تۇغۇلغان كۈنۈڭگە مۇبارەك بولسۇن
قىزىم، بۈگۈن سىنىڭ تۇغۇلغان كۈنۈڭ! بۈگۈن سەن ئۈچۈن شام ياقمىدىم، ساڭا تورت يىگۈزمىدىم، پەقەت ساڭا ئۈنسىز تىلەك تىلىدىم!
قىزىم، بۈگۈن تۇغۇلغان كۈنۈڭ. سەن بىريىل ئىلگىرى يىغا بىلەن يۇرۇق دۇنياغا كۆز ئاچقانىدىڭ. ئاشۇ چاغدىكى يىغاڭنى ئاڭلاپ قۇرسىقى ئاچقان ئوخشايدۇ، دەپ ئويلىغان ئىكەنمەن. ئەمدى چۈشەندىمكى، سەن شۇيىغاڭ ئارقىلىق ماڭا مۇھىم بىر ھەقىقەتنى تۇنۇتماقچى بولغان ئىكەنسەن. يەنى،<< دادا، مەن تۇغۇلدۇم، بىر يۈكىڭىز ئىككى، بىر غېمىڭىز ئون بولدى. ئەمدى يۈرىكىڭىزنىڭ بىر پارچىسى مەن ئۈچۈن كۆيىدۇ>> دىمەكچى بولغان، ئەمما شۇ سۆزلىرىڭنى ئىزھار قىلالماي يىغلىغان ئىكەنسەن.
قىزىم، سىنىڭ ئاشۇ يىغاڭغا ئېيتىپ تۈگەتكۈسىز ھېكمەت، يەشكەنچە ئادەمنىڭ قەلبىنى شىرىن ھېس-تۇيغۇلارغا ئوراپ، مەڭگۈلۈك ئۈمۈتۋارلىققا ئېرىشتۈرىدىغان سىر يۇشۇرۇنغان ئىكەن. دىمىسىمۇ تۇنجى يىغاڭ مىنىڭ قەلبىمدە بارغانچە كۈمۈلۈپ كەتكەن ھېس-تۇيغۇلىرىمنى ئويغاتتى، قېتىپ قاتمال بولۇپ قالغان يۈرۈكۈمنى باھارنىڭ ئىللىق ئاپتىپىدەك سۆيۈپ ئۈتۈپ، قەلبىمدىكى چىگىش تۈگۈنلەرنى يەشتى، ئادىمىيلىك بىلەن ئادەم ئوتتۇرسىدىكى چېگرادا تېنەپ قالغىنىمدا مەنزىلىمنى يۇرۇتۇپ، ئەرلىك مەسئۇلىيەت بىلەن ئاتىلىق مەجبۇرىيەتنىڭ نىمە ئىكەنلىكىنى ھېس قىلدۇردى. سىنىڭ شۇ يىغاڭ مىنىڭ بىر قىزغا دادا، بەخىتلىك، ئىللىق، ئىناق بىر ئائىلىگە باش بولغانلىقىمنى ئەسلەتتى.
قىزىم، سەن مىنى دۇنيادىكى ئەڭ ئۇلۇغ بولغان<<دادا>> نامىغا مۇيەسسەر قىلدىڭ! ئەمدى چۈشۈنۈپ يەتتىمكى، بۇ نامنىڭ ئۇلۇغلۇقى بىلەن بىللە، دادا بولغۇچىغا قۇيۇلىدىغان تەلەپلەر شۇ كىشىنى ئاۋايلاپ قەدەم بېسىشقا، ھەر ئىشنى ئويلىنىپ قىلىشقا ئۈندەيدىكەن. قاچان، قەيەردە، قانداق ۋاقىتتا بولسۇن خوتۇن، بالا، ئائىلىنى ھەردائىم ئەستى چىقارماسلىقنى تەلەپ قىلىدىكەن. مەن بىر بالىغا دادا بۇلۇپ ئادىمىيلىكتىن ئۇرۇن ئالغان بولسام، شۇنداق دىيەلەيمەنكى، دادام ئون بالىغا دادا بۇلۇپ، ئاللىبۇرۇن ئادىمىيلىكتىن كۈتۈرلۈپ، پەرىشتە قاتارىدىن ئۇرۇن ئالغان ئىكەن....
قىزىم، مەن ئائىلىدىن ئىبارەت بۇ چوڭ قۇرغاننى تېخىمۇ مۇستەھكەملەپ، ئانا-بالا ئىككىڭلار بىلەن بەخىتلىك، گۈزەل چاغلاردىمۇ، ئېغىر دەملەردىمۇ بىللە بۇلۇپ، قار-يامغۇردا، پىژغىرىم ئاپتاپتا سىلەر ئۈچۈن كۈنلۈك بۇلىمەن، دۇنيادىكى بارلىق خۇشاللىقلارنى سىلەرگە ھەدىيە قىلىش ئۈچۈن تىرشىمەن، ھەرقاچان، ھەرقانداق يەردە كۆكرەك كېرىپ چىقىپ، ھەرقانداق ئېغىر كۈنلەردە سىلەرنى قوغداپ، ئائىلىدە ياخشى ئەر، ياخشى دادا، جەمىيەتتە لاياقەتلىك بىر ئىنسان بۇلۇپ ياشاشقا تىرشىمەن.
قىزىم، بەلكىم سىنىڭ قەدەملىرىڭنى ئاران يۆتكەپ، تۇنجى بۇلۇپ چىققان چۈچۈك تىلىڭ بىلەن<< دادا>> دىگەنچە كىلىپ، قانداقتۇر بىر خىياللار بىلەن ساڭگىلاپ قالغان بېشىمنى قايتا-قايتا كۈتۈرۈپ قۇيۇشۇڭ بىزنى مۇنداقلا كۈلدۈرۈش ئۈچۈن قىلغان ئادىتىڭ بولماستىن بەلكى بىرە يۇشۇرۇن مەنىنى بىلدۈرسە كىرەك. بەلكىم، <<بېشىڭنى كۆتۈر دادا، مەن سىنىڭ يۈزۈڭنى يۇرۇق، بېشىڭنى ئىگىز قىلىدىغان قىزىڭ بۇلىمەن>> دىمەكچى دۇرسەن. بەلكىم،<< بېشىڭنى كۆتۈر دادا، ھاياتقا، كەلگۈسىگە كۈلۈپ قارا، مىنىڭ پارلاق بەختىمنى كۆر>> دىمەكچىدۇرسەن.
قىزىم، تۇغۇلغان كۈنۈڭگە مۇبارەك بولسۇن! سىنى توققان ئاناڭنىڭ سىنى تۇققان كۈنىگە مۇبارەك بولسۇن!
يوللىغان ۋاقتى 2012-8-12 12:23:41 AM
