ساۋاقداشلار ئۇچرىشىشى رىياسەتچى سۆزى

قۇددۇس

	XXX   ناھىيەلىك XXXمەكتەپ XXX- يىللىق سىنىپ ئوقۇغۇچىلىرىنىڭ 30 يىللىق ساۋاقداشلار ئۈچرىشىش خاتىرىسى رىياسەتچى سۆزى ئەسسالامۇ ئەلەيكۈم مۇھتىرەم ئۇستازلار، ئەسسالامۇ ئەلەيكۈم ئەزىز ساۋاقداشلار: ۋاقىت دىگەن ئاتقان ئوق، ئۇ يانمايدۇ كەينىگە؛ ۋاقىت بىلەن بەسلىشىپ، بىز چۇشەيلى بەيگىگە. 30 يىل ئىلگىرى، مەن بىر كىچىك مەسۇم قىز ئىدىم. 30 يىل ئىلگىرى مەن سەھنە ئەمەس بەلكى ئوقۇتقۇچىنىڭ سورىغان سۇئالىغا جاۋاپ بەرگىچە بويۇنلىرىمغىچە قىزىپ كېتىدىغان تارتىنچاق قىز ئىدىم. 30 يىل ئىلگىرى بۇ يەردە ئولتۇرغانلارنىڭ ھەممىسى ئەينى ۋاقىتتىكى ماڭا ئوخشاشلا قايناق ھىسىياتقا ئىگە، ئۇلۇغ غايىنى كۆڭلىگە پۈككەن، ۋاقىت بىلەن بەسلىشىپ، مىنۇت سىكىنوتنى قولدىن بەرمەي، بىلىم دېڭىزىغا شۇڭغۇپ كىرگەن تىرىشچان ئوقۇغۇچىلار ئىدى. ھالا بۈگۈنكى كۈنگە كەلگەندە 30 يىللىق تۇرمۇش مۇساپىسىنى باشتىن كەچۇرۇش ئارقىلىق، ھەر يەر، ھەر ساھەلەردە ۋاقىت بىلەن بەسلىشىپ، ۋاقىت بىلەن بەيگىگە چۇشۇپ، مۇئەييەن ئۇتۇق ۋە نەتىجىلەرنى قازاندۇق. ھايات دەپتىرىمىزنى ۋاراقلاپ، ئۇتۇق ۋە نەتىجىلىرىمىزنى ئەسلىگىنىمىزدە، بۇ نەتىجىمىزدىن دوكلات بېرىشىنى، بۇ ئۇتۇقلىرىمىزنى ئورتاقلىشىشىنى ئىستىدۇق. مانا بۈگۈن بىز مىھرىبان ئۇستازلىرىمىزنىڭ قىزغىن قوللاپ قۇۋەتلىشى، بارلىق ساۋاقداشلارنىڭ ئورتاق كۈچ چىقىرىشى بىلەن ----XX1- ئوتتۇرا مەكتەپ XX- يىللىق سىنىپ ئوقۇغۇچىلىرىنىڭ مەكتەپ پۈتتۈرگەنلىكىنىڭ 30 يىللىق ساۋاقداشلار ئۇچرىشىش پائالىيتىنى داغدۇغىلىق ئۆتكۇزدۇق. 1979- يىلى 9- ئاي. تولىمۇ ئۆزگىچە بىر يىل. مەدەنىيەت زور ئىنقىلاۋىنىڭ بورانلىرى بېسىقىپ، ئوقۇتۇش ئەسلىگە كەلگەن يىللار. بىز ئوتلۇق ئازرۇلىرىمىزنى كۆڭلىمىزگە پۈكۈپ، ناھىيىمىزنىڭ ھەر يەر، ھەر يەرلىرىدىن ئانا مەكتەپكە يىغىلدۇق. شۇنىڭدىن باشلاپ ھاياتىمىزدىكى ئەڭ پاك، ئەڭ جۇشقۇنلۇق ۋاقىتلىرىنى بىرگە ئۆتكۈزدۇق. تولۇق ئوتتۇرادىكى ئوقۇش ھاياتىمنى ئەسلىگىنىمدە مەيلى خاتا ۋە ياكى توغرا ئىشلار بولسۇن ئۇلارنىڭ ھەممىسى ماڭا تولىمۇ شېرىن، يېقىملىق تۇيغۇ ئاتا قىلىدۇ. مېنى ياشلىقىمغا قايتۇرىدۇ، ئەينى چاغدىكى ئەسلىمىلىرىمنىڭ ھەممىسى مېنىڭ ھاياتىمدىكى موھىم بايلىقىم، ئۇ مېنىڭ، شۇنداقلا ئولتۇرغان ھەر بىرەيلەننىڭ ھەسسىلەپ قەدىرلىشىگە ئەرزىيدىغان  ھايات. 1982- يىل. 7- ئاي. ئۈچ يىل بىر بىر پارتىدا ئولتۇرۇپ، بىر ئۇستازنىڭ قولىدىن تەلىم ئالغان،  ئەمدى 18 ياشلارغا كىرگەن مەسۇم قىز، مايسا بۇرۇت يىگىتلەر ھەم خوشاللىق، ھەم ئىسەنكىرەش، قىيالماسلىق ئىچىدە ئانا مەكتەپتىن ئايرىلدۇق. ئۇستازلاردىن ئايرىلدۇق. ئۈچ يىللىق ساۋاقداشلىرىمىزدىن ئايرىلدۇق. 30 يىل ئىلگىرىكى مۇنۇ قوشاق ئېسىمگە كېلىپ قالدى: ئالگىبىرادا ئا تولا،  فىزىكىدا فورمىلا. شۇنچە قاراپ ئولتۇرۇپ، بىرنى بىلسەم نىم بولا؟ يەنە بىر ئىش ئېسىمگە كېلىپ قالدى. مۇشۇ يەردە ئولتۇرغان بىر قىسىم ساۋاقداشلىرىم مۇئەللىمنىڭ سورىغان سۇئاللىرىغا جاۋاپ بېرىپ بولالماي، ئوتتۇرىغا چىقىپ قالاتتى. بىچارە ساۋاقداشلىرىم شۇ چاغلاردا قىزىپ، تاتىرىپ تۇرسىمۇ، بۇ زالىملار قىلچىمۇ ئىچ ئاغىرتىش دىگەننى بىلمەيتى. قاراڭلار، بۈگۈن بىزنىڭ مۇشۇ «زالىم، قاپىقى يامان» ئەپەندى، خانىملاردىن ئۆچىمىزنى ئالىدىغان ۋاقىت كەلدى. «زالىم» ئۇستازلاردىن لارنى ئوتتۇرىغا چىقىرايلى! (ئوقۇتقۇچىلارغا تون كەيدۇرۇش ئېلىپ بېرىلىدۇ) (ئەگەر مۇمكىن بولسا ئوقۇتقۇچىلارنى سۆزگە تەكلىپ قىلسىمۇ بولىدۇ) (تون كەيدۇرۋاتقان ۋاقىتتا) «ئۇستازىڭ زالىم بولسا شاگىرتىڭ ئالىم بولۇر». 30 يىللىق ھايات مۇساپەمدە ئەينى چاغدا زالىم دىگەن ئۇستازلىرىمنىڭ بىزگە نەقەدەر كۆيۇنىدىغانلىقىنى، نەقەدەر تەلەپچان ئىكەنلىگىنى تونۇپ يەتتىم. ئەگەر ئۇلارنىڭ شۇ چاغدا زالىملىقى بولمىغان بولسا مېنىڭ ھەمدە مۇشۇ يەردە ئولتۇرغان بارلىق ساۋاقداشلارنىڭ بۈگۈنكىدەك بەختىيار كۈنى بولمىغان بولاتتى. رەھمەت سىزگە مۇئەللىم.    رەھمەت. (ئوقۇتقۇچىلار ئۆز جايىغا ئولتۇرۇپ بولغاندىن كېيىن) ........................ ھەش – پەش دىگىچە 30 قىش، 30 باھار، 30 ياز، 30 كۈزنى تۇگەتتۇق. ئىنسان ھاياتىدا بۇنداق 30 يىلدىن يەنە نەچچىسى بار؟ بىز ئەمدى ئالدىراشلىق ئىچىدە ۋاقىت چىقىرىپ ئارام ئېلىشنى، ئەسلىمىلەرنى ۋاراقلاپ بېقىشنى، ئۇنتۇلغان چىرايلارنى كۆرۇپ بېقىشنى ئۇمىد قىلدۇق. مۇشۇ ھەقتە ساۋاقدىشىمىز                    نى سۆز قىلىپ بېرىشكە تەكلىپ قىلىمىز. (سۆزى ئاخىرلاشقاندىن كېيىن) رەھمەت، تولىمۇ پاساھەتلىك سۆزلەرنى قىلدىڭىز.   بۈگۈنكى بۇ پائالىيەت دەل بايا ساۋاقدىشىمىز ********* دىگەندەك «قىز – ئوغۇل، ئەر – ئايالدىن ئىبارەت جىنىس ئايرىمىسى بولمىغان، پەقەت ساۋاقداشتىن ئىبارەت بىر ئۇقۇم بولغان ،  30 يىللىق كەچمىشلىرىمىزنى، 30 يىللىق پىغانلىرىمىزنى، 30 يىللىق سىغىنىشلىرىمىزنى، 30 يىللىق ئامەتلىرىمىزنى، 30 يىللىق مۇۋاپىقىيەتلىرىمىزدىن بىرلىكتە ئورتاقلىشىدىغان يىغىلىش. بۈگۈنكى بۇ يىغىلىش كۆپچىلىك ساۋاقداشلارنىڭ قايتا دىدارلاشتۇرۇلۇپ، ئۆتكەن ئىشلارنى ئەسلەشنىڭ ياخشى پۇرستى. پەقەت جاپالىق تۇرمۇشتىن ھال مۇڭ قىلىدىغان ئەمەس بەلكى رەڭگارەڭ گۈزەل تۇرمۇشتىن ئورتاق ھوزۇرلىنىپ، چۇشۇنۇشنى چوڭقۇرلاشتۇرۇپ، دوستلۇقنى چىڭىتىپ، بۇنىڭدىن كىيىنكى تۇرمۇش ۋە خىزمەتتە ھەمدەم بولۇشنى تېخىمۇ ئىلگىرى سۇرۇشنى مەقسەد قىلغان ئۇچرىشىش. قېنى ئەمسە، 30 يىللىق ساۋاقداشلار ئۇچرىشىنى بارلىق ساۋاقداشلار ئەڭ ياخشى كۆرىدىغان ناخشا «ساۋاقداش» بىلەن باشلايلى.  كۆپچىلىك ئۇستازلارنىڭ، ساۋاقداشلارنىڭ بەھوزۇر ئولتۇرۇپ، كەڭ كۇشادە پاراڭلىشىپ، پىكىر ئالماشتۇرىشىنى ئۇمىد قىلىمىز. ...................... (ئاخىرىدا) ئەتىكى پائالىيەت  XXXXX بولىدۇ. كۆپچىلىكنىڭ سائەت     دە،            يەرگە ئۆز ۋاقتىدا بېرىشىنى ئۈمىد قىلىمىز.

قۇددۇس

	XXXناھىيەلىك 1- ئوتتۇرا مەكتەپ 1982- يىللىق سىنىپ ئوقۇغۇچىلىرىنىڭ 30 يىللىق ساۋاقداشلار ئۈچرىشىدا قىلىنغان سۆز (ئوقۇغۇچىلار ۋەكىلى سۆزى) ئەسسالامۇ ئەلەيكۈم موھتىرەم ئۇستازلار! ئەسسالامۇ ئەلەيكۈم ئەزىز ساۋاقداشلار! مول ھوسۇلغا تولغان، ھەممىنىڭ چىھرىدە بەخىت – ئامەت ئىزنالىرى چاقناۋاتقان ئالتۇن كۈزدە، بۇنىڭدىن 30 يىل مۇقەددەم بىر پارتىدا ئولتۇرۇپ،  بىرلىكتە ئوقۇغان ساۋاقداشلارنىڭ ---- XX ناھىيەلىك 1- ئوتتۇرا مەكتەپ 1982- يىللىق ئوقۇغۇچىلىرىنىڭ 30 يىللىق ساۋاقداشلار يىغىلىشىنى ئۇتكۈزۋاتىمىز. بۇنىڭدىكى ئاساسى مەقسەد: -- 30 يىل ئىلگىرىكى ياشلىقىمىزنىڭ ئىزنالىرىنى؛ 30 يىل ئىلگىرى ۋۇجۇدۇمىزغا پاتماي، تومۇرلىرىمىزدە كۇۋەجەپ ئاققان قانلىرىمىزنى؛ ئالەمشۇمۇل غايە ئىستەكلەر پۈكۈلگەن قىپقىزىل قەلىبلىرىمىزنى، ئەڭ موھىمى 30 يىللىق ساۋاقداشلىق مىھرىنى ئىزدەپ تېپىپ، ئۇنى تېخىمۇ چوڭقۇرلاشتۇرۇش ۋە  ساۋاقداشلىق مىھرى بۇلىقىنىڭ زەمزەم كەبى تامچىسى بىلەن ھاياتلىق باغچىسىنى سۇغۇرۇپ، تېخىمۇ ئاينىتىش ۋە گۈللەندۇرۇش ئۈچۈندۇر. مۇشۇ مۇناسىۋەت بىلەن ساۋاقداشلارنىڭ ماڭا مۇشۇ ئۇلۇق ئۇچرىشىشتا سۆز قىلىش پۈرسىتىنى بەرگەنلىكىدىن چەكسىز ئىپتىخارلىنىمەن.         كۆپچىلىككە رەھمەت. بىزنىڭ تولۇق ئوتتۇرا مەكتەپنى پۈتتۈرگىنىمىزگە توپتوغرا 30 يىل بولدى. بۇ 30 يىل مابەينىدە جەمئىيەتتە، ئەتراپىمىزدا، ھاياتىمىزدا نۇرغۇن ئۆزگۇرۇشلەر بولدى؛ نۇرغۇن كەچمىشلەرنى باشتىن ئۆتكۇزدۇق؛ بۇرتى ئەمدى خەت تارتقان يىگىتلەردىن پىشانىسىنى قورۇق باسقان، كەسىپتە پىشقان، قانىتى قاتقان، بىر ئۆينىڭ تۇۋرىكى دەپ ئاتىلىدىغان ئەرلەرگە ئايلاندۇق؛ زىلۋا بويلۇق قىزلىرىمىز  بولسا مىھرى ئىسسىق، قوينى كەڭ،  مىھرىبان ئانىلارغا، جاپاكەش ئاياللارغا ئايلاندى. 30 يىل مابەينىدە يۇرتىمىزدا ۋە ئۆزىمىزدە نۇرغۇن ئۆزگىرىشلەر بولدى. يۇرتىمىزنىڭ يوللىرى تېخىمۇ ئاۋاتلاشتى، بازارلار تېخىمۇ موللاشتى، ئېرىق – ئۆستەڭلەردىكى سۇلار تېخىمۇ سۇزۇكلەشتى. ساۋاقداشلار ئارىسىدا بەزىلەر رەھبەرلىك قاتلاملىرىدا ئىشلەپ، ئاۋامنىڭ باشلامچىسىغا ئايلاندى؛ بەزىلەر بولسا كەسىپتە ئۇتۇق قازىنىپ، مۇتەخەسىسلەردىن بولۇپ يېتىشىپ چىقتى؛ يەنە بەزىلەر سودا ساھەسىگە مېڭىپ، بايلىقى ئېشىپ، نامراتلارنى يۆلەپ، جەمئىيەتكە جاۋاپ قايتۇردى. دىمەكچىمىزكى 30 يىل جەريانىدا يۇرتىمىزدا يۇز بەرگەن ھەر بىر ئۆزگۇرۇشلەر، ھەر بىر يېڭىلىقلارغا 82- يىللىق سىنىپتىكى ھەر بىر ئوقۇغۇچىنىڭ ئەڭ كەمىدە بىر تامچىدىن ئەجىر تەرى سىڭگەن. بىزنىڭ پىشانىمىزگە چۇشكەن قورۇقلار، چېكىمىزدىكى ئاق چاچلار بۇنىڭغا شاھىت. شۇنداق دىيىشكە قادىرمىزكى: بىز   XXناھىيەلىك 1- ئوتتۇرا مەكتەپنىڭ 1982- يىلى تولۇق ئوتتۇرا سىنىپ ئوقۇغۇچىلىرى مىھرىبان ئاتا- ئانىلىرىمىزنىڭ؛ قەدىرلىك ئۇستازلىرىمىزنىڭ؛ مېھرى ئىسسىق مەكتىۋىمىزنىڭ؛ قوينى كەڭ يۇرتىمىزنىڭ تۇزىنى ئاقلىدۇق! 30 يىل ئىلگىرى. مەكتەپنى پۈتتۈرگەندىن كېيىن كەسىپ ۋە تۇرمۇش ئۈچۈن بىز تەرەپ – تەرەپكە چېچىلدۇق. ئالاقىلىشىشىمىز ئازايدى، ئايدا – يىلدا، بەزى – بەزىدە يوللاردا، كوچىلاردا ئۇچراپ قالغان ئۇنتۇلۇپ كېتەي دەپ قالغان تونۇش چىرايلارنى كۆرگەن چاغلىرىمىزدا، يۈرەكلىرىمىز ھاياجاندىن قېنىغا پاتماي قالدى. كۆزلىرىمىزدىن ئاللىكىملەرنى، قانداقتۇر مەنالارنى ئىزدىدۇق. لېكىن بۇ مەنالارنىڭ جاۋابىنى دەل بۈگۈن تاپتۇق. چۇنكى بېشىمىزدىن قانداق قىسمەتلەر ئۆتسۇن، مەيلى جاھاننىڭ قەيىرىگە بارمايلى ئەينى ۋاقىتتىكى ساۋاقداشلار گوياكى بىر تىزىق مارجاندەك، 82- يىللىق تولۇق ئوتتۇرا سىنىپتىن ئىبارەت بۇ مۇقەددەس نامنى تىلغا ئېلىپ، ئۇنى دەۋىر قىلىپ چۆرگىلەپ كەلدۇق. بۇ جەرياندا نۇرغۇن – نۇرغۇن ساۋاقداشلارنى ئۇچراتتۇق؛ ئالى مەكتەپتىكى ساۋاقداش، تەربىيلەش كۈرسلىرىدىكى ساۋاقداش، پارتىيە مەكتەپتىكى ساۋاقداش، ئاسپىرانىتلار كۈرسىدىكى ساۋاقداش، مەيلى قايسى خىلدىكى ساۋاقداش بولىشىدىن قەتئى نەزەر يۇقارقى ساۋاقداشلىقنىڭ ھىچقايسىسى ئەينى ۋاقىتتىكى تولۇق ئوتتۇرا مەكتەپ ھاياتىدىكى ساۋاقداشلىقنى بېسىپ چۈشەلمىدى.  چۇنكى تولۇق ئوتتۇرا مەكتەپ ساۋاقداشلىقىنىڭ مىھرى چوڭقۇر، ئەقىدىسى چىڭ،  مۇھەببىتى ساپ؛ چۇنكى ئۇ چاغلاردا بىز ياش ئىدۇق، نەۋقىران ئىدۇق؛ ئۇ چاغلاردا بىز پاك ئىدۇق؛ بىزنىڭ ساۋاقداشلىقىمىزدا پايدا – زىيان، يۇقىرى – تۆۋەنلىك يوق ئىدى؛ پەقەت سەمىمىيلىك ۋە چىن ھېسىياتلا بار ئىدى. 30 يىل ئەگرى – توقاي، ئاچچىق – چۇچۇك قىسمەتلىرىگە تولغان ھايات. 30 يىل قىيىنچىلىقلار ئىچىدىن يول ئېچىپ، مىھرى – مۇھەببەتتىن ئورتاق بەھىرلىنىپ، تۇرمۇشىمىزنى گۈللەتكەن ھايات. ساۋاقداشلار، ھەممىمىز بىرلىكتە كۆڭۇل قەسرىمىزنى ئېچىپ، كەڭ كۇشادە پاراڭلىشايلى. قىز – ئوغۇل، ئەر – ئايالدىن ئىبارەت جىنىس ئايرىمىسى بولمىغان، پەقەت ساۋاقداشتىن ئىبارەت بىر ئۇقۇم بولغان بۇ يىغىلىشتا 30 يىللىق كەچمىشلىرىمىزنى، 30 يىللىق پىغانلىرىمىزنى، 30 يىللىق سىغىنىشلىرىمىزنى، 30 يىللىق ئامەتلىرىمىزنى، 30 يىللىق مۇۋاپىقىيەتلىرىمىزدىن بىرلىكتە ئورتاقلىشايلى. بىرگە جەم بولغان ۋاقىتلىرىمىزدا چوڭقۇر قايغۇ ئىچىدە بالدۇر كېتىپ قالغان كۆيۈمچان، تەلەپچان ئۇستازلىرىمىزدىن                    لەرنى؛ بىزدىن ۋاقىتسىز ئايرىلغان، قارا يەرنىڭ تىگىگە كىرىپ، باقى راھىتىنى كۆرىۋاتقان ساۋاقداشلىرىمىزدىن لەرنى چوڭقۇر قايغۇ ئىچىدە ئەسلەيمىز. ئۇلارنىڭ جەننەت ماكان بولىشىنى تىلەيمىز. خوشاللىق ئىچىدە جەم بولغان چاغلاردا مەن بارلىق ساۋاقداشلارغا ۋاكالىتەن بۇ قېتىملىق ساۋاقداشلار ئۇچرىشىشغا كۆپ ئەجىر سىڭدۇرۇپ، ئەتراپلىق پىلانلاپ ئورۇنلاشتۇرغان XXXXXXقاتارلىق ساۋاقداشلارغا چوڭقۇر رەھمەت ئېيتىمەن. ئەگەر ئۇلارنىڭ كۆڭۇل قويۇپ پىلانلىشى، ئەتراپلىق تەشكىللىشى بولمىغان بولسا، بەلكىم بىز بۇ پائالىيەتنى ئۇيۇشتۇرالمىغان بولاتتۇق. شۇنداق تەكلىپ بېرىمەنكى: كۆپچىلىك ھەممىمىز بىرلىكتە بۇ قېتىملىق پائالىيەتنى پىلانلىغان، ئورۇنلاشتۇرغان، تەشكىللىگەن، تۆھپە قوشقان               قاتارلىق ساۋاقداشلارغا سەمىمى رەھمەت ئېيتايلى، سىلەرگە رەھمەت. ئىزىڭلاردىن گۈل ئۇنگەي. شۇنىمۇ دىگىم كېلىۋاتىدۇ. تۇرمۇش ۋە خىزمەت مۇناسىۋىتى بىلەن  خوشنا يۇرتلاردا تۇرۇپ قالغان ساۋاقداشلار بۇ پائالىيەتنىڭ خەۋىرىنى ئاڭلىغاندىن كېيىن، كېچىلەپ يول يۇرۇپ ئۆز ۋاقتىدا كېلىپ قاتنىشىپ، پائالىيەتىمىزنىڭ مەزمۇنىنى تېخىمۇ بېيىتتى. شۇ مۇناسىۋەت بىلەن ئۇزۇن يوللاردىن كەلگەن ساۋاقداشلارغا سەمىمى رەھمەت ئېيتىمەن. ئەڭ ئاخىرىدا، بارلىق ساۋاقداشلارنىڭ بۇنىڭدىن كېيىنكى ھايات مۇساپىسىدە بارلىق ئىشلىرىنىڭ ئوڭۇشلۇق، تېنىنىڭ سالامەت، تۇرمۇشىنىڭ باياشاد بولىشىنى؛ ئۇلۇغ ئاللاھنىڭ ھەممىمىزنىڭ ئائىلىسىگە بەخىت، پەرزەنىتلىرىمىزگە سائادەت، دوستلىقىمىزغا نۇسرەت ئاتا قىلىشىنى ئۇمىد قىلىمەن. كۆپچىلىككە رەھمەت.

خۇشفال

	نىمە بۇ ئىككى تىما ئوخشاش ئىكەنغۇ ئاساسەن كىيىنكىسى تىخىمۇ تەپسىلىي ئىكەن...تولۇقلىمىسى ئوخشايدۇ ئەھۋالدىن قارىغاندا....

ab8ob8

	ئوخخو... مەن ئالدىنقى ئايدا ساۋاقداشلار يىغىلىشىدا مۇشۇنچىلىك سۆزلىيەلمىدىم جۇمۇ... بالدۇرراق يوللىسىڭىز بوپتىكەن... لېكىنغۇ كۆنۈپ قالغان بۇرۇنقى ئۇسلۇب بويىچە خېلى پەيزى سۆزلەپ قويدۇم، ئورۇنلاشتۇرۇشۇمدىن ساۋاقداشلىرىممۇ خۇشالكەن....ئاللاھ خالىسا كېلەركى قېتىملىق يىغىلىشتا مۇشۇنى ئىشلىتەرمەن...

kar0923

	پايدىسى تېگىپ قالار دەپ ساقلىۋالدىم .... رەھمەت جۇمۇ

kurkum

	بىزمۇ بۇ يىل 10يىللىق خاتىرسىگە يىغىلغان

bendora

	kaLGundi يوللىغان ۋاقتى  2012-9-20 10:25 PM مەنغۇ ئۆتكەندە ساۋاقداشلار يىغىلىشىدا ئەسسالامۇ ئەلە ... سىز دەيدىغان چىراي جۇمۇ ئۇنچىلىك گەپنى... لېكىن ما گەپلەر راست بەك چىرايلىق تىزىلىپتۇ.

ZELAL530

	مەكتەپ ھاياتى ئاجايىپ كوڭۇللۇك،بۇنى جەميەتكە چىققاندىن كىيىن تىخمۇ چوڭقۇر ھىس قىلدىم.

okoguqi9

	بىر تىزىق مارجان ، بىر دەستە گۈلدەك ئۆتكەن ساۋاقداشلىق ھاياتىم ئاخىرلاشقىلىمۇ بىر نەچچە يىل بولۇپ قاپتۇ ، شۇ چاغلارنى ئەجەپ سىغىندىم !