پارىخور ئەمەلدارنىڭ ئۆلۈمىگە مەرسىيە ( ساتېرا )

saparbay

	پارىخور ئەمەلدارنىڭ ئۆلۈمىگە مەرسىيە ( ساتېرا ) كىتىپ قالدىڭ قىران ياشتا، ئېزىلدى زەپ يۈرەك باشلىق، ئەمەل-مەنسەپ گۈلۈڭ راسا ئېچىلغاندا پورەك باشلىق، ئۆلۈمىڭمۇ بولۇپ ئۆتتى مىسالى توي-كورەك باشلىق، كالا باقماي ساغاتتۇق سۈت، ئىدىڭ ئارقا تىرەك باشلىق، بولۇر ئەمدى يەنە كىممۇ بىزلەرگە يار-يۆلەك باشلىق؟! ۋاپات بولغاچ تۇيۇقسىزلا  بېرەلمىدۇق ساڭا رېزا  ، ئىلغاپ يۈرمەس ئېكەن نامرات ۋە يا باي دەپ ئەجەل-قازا ، قىلالىغان قاچان كىملەر شۇ ئەزرائىل بىلەن نىزا !؟ ئېكەن ئادەت : تىرىككە توي ، ئۆلگەنلەرگە ئېچىش ھازا ، كۆمۈپ قويدۇق مۇسۇبەتتە تىلەپ دۇئا-تىلەك باشلىق. دۇرۇس خىسلەت ئەمەس ئەسلى، ئۆلۈكنىڭ كەينىدىن سۆزلەش ، قارا كۈندە قىلىشمۇ سەت قوشاق توقۇپ كۆڭۈلنى غەش ، مېنىڭدە يوق، بېراق زىنھار تېرىقتەك پايدىنى كۆزلەش، بېراۋلارغا بېرىپ سانجىق، دىلىغا غۇم-ئازار ئەيلەش ، تېگىل گەپنى دېگۈم كەلدى، نىيەت يوقتۇر بۆلەك باشلىق. قەدىر ئەھۋال ئىدى ھالىڭ، نېچۈنكى تېز بېيىپ كەتتىڭ ، قاچان پۇلغا ھېرىس بولدۇڭ ، ھالال يولدىن قېيىپ كەتتىڭ ، سېزىك تارتىپ بېسات-ۋەجگە ، دىيانەتتىن ھېيىپ كەتتىڭ ، مانا تۆت گەز خەسە-گەزمالدىن «كۆڭلەك »مۇ كىيىپ كەتتىڭ ، بولامدىكەن ئۇ ئالەمدە مالۇ-دۇنيا كېرەك باشلىق؟! «بىكار » پۇللار كىرىپ تۇردى، گويا سەلدەك تۈمەن كويلاپ، كۈنۈڭ ئۆتتى قۇرۇپ بەزمە، ھاراق-تانسا ، قىمار قوغلاپ، كېچەلەرنىڭ پاۋانى بوپ، سەتەڭ ئىزلەپ ، جۇۋان «ئوۋلاپ» ، ئىشىق-شەھۋەت كوچىسىنى بولۇپ سەۋدا كۈنۈم بويلاپ ، كەيىپ-ساپا سۈرۈش بىلەن چىقارغان نام ۋەلەك باشلىق. خىيانەتنى بىلىپ ئەمچەك ، ئۆمۈر بويى شوراپ ئۆتتۈڭ ، قاچان پارا كېرەركىن دەپ تەمە بىرلە سوراپ ئۆتتۈڭ ، بالا نەپسىڭ يەنە تويماي ، ئىشىك ياقنى ماراپ ئۆتتۈڭ ، بېرىپ سوۋغات ، ئەمەل ئۆرلەش ئۈچۈن چېچىڭ تاراپ ئۆتتۈڭ ، قىلاتتىڭ يوق «توساق»لارنى شۇئان كولاپ ئورەك باشلىق. ھاراممۇ خوپ ياراشۇركەن، سىڭىپ سۇدەك ئەجەپ ياققان ، گېلىڭ تويسا كۆزۈڭ تويماي، يۇتۇۋەردىڭ يۇھا-ئوپقان ، تولا سەمىرىپ قورساق سالدىڭ، يىيىش دېسە ئۆزۈڭ ئاتقان ، ھەسەت ئىچىرە تۇتار ياقا، سىياقىڭدىن تۇلۇم چاشقان ، ئەشۇ تۇرقۇڭ ئايال بولساڭ، تۇغاتتىڭ ئۈچكېزەك باشلىق! سېنىڭ سادىق ئوقۇڭ ئىدۇق ، قايان ئاتساڭ شۇيان چۈشكەن ، قارا بوياپ ئاپئاق يىپنى، توزاقلارغا كۇلا ئەشكەن ، كۆزۈڭ چۈشسە كىمنىڭ مالى، ئىككىلەنمەي تېمى تەشكەن ، تۇتۇپ ھەتتا قىزىنىمۇ ساڭا جابدۇپ كېيىم يەشكەن ، خەمەكلەرگە نېمە كۈن بار، قۇرۇپ قالدى پىلەك باشلىق !؟... مەنبە : ئىجادىيەت

awyamatka

	روزى سايىت قايتا تۇغۇلدىمۇ نىمە.قەلىمىڭىز بەك ئۆتكۈركەن.گەپ سۆزلىرى بەك جايدا ئىشلىتىلپتۇ.ھازىرقى زامانىمىزگە بەك ماس كەپتۇ. لىكىن ھازىر پارىخورلۇق تېشىپ كىرمىگەن كامار قالمىدى.بىرنى جازالىسا مىڭى ئورننى تولۇقلاقلىق.مۇشۇنداق ئۆتۈپ كېتىدىغان ئوخشايمىز.

taltograk

	راسا قاملاشتۇرۇپ يېزىپسىز . شېئىرى تىل ۋە ئىپادىلەش كۈچىڭىزمۇ شۇنداق ياخشىكەن . شىرىيەتتىمۇ يىتىلىپ قاپسىز .

qolyigiti

	ياخشى يىزىپسىز ، پارىخورلار نىمانداق كۆپىيىپ كىتىدىغاندۇ .

tewelgha

	شېئىرى يېزىشتا تالانتتىڭىز بار ئىكەن،داۋاملىق تىرىشىڭ .شېئىردىكى مەزمۇنغا قارىتا مەندە مۇنداق بىرقانچە چىگىش سوئاللار  پەيدا بولدى.ئەمەلدارلىرىمىز خىيانەتچى،پارىخور  بولغانلىغى ئۈچۈن  جەمىيىتىمىز بۇزۇلۇپ خيىنەتچىلىك ئەۋىج ئىلىۋاتامدۇ  ياكى جەمىيەتنىڭ ئەزاسى بومىش بىر قىسىم پارا بىرىپ ئىش پۇتتۇرگۈرچىلەر بولغاچقا ئەمەلدارلار پارىخور خىيانەتچى بولۇپ كېتىۋاتامدۇ ؟؟؟بۇ ئىككىسىنىڭ ئىچىدە قايسىسى قايسىسىنى بۇزىۋاتىدۇ ؟ سىز بىر قىسىم يولداشلارنىڭ تۇنجى كۆرۈشۈپلا «تاماكا» تۇتقىنىغا قانداق قارايسىز ؟ مەن ئۇنى پارىخورلۇقنىڭ تۈنجى قەدىمى دەپ قارايمەن .بۇ خىل ئادەت بەزى مىللەتلەردە ئومومىلىشىپ پۈتۈن بىر مىللەتنىڭ ئورتاق ئادىتىگە ئايلىنىپ كەتكەن ،شۇڭا بىزنىڭ دۆلىتىمىزدە قانون قانچىلىك كۈچۈيىشىدىن قەتئىنەزەر پارىخورلۇق مەڭگۈ يوقالمايدۇ .

tumurkala

	پارا بەرگەن،پارا ئالغان كىشىنىڭ ھەر ئىككىسىنى قاتتىق جازالاپ ئىبرەت قىلىش كىرەك!

bugaltir

	پارىىخورلىقنىڭ مەنبەسى ئاچ كۆزلىك بۇلۇپ پارىىخورلاردىكى ئورتاق بىر ئالاھىدىلىك ئۇلار مال مۇلىككىمۇ، شان -شەرەپكىمۇ ھىرسمەن كىلىدۇ مىھنەت قىلماي ھارام پۇل مال ۋە شان -شەرەپكە ئىرىششىنى مەقسەت قىلىدۇ . ئىشنىڭ ئېپى-جېپىنى ئوبدان بىلىدۇ.  يۇقۇرى تۈۋەن مۇناسىۋەت قىلىشقا ماھىر،ئۇلار ساختىپەزلىكنىڭ ئەلىيۇل ئەلالىرى بۇلۇپ ھۇكۈمەت پۇلىغا ھاراق ئىچىپ تاماق يەپ،يىگەن تامىغى  ئىچكەن ھارىغى ئۆز قۇسىقىغا كىرگەن تەقدىردىمۇ   ھەر گىز ئۈزىنىڭ قۇسىقىغا يەپ ئىچكىنىگە ئىقرا بولغۇسى ئىشەنگۈسى كەلمەيدۇ . خەلق ئۈچۈن خىزمەت ئۈچۈن يەپ ئىچتىم دەپ ئويلىشىدۇ.

57gulyar

	تولا سەمىرىپ قورساق سالدىڭ، يىيىش دېسە ئۆزۈڭ ئاتقان ، ھەسەت ئىچىرە تۇتار ياقا، سىياقىڭدىن تۇلۇم چاشقان ، ئەشۇ تۇرقۇڭ ئايال بولساڭ، تۇغاتتىڭ ئۈچكېزەك باشلىق! بۇ مىسرالارنى ئوقۇغاندا ئىختىيارسىز كۈلۈپ كىتىپتىمەن  قولىڭىزغا دەرىت بەرمىسۇن بەك ياخشى يېزىپسىز

xaxyax

	بەلەن شېئىر! ئېسىل تېما!