يالغۇز ئەمەس يىغلىغان يۈرەك

suzuk-ay

	يالغۇز  ئەمەس  يىغلىغان  يۈرەك سەن كەتتىڭ . ئارقاڭدىن سېنى تۇتۇپ قېلىش ئۈچۈن سوزۇلغان ئاجىز قوللۇرۇم ھاۋادا قامغاق ياپرىقىدەك لەيلەپ قالدى. ئارقاڭدىن قانچىلىك قاراپ تۇرغانلىقىمنى بىلەمسەن؟ مەيۈس كۆزلىرىمدە لىق تولغان ھەسرەت ياشلىرى مەڭزىمنى دومىلاپ ئاستا سىرغىپ چۈشكىنىدە،  سېنىڭ يېنىمدا تۇرۇپ مەڭزىمدىكى ئەشۇ ئەلەملىك تامچىلارنى مېھىرلىك قوللىرىڭ بىلەن سۈرتۈپ قۇيۇشىڭنى قانچىلىك ئارزۇ قىلدىم. بىراق، سەن ئاللىقاچان يېنىمدىن كەتكەن ئىدىڭ. سەنسىز تەنھالىقىمنى يۈرىكىمگە ھەمراھ قىلىپ ، بىز ماڭغان ئاۋات كوچىلارنى، ئۇزۇن يوللارنى كېزىۋاتىمەن. كوچىلار ئىنتايىن ئاۋات.بىراق مەن تەنھا...مەنزىلىمنىڭ قايانلىقىنى بىلمەي ، بارماقلىرىمنى چىشلەپ گاڭگىراپ كېتىۋاتىمەن.ئاھ ، مېنىڭ يالغۇزلۇقۇم... نېمە دېگەن غېرىپ كۈنلەر -بۇ؟!...ئىكىمىز ھەققىدە تولا ئويلاپ بېشىمنىڭ ئىچ-تېشىنىڭ تاشتەك قېتپ كەتكەنلىكىنى بىلەمسەن؟ مەن تۇرۇپلا ھەيران قالدىم.ئارىمىزدا بىزنى ئايرىپ تۇرغان بىر تاغ بار ئىكەن.ئاھ، خۇدا...قانچە قىلىپمۇ بۇ تاشنى يىراقلارغا ئىرغىتىشقا كۈچۈم يەتمىدى.مەن تولىمۇ ئاجىز... مەن بەك چارچاپ كەتتىم، بەكلا... ئېغىر قەدەملىرىمنى ئاران يۆتكەپ ھۇجرامنى تېپىۋاپتىمەن.ئۆزۈمنى قاتتىق كارۋاتقا جاققىدە تاشلاپ ، مىسكىن تۇرقۇمغا قاراپ مېنى مەخسىرە قىلىۋاتقان تام سائىتىگە قاراپ قالدىم.ئۇ مېنى مەسخىرە قىلىۋاتىدۇ...ۋاقىتنى ئازاپ بىلەن ئۆتكۈزۋاتقىنىمغا بەلكىم ئىچى ئاغىرۋاتقاندۇ؟ سۆرۈن تەلەت ھۇجرىدا غېرىپلىق بۆرىدەك سۈرلۈك ھۇۋۇلىماقتا. ھىجراننىڭ مۇدھىش پۇراقلىرى سەزگۈلىرىمنى تىتىرتىپ يۈرىكىمنى ئەلەملىك دۇنياغا باشلاپ كىرمەكتە. كۆزلىرىمدىن توختىماي سىرغىۋاتقان ھەسرەت مېھىرلىك قوللىرىڭنى سېغىنماقتا... قارچۇغىمدا سېنىڭ سىمايىڭ،دىماقلىرىمدا خۇشبۇي ھىدلىرىڭ...ئاھ ، ئەنە شۇ شېرىن دەقىقىلەر خىيال ئېكرانىمدا بىر-بىرلەپ ئۆتمەكتە...ئەنە قارا، بىر جۈپ قىز-يىگىت مۇڭلۇق لىرىكىلار ئارىسىدا سۆيگۈ چېچەكلىرىنى پۈتكۈل دۇنياغا چاچقۇ قىلىپ چاچماقتا...ئوتلۇق لەۋلەرگە مېھىرلىك ئىز سالغان سۆيگۈ چوغلىرى گۈلخان كەبى يانماقتا . ئىسىق يۈرەكلەر ھەممىنى ئۇنتۇپ ، شېرىن تۇيغۇلار ئىچىدە قانغۇچە سۆيۈشمەكتە...سىماپتەك ئېرىپ كەتكەن پاك ۋۇجۇدتا مۇھەببەتنىڭ خىجىلچان يۇلتۇزلىرى بىر-بىرىگە شوخلۇق بىلەن كۆز قىسىشپ ناز قىلماقتا... ئاھ، ئەشۇ گۈزەل مىنۇتلار  مەڭگۈ ئەستىن چىقمايدىغان ئۇنتۇلماس دەقىقىلەر ...قېنى؟؟؟...شۇ گۈزەل ، شېرىن چاغلار...ئاھ ،ئۇ كەتتى.جۇدالىقىمىز بىلەن تەڭلا بىز بىلەن خوشلاشتى.قارچۇغىمدا قېتىپ قالغان سىمايىڭ، چاچلىرىمدا ، تىنىقلىرىمدا قېتىپ قالغان ھىدلىرىڭ ، سەن بىلەن بىللە ماڭغان ، سىرداشقان دەملەر مانا ئەمدى سەن بىلەن بىللە كەتتى.ئۇ ئەمدى كەلمەيدۇ.مەڭگۈ كەلمەيدۇ ...مەڭگۈ...چۈنكى بىز ئاللىقاچان كۆزلىرىمىزدىكى ھەسرەتلىك ياشلارنى يۇشۇرۇپ ،ساختا تەبەسسۇم ئىلكىدە جۇدالىق قەدەھلىرىنى قىيمىغان ھالدا سوقاشتۇرۇپ ، ئاچچىق شاراپنى "خوشە" دەپلا كۆتۈرۋەتتۇق. ئاھ،خۇدا جۇدالىق شارابى نېمىدېگەن ئاچچىق-ھە! جەھەننەمدىكى ئەڭ ئاچچىق زەھەرمۇ جۇدالىق شارابىدەك ئاچچىق بولماس.شاراپنىڭ زەھەر كەبى ئاچىق ھارارىتىدىن قېقىلىپ كەتتىم.يۈرىكىمگە مۇزدەك ئازاپلار كەلكۈندەك ئېقىپ كىرىشكە باشلىدى.كاللامغا نەچچە مىڭلىغان ھەرىلەر غۇڭۇلداپ ، نېرۋىللىرىمغا رەھىمسىزلەرچە نەشتەر ئۇرماقتا... ئاجىز تەنلىرىمگە ئاچچىق ھىجران مەڭگۈلۈك ھەسرەتتىن ئىشكەل سالماقتا...يۈرەكلىرىمنىڭ قات-قاتلىرىغا قونغان ھەسرەت توزانلىرى روھىمغا ۋەھشىيلەرچە قېلىچ ئۇرماقتا.ئاھ، مەن ھاياتمۇ ياكى تىرىكمۇ؟؟؟...مەن ھېلىمۇ تىرىككەنمەن. بىراق، سارغايغان خۇنۇك چىراي ، چۇۋۇلغان چاچلار ئارسىدا مۆلدۈرلەپ تۇرغان مەيۈس كۆز،ئېغىر-ئېغىر تىنىۋاتقان ئاجىز تىنىق ،مىدىرلىتىشقا مادار قالمىغان مۇزدەك تەن...بۇنىڭ مۇردىدىن نە پەرقى... غېرىپلىق روھىمغا ياماشماقتا.يەر تېگىدىن بىر ئېچىنىشلىق نىدانى ئاڭلاۋاتىمەن.سەن ئاچچىق تولغۇنۇپ ،ئىڭراۋاتىسەن. نىدالىرىڭ توختىماي ئازاپقا، جۇدالىققا ، پەلەكنىڭ تەتۈر چاقپەلىكىگە لەنەت ئوقۇماقتا...يۈرىكىڭدىكى ئازاپنى مەنلا ئېلىپ كېتەي. سەن تەنھا قالساڭمۇ، مېھىرلىك يۈرىكىڭدە پاك سۆيگۈڭنى پىنھان تۇتۇپ مېنى يادلاپ تۇرغىن.مانا مۇشۇلار سېنىڭ ماڭا ئاتا قىلغان قىمەتلىك سوۋغاڭ بولسۇن... سەن يىغلىدىڭ.چىن يۈرىكىڭدىن يىغلىدىڭ ،مېھىرلىك كۆزلىرىڭدىن ئاققان ياشلىرىڭغا ئاسمانمۇ گويا ماتەم تۇتقاندەك زىمىنغا ئەلەم ياشلىرىنى غەزەپ بىلەن تۆكتى.ئەگەر ماڭا جاھان رەپتارىنى ئوڭشاش پۇرسىتى بېرىلسە ئىدى سېنى ھەرگىزمۇ يىغلاتمىغان بولاتتىم.قارا بۈگۈنمۇ قۇياشنىڭ كۆزلىرىدىمۇ ياش . چۈنكى مەن بىز بىللە تىككەن سۆيگۈ كۆچىتىنى ۋەيران قىلدىم. مېۋە بېرىش ئالدىدىكى ئەشۇ كۆچەتنى ئۇسسۇزلىقتىن ھالسىرتىپ قۇرۇتۇپ قويدۇم.مېنى كەچۈر... بەزىدە بۇ كاج تەقدىردىنمۇ زارلىنىپ قالىمەن. ئەجىبا سېنى ئۇچرىتىش، سۆيۈش ۋە سۆيۈلۈش ،ئايرىلىشنىڭ ھەممىسى تەقدىرنىڭ ماڭا يېزىپ قالدۇرغان كىنو سىنارىسىمىدۇ؟شۇنداق ئىكەن،ئىككىمىز بۇ كىنونىڭ باش قەھرىمانى ئىكەنمىز...تىراگىدىيىگە تولغان بو كىنو جەريانى ئىلاھىم، مەڭگۈ باشقا بىر جۈپ يۈرەكنىڭ بېشىغا كەلمىسۇن... ھىجران روھىمنى ئاچكۆزلەرچە  يالماۋاتىدۇ.ئۇ يۈرىكمدىكى سۆيگۈ ئوتلىرىنى بوراندەك كېلىپ پۈۋدەپ ئۆچۈرۈش ئۈچۈن ماڭا تەھدىت سالماقتا.مەن بۇ تەھدىتىن ھەرگىز قورقۇپ قالمايمەن.گەرچە ئاجىز بولساممۇ، پىنھان يۈرىكىمدە سۆيگۈمىزنىڭ قاتىلى بولغان ئازاپلارنى ئۇنتۇپ ، شېرىن ئەسلىمىلەرنى ساقلاپ قالىمەن. مەن كېتىمەن.ئازاپلارنى ئۇنتۇش ئۈچۈن، كەلگۈسىنىڭ نۇرانە يوللىرىغا ئۇل سېلىش ئۈچۈن، يېڭى ھاياتنىڭ ئالتۇن بوسۇغىسىنى قۇياش نۇرىغا چۈمكەش ئۈچۈن بۇ يەردىن كېتىمەن.بىز ئەمدى ئۇچرىشىپ قالمايلى، ناۋادا ،بىر كۈنلەردە ئۇچرىشىپ قالساق ،مېنى كۆرمەسكە سېلىپ يانداپ ئۆتۈپ كەت.سەندىن قىلچە رەنجىمەيمەن.مەن غېرىپ بولساممۇ ، يالغۇز ئەمەسمەن.سەنمۇ شۇنداق.چۈنكى بىز بىر-بىرىمىزنىڭ قىپقىزىل يۈرىكىنى ئېلىپ كەتتۇق. يۈرىكىم سەن بىلەن بىللە كەتتى،ئۇنى ئاسرا...ئۇ پاك يۈرەك ئىدى.مەمۇ يۈرىكىڭنى قەلب تۆرەمدە ئەبەدىي ساقلايمەن. سەزگۈلىرىم تېنىدۇ ئېغىر، يۈرەكتىكى ئاچچىق ئازاپتا. جىمجىت ئۈزەر ھەسرەت كېمىسى، ئاھلىرىمنىڭ كۆلىدە تەنھا. چېچەكلىرىم جۇدالىق يولدا، ئېچىلماي گۈل بولدىغۇ خازان. ئويچان كۆزنىڭ تۇمۇرلىرىدىن ، ئاقار قاندەك قىپقىزىل قىيان. يارسىز تۈنلەرنىڭ غەمناكلىرى، يۆگىشەر دىلغا ھەشپىقىچەكتەك، سەرسان ھايات باشلانغان شۇدەم، چوغدەك يۈرەك سوۋۇيدۇ مۇزدەك. بىزگە گەرچە ۋىسال تېڭىنى بىرگە تاڭ ئاتقۇزۇش نىسىپ بولمىسىمۇ ، پاك سۆيگۈنىڭ قىممەتلىك خاتىرلىرى مەڭگۈلۈك ئەسلىمە بولۇپ قالدى.ئۇ _ پاك ھېسيات،ئۇ_ئەڭ پاك ئەسلىمە...مەن ھامان بىر كۈنى بۇ ۋاپاسىز ھايات بىلەن خوشلىشىپ ، ئۆمرنىڭ ئەڭ ئاخىرقى مەنزىلگاھى قەبرىگە كېتىمەن .مەن  قەبرەمگە پاكلىقىمنى بىللە ئېلىپ كېتىمەن...قەبرىنى نۇرغا چۈمكەش ياكى تۇمانغا توشقۇزۇش مېنىڭ ھايات يولۇمغا پاك ئىزلارنى قالدۇرۇشىمغا باغلىق.ئاللاھ خالىسا مەن ئۆمۈر بەتلىرىمگە ئاق يۇلتۇزلانى كەشتىلەپ،ئىنسانىيەتنىڭ ئۇلۇغۋارلىقىنى پاكلىق ئۇپۇقىغا نەقىش قىلىپ ئويىمەن.ماڭا جەننىتىمنى تىلە،ئەزىزىم.مەن خاتىرجەم ھالدا جەننىتىمگە يول ئالاي... ئىچىمدە بىرسى :"ئۈمىد بىلەن يولغا چىق!ئازاپلارنى ئۇنتۇشقا ئىمكان قالدۇر...يىراقتا ئۈمىدلىك كۆزلەر سېنى سېغىنىدۇ ، سېنى ئەسلەيدۇ، سېنى يەنىلا سۆيىدۇ.سەن ھەرگىز يالغۇز ئەمەس.يىغلىما!...ھايات مەڭزىڭدىكى ياش ئەمەس..."دەپ چۇقان سالماقتا.توغرا ،مەن غېرىپ ،ئەمما يالغۇز ئەمەس... يالغۇز ئەمەس يىغلىغان يۈرەك، ئىشەنچ بىلەن يولغا چىقىدۇ. پارلاق ئەتە قۇچاقنى يېيىپ ، يوللىرىڭغا ئۈمىد چاچىدۇ. 2010-يىلى  (ئاۋغۇست) مەنبە:قەلىمىم. ئەسكەرتىش :مەزكۇر ئەسەرنىڭ ئىشلىتىش ھۇقۇقى مىسرانىم مۇنبىرىگە تەۋە. كۆچۈرۈشكە ياكى باشقا مۇنبەرگە يۆتكەشكە قەتئىي بولمايدۇ.ئەسەر ھۇقۇقىغا دىققەت قىلىڭ !

d@tman

	ياخشى چىقىىتۇ................

subhinur

	مەن يالغۇز ئەمەس، يۈرىكىمگە يۈرىكىڭ ھەمراھ. بىراق مەن غېرىپ، ئەپ كەتتى سىنى رەھىمسىز دۇنيا.....

دىلسىرى

	لىرىكىڭىز ئۈزۈلمىسۇن !

kokyal

	نېمە دەپ ئىنكاس يېزىشنى بىلەلمىدىم ، پەقەت مۇشۇ نەسىرىمنى ئىنكاس شەكلىدە يوللاشنى مۇۋاپىق كۆردۈم : http://jalipkar.blogbus.com/logs/61781926.html مۇزىكىنى قويالمىدىم .

تاڭنۇر

	يالغۇز ئەمەس يىغلىغان يۈرەك ، بىر ئارماننى كۈتەر تائەبەت ، پاك -سۆيگۈمنى خازاڭ قىلغىنى ، چىن رىشتىنىڭ قىساسى نەپرەت . قانداق ئىنكاس يېزىشنى بىلەلمەي قالدىم  ،،،،،،،،، بولدى ئارتۇق گەپ قىلماي ھە لىرىكىغا ھەقىقەتەن باي ئىكەنسىز .......... قاملاشمىسىمۇ بىر كوبلىت يېزىپ باقتىم ،لىرىكىلىرىڭىز مۇنبەردىن ئۈزۈلمىسۇن !!!

شاتئاي

	ئىچىمدە بىرسى :"ئۈمىد بىلەن يولغا چىق!ئازاپلارنى ئۇنتۇشقا ئىمكان قالدۇر...يىراقتا ئۈمىدلىك كۆزلەر سېنى سېغىنىدۇ ، سېنى ئەسلەيدۇ، سېنى يەنىلا سۆيىدۇ.سەن ھەرگىز يالغۇز ئەمەس.يىغلىما!...ھايات مەڭزىڭدىكى ياش ئەمەس..."دەپ چۇقان سالماقتا.توغرا ،مەن غېرىپ ،ئەمما يالغۇز ئەمەس... بۇ جۇملىلەر ئادەمگە باشقىچە ئۇمۇت ، ئىرادە تۇيغۇسىنى بىردىكەن. لىرىكىڭىزدىن مۇڭلىنىپ ، ئۆزۇمنىمۇ تارتىپ چىقالمايمەن يا ،..  [s:52]  [s:52] تاتلىق ئاداش ھارمىغايسىز ```  قەلىمىڭىز تىخىمۇ بەركەتلىك بولغاي.

marhaba

	بەك ھىسياتلىق چىقىپتۇ،سىزگە رەھمەت سۈزۈكئاي.

Xarminaz

	لىرىكىڭىز شۇنداق ھېسياتلىق چىقىپتۇ ........    مۇڭلىنىپ ئولتۇرۇپ ئۇقۇپ تۈگەتتىم .....   مۇھەببەتلىك يۈرەكتىن مانا شۇنداق مۇھەببەت كۈيلىرى ئۈزۇلمەي تۆكۈلۈپ تۇرىدۇ.......

TANHA204

	يالغۇز ئەمەس يىغلىغان يۈرەك ، بىر ۋىسالنى كۈتىدۇ ھامان ! كۈتىمەن سىنى مەڭگۈ ئەبەدكە ، قالمىسا ھەتتا ۋۇجۇدتا دەرمان .    سەل قاملاشمىدى سىڭلىم ``كەيپىياتىم سەل جايىدا ئەمەس ،مۇشۇنچىلىك يازاي ،ئەسەرلىرىڭىزنى كۆرمىگىلى ئۇزۇن بوپتىكەن ،قەلىمىڭىز ھارمىغاي !     ما دىلسىرىغىمۇ رەھمەت ،ما مۇزىكا مېنى تېخىمۇ ئويغا سېلىۋەتتى دېسە `