شىۋىرلىغان غازاڭلار

abaytarim

	ھەر يىلى مۇشۇ پەسىلدىكى غازاڭلارنىڭ شىۋىرلىغان تېۋىشلىرى مېنى تولىمۇ جەلپ قىلاتتى . غازاڭنىڭ قىسمىتىمۇ قىزىق ئىكەن . ئىنسانىيەت ھازىرغىچە قانچىلىغان غازاڭلارنى دەسسەپ ، چەيلەپ كەلگەندۇ - ھە؟... ئەتىيازدا بىزنى تەشنا قىلىدىغان يوپۇرماقلارنىڭ بىر نەچچە ئاينى ئۆتكۈزۈپلا ئىسمىنىڭ ئۆزگىرىپ يوپۇرماققا ، يەرگە چۈشۈپ كەتكەنلىرى دەسسىلىپ غازاڭ ئاتىلىپ قېلىشىمۇ ئۇنىڭ ئۆزگەرمەس تەقدىرى .   مانا باغچىدا كېتىپ بارىمەن . ئايىغىم ئاستىدا ھاياتىي كۈچىنى پۈتۈنلەي يوقاتمىغان غازاڭلار غىرىسلايتتى . مەن ئېڭىشىپ ئىككى قولۇمغا سىقىمداپ ئالغان نۇرغۇن غازاڭلارغا ئۇزاققىچە قارىدىم . ئۇلار ماڭا شىۋىرلاۋاتقاندەك قىلاتتى . مەن قانچە دىققىتىمنى يىغساممۇ ئۇلارنىڭ ئاۋازىنى ئاڭلىيالمايۋاتاتتىم . قارىغاندا مەندە ئۇلارنىڭ ئاۋازىنى ئاڭلىغۇدەك قۇلاق ، ياق ..قەلب يوق بولسا كېرەك . چۈنكى قۇلاقنىڭ ئاڭلايدىغىنى ئاۋازلا پەقەت . ئەمما قەلبنىڭ ئاڭلايدىغىنى تولىمۇ تېرەن يەردە ئىدى . قەلبنىڭ خىتابىغا قۇلاق سالالىغان ئىنسان ھەقىقەتەنمۇ ھەقىقى ئىنسانلارنىڭ ئىچىدىكىسى ئىدى . تۇرۇپلا يوپۇرماقنىڭ ھالقىلىق پەيتتىكى  مەردانىلىكىمۇ مېنى جەلپ قىلىۋاتقاندەك قىلاتتى . چۈنكى ئۇ ئۆزىنىڭ ھاياتىنىڭ ئاخىرلاشقانلىقىنى ھىچبىر پەدەزسىزلا ئىنسانلارنىڭ ئايىغىغا تاشلايتتى . مەن بېشىمنى كۆتۈرۈپ دەرەخكە قارىدىم . يەنە نۇرغۇن يوپۇرماقلار يەرگە چۈشۈشنى خالىماي كۈچلۈك شامالغا بەرداشلىق بېرىپ ئاخىرقى دەقىقىغىچە ھايات- مامات ئارىسىدا ئېلىشىۋاتاتتى . بىر نەچچىسىنى تارتىپ بېقىپ ھەيران قالدىم .ئۇلار دەرەخ غوللىرى قاچان غولىسا شۇ چاغدا بىرلىكتە تۇپراققا كۆمۈلۈشنى نىيەت قىلىشقاندەك ئۆزىنى ئۆستۈرگەن غولغا شۇنچىلىك چىڭ يېپىشقانىدى . ئەتراپىمدا بىر نەچچە سەيلىچىلەر ساپسېرىق يوپۇرماقلارنى كۆرۈنۈش قىلىپ ، ئاستىغا لىق غازاڭنى يىغىپ ھەر خىل شەكىللەردە سۈرەتكە چۈشۈۋاتاتتى . شاختا تۇرغان يۇپۇرماقلار گۈزەل كۆرۈنۈش بىلەن ئۇلارنى ھوزۇرلاندۇرسا ، يەرگە چۈشۈپ غازاڭغا ئايلانغانلىرى ئۇلارغا سېلىنچا بولۇۋاتاتتى . قاياقتىندۇر بىر نەچچە ئادەم دەرەختىكى قېپقالغان يوپۇرماقلارنى بىر باشتىن سېرىپ خالتىغا سېلىپ، يوپۇرماقنى غازاڭغا ئايلاندۇرۋاتاتتى. قايتىشىمدا قەبرىستانلىقتا تالاي قەبرىلەر ئۈستىدە يېڭىلا شېخىدىن ئايرىلغان رەڭگارەڭ يوپۇرماقلار ئۇچۇپ يۈرەتتى ، ئۇلار شىۋىرلاۋاتاتتى ...ماڭا ئۇلار ئىنسانلاردىنمۇ ئۇزۇن ياشايدىغاندەك بىلىنىپ كەتتى ...    مەنبە : ئۆزۈم . ئايىغىم ئاستىدىكى كۈز غازاڭلىرى .      ئەبەي تارىم .2012-11-2.

ataman118

	بەك ياخشى يىزىپسىز بەكمۇ سۆيۈندۈم

azizgul

	يازنىڭ زىننىتى بولغان يېشىل يۇپۇرماقلار مانا ئەمدى سارغىيىپ خازان بولدى.................

بەرگى

	يوللاردىكى كۈز پەسلىنىڭ شاھىدى بولغان يوپۇرماقلارنى كۆرۈپ شۇنداق زوقلىنىپ كىتىمەن ، ئازاپتىنمۇ ياكى كۈزەللىككە تولغان گۈزەل كۈز پەسلىنىڭ خاسىيتىدىنمۇ ئىيتاۋۇر خىياللار دىڭىزغا كىرىپ كىتىمەن  ياز پەسلىدى ئەشۇ بىخلەپ چىقىدىغان ياپراقلارنىڭ تىزراق كىلشىنى سىغىنىمەن .........

okya120

	ئالامەت ياخشې يىزپسىز

xiho

	بۇ ئەسىرىڭ ناھايىتى ياخشى چىقىپتۇ-دوستۇم!http://www.nipic.com/show/1/47/5345889kaa1007d2.html

xiho

	بىر بىمار كارىۋاتتا يېتىپ سىرتتىكى دەرەخكە قاراپتۇ. ئۇ تۇيۇقسىز بۇ دەرەختىكى بىر تال يوپۇرماقنىڭ قىش كىرىپ قالغان بولسىمۇ، تېخى چۈشۈپ كەتمىگەنلىكىنى كۆرۈپ، ئۆز كۆڭلىدە مۇشۇ بىر تال يوپۇرماق دەرەختىن تۆكۈلگەن ھامان مېنىڭ ھاياتىممۇ ئاخىرلىشىدۇ، دەپ ئويلاپتۇ ھەم كۈن بويى شۇ يوپۇرماققا قاراپ ئولتۇرۇپتۇ. بىراق ئۇ بىر تال يوپۇرماق تاكى بۇ كىشىنىڭ كېسىلى ساقىيىپ كەتكىچىمۇ تۆكۈلمەپتۇ.ئەمەلىيەتتە، بۇ يوپۇرماق بىرەيلەن شۇ دەرەخكە ئېلىپ قويغان سۇلياۋ يوپۇرماق ئىكەن. دەرۋەقە شۇ سۇلياۋ يوپۇرماق ھاياتىدىن ئۈمىد ئۈزگەن ئاشۇ بىمارغا قايتا ئۈمىد ئاتا قىلغان. ھېكمەت: ھاياتلىقتا پەقەت شۇ يوپۇرماق تۆكۈلمەيدىكەن،ھاياتىمىزدا ئۈمىد ئۈزۈلمەيدۇ. ھەقىقىي ھاياتىي كۈچ ئۇ يوپۇرماق بولماستىن، بەلكى ئادەمدىكى ئىشەنچ. ھاياتىمىز يوپۇرماقلىرىنىڭ مەڭگۈ تۆكۈلمەسلىكى ئۈچۈن، ئالدى بىلەن قەلبىمىزدىكى يوپۇرماق مەڭگۈ تۆكۈلمەسلىكى شەرت.

mahatjan

	ياشلىق ئادەمنىڭ زىلۋا بىر چېغى، تولىمۇ قىسقا ئۇنىڭ ئۆمرى بىراق. يىرتىلسا كالىندارنىڭ بىر ۋارىقى، ياشلىق گۇلىدىن تۆكۈلىدۇ بىر تال يوپۇرماق.