قوشنىلار ئىناقلىقىغا مىتە چۈشمىسۇن

bugaltir

	قوشنىلار ئىناقلىقىغا مىتە چۈشمىسۇن بايىنغۇلىن رادىيو- تېلىۋېزىيە ئىستانىسسىدىن تۇرسۇنجان ئابدۇرېھىم بىز ھازىرغىچە ھەرقانداق جايدا قوشنىلار ھەققىدە گەپ بولغاندا ئۆزىمىزنىڭ مول بولغان قوشنىلار مەدەنىيىتىمىز بىلەن پەخىرلىنىپ كەلدۇق. شۇڭىمۇ خەلقىمىزدە «يىراقتىكى تۇققاندىن يېقىندىكى قوشناڭ ياخشى»،«قوشنا بولساڭ يۆلەك بول،بولمىسا بۆلەك بول» دىگەندەك ماقال-تەمسىللەر كەڭ تارقالغان. بۈگۈنكى كۈندە تەرەققىيات ۋە شەھەرلىشىشنىڭ ئۇچقاندەك تېزلىشىشى بىلەن شەھەرلەردىن شەھەر ئەتىراپلىرىغىچە ، ھەتتا يېزا مەيدانلارغىچە كىشلەر ئىگىز بىنا ياكى ئادەتتىكى بىنالارغا ئولتۇراقلاشتى. شۇنىڭ بىلەن كىشىلەر يېڭىدىن-يېڭى قوشنىلارغا ئىگە بولدى. يېقىندا بىر تونۇشۇمدىن قوشنىلار ئىناقلىقىغا تەسىر يەتكۈزۈۋاتقان مۇنداق بىر ئەھۋالنى ئاڭلاپ قالدىم. مەلۇم مەھەللىدە ئاستى-ئۈستى ئولتۇرىدىغان قوشنىلار ئازارلىشىپ قاپتۇ. سەۋەبى، ئۈستىدە ئولتۇرىدىغان قوشنىنىڭ بىر كەپسىزرەك 7 ، 8 ياشلىق ئوغلى بولۇپ، بۇ ئوغۇل كۈندۈزىغۇ ئاراملىق بەرمەيدىكەن، يەرگە بىر نەرسىلەرنى خالىغانچە ئېتىۋاتقان ، ئورۇندۇقلارنى سۆرەپ غەلىتە ئاۋاز چىقىرىۋاتقان ، بىردەم بولسا ئاڭلاپمۇ چۈشەنگىلى بولمايدىغان غەلىتە ناخشىلارنى يۇقۇرى ئاۋازدا قويۇۋالىدىكەن، ئىشقىلىپ بەكلا تىنىمسىز ئىكەن . بۇ ئاز كەلگەندەك ھەر كۈنى ئاخشىمى سائەت 11 ، 12 لەرگىچە شارەكچە ئويناپ ئاستىنقى قەۋەتتىكىلەرنى پەقەتلا ئۇخلاتماپتۇ. ئاستىنقى قەۋەتتىكىلەر ئۆز قوشنىسىغا چىرايلىققىنە ئۆزلىرىنىڭ توختىماي چىقىۋاتقان تاراق -تۇرۇق ئاۋازدا پەقەتلا ئۇخلىيالمايۋاتقانلىقىنى، ئوغلىغا تەربىيە قىلىشنى ئېيتىپتىكەن. ئۇلار بەكلا خاپا بولۇپ، بۇ ئۆينى ئۆزلىرىنىڭ نۇرغۇن پۇلغا سېتىۋالغانلىقىنى، شۇڭا نىمە قىلسا ئۆزلىرىنىڭ ئىشى ئىكەنلىكىنى ئېيتىپ قوشنىسنىڭ كۆڭلىنى قاتتىق رەنجىتىپتۇ. نۆۋەتتە، ئۆزىمىزگە ئوبدان نەزەر سالساق بەزى جايلار ، بەزى مەھەللىلەردە ھەتتا يېزىلارغىچە بەزى قوشنىلار مۇناسىۋىتىنىڭ خېلىلا سۇسلىشىپ قېلىۋاتقانلىقىنى، بەزىلەر ئۆزلىرىنىڭ ھەلەكچىلىكى بىلەن بولۇپ كېتىۋاتقانلىقىنى ، ئۆز-ئارا تاماق سۇنۇش ئەمەس ئۇلۇغ ھېيىت -ئايەملەردىمۇ بىر -بىرىسىنىڭ ئۆيىگە پەتىلەپ ھېيتلاشمايدىغانلىقىنى كۆزىمىز بىلەن كۆرىۋاتىمىز. قۇلىقىمىز بىلەن ئاڭلاپ تۇرۇۋاتىمىز. مەن كىچىكىمدىن تارتىپ ئوبدان بىلىدىغان بىر مەھەللە بار، بۇ مەھەللىگە قاچان ياسالغانلىقىنى بىلگىلى بولمايدىغان ئەسكى كونىراپ كەتكەن ئورۇنداقلار قاتار قىلىپ قويۇپ قويۇلغان ئىدى. بىر تۇنۇشۇمدىن ئاڭلىشىمچە، بۇ ئورۇندۇقلاردا بىنا ئۆيدە ئولتۇرۇپ زىرىككەن قوشنىلار كۈندە نەچچە سائەتلەپ پاراڭ سېلىشىپ ئولتۇردىكەن. مەن بۇ گەپنى ئاڭلاپ قوشنىلار كۆپ پاراڭلاشسا ياخشى ئەمەسمۇ دەپتىمەن مەن ئۇ تۇنۇشۇمغا. -ساڭا دىسەم ئۇلارنىڭ ئىچىدىكى بەزىلىرىنىڭ سۆزلىرىدە قوشنىلار ئىناقلىقىنى بۇزىدىغان مىتە بار. تونۇشۇمنىڭ سۆزلىرىدىن بەزى قوشنىلارنىڭ دائىملا قوشنىسىنىڭ يامان گېپىنى قىلدىغانلىقىنى، ئۇلارنىڭ بەزىلىرى بەزى ئائىلىلەردىكىلەرنىڭ دائىملا داۋالىنىدىغانلىقىنى،  كېچىسى قانچە قېتىم يۆتىلىدىغانلىقىنى سۆز چۆچەك قىلىشسا ، يەنە بەزى قوشنىلارنىڭ پەرزەنتىنىڭ نىكاھتىن ئاجرىشىپ كەتكەنلىكىنى سۆز تېمىسى قىلشىدىكەن. ھەتتا بەزىدە مەرھۇملارنىڭ يامان گەپلىرىنىمۇ قىلىشىپ قويىدىكەن. ئاغىرىق بولسا ئۆز ۋاقتىدا داۋالىتىش، شارائىت يار بەرسە چوڭ دوختۇرخانىلارغا بېرىپ كېسەل كۆرسىتىش، نىكاھ تۇرمۇشتا ئۆز-ئارا مىجەزى كېلىشەلمىسە ياكى ئۆينى داۋاملىق تۇتۇش ئىمكانىيىتى پەقەتلا قالمىسا ئاجىرىشىپ كېتىش مانا بۇلارنىڭ ھەممىسى ئەقەللىي ساۋاتلار. بۇنى يەنە سۆز-چۆچەك قىلىشنىڭ نىمە ھاجىتى بولسۇن؟ نۆۋەتتىكى بىنالىشىش قوشنىلارنى تېخىمۇ ئىخچام ھالەتكە ئەكەلدى.ئۇنىڭ ئۈستىگە پىلانلىق پەرزەنت كۆرۈش سىياسىتىنىڭ 20 نەچچە يىللىق زور نەتىجىسىدە كۆپىنچە ياشلارنىڭ ئائىلىسىدە بىر ياكى ئىككى پەرزەنت بار .ئوتتۇرا ھەم ياشانغانلار ئائىلىسىدە بەزى ئائىلىلەردىكى ئۆزلىرى بېقىۋاتقان نەۋرىلەرنى ھېساپقا ئالمىغاندا ئادەم سانى ئارانلا بىردىن ئىككىگىچە . بىنا ئۆيدە قول ئىشتىن بوشىغاندا تېلېۋىزور كۆرۈش ئادىتى ھەممە ئائىلىلەردە دېگۈدەك بار، ئەمما ئۇ نەرسىنى كۆرۈش نورمىدىن ئېشىپ كەتسە سالامەتلىكنى تۈگەشتۈرۈدۇ. دېمەك، ھازىرقى رېئاللىق بىزنى قوشنىلارغا تېخىمۇ مۇھتاج قىلماقتا، قوشنىلار ئارا تېخىمۇ ئىناق ئۆتۈشكە دەۋەت قىلماقتا. قوشنىلار تېمىسىدىكى گەپ بولغاندا ھەممىمىز ھازىر قوشنىدارچىلىقتا سۇسلۇشۇپ كەتتۇق، ھەممە ئۆز ئىشلىرى بىلەن ئالدىراش دىيىشىپ قويۇمىز- يۇ، نېمە ئۈچۈن مۇشۇنداق بولۇپ قېلىۋاتقانلىقىنى تەھلىل قىلىپ كۆرۈش ئىشىنى ئۆزىمىزدىن باشلايدىغانلىغىمىز ساناقلىقلا. ھازىر يىغىلىشلار ئاساسەن رېستۇران ياكى مەرىكە زاللىرىدا ئۆتكۈزۈلىدىغان بولۇپ كەتتى. نەچچە يىللار بولۇپ كەتتى مەھەللىمىزدىكى قولۇم- قوشنىلارمۇ ئۆز- ئارا ھېيت پەتىسى قىلىشمىغىلى. روزا ھېيت كەلسە بەزىلىرىمىز دەرھاللا: ئىشلىرىمىز تېخى تۈگۈمەيۋاتىدۇ، قۇربان ھېيىتتا ھېيىتلىشارمىز دەپ قويۇمىز. ئارىدىن 70 كۈن ئۆتۈپ قۇربان ھېيت يېتىپ كەلگەندە يەنە دەرھاللا كېلەر يىلى ھېيىتلىشايلى دەپ قويۇمىز. بەزىدە ئۆزىمىز ئوتتۇرىغا چۈشۈپ : قوشنىلار ئەمىسە بۈگۈن كەچ بىزنىڭ ئۆيگە پەتىلەپ چىقىڭلار دەپ ئېيتىپ قويساق، قوشنىلار شۇ ۋاقىتتىمۇ تولۇق جەم بولالمايمىز. بەزىلىرىمىزنىڭ شۇ كۈنى ئىشى چىقىپ قالىدۇ. بەزىلىرىمىز باشقا كەيپ سورۇنلاردىن بېرى كېلەلمەيمىز. شۇنىڭ بىلەن كۆڭۈللۈك بىر ئىشىمىزنىڭ ئايىغى چىقمايدۇ. قوشنىلار ئۆز-ئارا بىر بىرىمىزنىڭ ئىشلىردىن خەۋەرسىز قالىمىز. ئۆتكەندە قوشنىلاردىن بىرەيلەننىڭ ئېغىر كېسەل بولۇپ قېلىپ دوختۇرخانىدا يېتىپ قاپتىكەن خەۋەرسىز قالغاچقا يوقلىماپتۇق.كېيىن بۇ ئىشتىن يۈزىمىز بەكمۇ قىزاردى. قوشنا - ئۇ ھەممىمىزنىڭ بىر بايلىقى. قوشنىلار ئىناقلىقى - ھەممە ئائىلىلەرگە شاتلىق ئېلىپ كېلىدىغانلىقىنى ئەجدادلىرىمىز بىزگە ئاللا بۇرۇن بىلدۈرۈپ قويغان. ھەممە كەڭ قورساق، ئەپۇچان بولۇپ مۇھىمى سەمىمىي، ئاق كۆڭۈللۈكىمىز بىلەن قوشنىلار ئارا ئىناقلىقنى كۈچەيتەيلى. ھاياتلىقتىكى ھەر بىر دەقىقە ۋاقىتنى خوشال ئۆتكۈزەيلى. قوشنىدارلىق مۇناسىۋىتىگە ئەھمىيەت بەرمەيۋاتقان كىشىلىرىمىزگە شۇنداق  تەشەببۇس قىلىمىزكى، قوشنىلار ئىناقلىقىغا مىتە چۈشمىسۇن  !                 مەنبە    :      جۇڭگو رادىيو تورى شىنجاڭ تارماق تورى   . http://www.radioxj.com/show.aspx?id=15857&cid=24

hekmat110

	يىراقتىكى توققاندىن يىقىندىكى قوشناڭ ئالا دىگەن گەپ بار ئەمەسمۇ بىزدە

ئالماس

	خوشنىلار بىلەن ئىناق ئۆتمىىسە  يۇرت چۆل كۆرىندۇ

Submarine

	ھەممىسى ساپاغا باغلىق ! قورساقنى كەڭ تۇتۇش كېرەك ................... كىچىككىنا ئىشنى دەپ بىربىرمىزنىڭ كۆڭلىگە ئازار بەرمەيلى ، ئۇ بالا ھازىر شۇنداق شوخلۇق قىلغىنى بىلەن چوڭ بولغاندا شۇ قىلىقىنى تاشلايدۇ . شۇڭغىچە سەۋر قىلىش كېرەك .

adiba

	مىنىڭ ئۇدۇل قوشنام داۋاملىق«يەرنى كىپەككە سېتىۋال  قوشناڭنى ئالتۇنغا »دەيتتى.....

ardamay

	قوشىنلار ئارا ئىناق ئىتتىپاق ئۆتۈش،ئىنسانلار ئارا مېھىر مۇھەببەت تۇرغۇزۇشنىڭ ئەڭ ئەقەللىي ئاساسىي! ئادەم بىلەن ئادەمدۇر ئادەم دېگەن گەپ بار،ئادەم بولغان ئىكەن ئىنسانىي قەلب بىلەن ئىنسانىي غەمخورلۇق ۋە مېھىر مۇھەببەتكە ،كۆيۈنۈشكە مۇھتاج بولۇپ تۇرىدۇ! گەرچە ھازىر بىز ماددىي جەھەتتىن تەسەۋۋۇرغا سىغمىغۇدەك سۇرئەت بىلەن تەرەققىي قىلۋاتقان بولساقمۇ لېكىن شۇنىڭغا ماس ھالدا قەلىبلەرنىڭ ئارىسىغا پەيدا بولۇپ قالغان كۆرۈنمەس قورغان تاممۇ كۈنسېرى ئېگىزلەپ بارماقتا،ئادەملەر بىلەن ئادەملەرنىڭ ئارلىقى كۈندىن كۈنگە يىراقلاشماقتا!!! ئەگەر مۇشۇنداق كېتىۋەرسە مۇقەررەركى كىشلەر روھىي غېرىپچىلىقنىڭ دەردىنى تارتماي قالمايدۇ!!

akram343

	قوشنىدارچىلىق ئەنئەنىمىز ئەسلىدىنلا پەخىرلىنىشىمىزگە ئەرزىيدىغان ئىسىل مەدەنىيەت بايلىغىمىز ئىدى بۇنى قەدىرلەش ۋە داۋاملاشتۇرۇش ئاساسىغا ئىگە قىلىش ئۈچۈن ھەممىمىز ئورتاق كۈچ چىقارساقلا چوقۇم بۇ ئەنئەنىمىزنى ياخشى داۋاملاشتۇرغىلى بولىدۇ.

bayhenim

	ناھايىتى ئەھمىيەتلىك تىما بوپتۇ ، سۈيۈملۈك پەيغەمبىرىمىزگە شۇنداق يامانلىقلارنى قىلغان خوشنىلىرى بىلەنمۇ ياخشى ئۆتكەن ،بىزمۇ پەيغەمبىرىمىزنىڭ تۇتقان يوللىنى تۇتىشىمىز لازىم ، شۇڭا خوشنىلار بىلەن ئىناق ئىجىل ،ئۆتسەك ئىككىلى دۇنيادا بەختىمىزنى تاپقان بۇلىمىز

koxmak602

	قوشنا ھەققى يامان دېگەن گەپ بار.