پاتىمە (ھېكايە)

غوجا

	پاتىمە                                                                        (ھېكايە)                                                                            ـــ ئالا ئىنىەكنىڭ بالىسى چالا قۇيرۇق دېگەندەك سىزمۇ ئاپىڭىزدەك ئادەمنىڭ ئىچىنى سىقىپ نەدىكى گەپنى قىلىدىكەنسز. ئەجەپ تەتۈر ئىكەنسىز. توي دېگەن ئادەمنىڭ ئۆمرىدىكى چوڭ ئش تۇرسا، بۇ نەرسىلەرنى ئالمىساق قانداق بولىدۇ؟ ھېلىمۇ پىدىنە كۆكىدەك تۇغقاندارچىلىقىمىزنىڭ يۈزىنى قىلىپ، ئالتۇن ۋە كىيىم كېچەكلەرنىڭ بىر قىسىمىنى كېيىن ئېلىشىڭلارغا ماقۇل دېدىم. گەپ قىلماي تۇرۇپ بەرسەم، توغراتامنىڭ كەينىدىكى مۈشۈكمىكىن دەپ قالدىڭىزما؟ چىدىسىڭىز قىلايلى بۇ توينى، چىدىمىسىڭىز مەنمۇ ئەرسىز قالماسمەن...    ئالدىنئالا ئۈنئالغۇغا ئېلىپ تەييارلاپ قويغاندەك، ئۈزۈلمەي چىقىۋاتقان يېقىمسىز گەپلەردىن ئۆزۈمنى ئارانلا تۇتۇۋېلىپ، ئالدىمدىكى قاش-كۆزىدىن يامان تەلەتلىك كۆرۈنمەيدىغان، ياراشمىغىنىغا قارىماي پىشانىسىنى بىرلا ئېلىپ كۆزىنىڭ قۇيرۇقىدىن ئەگىپ چۈشىدىغان ماڭلاي قويۇۋالغان، ئوتتورا بوي، مەن توي قىلماقچى بولۇۋاتقان قىز پاتىمەگە قاراپلا قالدىم. يېقىندا توينىڭ گېپى چىققاندىن بۇيان يۈز بەرگەن بەزى كۆڭۈلسىز ئىشلارغا ئۇنىڭ ھازىرقى بىشەملىكى قوشۇلۇپ، ماڭا كىشىنىڭ خۇشى كەلمەيدىغان كەچكۈزنىڭ سوغۇقىنى ھېس قىلدۇردى.       مەن ئەمدىلا 21 ياشق كىردىم. تېخى ئۆزۈمنىڭ قارىشىدىكى توي قىلىش يېشىغا يەتمىگەنىدىم. شۇڭلاشقا ھازىرچە ئۆيلىنىشىمگە بالدۇرلۇق قىلىدۇ دەپ ئويلاپ توي قىلىشقا ئىنتىلىپ كەتمىگەنىدىم. بىراق، ئاپام،چوڭ بولۇپ كەتتىڭ، تويۇڭنى قىلىۋەتسەك بولاتتى، دەپ توي قىلىپ بولغان تەڭتۈشلىرىمدىن بىر نەچچىنى تىلغا ئېلىپ، تولا سۆزلەپ بېشىمنى ئاغرىتىۋاتاتتى. ماڭا بىلىندۈرمەستىن ئاتام بىلەن كېلىشىۋالغىنى بويىچە، يىراق-يېقىنىكى مەن تونۇيدىغان ھەتتا تونۇمايدىغان قىزلارنى سۈرۈشتۈرۈپ مەن ئۈچۈن لايىق ئىزدەپ يۈرۈرۈپتۇ. ناۋادا قوشنىلارنىڭ بىرەسىدىن قەيەردە، كىمنىڭ قىزى ئۆي ئشلىرىغا چېۋەر ئىكەن. چىرايلىق، ئەدەبلىك چوڭ بوپتۇ دېگەننى ئاڭلاپ قالسا،كۆپ يول مېڭىشتىن ئاھسىماي، بەزىدە ھارۋىلىق، بەزىدە يالغۇز موتسىكلىت مىنىپ كېتىۋاتقانلارنىڭ كەينىگە چىقىۋېلىپ، بەزىدە پىيادە دېگۈدەك يۈرۈپ، بولغۇسى كېلىننى بىلىدىغانلارنىڭ ئۆيلىرىگە بېرىپ، ئادەت تىلىغا ئايلىنىپ كەتكەن دەرتلىرىنىڭ ئارىسىغا توي ئىشىنى قىستۇرۇپ، ئۆز مەقسىتىنى بىلدۈرۈپتۇ. كەچلىرى قايتىپ كېلىپ ئاتامغا بولغان ئىشلارنى بىرمۇبىر سۆزلەپ بەر- گەنلىرىدىن ئاز-تولا ئاڭلىۋالغىنىمغا قارىغاندا، بەزى ئاتا-ئانىلار، قىزىمىز كىچىك، دەپتۇ. بەزى ئاتا-ئانىلار، ئارا يىراق، يالغۇز قىزىمىز، دەپتۇ. يەنە بەزىلىرى يالغاندىن قىلىپ، قىزىمىزغا نان تاشلاپ بولغان، دەپتۇ. شۇنداق قىلىپ مۇۋاپىق لايىق چىقمىغانلىقتىن، ئاپام بىر مەزگىل پەسىيىپ قالدى. بىراق، ئاپام قولۇم-قوشنا، تۇغقانلارغا ئۆي ئىشىنىڭ جىقلىقىدىن يېتىشەلمەي قالغانلىقىنى، ھېرىپ كەتكەنلىكىنى داتلاپ يۈرگەنلىكى مەلۇم. ماڭىمۇ، بېلىمنى كۆتۈرەلمەي قالدىم، پۇتۇم سىرقىراپ ئاغرىۋاتىدۇ، دەپ قاخشايتتى. ھەر قېتىم دېگەنلىرىدە گەپ يەنە شۇ تويۇمغا بېرىپ تاقىلاتتى. دېيىشىچە، ئۆيگە كېلىن كىرسە ئۇھ دەپ پۇتىنى ئۇزۇن سۇنۇپ ئولتۇرالىغۇدەك.        بۇرۇن ھەقىقەتەن دىققەت قىلمىغان ئىكەنمەن. ئاپام دەۋەرگەچكىمىكىن، دىققەت قىلسام ئاپام يېنى يەرگە تەگمەيدىغان، قولى ئىشتىن ئاجرىمايدىغان ئايال ئىكەن. ئۆي ئىشى، تالا ئىشى دېگەندەك ئىشلار ئاپامنى تىنىم تاپقۇزمايدىكەن. ئائىلىمىز راستىنلا ياخشى بىر كېلىنگە موھتاج ئىكەن دەپ ئويلاپ قالدىم. 21  ياشمۇ بەك كىچىك ئەمەسقۇ؟ ھېچبولمىغاندا بۇرت-ساقللىرىم ئۆسمۈرلۈكىمنى مەن بىلەن خەيرىلەشتۈردى. ئۆز ئۆزۈمگە توي قىلسام بالدۇر دېگىنىم بىلەن، دېمىسىمۇ مەھەللىدىكى تەڭتۈشلىرىمدىن ئۆيلەنگەنلىرى ئاز ئەمەس ئىدى. ئەمدىلىكتە ئىدىيەمدىن ئۆتۈپ، تويۇم توغرىلۇق پاراڭ بولسا، قۇلىقىمنى يۇمشاق قىلىدىغان بولدۇم.       مېنىڭ چىراي ئىپادىلىرىمنى كۆرۈپ ئاتام-ئاپامنىڭ مېنى ئۆيلەش تەققازاسىغا بىر خىل ئۈمىد قوشۇلدى. بولۇپمۇ بۇ خىل ئۈمىدۋارلىق ئاپامنىڭ باشقىلارغا قىلغان سۆزلىرىدە روشەن ئەكىس ئېتەتتى. ئۇ ئاتام بىلەن توينىڭ چوڭ ئىشلىرىنى پىلانلاپ كۆڭلىگە پۈككەن بولسا، ھاممىلىرىم، ئايال قوشنىلار بىلەن، ئۇنى بۇنداق قىلايلى، بۇنى ئۇنداق قىلايلى، دەپ كىچىك ئىشلار ئۈچۈن ئىنچىكە پىلانلارنى تۈزەتتى. ئۇچرىغان تونۇش-بىلىشلەرگە پات ئارىدا مېنى ئۆيلىمەكچى بولۇۋاتقانلىقىنى زوق بىلەن سۆزلەيتتى. كېيىنكى گەپ ئاپامنىڭ سورىغان سوئالىغا ئەيمىنمەستىن بەرگەن جاۋابىم «پاتىمە»دە قالغان ئىدى.     ئەمدىكى مەسلىھەت پاتىمەنى ئۆيگە قانداق ئەكىلىۋېلىش ئۈستىدە بولۇپ قالدى... پاتىمە مەن بىلەن يىراقراق تۇغقان كېلەتتى. كىچىكىمدە ھېيتلاردا ئۇلارنىڭكىگە مېھمان بولۇپ باراتتۇق. ئۇلارمۇ كېلەتتى. ئشقىلىپ يىلدا بىر نەچچە قېتىم كۆرۈشۈپ قالاتتۇق. بىزلەرنىڭكىگە كەلگەندە، پاتىمە كەپتۇ، دەپ بالىلار يىغىلىپ بىرگە ئوينايتتۇق. مەن پاتىمەگە بالىلارچە ئامراقلىق قىلاتتىم. بالىلار ئويۇنلىرىدا ئۇنىڭغا قەستەن ئۇتتۇرۇپ بېرەتتىم. ئۆيدىن ئېلىپ چىققان قاق - جىگدىلەرنى باشقا بالىلارنىڭ تالىشىپ چۇقان سېلىشلىرىغا قارىماستىن ئۇنىڭغا سۇناتتىم. ئامراقلىقىمدىن بىر قېتىم سىڭلىمنىڭ كىچىك چاچ قىسقۇچىنى تۇيدۇرماستىن ئېلىۋىلىپ، ئۇنىڭ قولىغا  تۇتقۇزۇپ قويغانلىقىم ئېسىمدە. پاتىمەمۇ ماڭا ئەگىشىپلا يۈرەتتى. ئوغۇللار ئۇرۇشۇپ، قوغلىشىپ ئوينىغان، سۇغا چۆمۈلگەن جايلارغا، مەنمۇ بارايچۇ؟ دەپ يالۋۇراتتى.     چوڭ بولغانچە جەمەتىمىزدىكى چوڭلار تۈگەپ كەتكەنلىك سەۋەبىدىن بېرىش-كېلىشىمىز ئانچە قويۇق بولمىدى. ئەمما ئۈزۈلۈپمۇ قالمىدى. چوڭ بولغاندىن كېيىنمۇ، پاتىمەنىڭ قەلبىمدە سىزىلغان گۈزەل سۈرىتى كۆز ئالدىمدا پەيدا بولسا، چىرايىمدا تەبەسسۇم بالقىيتتى. بۇ قېتىم تويۇم ئۈستىدە توختالغاندا، بالىلىق قىزىقىشلىرىمدىن باشلانغان بىر خىل سېزىم مېنى ئختىيارسىز ھالدا پاتىمەگە قاراتتى.      پاتىمە ئاتام-ئاپامغىمۇ يارايتتى. ئۇلار، پاتىمە بىزگە تۇغقان كېلىدۇ، ئائىلىمىزنى ياخشى چۈشىنىدۇ. نەچچە ۋاقىتتىن بېرى پاتىمەنى ئەجەپ ئويلاشماپتۇق، دېيىشتى. بىراق، ئۇزۇن ئۆتمەي ئۆيدىكىلەر ۋە مەنمۇ توي ئۈچۈن غەمگە پاتتۇق. ئۆيدىكىلەر تويۇم ئۈچۈن ئالدىراۋاتقان مەزگىلدە، يۇرت-يۇرتلاردا ئۆي سېلىش دولقۇنى بىلەن بىزمۇ ئۆي سېلىپ تويلۇق ئۈچۈن يىغققان خىراجەتنىڭ بىر قىسىمىنى ئىشلىتىپ كەتتۇق. يەنە بىر تەرەپتىن، سىڭلىممۇ ئالىي مەكتەپتە ئوقۇۋاتقان    ئىدى. شۇنداق بولسىمۇ، ئۆيدىكىلەر ئەھۋالىمىزنى چۈشەندۈرۈش ئارقىلىق، توينى ئاددىيراق قىلىشقا، ھازىرچە ئالتۇن ۋە كىيىم-كېچەكنىڭ بىر قىسمىنى ئېلىپ تۇرۇپ، قالغىنىنى كېيىن تولۇقلاشقا كېلىشتى. بىراق، پاتىمە ئاپامنىڭ، چىرايلىق توي قىلايلى، توي كۈنى ئېسىل مىللىي كىيىملەر بىلەن جابدۇنۇڭ  قىزىم، دېگەنلىرىنى پىسەنتىگە ئېلىپمۇ كەتمىدى.       بۈگۈن بەزى لازىمەتلىكلەرنى ئېلىش ئۈچۈن ئەتىگەنلىك چاينى ئىچىپلا پاتىمە بىلەن رەستە تەرەپكە كەلدۇق. ئېلىشقا تېگىشلىك نەرسىلەرنى ئۇيان-بۇيان قارىماستىن ئالدىم. ئارتۇقچە   ھەشەمەتچىلىك سانىلىدىغان نەرسىلەرنى ئالماسلىق خىيالىم بار ئىدى. شۇڭا توي كۈنىدىكى مەشرەپ سورۇنى ئۈچۈن ئالمىساقمۇ بولىدىغان نەرسىلەرنى ئېلىش-ئالماسلىق توغرىسىدا باياتىن بېرى تالىشىپ قالدۇق. تالىشىش جەريانىدا پاتىمە ھەددىدىن ئېشىپ كەتتى. دىتىغا ياقمىغان ھەممە ئشنى تەگەپ چىقتى. يېقىندىلا ئاتام-ئاپامنىڭ، ھازىرچە قولىمىز قىسقا بولۇپ قالدى، كېيىنچە كەم يەرلىرىنى پۈتۈن قىلارمىز، دەپ يېلىنىش ئارىلاش چۈشەندۈرۈشى ھەم توي ئىشىنىڭمۇ مۇھىملىىنى دېيىشى ئارقىلىق پۈتۈلگەن ئىشنىڭ يەنىلا قولاشمىغانلىقى مانا ئەمدىلىكتە پاتىمەنىڭ پېلىموتتەك ئېغىزىدا بىر-بىرلەپ ئېتىلىپ چىقتى. ئۇنىڭ دېيىشىچە، مېنىڭ ئوغۇلدارچىلىقىم يوق ئىكەن، كۆزۈم كىچىك ئىكەن. ئاپام بولسا ياشلارنى چۈشەنمەسمىش، نېمىنىڭ گۈزەللىكىنى بىلمەسمىش، ھەممە ئشقا چات كېرىۋالالمىش...شۇ تاپتا مەن باشقىلار بىلەن زاكونلىشىپ قالسام،  زاكونلىشىپ تەڭ تۇرمايدىغان مىجەزىم بىلەن تۇرۇپلا قالدىم. ھەممىسى ئىچىمدە قالدى. ئاچچىقىممۇ ھەم نارازىلىقىممۇ .         مېنىڭچە، پاتىمە كۆز ئالدىدىكى بىردەملىك ئالۋۇن ھېسىياتلىرىغا بېرىلمەسلىكى، كەلگۈسىنى كۆپرەك  ئويلىشى كېرەك ئىدى. توي دېگەن بىر ئىككى كۈندە ئۆتۈپ كېتىدۇ. مۇشۇ قىسقىغىنە ۋاقىتتىكى بەزى ئورۇنسىز ئىشلار ئۈچۈن بىر ئۆمۈر بىللە ئۆتىدىغان يولدىشىنىڭ قەلبىدىكى ئوبرازىغا سەل قاراش ھەر قانداق بىر قىزنىڭ توغرا تېپىپ قىلىدىغان ئىشى ئەمەس ئىدى. پاتىمەنىڭ كۆڭۈل بۆلىدىغىنى مېنىڭكىگە ئوخشاش بولغان بولسا ئىدى، ھەقىقىي سۆيۈنگەن بولاتتىم. بىراق، پاتىمە ئۇنداق  ئويلىمايدىكەن. قەلبىم ئاچچىق ھېسلارغا چۆمدى. پاتىمەنىڭ كىچىك ۋاقتىدىكى ئوماق قىياپىتى بىلەن كۆز ئالدىمدىكى سوغۇق ھالىتى كاللامدا دەم-دەم ئالمىشىپ پەيدا بولۇپ، تولىمۇ بىئارام بولدۇم. ئىختىيارسىز بىر قەدەم ئارقامغا ياندىم. ھېلىلا، توي كۈنىدىكى مەشرەپ سورۇنىدا قىز-يىگىتكە تەييارلىنىدىغان ئۈستەلگە قويۇش ئۈچۈن سېتىۋالغان پۇراقسىز، سۈنئىي گۈل قولۇمدىن چۈشۈپ كەتتى...       مەنبە:ئۆز قەلىمىم

nurmamat122

	بەزى قىزلار نادان بۇلۇپ كەتتى ئەينا ،

delim

	مۇشۇنچىلىكلىما ؟

غوجا

	nurmamat122 يوللىغان ۋاقتى  2012-9-12 08:31 PM بەزى قىزلار نادان بۇلۇپ كەتتى ئەينا ، ھەجىمىنى دېمەكچىمۇ سىز؟

57gulyar

	ئاخىرى يوقما

غوجا

	غوجا يوللىغان ۋاقتى  2012-9-13 01:29 PM ھەجىمىنى دېمەكچىمۇ سىز؟ ئاخىرقى بىر نەچچە جۈملىدە خۇلاسە ئىپادىلەندى. چۈشىنىپ باقارسىز

غوجا

	57gulyar يوللىغان ۋاقتى  2012-9-13 02:19 PM ئاخىرى يوقما ئاخىرقى بىر نەچچە جۈملىدە خۇلاسە ئىپادىلەندى.

katran

	قولۇمدىن چۈشۈپ كەتكەن گۈلگە قاراپ كۆڭلۈمنىڭمۇ يەردە قالغىنىنى سەزدىم. شۇ ھامان يۈزۈمگە ئۇرۇلغان سوغ شامال بىلەن تەڭ ئارقامغا بۇرۇلۇپ كىشىلەر توپىدىن سۇغۇرۇلۇپ ئۆزۈمگە تەۋە بولغان، مېنىڭ ئۈچۈن غەمگۈزارىمنىڭ، پاسىبانىمنىڭ قوينىغا قاراپ يول ئالدىم.

mahatjan

	شۇڭا مەن دەيمەن مۇھەببەتلەشمەك ئاسان توي قىلماق تەس، توي قىلماق ئاسان ئۆي تۇتماق تەس. تەس دىسە يەنە-----تېخىمۇ تەس.

781847813