلىشى كېرەك. مەن زىيارەت جەريانىدا نۇرغۇن ياشلار بولۇپمۇ ياش قىزلار ئارىسىدا مۇشۇنداق رەڭلىك يوشۇرۇن كۆزئەينەك تاقاشنىڭ مودا بولۇۋاتقانلىقىنى ھېس قىلدىم، مودىنىڭ قىزىقتۇرۇشى ھەتتا بەزىلەرنى كۆزئەينەك تاقاش زۆرۈرىيىتى يوق ساپمۇساق كۆزىنى ئازابلاپ، چىرايلىق قارا كۆزلىرىنى يېشىل، زەڭگەر كۆزلەرگە ئۆزگەرتىۋېلىشى مېنى تولىمۇ ئەپسۇسلاندۇردى. كۆز ئىنساننىڭ ئەڭ مۇھىم ئەزالىرىنىڭ بىرى، بىز كۆز ئارقىلىقلا بۇ گۈزەل ۋە يورۇق دۇنيانى كۆرەلەيمىز، ئۇنىڭدىن ھوزۇرلىنالايمىز. شۇڭا كۆزىمىزنى ئاسرىشىمىز، قەدىرلىشىمىز ئىنتايىن زۆرۈر، قاملاشمىغان مودىغا، ئاتالمىش گۈزەللىككە ئىنتىلىپ شۇ چىرايلىق قارا كۆزلەرنى يىغلىتىش ئەسلا ئەرزىمەيدۇ، ئەلۋەتتە.

oyqan0999

	توۋا ھازىر بىر قىسىم ئادەملەرگە نىم بولغاندۇ؟دەيمەن.مودا دەپ قاملاشمىغان قىلىقلارنى قىلغىلى تۇردى.ھىلى چىچىنى كەستۈرۈپ،غەلىتە قىلۋىلىپ بارغان.ھىلى يۈزىگە مەڭ چەكتۈرۋاتقان.تىخى بىر ئۇبدان قاشلىرىنى،ئىلۋىتىپ سىزما قاش بولۋىلىپ بارغان.ئەمدى كۆزىنىڭ رەڭگىنى ئۆزگەرتكىنى تۇرۇپتۇ.ھەي........................

qog

	بىر چاغدا تېلىۋىزۇردىمۇ شۇ توغرۇلۇق توختالغاندەك قىلىۋاتقان.

nap~rat

	بۇ ئىشقا يەنىلا مۇنبەرنىڭ مۆھتىرەم سىياسۇنلىرى بىلەن ئىنكاس چولپانلىرى بىر نىمە دىسۇن ھە قېنى ................. ھە

zapar

	كۈزۈمگە سەت كۈرۈنۈپ مۇشۇنداق نىمىلەر.ماندا بىر كۈزىگە سۆيۈپ قۇياي دېسە ئادەمنىڭ ئېغىزغا چىقىپ قالار بۇ ئەنەك

1670154432

	zapar يوللىغان ۋاقتى  2012-11-13 10:24 AM كۈزۈمگە سەت كۈرۈنۈپ مۇشۇنداق نىمىلەر.ماندا بىر كۈزىگە  ... ما ئىنكاسقا كۇلمەي دېسەممۇ ئامال بولمىدى ھە؟سىز بىرسىنىڭ كۆزىگە سۇيسىڭىز شوراپ سۆيەمسىز يا؟

zapar

	1670154432 يوللىغان ۋاقتى  2012-11-13 11:42 AM ما ئىنكاسقا كۇلمەي دېسەممۇ ئامال بولمىدى ھە؟سىز بىرس ... ياق ھەرگىز شورىمايمەن، بىكار چاپاقنى شۇرۋېلىپ ھىسياتنى ئۆلتۈردىغان ئىش چىقىدۇ. ئاۋۇ ساختا مالدىن سالغان بولسا بېرىپ بولغۇچى چۈشۈپ كىتەرمىكىن دەيمىنا، كۆزىگە سۈيىمەن دەپ بىكار كالىپۇكىمىزنى كىسۋالمايلى دەيمەندە.

tabassum516

	بىزىنڭ  ئەمدى  قىلمايدىغان  قايسى  ئىشمىز   قالىغاندۇ   دەيمەن . ئادەمنى  بەك  ئويلاندۇرىدۇ  جۇمۇ  بۇنداق  پەس   ئىشلار .....ھەي.........بۇ  جاھان  نىم  بوپ  كەتتى  ئەمدى .

1670154432

	مەن تاقىغان ،نەچچە يىلنىڭ ئالدىدا كۆزۇمنى تەكشۇرتسەم ،ئىككى كۆزۇمنىڭ گىرادۇسى ئوخشاش چىقمىدى ،گىرادۇسلۇق كۆزئەينەك تاقاي دىسەم پەقەتلا كۆزۇمگە سىغمايدۇ ئاشۇنداق كۆزەينەك تاقىغانلار ،شۇنىڭ بىلەن بىر دوستۇمنىڭ مەسلىھەتى بىلەن ،بەلگلەنگەن دوختۇرخانىدىن ئېلىپ تاقىغان ،ئۇلار تاقاپ سىناق قىلغىلى قويمايدىكەن ،ئۆيگە كىلىپ تاقاپ باقسام چىرايىمغا  50 گىرام سىڭگەن بولسا نىمە دەي ،تاشلىۋىتەي دېسەم 200 يۇئەن پۇلغا ئالغان ،ئشلىتىۋىرەي دىسەم ئۇ كۆزنى سېلىپ تالاغا قانداق چىقىشنى بىلمىدىم ،ئۇنى ساقلاپ-ساقلاپ ئاخىرى شۇنداق مودىكەش دوستۇمدىن بىرسىگە 100 يۇئەنگە سېتىۋەتكەن ،بىر ھەپتىدىن كىيىنلا قىزىققارلىق خەۋەردىن بىرنى ئاڭلىدىم، مەندىن كۆز ئالغان دوستىمىز ،يەنە بىر توي قىلىپ بولغان دوستىمىزنىڭ ئۇيىدە قۇنۇپ قاپتۇ ،ئۇخلىغاندا ئۇ كۆزنى ئېلىۋەتمىسە بولمىغاچقا ئۇ كۇزنى ئېلىپ دورىسىغا چىلاپ قۇيۇپ ،ئەتىسى ئۇنتۇپ قېلىپ قاپتۇ ، ئەتىگىنى ئۇ دوستى يولدىشى بىلەن چاي ئېچىپ ئولتۇرسا ھېلىقى دوستىمىزدىن تىلىفۇن كەپتۇ ،ئۇ ھازىرلا كېتىپ يەنە نىمىگە تېلىفۇن قېلغاندۇ دەپ ئەجەپلىنىپ تېلىفۇننى ئالسا ،ئاداش ئاخشام مىنىڭ كۆزۇم سىلەرنىڭ  ئويدە قاپتۇ دېيىشىگە يولدىشى كۆلىمەن دەپ ،ئېچىۋاتقان چېينى ئايالىنىڭ يۇزىگە پۇركىۋىتىپتۇ ،ھەم يولدىشى ئايالىنى تىللاپ كىتىپتۇ ،ئوينىڭ ئۇ يەر بۇيېرىدە يالغان كىرىپىكىڭنى چاپلاپ يۇردۇڭ گەپ قىلمىدىم ،بۇنىڭغا ھەيران بۇلۇپ يۇرسەم ،ئەمدى دوستۇڭنىڭ كۆزىمۇ يالغانكەن ،سەن خەقنىڭ زادى نىمەڭ راست؟ دەپ ،بۇ گەپ دوستلىرىمىزنىڭ ئارىسىدا خېلىغىچە قىزىقق نۇقتىغا ئايلىنىپ قالغان.

1670154432

	zapar يوللىغان ۋاقتى  2012-11-13 11:46 AM ياق ھەرگىز شورىمايمەن، بىكار چاپاقنى شۇرۋېلىپ ھىسيات ... خاتىرجەم بۇلۇڭ ،ئۇ ئەينەك ئەمەس ،يۇمشاق سۇلياۋدىن ئىشلەنگەن ،ئاغزىڭىزغا تىكەتسىمۇ كىسۋەتمەكتە يوق ،تۇيمايلا يۇتىۋىتىسىز.