قەيسەر بولۇڭ، ھايات يولىڭىز جاپا-مۇشەققەتلىك كۆرەشلەرگە تولغان.

tamkin147

	ئۆمۈر مەنزىلىمدە 25 تاغ-داۋاننى بېسىپ ئۆتۈپ 26- تاغ-داۋانغا كېلىپ قاپتىمەن. 27- تاغ-داۋانغا قارىدىم، بۇ تاغ-داۋان ناھايىتى تىك ۋە ئىگىز ئىدى. يەنە يولۇمنى توسىماقچى بولۇپ تۇرغان ھەر يوغان، ھەر ئىگىز تىكەنلىك دەرەخلەر، يىرتقۇچ ھايۋانلار بار ئىدى. كەينىمگە يېنىش ئويىدا 25- تاغ-داۋانغا قارىدىم، تاغ-داۋان ئەمەس بەلكى تىگى يوق ھاڭ تۇراتتى، ئاستىدا لاۋۇلداپ ئوت كۆيۈۋاتاتتى. ئەسلىدا مەن ھەر بىر تاغ-داۋاندىن ئۆتكەندە، كەينىمدىكى بېسىپ ئۆتۈپ بولغان تاغ-داۋانلار گۈمۈرۈلۈپ چۈشۈپ غايىپ بولغانىكەن.   ئىختىيارسىز ئالغا قاراپ سىلجىدىم. قاتتىق قۇم-بوران چىقىپ كەتتى. كۆزۈمنى ئاچالماي قالدىم. بوران خېلى ئۇزۇندا توختىدى، كۆزۈمنى تەستە ئۇۋۇلاپ ئېچىپ ئالدىمغا قارىدىم. كۆزۈم ئىچىشىپ ئاغرىۋاتاتتى. يەنە ماڭدىم، بىر ھازا ماڭغاندىن كېيىن پۇت-قولۇم ماغدۇرسىزلىنىشقا باشلىدى. تۇلۇمۇمنى ئېلىپ بىر قانچە يۇتۇم سۇ ئىچتىم. خۇرجۇنۇمدىن بىرقانچە لوقما نان ئېلىپ يىدىم. پۇت-قولۇم جانلىنىپ روھلىنىپ قالدىم. چوڭ-چوڭ قەدەم تاشلاپ، تىز-تىز مېڭىشقا باشلىدىم. ئۇشتۇمتۇت تاققىدە توختاپ قالدىم، ئالدىمدا ئاغزىنى ئېچىپ شۆلگەيلىرىنى ئېقىتىپ، قوزۇق چىشلىرىنى پارقىرىتىپ تۇرغان بىر چىلبۆرە تۇراتتى. ئەھۋال ئىنتايىن جىددىي، چىلبۆرە سەكرەپ ئۆزىنى ئېتىپ كەلدى. ئۆزۈمنى يانغا ئېلىپ قېچىشقا ئاران ئۈلگۈردۈم. سول بېلىكىمدىن قان ئېقىۋاتاتتى. يەردىكى يوغان بىر دەرەخ شېخى قولۇمغا چىقىپ قالدى-دە، چىلبۆرىنىڭ بېقىنىغا كېلىشتۈرۈپ بىرنى سالدىم. چىلبۆرە غىڭشىغىنىچە كەينىگىمۇ قارىماي تىكىۋەتتى.   خۇداغا شۈكرى، بېلىكىمنى تېڭىۋىلىپ يولۇمنى داۋام قىلدىم. ئالدى تەرىپىم كەڭرى كەتكەن قاقاسلىق، كۈن نۇرىدىن ھەممە يەر قىززىپ كەتكەن ئىدى. گاھى دۆڭلەرگە يامىشىپ چىقسام، گاھى تۈز يوللاردا ماڭاتتىم. پۇتلىرىم قاپاردى. بىر ھازا ماڭغاندىن كېيىن ئۇزۇن ۋە تىكرەك بىر دۆڭگە دۇچ كەلدىم. دۆڭنىڭ بەزى يەرلىرى بەك تىك ئىدى. يامىشىپ چىقىشقا باشلىدىم. قاتتىق تەرلەپ كەتكەنلىكتىن ئىڭەكلىرىمدىن چىپىلداپ تەر ئېقىپ، كىيىملىرىم بەدىنىمگە چاپلىشىپ كەتكەن ئىدى. چاتقال ۋە دەرەخلەرنىڭ تىكەنلىرى قوللىرىمغا ۋە پۇتلىرىمغا سانجىلاتتى. بەزىدە ئېسىلغان تاش ۋە چاتقاللار قومۇرۇلۇپ چىقىپ كېتىپ، بىر قانچە مېتر تۆۋەنگە سېيرىلىپ چۈشۈپ كېتەتتىم. دۆڭ ئاخىرلىشاي دەپ قالدى. تۇيۇقسىز سول تەرىپىمدىكى چاتقال ئارىسىدىن بىر نەرسە مىدىرلىغاندەك ھېس قىلدىم. تىزلا شۇ تەرەپكە قارىدىم. يۈرىكىم قارتتىدە قىلىپ كەتتى، مەن ئىلگىرى كۆرۈپ باقمىغان ۋە ئىنتايىن سۈرلۈك بىر يىلان چاتقال شاخلىرىغا يۆگىلىپ تۇراتتى. ئالدىمغا قاراپ ئاستا ئۈستىگە يامىشىشقا باشلىدىم. دۆڭ تۈگەپ تۈزلەڭلىككە چىقاي دىگەندە، يىلان كەينىمدىن كېلىشكە باشلىدى. تىزلىكتە ئورنۇمدىن تۇرۇپ يۈگىرەشكە باشلىدىم. چارچاپ كەتكەنلىكتىن ئانچە تىز يۈگىرەلمەيۋاتاتتىم. شۇنداقتىمۇ پۈتۈن كۈچۈم بىلەن يۈگۈردۈم. يىلانمۇ ناھايىتى تىز مېڭىپ مېنى قوغلاپ كېلىۋاتاتتى. 100 مېترچە يۈگۈرگەندىن كېيىن قۇرۇپ قالاي دىگەن بىر دەرەخ يىنىدىن ئۆتتۈم. دەرەخنىڭ يىنىدىلا 5~6 تال قۇش تۇخۇمى بار ئىدى. بىر ئازدىن كېيىن  ئارقامغا قارىسام، يىلان سۈرئىتىنى ئاستىلىتىپ تۇخۇمنىڭ يېنىدا توختاپ قالدى. يەنە بىردەم يۈگۈرۈپ يىلاندىن يىراقلىغاندىن كېيىن، ئۇھ،-دەپ ئاستا مېڭىشقا باشلىدىم. قۇشلارنىڭ سايراشلىرى ئاڭلىنىشقا باشلىدى. ئالدىمدا شىلدىرلاپ سۇ ئېقىۋاتقان بىر ئېرىق كۆرۈندى. قوش چاڭگلىمدا سۇ ئېلىپ گۈپۈلدەپ ئىچتىم، پۈتۈن بەدىنىم يايراپ كەتتى. بۆلەكچىلا روھلىنىپ ئورنۇمدىن تۇردۇم، ئالدىمدا ئادەم بويى ئېگىزلىكتە بىر تاش تۇراتتى. تىزلا تاشنىڭ ئۈستىگە چىقتىم،   ۋاھ ،!   نېمىدېگەن گۈزەل مەنزىرە!   كەڭرى كەتكەن يېشىللىق، دەل-دەرەخلەر، گۈل-گىياھلار، بىراق، يىراق-يىراقتا ئىگىز-پەس ھەرخىل تىك قىيالىق تاغلار غۇۋا كۆرۈنۈپ تۇراتتى. سوقۇۋاتقان كۈچلۈك شامال تىتىلىپ كەتكەن كىيىملىرىمنى ۋە چاچلىرىمنى لەپىلدىتەتتى. كەينىمگە قارىدىم، كەينىمدىكى تاغ-داۋان گۈمۈرۈلۈپ چۈشۈپ تېگى يوق چوڭقۇر ھاڭغا ئايلاندى. كۆزۈمنى يۇمدۇم. بېسىپ ئۆتكەن كەچمىشلىرىم خىيال ئېكرانىمدىن بىر-بىرلەپ ئۆتۈشكە باشلىدى....................................     ئالدىمدىكى تاغ-داۋان مېنىڭ كېلىشىمنى كۈتۈپ تۇراتتى.    مەنبە :     ئۆزۈم.

mehriban

	ھايات داۋانلىرى تولىمۇ مۇرەككەپ ، ئۆز ھايات قىممىتىنى بىلگەن ئادەملا ھارقاچان بەخىتلىك بولىدۇ دەپ ئويلايمەن .. بۇ ئەسەر تولىمۇ ئوبرازلىق ئىپادىلىنىپتۇ!!

aptap104

	مەن  داۋان ئاشمىدىم  پەقەت ، ئاشقىنىم ئۆتمۈش بولدى ، قىسمەت كۆرمىدىم ، ئەمما شۈكۈرىدىن ئايرىلمىدىم ....

ئەنسار

	ھايات يوللىرى ئەنە شۇنداق ئەگرى توقايلىرى بىلەن گۈزەلدۇر.

tazz

	بۆرىنى قورقۇتالىغان ئادەم يىلاننىمۇ يانچىپ تۇخۇملىرىنىمۇ قۇرۇتىۋەتسىڭىز بوپتىكەن

kokturik

	ھەي   مۇشۇنداق داۋان ئېشىپ نەگە  بارىمىز،،،،،،،،،؟      ئاخىرى   ئۆلۈمگە،،،،،

ئەنسار

	kokturik يوللىغان ۋاقتى  2012-8-21 06:25 PM ھەي   مۇشۇنداق داۋان ئېشىپ نەگە  بارىمىز،،،،،،،،،؟      ئ ... جۇمۇلاڭما چوققىسىغا بارامىز

bugaltir

	يولدا  قورام تاش  تۇرغان بولسا  ، غەيرەتلىك ئادەم ئۇنى ئىلگىرلەشنىڭ پەلەمپىيى دەپ بىلىدۇ . غەيرەتسىز ئادەم ئۇنى ئىلگىىرلەشنىڭ توسالغۇسى دەپ بىلىدۇ   .

mahatjan

	مەنمۇ بىر كۈنى سىزگە ئوخشاش ئۆزەمنى تەۋرەتكەن بۆشۈكلەرگە قاراپ؛- يەنە مىنى تەۋرىتىدىغان بۆشۈكلەر بارمۇ؟-دەپ توۋلىسام،ئەمدىكىسى تەۋرىمەيدىغان بۆشۈك قالدى دىدى،يەنى؛-قەۋرە بۆشۈكىگە بۆلىنىسەن، قورقۇپ كەتتىم.