مۇقۇملۇق ھەققىدە ساتىرا (موللا-زەيدىن)

molla-zaidin

	خىزمەتنىڭ ئوسىلى ئىكەن مۇقۇملۇق   ئىزاھات : ئۆتكەن يىلى مۇقۇملۇق خىزمىتى بىلەن خوتەن ناھىيسىنىڭ مەلۇم بىر يېزىسىدا بىر يىل مۇقۇملۇق   خىزمىتىگە چۈشۈپ،بىر يىللىق خىزمەتتىن تۆۋەندىكى خۇلاسىنى چىقاردىم،لىكىن مۇنەۋۋەر سايلىنالمىدىم.                                                             ئاپتورى : موللا-زەيدىن كىسەلنىڭ ئەسكىسى بولۇر يۇقۇملۇق، تۇپراقنىڭ ناچىرى زەيكەش يا قۇملۇق. ئەجەبا نەچچە يىل بىلمەي كەپتىمەن، خىزمەتنىڭ ئوسىلى ئىكەن مۇقۇملۇق. ئەتتىگەن ئون تۈرلۈك خىزمەت پىلانلاپ، چۈش بولماي كادىرلار كىتىدۇ تاراپ. قورساق ئاچ تاماققا چاقىرار كىم دەپ، قالىمەن تامادا ئارقىدىن قاراپ. خىزمەتنىڭ ئوسىلى ئىكەن مۇقۇملۇق. كىچىسى جانلىنار ياتاقنىڭ ئىچى، چاشقانلار كىتىرلار ئۇيقۇنى بۇزۇپ. چۈشۈمدە بۇلۇمەن كۈ ندە باسقۇنچى، دەل شۇئان مۇئەزىن قۇيار قۇتقۇزۇپ. خىزمەتنىڭ ئوسىلى ئىكەن مۇقۇملۇق. خۇش چىراي سىكىتار،مىنجىڭ گەنسىگە، سۆھبەتكە مەن بارسام قىلىدۇ توڭلۇق. باشقىغا خاس ساراي،مەن ئولتۇرۇشقا، كۆرسەتمەس پەگادىن ھەتتا بىر قوڭلۇق. خىزمەتنىڭ ئوسىلى ئىكەن مۇقۇملۇق. سەنلىسە ئىگىلىپ تۇراركەن يايدەك، ھۆرمەتلەپ يول قويساڭ قىلاركەن چوڭلۇق. جىسمى بىر،خۇلقى مىڭ،كەتتىم بىلەلمەي، قايسىسى ئوسىلى؟قايسىسى ئوڭلۇق. خىزمەتنىڭ ئوسىلى ئىكەن مۇقۇملۇق. كەنتىگە كىلىدۇ غەۋغالار تىنماي، تىگىنى ئاختۇرساڭ كەلمەس بىر پۇڭلۇق. ئايرىساڭ جىدەلنى كىتەر بىرسى خوش، بىرسىنىڭ كۆزىدىن ياغىدۇ شۇملۇق. خىزمەتنىڭ ئوسىلى ئىكەن مۇقۇملۇق. بېشىڭدا قاينايدۇ تۈرلۈك تەكشۈرۈش، يوقلامنى ئاختۇرۇش خاتىرنى كۆرۈش. تۇرمۇشقا ئادەم يوق باشقۇرۇش كۆپتۇر، ۋەزىپە خىزمەتنى ئىلگىرى سۈرۈش. خىزمەتنىڭ ئوسىلى ئىكەن مۇقۇملۇق. شەھەردە بىر ئوبدان چىكىشنى تاشلاپ، يېزىدا مىڭ قىسما ھۆنەرنى باشلاپ. ئوقەت يوق چۇپۇلۇق تىرىنى ئاشلاپ، تاپىنىم قىچىشسا بېشىمنى قاشلاپ. خىزمەتنىڭ ئوسىلى ئىكەن مۇقۇملۇق. كۈندىزى رومالدا پۈركەپ بېشىنى، كەچلىگى ئەگىيدۇ ئېتىپ قېشىنى. يەپ قويۇپ شاشلىقتا مانتۇ ئېشىنى، بىر كۈنى موللاخۇن يەرمۇ بېشىنى. خىزمەتنىڭ ئوسىلى ئىكەن مۇقۇملۇق. ئەرىز قىپ ناھىيگە دەرىجە ئاتلاپ، دات ئېيتماس كەننتىگە بىزلەرنى ياتلاپ. نەچچە ئاي ئىشلىگەن تەربىيە قېنى؟ سالغۇڭىز كىلىدۇ بىلىدىن قاتلاپ. خىزمەتنىڭ ئوسىلى ئىكەن مۇقۇملۇق. بىر موللام تۇتۇلسا بالا ئوقۇتۇپ، بىر  باخشى جىنغىمۇ توقام توقۇتۇپ. بىرسى دەر قانۇننى كىتەي يوقۇتۇپ، كار قىلماس ئۇلارنى تۇرساڭ قورقۇتۇپ. خىزمەتنىڭ ئوسىلى ئىكەن مۇقۇملۇق. ھەپتىدە كەلمەيسەن مەخسىدىڭ نىمە ؟ خوتۇننىڭ سورىغى ئۆتەر جېنىمدىن. كوتۇلداش ھەر ياڭزا ئايلىنىپ بېشىم، غىزامۇ ئۆتمەيدۇ ھەتتا گېلىمدىن. خىزمەتنىڭ ئوسىلى ئىكەن مۇقۇملۇق. تىنىڭدىن پۇرايدۇ يېزا پۇرىقى، دەيدۇ ئۇ گۇناھنىڭ بولۇر سورىقى، بەئەينى سوتچىغا ئوخشار تۇرىقى. كۆڭلۈمگە ئاياندۇر گەپنىڭ قۇيرۇقى، خىزمەتنىڭ ئوسىلى ئىكەن مۇقۇملۇق. ۋاي توۋا بىر كەلسەم جەۋرى-جاپادا، ئايلاندى ساق بېشىم تەنە-تاپا دا. مۇقۇملۇق بۇزۇلۇپ مەيدان ئايرىشىپ، كارۋاتقا رايىم يوق ياتتىم ساپا دا. خىزمەتنىڭ ئوسىلى ئىكەن مۇقۇملۇق. كەنتىدە كۆپلەرنىڭ باركەن شالتىغى، شۇڭا مەن بوپقالدىم كادىر ئارتۇقى. مەن كىتەي ئۇلارغا مىختەك قادالماي، خىزمەتنىڭ بولسىمۇ مىڭلاپ تارتۇقى. خىزمەتنىڭ ئوسىلى ئىكەن مۇقۇملۇق. خىزمەت كۆپ ھەم ئېغىر بولسىمۇ مەيلى، تەنقىت چوڭ  باش يېغىر بولسىمۇ مەيلى. قېچىشقا شەھەرگە چوڭ يول يوق بولسا، تىكەنلىك يول چىغىر يول بولسىمۇ مەيلى. خىزمەتنىڭ ئوسىلى ئىكەن مۇقۇملۇق.     مەنبە : ئۆز قەلىمىم

tuntaxvixi

	يوق ئشىىم ھاكىم،ئەمەلدار،شاھى-سۇلتانلار بىلەن،بىرگە بولسام دەيمەن دائىم باغرى سۇنغانلار بىلەن.

boxuk

	مۇشۇنداق يۈرەكتىكى گەپنى قەلەم بىلەن ئىپادىلەيدىغان چىنلىق ئەكىس ئەتكەن تىمىلارنى مىڭ ئوقىساممۇ زىرىكىپ قالمايمەن

aptap104

	ئاڭلىمىغانما ،  كىسەلنىڭ ئەسكىسى يۇقۇملۇق ، خىزمەتنىڭ ئەسكىسى مۇقۇملۇق .    بىر ئۆمۈر ياخشى بولالمايدۇ بۇ مۇقۇملۇقتا . نىمە ئۈچۈن مۇقىم ئەمەس دەپ ئويلىمايدۇ بۇ كادىردىگەن ، پىكىر بەرمەي باشلىقىغا باش چۆكىرەپ ئىشلەشنى بىلىپ بالدۇراق ئۆسۈپ ، باشلىق بولۇشنى ئويلايدۇ .   باشلىقى مانى قىل دەپ دىنىغا ئۆرۈپ ئادىتىغا خىلاپ ئىشنى بۇيرىسا ، باشلىق ما ئىش خاتا بۇنى قىلساق بولمايدۇ دىمەي ،  ئىشتىننى ئەكەل دىسە ، پۇتىنى كىسىپ ، توكۇر قىلىپ ،  ئىشتان كەيگەن پۇتى بىلەن قوشۇپ ئەكىلىدۇ . ئادەم دىگەندە پىكىر بولىدۇ . ئۆزىنىڭ خاھىشى بىلەن ياشىماي ، خەقنىڭ خاھىشى بىلەن ياشىغان ئادەمنى ، ئادەم تىزىملىكىدىن چىقىرۋەتتىم مەن ....

uyghur05

	ياخشى يېزىپسىز ، موللا زەيدىن ئەپەندى . . . . . . . . . .

tuntaxvixi

	مۇقۇملۇقنىڭ گىپى چىقىپ قالدى ،مىنىە دەردىمنى ئاڭلاپ قوياڭلا،مەن بىر يىزىلىق ،يەنە كىلىپ ئۆيۈم كەنىت ئىشىخانىسى يىنىدىلا،كەنىت ئىشىخانىسى كانىيىدىن(لابا)24سائەت شۇ مۇقۇملۇق توغرىسىدا تەربىيە ئاڭلاپ تۇرىمىز.قۇلاققا پاختىنىڭ يوغىنىنى تىقىۋالساقمۇ ئامال يوق قۇلاق تۈۋىمىزدە ياڭرايدۇ،ئۇنى ئاز دەپ كۈندە كەچتە مەجبۇرى ئويۇن قويىدىغان بولىۋالدى(پارتىيىنى كۈيلەيدىغان ئويۇنلا)،مۇشۇ ئاي مۇشۇ كۈنلەدە چۇشتە ئارام خۇدا دەم ئالغنىمنى ئۇقمايمان قىرىنداشلىرىم،مۇندقلا دىسەم ھەتتا نامازنىمۇ قۇلاق تۈيۇمدە ناخشا مۇزىكا جاراڭلاغلىق ئۇقۇيمە ئەمەسمۇ....

rahatmakan

	تىنىچلىق ۋە مۇقىملىق بەخىت ئامەت  تىنىچسىزلىق قالايمىقانچىلىق ئاپەت

totem

	نىمىسىنى دەي،يازمۇ تازا ئىسسىق ۋاقىتلاردا كىلىپ قۇياش ئەمدى سەل پەسكويغا چۈشكەندەك قىلىدۇ ماۋۇ تۇرپاندا.ئەبەينىڭ تاققا-تۇققا گەپلېرىنى تۇلا ئاڭلاپ ئۆچەيەم ئۈزۈلگۇدەك كۆلۈپ ئەمدى ئۆزەم تاققا-تۇققا ئىشلارغا دۈچ كىلىۋاتىمەن.دىمەي دىسەم جاپا تارتىدىغىنى مەن.دەي دىسەم يامان خىجىل بۇلىمەن.ئاقىۋەت دەپلا قۇتۇلاي دىدىم.ياخشى نىيەتلىكەر تەلىم بېرەر.يامان نىيەتلىكلەر مەسخىرە ئىتەر.(بۇ يەردىغۇ ناچار مىجەزدىكىلەر يوق دەپ ئويلايمەن)شۇنداق قىلىپ ئايەم كۈنى كەچتىمۇ كەنتىمدە مۇقىملىق ئۈچۈن ئالا-بۇلماچ كىيىم كىيىپ قىزىل بايراققا يۈز كىلەلگۈدەك خىزمەتنى ئىشلىۋەتتىم.شەنبە-يەكشەنبە،ھۈكۈمەت دەمىلىش قىلىپ بەرگەن قۇتلۇق كۈنلەردىمۇ يەنە شۇ مۇقىملىق.ئۆزەم ساددا،خىزمىتىمنى جان كۆيدۈرۈپ ئىشلەشنى بۇرچۇم دەپ بىلىپ كەلدىم.ھۈكۈمەت ئايدا بەرگەن مائاشقا يۈز كىلەلىشىم كېرەكتە ئاخىرى.كەنىتتە بىكارلىق تورغا چىقىپ،تىلۋىزور كۆرۈپ كۆنلەر ئۈتۈپ،مايلامچىنىڭ توپتىكى بىكار ۋاقتىڭدا كىتاپ ئوقۇساڭ بولمامدۇ،دىگەن كۈيۈنۈپ تەئەددى ئارلاش دىگەن بىر ئېغىز گىپى بىلەن بۇگۇن 170 سومنىڭ بىشىغا سۇ قۇيۇپ شېئىر توپلامدىن بىرنى،ساياھەت خاتىرسىدىن بىرنى،ماقالىلەر توپلىمىدىن ئىككىنى سىتىۋاپتىمەن.خۇددى مەن بىر يەردىن پارە ئالغاندەك،دەملىش ۋاقتىدا كەنىت بىقىپ يۇرسەم ھۇكۈمەت ئېلان قىلغان شۇ كۈنلۈك ئىش ھەققىمنىڭ 300%تى ئەمىللىشىدىغاندەك.كىملەر شۇ سىياسەتتىن بەھىرلىنۋاتقاندۇ دەپمۇ قالىمەن،لېكىن نىمىلا دىمەي،خۇداغا شۈكرى.ئاچ قالمىدىم.يالىڭاچ قالمىدىم.مەيۈسلۈك باسقاندا كۈڭلۈمنى ئاۋۇندۇردىغان قىزىل بايراق كەنىت قورۇسىدا لەپىلدەپ تۇرىدۇ.يىشىم ئانچە چوڭ بولمىسىمۇ خېلى ئىشلارنى قىلىپ بېقىپتىمەن.ئەمما لېكىنزە مۇشۇ تاماق ئېتىش دىگەننى زادى خىيالغىمۇ كىرگۈزۇپ باقماپتىمەن.بويتاق ۋاقىتلاردىغۇ كىيىمنى قاتۇرۇپ كىيىش ئۈچۈن كىرنى ئەستايىدىل يۇيۇپ،دەزمالنى قاتۇرۇپ سىلىپ قۇلۇم خېلى كەپ قالغان.ماۋۇ مۇلايىم خۇتۇننى ئالغاندىن بېرى پايپاقنىمۇ تاشلاپ بېرىدىغان بولدۇم.ئاياقنىغۇ ئەتىسى ئىشقا ماڭغۇچە مايلاپ قويۇپ،ناشتىلىقىمنى ئۈستەلگە تەييارلاپ قۇيۇپ پارازىتلا بوپ كەتتىم.ئەمدى ئاپامنىڭمۇ ياكى خۇتۇننىڭمۇ نارازىلىقىنىڭ قاغىشى بولسا كېرەك.بۇگۈن چۈشتە كەنتىمىزگە قازان-قۇمۇچ،چوكا،ئەمبەل،تاختا-قىڭغىراق...دىگەنلەرنى تىزىپ ئۆزىمىز ئۇزۇقلىندىغان ئاشخانا ئىچىۋالدۇق.«دىباۋخۇ»لارغا بېرىدىغان ئەرزان پۇللۇق ئۇننى قازناقتىن كاسىر ئەپ چىقىپ بەردى.5 ئەركەك قولمۇ-قول لەغمەنگە پىلتە تەييارلاپ،بەرەڭگىنى ماجاڭ ئۇرۇقىدەك توغراپ،گۆشلەرنى 4 سوملۇق كاۋاپقا ئۆتكۈزدىغاندەك تۇغراپ...دىگەندەك تاماقنىمۇ ئەتتۇق.چۆپلېرى ئىشتان باغدەك،«مەنتاڭ»ى كەلكۈن سۈيىدەك چىققان بولسىمۇ ئىشتىھا بىلەن«ئاشخانا ئاچاساقمۇ بولغۇدەك»دىگەن گەپلەر بىلەن ئۆزىمىزنىڭ كۈڭلىنى ئاۋۇندۇرۇپ قوساق تويغۇزۇپتىمىز.تۇرۇپ يىغلىغۇم كىلىدۇ،تۇرۇپ كۈلگۈم كىلىدۇ.ھاياتلا بولسام تۇغمايدىكەنمەن،لېكىن باشقا ھەممە ئىشنى كۆردىغان ئوخشايمەن،يا بۇۋاق ۋاقتىمدا ئاپامنىڭ كۆكسىنى چىشلىۋالغان بولغۇيمىدىم،دىگەن خىياللار بىلەن رەھمەتلىك ئاپامنىڭ(ياتقان يېرى جەننەتتە بولسۇن)ئەتكەن تەمىلىك تاماقلېرىنى ئەسلەپمۇ قالدىم.ھاياتلىقىدا ھېچقانچە راھەت بېرەلمىگەن بولساممۇ پات-پات قەبرە بىشىڭىزغا چىقىپ دۇئا قىلىشنى ھەرگىز ئۇنۇتمايمەن،دەپ ئۆزەمگە جىق ۋەدىلارنىمۇ بېرىپ كەتتىم.يەنىلا جان بېقىش مۇھىمكەن.ھېلىمۇ ئۇيغۇر بۇلۇپ تۇغۇلۇپ قاپتىمەن،مىڭ قەترە شۇكرى.تاماق مەدەنيىتىمىزگە ھېچقاندەك مىللەتنىڭ مەدەنيىتىنى تەڭ قىلمايدىكەنمەن.بويتاقلىقتا ئۇزۇن چاچلارنىڭ كۆڭلىنى ئۈتۈش ئۈچۈن«خوگور»،«مالاچور»،«كىنتاكىنتى»...دىگەندەك جايلاردا سوكىلداپ يۈرگەنلېرىمدىن ئەمدى ئۇيىلۋاتىمەن.ئاشپەزمۇ ئۆزىمىز،خىرىدارىمۇ ئۆزىمىزكەنمىز.تاماقلانساقمۇ ئادەمدەك تاماقلىنايلى دەپ قالدىم.شۇڭا مۇنبەردىكى خانىم-قىزلارنىڭ قانداق تاماق ئەڭ ئاسان،قول تۇتمايدۇ.بىر ئاڭلاپلا ئىتەلەيدۇ.(گەرچە ئانچە تەمىلىك بولمىسىمۇ)...مەسىللەرنى چۆرىدىگەن ھالدا تەلىم بېرىشىڭىزلەرنى ئۈمىد قىلىپ قالدىم.ئاشخانا-رىستۇرانغۇ ئاچمايمەن.ئەمما خۇتۇن بار تۇرۇپ«چارەك تۇل»قالغاندا مۇراجەت قىلمايمۇ بولمايدىكەن.

totem

	يۇقۇردىكىنى ئايرىم تېما قىلىپ يوللىغان.،لېكىن سەزگۈر باشقۇرغۇچىلار ئەخلەتخانغا تاشلاپتىكەن.ئىنكاس شەكلىدە بۇ يەرگە قالدۇرۇپ قۇياي.قونچاق ياكى تۇتامسىز ئىنكاستىن ۋەزىنى ئاز-تۇلا بار دەپ ئويلايمەن.

arkanaz

	بېشىڭدا قاينايدۇ تۈرلۈك تەكشۈرۈش، يوقلامنى ئاختۇرۇش خاتىرنى كۆرۈش. تۇرمۇشقا ئادەم يوق باشقۇرۇش كۆپتۇر، ۋەزىپە خىزمەتنى ئىلگىرى سۈرۈش. خىزمەتنىڭ ئوسىلى ئىكەن مۇقۇملۇق ماۋۇسى مەن ئشلەۋاتقان يەرگە بەكمۇ ماس كەلگۇدەك،،،كۇندە ئۇ تەكشۇرۇش بۇ تەكشۇرۇش بىلەن كۇن ئوتىدۇ....