ئىنساب دېگەن مانا!

ab8ob8

	ئىنساب دېگەن مانا!       - ھوي ئۇستاموي، ماڭمامسىز؟ مەن ماشىنىغا چىققىلى نەۋاخ! گېپىڭىزگە ئىشىنىپ ماشىنىغا چىقمىغان بولسام ئاللىبۇرۇن ئاپتۇبۇستا بولسىمۇ ئۆيگە بېرىپ بولاتتىم دەيمەن... ھەييى... ئىسىت ئىككى سائەت ۋاقتىم!       ئەمدى ماشىنىنىڭ يېنىغا كېلىشىمگە بۇ ئايالنىڭ ئېغىزى ئېچىلىپلا كەتتى... ئەجەپ خىجىل بولدۇم دېسە...بۇ شوپۇر ئاكاشمۇ مېنى دەپ كەينىدىكى ئۈچ كىشىنى بەكمۇ ساقلىتىپ قويۇپتۇ ئەمەسمۇ... مەن بولساممۇ قاقشايتتىمدە... شوپۇر ماڭا غەلىتىلا بىر نەزەردە قارىۋېتىپ ماشىنىنىڭ كەينىنى ئاچقىلى ماڭدى، مەن قولۇمدىكى ئېغىر لاقا- لۇقىلىرىمنى كەينىگە سېلىۋېتىپ، ئۇف دەپ ئالدىغا چىقىپ ئولتۇردۇم. نەس دېگەن مېنىلا باسامدۇ دەيمەن، توۋا ، مەنلا بىر يەرگە بارىمەنمۇ بارغۇچە كەلگۈچە كۆتۈرىدىغان نەرسىنىڭ جىقلىقى، بەزىدە بېلەتنى ئاغزىمدا چىشلەپ كىرىپ كېتىمەن بېكەتكە ، ئامال يوقتە مۈرەمدىن تارتىپ قولۇمنىڭ ئۇچىغىچە يۈك... يا ئاللاھ... شۇنداق غۇدۇڭشۇپمۇ يەنە كۆتۈرۈپ ماڭىمەن تاشلاشقا چىدىماي!!! بىرخىللا خوتۇن كىشى مىجەزمەن ئىشقىلىپ...( ئەمەلىيەتتە قىز بالا )       < بىسمىللاھىر رەھمانىر رەھىم> دەپ ماشىنىنى قوزغاتتى، ھەممەيلەن تەڭلا بىسمىللاھ دېيىشتۇق. ئۈرۈمچىنىڭ قايناق تۇرمۇشىدىن بارغانسېرى يىراقلاپ كېتىپ بارىمىز، كازىۋەندىن ئۆتكەندىلا كەينىدە ئولتۇرغان سېمىز كەلگەن ئايال ئېغىز ئېچىشقا باشلىدى:      - مۇشۇ كۈندە ئىنساب دېگەن قالماپتۇ ، توۋا دەيمەن، بايا تۇغقانلارغا بىردىن ياغلىق ئېۋالاي دەپ ئابلىزغا كىرگەن( ئابلىز سودا سارىيى دېمەكچى)، ھېلىقى ياغلىقتىن ئوننى ئالساممۇ باھاسىنى ئاران بىر كوي چۈشۈرۈپ بەردى، سەككىز كويدىن بېرىڭ دېسەم مۇمكىن ئەمەس يېقىن كەلمىدى دېسە... ئۇلۇغ رامىزانلاردا نېمە بولىدۇ ناھايىتى ئون كوينىڭ ئىشىغۇ؟! - يېنىدىكى ئاياللارمۇ بەس بەستە سۆزلەشكە باشلىدى:     - ۋوي، ئۇمۇ شۇ ئون كوينى دەپ سودا قىلىۋاتسا، ھازىرچۇ خەقلەر بەش مو ئۈستىدىمۇ دىڭ تۇرىدۇ دەيمەن...     - پۇل، مال دۇنيا دېگەن ئۆلسە قالىدۇ، ئۇنچىلىك قىپ نېمە كەپتۇ، بازارلىقلار، خىزمەتچىلەر بەك چىڭ پىخسىق كېلىدىكەن، سىقىپ سۈيىنى چىقىرىدۇ پۇل دېگەننىڭ زادى، بىز دېھقان خەق نېمىلا بولسا مەيلى خۇدايىم بېرەر دەپ قولدا بار چاغدا چوڭ چوڭ خەجلىۋېتىدىكەنمىز، يوق چاغدىمۇ ئۆيلەرگە مېھمان كەلسە ھەرگىز چاندۇرمايمىز جۇمۇ، لېكىن مۇشۇ ئۈرۈمچىگە كەلسەم تۇغقاننىڭ جىقلىقى، لېكىن كىرسە بىر كېچە پاتىدىغان ئۆي يوق! ئۇف!     شوپۇرمۇ گەپ قىستۇردى:    - قىيامەت يېقىنلاشقان ئوخشايدۇ، ھەممىلا يەردە ئىنساب كۆتۈرۈلۈپ كەتتى... ھەممىسى شەخسىيەتچى، ئۆزىنىلا ئويلىغان!    - شۇ شۇ، بۇرۇن بىزنىڭ مەھەللىدە بىرەر مېيىت ياكى نەزىر چىراغ بوپ قالسا قوشنا مەھەللىدىكىلەرمۇ سۇيقاش ئېتىپ چېلەككە قاچىلاپ ئەپكەش بىلەن شۇ ئۆيگە ئاپىرىپ مېھمانلارغا سۇنىدىغان، ھازىر قوشنىسىنىڭ ئۆيىدە نەزىر بولسىمۇ قازان قايناتمايدۇ...    - ۋوي شۇ، ھەممە يەردە پىتنە بوپ كېتىپتۇ، بۇرۇن دېگەن تاماق ۋاقتى بولسا ھەممە ئۆيگە قاچىلاپ توشۇيتتۇق، ئۆيلەردە ئالتە يەتتە خىل تاماق بوپ كېتەتتى، شۇنداق بەرىكەتلىك مولچىلىق...    - ئەھ، ئۇچاغلارچۇ كەتتى ئەمدى، ھازىر دېگەن بىر سورۇندا ئولتۇرغان كىشىلەر ھا ھا ھا ھى ھى ھى كۈلۈشۈپ قارىماققا ئامراقتەك شۇنداق چاقچاقلىشىپ ئولتۇرىدىكەن، ئارىدىن بىرەرسى قوپۇپلا ماڭدىمۇ، پۇتى بوسۇغىدىن ئاتلىمايلا شۇ سورۇننىڭ غەيۋەت ئوبيېكتى بوپ قالىدۇ... ھەممە يەردە ئىت، غاجاپلا يۈرگەن!    - ھەي راست، ئالدىمىزدىكى ھەپتىدە بىزنىڭ قوشنىمىزچۇ قېرىنداشلىرى بىلەن سوتلىشىدىكەن، توۋا، زامان ئاخىرى دېگەن مۇشۇ مانا...    - نېمە نېمە؟ كىمۇ ئۇلار؟ نېمىشقا سوتلىشىدىكەن؟    - ھە ھېلىقى يېقىندا ئاتىسى تۈگەپ كەتكەن ئادەمما؟ سىڭلىسى بىلەن مىراس تالىشىۋېتىپتۇ دەۋاتقان راست... شۇلارمۇ؟    - شۇ، شۇ ، نەق ئۆزى، ھازىر ئۇنداقلارمۇ جىقلاپ كېتىپتۇ، ھەتتا ئاتىسىنى سوتقا ئەرز قىلىدىغانمۇ بوپ كېتىپتۇ، باللارنىڭ كۆڭلىگە ئىنساپ بەرمىسە بىكار جۇمۇ، ،، ھەي ئۇنىمۇ دەيمىز بۇنىمۇ دەيمىز، بالىلاردىن كۆرىدىغان ھېچ يېرىمىز يوق، سۇنىڭ بېشى لاي بولسا ئاخىرىدىن كۆرگىلى بولمايدۇ، ئاشۇ ئاتا ئانا بولغۇچى ئەينى ۋاقىتتا ئۆز ئاتا ئانىسىغا قانداق قىلغان بولسا ئۆز بالىسىدىن شۇنى كۆرىدۇ... بۇرۇن ئاتام رەھمەتلىك دەپ بېرىدىغان ، ئوتتۇرا مەھەللىدە بىر كىشى ئوغلىدىن ئىككى شاپلاق يەۋېلىپ قولىنى ئېگىز كۆتۈرۈپ دۇئا قىلىپ < جېنىم بالام، مەن رازى، ئىككى ئالەملىك رازى ، ئەينى ۋاقىتتا ئەقىلسىزلىكىمدىن ئاتامنى مەن بىر شاپلاق سالغان ئىدىم، ئەمدىلىكتە سەن مېنى ئىككى شاپلاق ئۇردۇڭ، مەن رازى بوپ كېتەي، بالىلىرىڭغا ئىنساب تىلەي، سەن مەن كۆرگەننى كۆرمىگىن> دەپتۇ،   شۇڭا، بالىلاردىن ئاغرىنىشتىن بۇرۇن ئۆزىمىز بۇرۇن نېمە قىلغان شۇنى ئويلاپ باقساق بولىدۇ.    .................................................................. ...........................................     ۋاييەي! ئەجەپ ئاغرىدا ما بېشىم، خوتۇنلارنىڭ گېپىنى ئاڭلاۋېتىپ ئۇخلاپ قاپتىمەندە،  كۆزۈمنى ئېچىشتىن بۇرۇن يەنە مۇنۇ گەپلەر قۇلىقىمغا كىرىپ قالدى:     - ئۇ چاغلاردا بىز دەرۋازا يېنىدىمۇ تۇرالمايدىغان ، قايسى يىگىتكە قاراۋاتىسەن؟ كىرە ماڭ ئۆيگە، بولمىسا ئەلچى كەلمەيدۇ دەپ ئاپام تىللاپ...    - ھا ھا ھا،، شۇ شۇ ، ھازىر دېگەن قىزلار ئوغۇللارغا تېلفۇن قىلىپ < چىقە، باغچىدا ساقلاۋاتىمەن، تاماق يەپ كېلىمىز > دەپ چاقىرىدۇ، چىقمايمەن دېسە < نېماندا  سايىماخۇندەك خوتۇن مىجەز بوپ كەتتىڭ > دەپ سېسىق گەپ قىلىپ، ئاچىقىدۇ...    - توۋا قىزلارمۇ شۇنداق قىلامدىكەن؟ مېنىڭ قىزىمغۇ ئادەتتە سىرتلارغا تۈزۈكمۇ چىقمايدۇ، ئوغۇللاردىن تېلفۇن كەلسىمۇ ئاپام بار ئۆيدە، يالغۇز قالىدۇ، چىقمايمەن، دەپ شۇنداق تېز رەت قىلىدۇ،،، ئاۋۇ قوشنىلارنىڭ قىزى دېگەن تولا چاقىرىپ كىرىدۇ، ئۇنىڭ كىيىنىشلىرىگە قاراپلا قىزىمنى ئۇنىڭغا قوشمايمەن مەن، ساپلا يولدىن چىققانلارنىڭ كىيىملىرىنى كىيىپ يۈرىدۇ ئۇ...    - ۋوي سىز قىزىڭىزنى ئۇخمايدىغان ئوخشايسىز، ئالدىنقى ھەپتە مەن بازارغا كىرگەن، ئاچامنىڭ ئۆيىدە تاماق يەپ كەچ قاپتىكەنمەن، باغچىنىڭ يېنىدا قىزىڭىز بىلەن شۇ قوشنىڭىزنىڭ قىزى قولتۇقلىشىۋاپتۇ، يېنىدا ئۈچ ئوغۇلبالا باركەن، كۈلۈشۈپ چاقچاقلىشىپ كېتىۋاتىدۇ، سىز قارىغاندا ئۆيدە يوق ئوخشايسىز ھە؟! لېكىنغۇ قارىسام قىزىڭىز ئوغۇللار بار تەرەپتە ماڭماي، دوستىنىڭ سول تەرىپىدە كېتىپ بارىدۇ...     ئۇ ئايالنىڭ ئۆڭى سەت ئۆزگەردى دە، مەن ئۇف، تىنچ ئۆيگە كەۋالساق بولاتتىغۇ، بۇلار ئەمدى ئېغىزلىرىنى بۇزۇشۇپ تىللاشمىغىدى دەپ شۇنداق ئەنسىرەپ كەتتىم.    - بولدى بولدى، نېمە جىق غەيۋەت بۇ! غەيۋەتخورلارنى تىللاپ تۇرۇپ غەيۋەت قىلىدىكەنسىلار ئاچىلار! - شوپۇر شۇنداق دەپلا  ۋەزىيەتنى ئۆزگەرتتى...     دېرىزىدىن سىرتقا قاراپ ئولتۇردۇم. بىر قېتىم مۇشۇ يولدىن ئۆتكەندە بۇغدايلار ئەمدى مايسا بوپتىكەن، يەنە بىر قېتىمدا باشاق چىقىرىپتىكەن، ئالدىنقى قېتىم ئالتۇن رەڭگە كىرىپتىكەن، مانا ئەمدى ھەممىسى كومبايىن بىلەن ئاللىبۇرۇن بىر تەرەپ قىلىنىپ بوپتۇ...      ئالدى بىلەن بۇ ئۈچ ئايالنى ئۆيىگە ئاپىرىپ قويىدىغان بولدى، يېزىغا قاراپ كېتىۋاتىمىز، نېمىدېگەن گۈزەل !؟ مۇشۇ تەبىئىي گۈزەل مۇھىتتا ياشاۋاتقان مۇشۇ ئاياللار بايىقىدەك پاراڭلىرى بىلەن مەھەللىنى قىزىتىپ كېلىۋاتقاندۇ ھە... بىردە قىزىرىشقان، بىردە كۈلۈشكەن...     مانا ئۆيىگە كەپتۇق، ۋوي جۈرۈڭلار ئۆيگە كىرىپ ئىسسىق تاماق يەپ مېڭىڭلار دەپ تەكەللۇپ قىپ كەتتى، بىزمۇ ئۆيگە ئالدىراپ شۇ، ئۆيىڭىزنى بىلىۋالدۇق داۋاملىق كېلىپ تۇرارمىز دېيىشتۇق...     بىراق شوپۇر ماڭىدىغاندەك ئەمەس، نېمە بولدىكىن دېسەم، ئۇ ماڭا قاراپ:< بۇلار كىرا پۇلىنى ئۇنتۇپ قاپتىمۇ نېمە؟> دېدى.     مەن ئەقلىمنى ئىشلىتىپ:     - ئاكا، راست مەن ماۋۇ كىرا ھەققىنى بېرىۋېتەي، سەل تۇرۇپ ئۇنتۇپ قالماي يەنە ! - دەپ پۇلنى سۇندۇم، بۇ چاغدا ئۇلارمۇ ئېسىگە ئالغاندەك:     - ۋاي خۇدايىم ، راسىت، ما ئۇنتۇغاقلىقىمنى،،، ئېسىم قۇرىسۇن! مانا 50 كوي...     شوپۇر ئاكاشنىڭ چىرايى ئۆڭۈشكە باشلىدى:     - ئاچا، بۇ، بۇ ، بۇ ،،، ئەسلى 60 كويدىن مېڭىۋاتقان يولتى بۇ ،، ئۇنىڭ ئۈستىگە سىزلەرنىڭ بۇ مەھەللىگىمۇ خېلى ئۇزۇن ماڭدۇق، ئۇنىڭغىمۇ بوپتۇ دېسەم ئەمدى ئون كوي قىسىۋالسىڭىز ماڭىمۇ تەس كېلىدۇ...     - توۋا، ما خەقتە ئىنساپ دېگەن قالماپتۇ جۇمۇ، بۇرۇندىن 50 كويغا چىقىدىغان بىز ، ئەمدى سىز ئون كوي قوشۇپ ئالامسىز؟ بىزمىچۇ داۋاملىق بېرىپلا كەۋاتقان ئۈرۈمچى ئۇ، سەھرالىق دەپ قۇياي دەۋەتامسىز ئۇكام...بولدى جىق گەپ قىلماي ئەپ مېڭىڭە ماۋۇ پۇلنى! ئوھۇشتە، ھېرىپ ئاران قالغاندا ئەجەپ نېرۋامنى ئۆرلەتتا!     شوپۇر يەنە بىر نېمىلەرنى دېمەكچى بولدىيۇ ، ئۆزىنى بېسىۋالدى، چۈنكى بۇلاردىن پۇل چىقمايتتى، بۇنى ئۇ بىلىدۇدە... يولىچە خەقنى تىللاپ، ئىنساب توغرۇلۇق گەپ ساتقان ئايال، ئەمدىلىكتە ئاشۇ 10 يۈەن بىلەن ئىنسابىنى يوق قىلدى! توۋا، ئىنساب ئەسلى مۇشۇكەندە!                                مەنبە: ئۆزۈم

رەھىمى

	ئابلىزدىكى تىجارەتچىلەرنى ئىنساپسىز دەپ رەنجىگەن ئايالنىڭ ھالىمۇ تايىنلىقكەن .... ئىنساپسىزلىق ئىمانى سۇسلاشقانلىقنىڭ ئالامىتى .

izdinish

	ھەممىسى ساپا مەسىلىسى ! ساپا نەدىن كېلىدۇ ؟  ج: دىنىمىزدىن كېلىدۇ ، سۈننەتتىن كېلىدۇ ، مۇسۇلمانداچىلىق ھەقىقىي ئىنسانغا ماس ياشاش يولى

↗■ηυrì

	توۋا  باشتا  گەپلىرىنى ئوقۇپ   خېلى ئېسىل ئايالكەن  دىسەم

sabri@

	.....ماڭا بەك قىزىقارلىق تۇيۇلۇپ قەتتى...توۋا....باشقىلاردىن  ئەيىپ ئىزدەپلا يۇرۇيمىزيۇ، شۇ ئەيىپ مەندىمۇ بارمۇ؟ دىگەننى ئويلاشمايمىز.....

AYGUZAL007

	غەيۋەت   دىگەن  نەسە   بىلەنغۇ    بۇرۇندىن  خوشام  يوق   مىنىىڭ  ...........

azizgul

	مۇشۇنىڭ ئۆزى غەيۋەت .

zulfay

	ياخشى يېزىلغان ھېكايىكەن.

alanwar

	( شوپۇر يەنە بىر نېمىلەرنى دېمەكچى بولدىيۇ ، ئۆزىنى بېسىۋالدى، چۈنكى بۇلاردىن پۇل چىقمايتتى، بۇنى ئۇ بىلىدۇدە... يولىچە خەقنى تىللاپ، ئىنساب توغرۇلۇق گەپ ساتقان ئايال، ئەمدىلىكتە ئاشۇ 10 يۈەن بىلەن ئىنسابىنى يوق قىلدى! توۋا، ئىنساب ئەسلى مۇشۇكەندە!) ياخشى ئاخىرلىشىپتۇ،ئىسىل،تۇرمۇشتا ھەقىقى ئۇچىراپ تۇرۋاتقان ئىشلار!!!رەھمەت سەگىتىپ قويغۇنىڭىزغا!!!

qog

	ئىنساب ئىنساب ئىنساب ئىنساب ئىنساب ئىنساب ئىساب ئىنساب بادۇ ھە،با يەدە يەنىلا بار.