ئەقىدە گۈلى ( نەسر )

qiqak1219

	ئەقىدە گۈلى        قەلب دەپتىرىمگە يارقىن مىسرالارنى پۈتمەكچى بولدۇم . ئىلھام قۇشلىرى تەرەپ - تەرەپتىن ئۇچۇپ كېلىشكە باشلىدى . بىراق قەلب دەپتىرىمنىڭ قالايمىقان سىزىق ، چېكىتلەر بىلەن بۇيۇلۇپ كېتىشىنى خالىمايتتىم . شۇڭا ، ئۇنى يۈرىكىمنىڭ ئىچىگە يۇشۇردۇم . قەلبىمدىكى پىنھان ھېسلىرىمنى غىدىقلىغۇچى ئىلھام قۇشلىرى جەزبىدار كۈيلىرىنى ياڭراتقىنىچە ، لىرىكىغا تۇيۇنغان قاناتلىرىنى يېنىك ئۇرۇپ ، سۈتتەك ئاپئاق قەغەز ئۈستىدىن ئۇچۇپ ئۆتۈشكە باشلىدى .       تاغلار مەغرۇر ، قەيسەرلىك بىلەن ئالدىمدا قەد كۆتۈردى . دەريالار ھاياتىي كۈچكە تولغان شاۋقۇنى بىلەن قىيا تاشلارغا ئۇرۇلۇپ ، ئاپئاق بۇژغۇنلىرى بىلەن گۈلدەستە تىزدى .       تۇساتتىن سەن قۇمۇش نېيىڭنى ئىلاھى جەزبىدارلىققا تويۇنغان لىرىك كۈيلەرگە سازلىغىنىڭچە كۆز ئالدىمدا پەيدا بولدۇڭ . قۇلۇڭدا باھار ھىدىغا تولغان بىر دەستە ئەتىرگۈل كۈلۈپ تۇراتتى .ئۇنىڭدىن تاراۋاتقان خوشبۇي ھىدتىن تاشقا ئايلانغان يۈرىكىم سۆيگۈنىڭ شېرىن شارابىدا مەست بولغاندەك تۇيغۇغا كەلدى .ئىلھام قۇشلىرى ئاھ ئۇرۇپ يىغلىدى . تاغلار يۈرىكىنى تۇتقىنىچە قېتىپ قېلىشتى ، گۈلنى ئۇزاتتىڭ . چەكسىز ئىپتىخارلىنىش تۇيغۇسىدا قۇلۇڭدىن ئالدىم . سەن ئۇنىڭدىن گۈلچەمبىرەك ياساپ بوينۇمغا ئېسىپ قويدۇڭ. مەن ئۇنىڭ مېھىر گۈزەللىكىگە مەپتۇن بۇلۇپ تۇرغىنىمدا ، سەن تۇيۇقسىز كۆز ئالدىمدىن غايىپ بولدۇڭ .       كۈن - كۈنلەرنى قوغلاپ ئايلارغا ، ئاندىن يىللارغا ئۇلىشىۋەردى . باغلار نەچچە چېچەك ئېچىپ ، نەچچە خازان تۆكتى ، سەن كەلمىدىڭ . بوينۇمدىكى گۈلچەمبىرەكنىڭ خازان بولۇشىغا ئەگىشىپ ، ئاپئاق قەغەزنىڭ رەڭگىمۇ ئۆچۈشكە باشلىدى . مەن سېنى تاقەتسىزلىك بىلەن كۈتتۈم ...       ئىلھام قۇشلىرى باش ئۈستۈمدىن چۇرۇقلىشىپ ئۇچۇپ ئۆتۈپ كەتتى . تاغلار ئېغىر خورسىنىش ئىچىدە ئېڭىكىنى سىلىدى . دەريالار زەرب بىلەن ئۆزىنى قىرغاققا ئۇردى . قارىغايلا ئەلەم بىلەن سىلكىندى . مەن سېنى ئەڭ زور چىدام ، غەيرەت بىلەن كۈتتۈم . گۈلچەمبىرەك قۇرۇپ ، ئەڭ ئاداققى جەلپكارلىقىنى يوقاتتى . قەغەزمۇ ئاللىقاچان رەڭگىنى يوقاتقانىدى . مەن يەنىلا ئۈمىدۋارلىق ئىچىدە يوللىرىڭغا قارىدى . كۈنلەرنىڭ بىرىدە سېنىڭ مۆجىزىگە ئوخشاش كۆز ئالدىمدا پەيدا بولۇشىڭنى تىلىدىم .       ئەتراپ باھار پەيزىگە چۆمۈلگەن بىر كۈنى سەن تۇيۇقسىز كۆز ئالدىمدا پەيدا بولۇپ قالدىڭ . مەن تىلىكىمگە يەتكۈزگەن مۇھەببەت ئىلاھىغا ھەمدۇسانالار ئېيتىشقا باشلىدىم ، ئويلىماپتىمەن . سەن بوينۇمدىكى قۇرۇپ قاقشال بولۇپ قالغان گۈلچەمبىرەككە ۋە قولۇمدىكى كونىرىغان قەغەز ، رەڭگى ئۆڭگەن بوياق بىلەن دات باسقان قەلەمگە قارىدىڭ - دە ، سۈكۈتكە تولغان ئېغىر قەدەملىرىڭنى يۆتكەپ كېتىپ قالدىڭ . مەن ھەيرانلىق ئىچىدە ئارقاڭدىن قاراپ قالدىم .        ئەپسۇس ، سەن بوينۇمدىكى گۈلچەمبىرەك ۋە قۇلۇمدىكى قەغەزنىڭ سېنى كۈتۈش بەدىلىگە بىۋاق سولغانلىقىنى بىلىشكە قادىر بولالمىدىڭ . بىمەزگىل قروۋ قونغان قەلب دەپتىرىمنىڭ قات - قاتلىرىدا ساڭا بولغان ئىشەنچ ۋە ئۈمىدىمنىڭ باھارىستان ئاپتىپىدا پەرۋىشلىنىپ ، بەرق ئۇرۇۋاتقان رەڭدار گۈل - غۇنچىلار چېچەك ئاچقان ئەمەسمىدى ؟...         مەنبە : قەشقەر ژورنىلى

tuntaxvixi

kaLGundi

	مېھىر ئاڭلاپ ئاشىق ئولدۇم سۇڭرە يەتسە كۈھى غەم، نە ئەجەب ئىشق ئىپتىداسى ئەيىن ئېرۇر بايانى قاف

ap~qilam

	مۇزىكىدىن بىرنى قىستۇرىۋەتكەن بولسىىڭىز تېخىمۇ ياخشى چىقاتتىكەن

kapsizparixta

	قــەلـب چـېـچـەكـلـىـرى مەن ساڭا دەرت تۆكمەكچى ئەمەس ، قەلبىم چېچەكلىرىنى ساڭا تۇتماقچىمۇ ئەمەس ياكى ساڭا نەسىھەت قىلماقچىمۇ ئەمەس ۋە يەنە... شاتۇتى پەقەت باشقىلارنىڭ دېگىنىنىلا دورىيالايدۇ ؛ ھۆپۈپ بۇ دۇنيادا ئۆزىنىڭ ئىسمىنىلا توۋلاپ ئۆمرى ئۆتىدۇ ؛ بۇلبۇل ئۆزىنىڭ يېقىملىق ئاۋازىنى گۈزەللىككە ۋە ئاشىقى گۈلگە ئاتىغان . بىر چاغلاردا يۈرۈكىم سېنىڭ سېھىر بىلەن تولغان كۆزلىرىڭگە سىڭىپ كەتكەن ئىدى . شۇنىڭدىن كېيىن يۈرۈكىمنى ساڭا تاپشۇرۇپ ، ئۆزۈمنىڭ رومانتىك دۇنياغا كىرىپ كەتكەنلىكىمنى ئەمدى ھېس قىلماقتىمەن . ئەقىل كۆزلىرىمنى ئاچقىنىمدا ، يۈرۈكىم خۇرسىنغان ھالدا يېنىمدا دومىلاپ يۈرۈپتۇ...يۈرۈكىمنىڭ سەرسان بولۇپ بۇ ھالەتتە قايتىپ كەلگەنلىكىدىن سېنىڭ بىر سادىق يۈرەككە ئىگە بولالمايدىغانلىقىڭنى ، جىسمىڭنىڭ لەۋزىڭگە ئوخشاشلا ساختىلىق بىلەن يارالغانلىقىنى چوڭقۇر چۈشۈنىپ يەتتىم . تەنتەكلىكىڭدىن ئۇدۇل كەلگەن يەرلەردە ، ئۇدۇل كەلگەن كىشىلەرگە ئاغزىڭغا كەلگەننى دەۋېرىپ ، ئاقىۋەت ئۆزۈڭ رەسۋا بولدۇڭ . رەسۋا بولغانلىقىڭنى بىلگىنىڭدە ، پۇشايمان تاغىرى ئۈستۈڭدىن بېسىۋالغان ئىدى . سەن مۇقەددەس سۆيگۈنىڭ شېرىنلىكىنى ۋىسال ئوتىدا كۆيگەن مەشۇقنىڭ يۈرۈكىدىن ئىزدەشنى بىلمىدىڭ . سەن كۆزلىرىڭنى ئالا - چەكمەن قىلغان نازىنىنلارنىڭ كەينىدىن ئەگەشىپ ، ئاخىرى ئۆزلۈكىڭنى ھەم بىساتىڭنى يوقۇتىپ قويغۇنىڭدا ، ۋىسال ئوتۇدا پۇچىلانغان مەشۇقنىڭ يۈرۈكى كۆيۈپ ، كۈنداشلىقىڭ ھەسرەتلىك ئوچاقلىرىدا كۈلگە ئايلانغان ئىدى . پەسلى باھاردا كۆڭلۈمنى سېنىڭ ئىختىيارىڭغا تاپشۇرغان ئىدىم ، ئەمما پەسلى كۈزدە كۆڭۈل گۈلۈمنىڭ خازان بولغان ھالىتىنى كۆرگىنىمدە ، قەلبىمدىكى ئورنۇڭغا لەنەت تامغىسى بېسىلغان ئىدى . مەنبە:جۇڭگۇ مىللەتلىرى ژۇرنىلىدىن ئېلىندى.

mahatjan

	ئەدەبى ئىقتدار بولسا ،ھۆپۆپۈپنىمۇ بۇلبۇل قىلىپ سايراتقىلى،قېرى ئىشەكنىمۇ دۇلدۇل قىلىپ چاپتۇرغىلى بولىدۇ.