ئانام بولسىدى (تەۋسىيە )

Ahsayigit

	بۇ يازمىنى مەن ئۈچۈن ئەڭ سۈيۈملۈك ، ئەڭ ئەزىز بولغان رەھمەتلىك ئانامغا بېغىشلايمەن . ئەي ئۇلۇغ ئاللاھ ، رەھمەتلىك ئانامنىڭ ياتقان يېرىنى جەننەت قىلغايلا !  ئامىن ! تاغ ئارىلاپ بوران كەلدى ، باغ ئارىلاپ شامال كەلدى . ئاچ  ئانا  ئىشىگىڭنى ، دەردى بار بالاڭ كەلدى . ئانا ، مانا مەن كەلدىم ، بىز يەنە ئامان - ئېسەن يۈز كۆرىشىشكە نىسىپ قىلغان مېھرىبان ئاللاھقا يۈز مىڭ قەترە شۈكرى ! ئانا ، مىجەزىڭ يوقمۇ نېمە ؟ شۇنداق ، نېجىس كېسەل سېنى ئاز قىينىمىدى . ياراتقان ئاللاھ شىپالىق بەرسۇن ! ئانا ، جېنىم ئانا ، ھېلىمۇ ئېسىمدە ، سەن ھەر يىلى مەن مەكتەپكە قايتىدىغان ۋاقىتتا مەن ئۈچۈن ئەڭ ئېسىل نېممەت بولغان سەپەر توقىچىنى ھاردىم - تالدىم دېمەي شۇنداق ئوخشىتىپ يېپىپ بېرەتتىڭ ! ئانا ، ھېلىمۇ ئېسىمدە ، مېنى ئۇزۇتۇپ پويىزئىستانسسىغا بارغاندا ، ماڭا قىيماي ، كۆزلىرىڭ كۈلۈپ تۇرسىمۇ ، ياشلىرىڭ ئىختىيارىڭغا بوي سۇنماي يىپى ئۈزۈلگەن مارجاندەك تۆكۈلەتتى . مېنىڭ قارام يۈتكىچەكۆزۈڭنى ئۈزمەي  بىر قەدەم بىر قەدەمدىن ئارقاڭغا سىلجىيتىڭ ... ... ئانا ، ھېلىمۇ ئېسىمدە ، مەن قايتىپ كەلگەن ۋاقتىمدا ، بويۇڭ ئېگىز بولمىغاچقا ئادەملەر توپى ئارىسىدىن بىر قولۇڭنى سايىۋەن قىلىپ تۇرۇپ ھېلى ئۇياققا ، ھېلى بۇياققا < بالام ، ياقۇپجان ، قەيەردىسەن ؟ > دەپ ئوتلۇق كۆزلىرىڭ بىلەن باقاتتىڭ . ئانا ، ھېلىمۇ ئېسىمدە ، كۆرۈشكەن ۋاقتىمىزدا مېنى باغرىڭغا چىڭ بېسىپ كىچىك بالىدەك بۇقۇلداپ يىغلاپ كېتەتتىڭ . مەن كۈلۈپ تۇرۇپ ياشلىرىڭنى ئېيتاتتىم. ئانا ، ھېلىمۇ ئېسىمدە ، ماڭا دائىم : < مەن سېنى ئوغۇل دەپ تۇغقان ئىكەنمەن ، ئوغۇل بالىدەك ياشا ، چىرايىڭدىن تەبەسسۇم ئۆچمىسۇن ، نېمە ئىش بولىشىدىن قەتئىنەزەر ، تۇرمۇشقا ، ھاياتقا كۈلۈپ باق . ئەتراپىڭدىكى كىشىلەرنىڭ سۇلغۇن چىرايىغا  سەن تېرىقچىلىك كۈلكە ئاتا قىلالىساڭ ، ياردەمگە مۇھتاج بولغىنىدا ھاجىتىدىن چىقالىساڭ ، ھېچبولمىسا يول كۆرسىتەلىسەڭ ، ئۆزۈڭنى ئەر چاغلا ، شۇندقلا ھاياتنىڭ مەنىسىنى تاپىسەن ، مەن شۇندىلا سەندىن رازى بولىمەن . بەختىڭنى تاپقىن ئوغلۇم ! > دەيتىڭ .مەن بۇ سۆزلىرىڭنى ئەمدى ھەقىقى چۈشىنىۋاتىمەن ئانا ! 2012-يىل 8-ئاينىڭ 10-كۈنى ، ئۇلۇغ جۈمە كۈنى . مەن بۇ كۈننى مەڭگۈ ئۇنۇتالمايمەن . چۈنكى بۇ كۈندە مەن مەن ئۈچۈن ئەڭ ئەزىز بولغان ئىنسان __ ئانامدىن ئايرىلىپ قالدىم . مانا ئەمدى سەن مەندىن ۋاقىتسىز ئايرىلغىنىڭدا بولسا ، مەيلى مەكتەپكە قايتىدىغان ، مەيلى ئۆيگە تەتىل قىلىپ قايتىپ كەلگەن ۋاقىتتا بولسۇن پويىز ئىستانسىسىدا ئىختىيارسىز بىر سىمانى ئىزدەيدىغان بولۇپ قالدىم . كۆزۈمدىن ئىختىيارسىز بىر تامچە ياش دومۇلاپ چۈشتى . ئەسلى ياش دېگەن ئىچ - ئىچىدىن چىقىرىپ يىغلىغاندا ئاندىن چىقىدىكەن . مەن ئىزدىگەن ئۇ سىما دەل سېنىڭ سىمايىڭ ئىدى . ئانا ، جېنىم ئانا ، مەن چوڭ بوپتىمەن ، سېنى ھەقىقى سېغىنىپتىمەن ئەمەسمۇ ! ئانا ، مەن يەنە سەندىن ئايرىلىپ ، ئانا يۇرتتىن ئايرىلىپ ئوقۇشۇمنى تاماملاش ئۈچۈن مەكەتەپكە قايتىۋاتىمەن . خاتىرجەم بول ئانا ، مەن چوقۇم سەن ئېيىتقاندەك ياخشى ئوقۇيمەن ، ئوقۇشۇمنى غەلبىلىك تاماملاپ ئۆمىدىڭنى ئاقلايمەن . كونىلار ناھايتى توغرا ئېيىتقان ئىكەن : < كەتكەنلەرغۇ كېلەر بىر كۈنى ، كەلمەيدىكەن كەتمەنلەنگەنلەر ! > .ئانا ، تۈنۈگۈن سېنى چۈشۈمدە كۆردۈم . سەن كۈلۈمسىرىگەن ھالدا  ئاشۇ ئانىلىق مېھىر - مۇھەببەتكە تولغان ئالقانلىرىڭ بىلەن مېنىڭ يۈزۈمنى سىلاپ تۇرۇپ پىشانامگە سۆيۈپ قويدۇڭ . دەل شۇ ۋاقىتتا مەن ئويغىنىپ كەتتىم . ئانا ، بىلەمسەن ؟ مەن بۇ چۈشنىڭ رېئاللىق بولۇپ قېلىشىنى نەقەدەر ئارزۇ قىلاتتىم . مۇمكىن بولسا مەن ئويغانماسلىققا رازى ئىدىم . ئانا ، ياقا يۇرتلاردا بىلىم ئالىمەن دەپ ساڭا ئەسقاتىدىغان ۋاقىتلاردا يېنىڭدا بولالمىدىم ، مېنى كەچۈرگىن ، مەن دىن رازى بولغىن ، ماڭا بەرگەن ئاق سۈتۈڭگە رازى بولغىن ئانا ! ئۇلۇغ ئاللاھ ياتقان يېرىڭنى جەننەتتتە قىلسۇن ! تۆۋەندىكى قىسقىغىنا فېلىمنى كۆرۈپ رەھمەتلىك ئانام يادىمغا كېلىپ ئىختىيارسىز يىغلاپ تاشلىدىم . سىلەرمۇ كۆرۈپ باقساڭلار . ئانىلىرىمىزنى قەدىرلەيلى ، دىلىغا ئازار بەرمەيلى ، ۋاقىت چىقىرىپ يوقلاپ تۇرايلى . ھېلھەم بۇ دۇنيادا ياشاۋاتقان ، بىز ئۈچۈن تېنىم - تاپماي بالام دەپ تەر تۆكۈۋاتقان مېھرىبان ، جاپاكەش ئانىلىرىمىزنىڭ ئۆمرى ئۇزۇن بولسۇن ، بىزدىن ۋاقىتسىز ئايرىلغان .ئانىلىرىمىزنىڭ روھى قورۇنمىسۇن ، ياتقان يېرى جەننەتتە بولسۇن !  (ئامىن !) تۆۋەندىكىسى بولسا ئابدۇللا ئابدۇرېھىم ئاكىمىز ئورۇنلىغان ئانام بولسىدى ناملىق ناخشا ، ئاڭلاپ باققايسىلەر ! ئاخسا يىگىت   2012-يىل 24- ئاۋغۇسىت

jula0997

	شۇ مىھرىبان ئانىىڭىزنىڭ ياتقان جايى جەننەتتە بولسۇن . ئامىن !!!

izqin.com

	بارلىق ئۇيغۇر قىزلىرىمىزنىڭ تەرىپلىگۈدەك ، شەرمى ھايالىق ئۇلۇغ ئانىلاردىن بۇلۇشىغا تىرىشىشىغا تىلەكداشمەن . ئانىڭىزنىڭ ياتقان جايى جەننەتتە بولسۇن ، ھەقىقەتەن ئويغا سالدىڭىز .

kaynam999

	دۇنيادىكى بارلىق مۇمۇن مۇسۇلمان ئانىلارنىڭ ياتقان يىرى جەننەتتە بولغاي .

bugaltir

	ئاللاھنىڭ شاپائىتى بىلەن ئانىڭىزنىڭ ياتقان يېرى جەننەتتە  بولغاي   .

bugaltir

	نان ياققانتىم    قىززىق   تونۇرغا ،   كۈلگە چۈشۈپ مىلىنىپ كەتتى. تىرىكلىكتە  قەدرىڭ بىلەنمەي ، بۈگۈن ئەجەپ بىلىنىپ كەتتى. ياتاق ئىچى گۆردەك قاراڭغۇ ، سۇخانىدىن سۇ تامچىلايدۇ . سۈرىتىڭگە قاراپ ئولتۇرسام كۆزلىرىمدىن ياش تامچىلايدۇ. مەكتەپلەردە   بېسىم سەل ئېغىر ، دەرس    بىلەن تەكرار كۆپەيدى . سېغىنىشنىڭ     قۇم قەغەزلىرى ، يۈرىكىمگەھەجەپ سۈركەلدى؟! مەنبە   :    ساقلاپ  قويغانلىرىم   .

rahmansaykin

	ئانىمىز رەھمەتلىك بولغانلار ھەر ۋاقىت  ياد  ئىتىپ  روھىغا  دۇئا  قىلايلى . ئانىمىز  بارلار  قەدىرلەيلى . كەتكەندە  يىغلىىغاننىڭ  پايدىسى  يوق .

nadira

	ئانا ئۇلۇغ،ئانا مۇقەددەس!   ئانا، سەن ھەقىقەتەن ھەر قانداق مەدھىيە،ماختاشلارغا لايىقسەن ،بېشىمىزغا ئېلىپ قانچىلىك كۆتۈرسەكمۇ ئەرزىيدىغان بۈيۈك ئىنسانسەن!شۇڭا ، بىز ساڭا تەزىم قىلىمىز،سەندىن روھىي ئۇزۇق ئالىمىز!سېنى رەنجىتىشنى،سېنىڭ كۆڭلىڭنى يېرىم قىلىشنى زىنھار خالىمايمىز! ئانا ،سەن ئۇلۇغ، سەن مۇقەددەس! بىز ساڭا تېخىمۇ مۇقەددەسلىك تېخىمۇ  ئۇلۇغلۇق تىلەيمىز!

xaripa2011

	نىمە دىيىشىمىنى بىلەلمەي قالدىم

wenas

	تېمىڭىزنى ئوقۇپ مېنىڭمۇ كۆڭلۈم بەك بۇزۇلدى.كۆز ياشلىرىم يىپىدىن ئۈزۈلگەن مارجاندەك تۆكۈلدى.ئاھ نىمە دىگەن ئېغىر قىسمەتلەر ھە!قەدىرلىك ئاپامدىن ئايرىلغاندىن كېيىن ئىچىمدىن چىقىرىپ كۈلۈپ باققىنىمنى بىلمەيمەن..............‹ئانام بولسىدى›دىگەن بۇ ناخشىنى قانچە قېتىم ئاڭلىسام شۇنچە قېتىم كۆڭلۈم يېرىم بولىدۇ.ئۇنىڭ روھىغا ئاتاپ دۇئا قىلۋالساملا كۆڭلۈم ئازراق ئارام تاپىدۇ.كەتكەنلەر كېلەر بىر كۈنى،كەلمەيدىكەن كەتمەنلەنگەنلەر......ئۇلۇغ ئاللاھ ياتقان يېرىنى جەننەتتە قىلغاي!!!