چاۋاك تۇغقان خىياللار (2)

abaytarim

	گەرچە ھاياتىمدا نۇرغۇن قېتىم چاۋاك چالغان بولساممۇ ، مەندە يەنە نۇرغۇن چېلىنىشقا تېگىشلىك ، ئەمما چېلىشقا نېسىپ بولمىغان تالاي چاۋاكلارنىڭ ئارمىنى بار ئىدى . ھاياتتا ئارمانلىق چاۋاكلارنى چېلىۋېلىشمۇ ھەممىمىزگە نېسىپ بولىۋەرمەيتتى . ھازىرغىچە ئەدىب، ئوبزورچى، نازىر، ئىدارە باشلىقى ، مۇدىر ، سەنئەتچى، ئۈچۈن چاۋاك چاپتىمەن . ئالىملار ئۈچۈن چاۋاك چېلىش ماڭا نېسىپ بولماپتۇ . ئابدۇشۈكۈر مۇھەممەتئىمىن ، ئابدۇرېھىم ئۆتكۈر ، زوردۇن سابىر، ئىبراھىم مۇتىئىي ، ئۇيغۇر سايرانى، تېيىپجان ئېلىيوپ ، ئابباس بۇرھان ، ماتىماتىكا ئالىمى ئابدۇرىشىت ئابدۇۋېلى ، كومپىيوتېر ئالىمى ھۇشۇر ئىسلام ، جامائەت ئەربابى مىجىت ناسىر ، پروففېسور خالمۇرات غۇپۇر ، تەبىئىي پەنلەر ئالىمى زەپەر ئابلېز كەبى ئالىملارنىڭ نۇتۇق-ئۆگۈتلىرىگە چاۋك چالالمىدىم . گەرچە مەن بۇ ئالىملارنىڭ (تەبىئىي پەن ئالىملىرىنىڭ، ) ئىلمىي ئەمگەكلىرىنىڭ ھەقىقىي ماھىيىتىنى تولۇق چۈشەنمىسەممۇ بىراق ئۇلارنىڭ ئۆز ئاۋازلىرىنى ئاڭلاپ چاۋاك چېلىشقا، ئالقىشلاشقا يارايتتىم . بۇمۇ مېنىڭ ئۆمۈرلۈك ھەسرەتلىرىمنىڭ بىرى ئىدى . جەنۇب سەپىرىدىن قايتىشىمدا رەسسام ئىلشات تۇرسۇننىڭ ئالىم ئابدۇشۈكۈر مۇھەممەتئىمىننىڭ  لېكسىيەسىنى ئاڭلىغاندىكى ھاياجانلىق بايانلىرى قەلبىمنى ئۇزۇنغىچە لەرزىگە سالغانىدى . لىكسىيە ئاخىرلاشقاندىكى چاۋاكنى خىيالەن پەرەز قىلىپ كەتتىم . چۈنكى ئۇ مىللىتىمىزدىن يېتىشىپ چىققان ئەڭ ھوسۇللۇق، يېتۈك ئالىمىمىزنىڭ سۆزلىرىگە چاۋاك چېلىشقا مۇيەسسەر بولالىغانىدى . خىيالىمدا ئابدۇرېھىم ئۆتكۈر، سەردار يازغۇچىمىز زوردۇن سابىرلارنىڭ لېكسىيە ، ئەنجۈمەنلىرىگە چېلىنغان چاۋاكلار ئەلەڭگىيتتى . رەھبەرلىرىمىز ئىچىدە باشقىلارنىڭ غەلبىسىگە ئەڭ قىزغىن چاۋاك چېلىپ تەبرىكلىگەن رەھبەر مىجىت ناسىر بولدى . يازغۇچى ئابدۇرېھىم ئۆتكۈر، زوردۇن سابىرلارنىڭ مۇسىبىتىدە ئوخشاشلا شۇلارنىڭ تەنتەنىسىگە، نەتىجىسىگە قىزغىن چاۋاك چالغان قوللىرىنى مۇسىبەتكە يۇمدى . بىزدە تەبىئىي پەن ئالىملىرىنىڭ شەنىگە بېغىشلانغان مۇراسىملار بەك ئاز بولغاننىڭ ئۈستىگە بەلگىلىك كۆلەممۇ شەكىللەنمىدى . ئەمما يازغۇچىلىرىمىز ، شائىرلىرىمىزنىڭ كۆپ قىسمى ( ھەقىقىي شائىرلىق ئۆلچىمى بويىچە باھالىساق.) تون كىيىپ ئۈلگۈردى . تېخى ئادەم ئېتىراپ قىلغۇدەك ھوسۇلى يوق بىر قىسىملىرىمىزمۇ قىزغىن چاۋاك، تونلارغا مۇيەسسەر بولۇپ ئۈلگۈردى . ( پاختىغا كېۋەز ياپقاندەك) تەبىئىي پەن ئالىملىرىمىزنىڭ بۇنداق كۆرۈنۈشلىرى، ئۇلارغا چېلىنغان چاۋاكلار تولىمۇ ئاز بولدى . بىزنىڭ دۆلىتىمىز، خەلقئارا ئېتىراپ قىلغان ئالىملىرىمىز تېخى بۇنداق ھىممەتلەرگە ئېرشمىگەنىدى . يېقىندا كۆكنۇر شىركىتىنىڭ تەشكىللىشى بىلەن پەخرلىك قىزىمىز ساھىبجامال دۆلەتنىڭ مۇشۇنداق چاۋاك، تونغا مۇيەسسەر بولغىنىنى كۆرۈپ ھاياجاندىن كۆزلىرىمگە ياش كەلدى . نېمىدىگەن ئېزگۈ تىلەك ، نېمىدىگەن قالتىس ئويغىنىش- ھە!  ساھىبجامال خانىم ئۆز مىللىتىنىڭ تونىنى قانچە ئىپتىخار بىلەن كىيگەندۇ. بىر ئالىم ئۈچۈن دۇنيا ئېتىراپ قىلغۇدەك ئالقىشقا ئېرىشىش بەك مۇھىم ، خەلقئار توننى كىيىش تېخىمۇ مۇھىم ، ئۆز مىللىتىنىڭ چۈشىنىپ ئالقىشلاپ چاۋاك چېلىپ، تون كىيدۈرىشى ھەممىدىنمۇ مۇھىمدۇر . دىققەت قىلسام ساھىپجامال خانىممۇ قاتتىق ھاياجاندا ئىدى . ئۇنىڭ ئەشۇ ۋاقىتتىكى خۇشاللىقىنى ، دۇنيادا 30 يىلدىن بېرى يېشىلمەي كېلىۋاتقان ( فىزىكا ساھەسىدە)مەسىلىنى يېشىپ خەلقئارا ئالىملارنىڭ ئېتىراپىغا ئېرىشكەندىكى خۇشاللىقىدىن كەم دېگىلى بولمايتتى . ھەي! شۇ سورۇنغا قاتنىشالمىدىمدە؟... بۇ سورۇندىكى چاۋاك قانچە قىممەتلىك ، ۋەزنى ئۆز ئورنىنى تاپقان، مەزموندار ،چىن قەلبدىن چىققان چاۋاكلار ئىدى . بۇ چاۋاكلارنى ھەرگىزمۇ ئابدۇللا ئابدۇرېھىمنىڭ، تاشمۇھەممەتنىڭ ناخشىلىرىغا ، تۇرسۇنئاي ئىبراھىم، رەيھان ئابلىزلارنىڭ ئۇسۇللىرىغا چالغان چاۋاكلارغا ئوخشاتقىلى بولمايتتى . بەزى چاۋاكلار مۇراسىم ئاخىرلىشىىشى بىلەن تەڭ ئاخىرلىشاتتى . ئەمما ساھىپجامال دۆلەتكە چالغان چاۋاكلارنى دۇنيا ئېتىراپ قىلاتتى ، ئۇنىڭغا چالغان چاۋاكلار دۇنيانىڭ دېققىتىنى تارتالايتتى ، چۈنكى ئۇنى دۇنيا تونۇيتتى .  مىللىتىمىز دۇنيا ئىلىم ساھەسى ئېتىراپ قىلىدىغان چاۋاكنى چېلىشقىمۇ مۇيەسسەر بولدى . دۇنيا ناخشا - ئۇسسۇل فېستۇۋالى بىلەن دۇنيا فېزىكا ئالىملىرىنىڭ بىر ئىككى سائەتلىك مۇلاھىزىلىرىنىڭ دۇنيانىڭ دېققىتىنى تارتىشىمۇ ئەلۋەتتە ئوخشىمايدۇ . ( مەن ھەرگىزمۇ سەنئەت ساھەسىنى تۆۋەن كۆرۈش تەرەپدارى ئەمەس .) بىزنىڭ دۇنيا  سەنئەت فېستۇۋالىدا شەرەپ قۇچقان كىشىلىرىمىزمۇ بولۇشى كېرەك ، ئەمما دۇنيا ئېتىراپ قىلغان ئالىملىرىمىزمۇ ئۇلاردىن زور دەرىجىدە ئارتۇق بولۇشى كېرەك ، دەپ ئويلايمەن . ئىلىم سەھنىسىنىڭ نوپۇزى ھەممىدىن ئۈستۈن . بىز ئەشۇنداق ئەڭ ئۈستۈن ئورۇندىكى نەتىجىلەرگە چاۋاك چېلىشقا ئەڭ تەقەززا، ئەڭ ئىنتىزار، ئەڭ ئېھتىياجلىق . "تاققا- تۇققۇ" گەپلەرگىمۇ ھېرىپ قالماي چاۋاك چالغان خەلقىم ئالىملىرىمىزغىمۇ چاۋىكىنى ھەرگىز ئايىمايدۇ . ئالىملىرىمىز ئۈزۈلۈپ قالمىغاي، ئالىملىرىمىزغا ئاتالغان مۇراسىملار ئاۋىغاي ،ئۇلارغا چالغان چاۋاكلىرىمىز دۇنيانى لەرزىگە سالغاي.    مەنبە : ئۆزۈم. يىغىن چاۋىكى .                  ئەبەي تارىم .   2012-9-14

mahatjan

	ئالىملارغا چاۋاك چالساق ھەقىقىتەن ئەرزىيدۇ،ئالىملارنى قەلبىمىزدىن ھۆرمەتلەيلى، ئەمىلىيتىمىزدە ئىپادىلەيلى.

tarim2179

	داداممۇ ئۇتۇپتكەن بۇ دۇنيادىن چاۋاك چېلىپ، ئاناممۇ ئۇتۇپتكەن دادامنى دوراپ چاۋاك چېلىپ. مەنمۇ  دادامنى دوراپ بۇ دۇنيادىن كېتەر بولدۇم ، چاۋاك چېلىپ،چاۋاك چېلىپ،چاۋاك چېلىپ،چاۋاك چېلىپ،.......

arkenkaxka

	‹‹گەرچە ھاياتىمدا نۇرغۇن قېتىم چاۋاك چالغان بولساممۇ ، مەندە يەنە نۇرغۇن چېلىنىشقا تېگىشلىك ، ئەمما چېلىشقا نېسىپ بولمىغان تالاي چاۋاكلارنىڭ ئارمىنى بار ئىدى›› مەنمۇ مۇشۇنداق چاۋاكلارنى قاتتىق بىر چىلۋالسام دەيمەن.

ZELAL530

	چاۋاك چىلىشقا تىگىشلىك نۇرغۇن ياخشى ئىشلار باردۇ بەلكىم ئالدىمىزدا.