17- چىسلا ئۈرۈمچىدە ئاتىلار بايرىمى تەبرىكلەندى

كەپتەر

	ئەسسالامۇ ئەلەيكۇم ، ھۆرمەتلىك قەدىرلىك ساخاۋەتچى ئاتىلار  - ئاتىلار بايرىمىڭلارغا مۇبارەك بولسۇن ساخاۋەتچى ئاتىلار ئۇزۇن يىللاردىن بۇيان جۇڭخۇا مىللىتمىزنىڭ ئېسىل ئەنئەنىسىگە ۋارىسلىق قىلىپ ، خەير - ساخاۋەت ئىشلىرىنى تەشەببۇسكارلىق بىلەن جارىي قىلدۇرۇپ ھەر مىللەت خەلقىنىڭ ، ھەر دەرىجىلىك ، پارتىيە - ھۆكۈمەت ئۇرۇنلىرىنىڭ مائارىپ تارماقلىرىنىڭ ، ئاياللار بىرلەشمىلىرىنىڭ  ، بولۇپمۇ تۇرمۇشتا قىيىنچىلققا ئۇچىرىغان ئاتا - ئانىلىرىدىن ئايرىلىپ قالغان بالىلارنىڭ ھېسداشلىقىغا ، ھۆرمىتىگە ، مۇئەييەنلەشتۈرشىگە ئىگە بولۇپ كېلىۋاتىدۇ . شۇڭا كوللىكتىپ بارغانسېرى زورىيىپ ، كۈچىيىپ ، بىر-بىرسىدىن ئەھمىيەتلىك پائالىيەتلەرنى كەينى -كەينىدىن قانات يايدۇرىۋاتىدۇ. تارقىتىۋىلىۋاتقان دوپپىلار 2012 - يىلى 6 -ئاينىڭ 17 - كۈنى ئۈرۈمچى خەيرى - ساخاۋەت باش جەمئىيتى ،ساخاۋەتچى ئاتىلار كوللىكتۋىنىڭ ئورۇنلاشتۇرۇشى بىلەن ھايۋاناتلار باغچىسىدا ئاتىلار بايرىمى تەبرىكلەندى. پائالىيەتكە ساخاۋەتچى ئاتىلار كوللىكتىۋىنىڭ ئەزالىرى،رايونىمىزدىكى پىشقەدەم ئۇستازلار،20 گە يېقىن ئاخبارات خادىملىرى داخىل بولدى. ئۈرۈمچى شەھەرلىك مائارىپ تەتقىقات مەركىزىنىڭ ئەخلاق تەتقىقاتى ، ئائىلە تەربىيسى ۋە بالىلار پىسخىكا تەتىقاتچىسى ، شىنجاڭ تېلېۋىزىيە ئىستانسى قانۇن ۋە پۇقرا پىروگىراممىسىنىڭ تەكلىپلىك مۇلاھىزىچىسى  ، ئاپتۇنۇم رايۇنىمزىدىكى ئاتا -ئانىلار ، ئۇقۇتقۇچىلار ۋە ئۇقۇغۇچىلارنىڭ بىردەك ئىتىراپ قىلىشىغا ئىرىشكەن  ، مائارىپ مۇتەخسسى  ئۈرۈمچى خەير - ساخاۋەت جەمئيىتى ساخاۋەتچى ئاتىلار كوللىكتىپىنىڭ مەسلىھەتچىسى تۇرسۇن ھەسەن سۆز قىلىپ مۇنۇ قۇرلارنى ئوقۇغىنىدا كۆپچىلىكنىڭ قەلبى ھاياجان ھېسلارغا تولدى.    ئەسسالامۇ ئەلەيكۇم كەڭ قورساق، ئەپۇچان، راستچىل، سەمىمىي، مەسئۇلىيەتچان، قەدىرلىك  ئاتىلار، مانا بۈگۈن بىز ئوتلۇق ھېسىياتىمىز، خۇشاللىق كەيپىياتىمىز، ئۈمۈتكە تولغان ئەتىمىز بىلەن بايرام تەنتەنىسىگە چۆمۈلۈپ، 5 – قېتىملىق ئاتىلار بايرىمىنى ئۆتكۈزۈپ ئولتۇرۇپتىمىز، مەن ئۈرۈمچى خەيرى – ساخاۋەت باش جەمئىيىتى ساخاۋەتچى ئاتىلار كوللېكتىپى نامىدىن سىلەرگە ئالىي ئېھتىرام بىلدۈرىمەن. بايرىمىڭلارغا مۇبارەك بولسۇن! تەن ساغلاملىق، بەخت – سائادەت سىلەرگە مەڭگۈ يار بولسۇن!     بۇنىڭدىن 9 يىل بۇرۇن قەلبى مېھرى – مۇھەببەتكە تويۇنغان، ئۆزىگە، ئائىلىسىگە مەسئۇل بولۇش چەمبىرىكى ئىچىدە ئۆسۈپ يېتىلگەن ھەسەنجان ئابدۇراخمان ئائىلە ۋە جەمەت چەمبىرىكىدىن ھالقىپ چىقىپ، جەمئىيەتكە مەسئۇل بولۇش چەمبىرىكى ئىچىگە سىڭىپ كىرىپ، ئۆزىدە يېتىلدۈرگەن ئادىمىيلىك خىسلىتى ۋە بەلگۈلۈك بۇرۇچ، مەسئۇلىيەت تۇيغۇسىنىڭ تۈرتكىسىدە ساخاۋەت يولىغا قەدەم باسقان ئىدى، ھەسەنجان ئابدۇراخماننىڭ مەقسەت مۇددىئاسىدىن خەۋەر تاپقان دوستلىرىدىن پەرھات ئەيسا، ئابدۇۋەلى نۇرمەمەت، ئابدۇرېھىم توختى قاتارلىقلار ئۇنى قوللاپ قۇۋۋەتلەپ بۇ ئۇلۇغ مۇساپىنى بىللە تاماملاشقا تەردۇت قىلدى، ئايالى، بالا چاقىلىرى، ئۇرۇق تۇققانلىرىمۇ ئۇنى ھەر تەرەپتىن قوللاپ مەدەتكار بولدى.     ئۇلۇغ مەقسەت مۇددىئا بىلەن باشلانغان ئىشنىڭ ئاخىرى خەيرلىك بولماي قالمايدۇ ئەلۋەتتە.     ھەسەنجان ئابدۇراخمان بىر قەدەم – بىر قەدەمدىن بېسىۋاتقان نۇرلۇق يول باشقىلارنىڭ دىققەت ئېتىبارىنى ئۆزىگە تارتتى.     شىنجاڭ ئۇيغۇر ئاپتونوم رايوننىڭ سابىق مۇئاۋىن رەئىسى، بىر ئۆمۈر ئەل غېمىنى يەپ ئەل ئۈچۈن قايغۇرغان، ئەلنىڭ خۇشاللىقىغا كۈلۈپ، قايغۇسىغا يىغلىغان خەلقپەرۋەر رەھبىرىمىز، جامائەت ئەربابى مىجىت ناسىر ئاكا ھەسەنجان ئابدۇراخماننى ئەمەلىي ھەرىكىتى ئارقىلىق قوللاپ، خەيرلىك ئىشقا بىللە قەدەم باستى.     ئېسىللەر ھامان ئېسىللىكىنى قىلىدۇ، دانالار ھەر زامان ئەل غېىمىنى يەيدۇ دېگەندەك، ئۆز ھاياتىنى مەدەنىيەت، مائارىپ ئىشلىرىغا بېغىشلىغان، بىر ئۆمۈر تەتقىقات بىلەن شۇغۇللىنىپ خەلقىمىز ئۈچۈن ئۆچمەس تۆھپىلەرنى قوشقان تىلشۇناس، ئالىم، جامائەت ئەربابى مەرھۇم ھاجى ئىمىن تۇرسۇن ئاكا ۋە شىنجاڭ گېزىت ئىدارىسىنىڭ سابىق باش مۇھەررىرى مەرھۇم يۈسۈپجان ئەخمىدى ئاكىمۇ بۇ چەمبىرەك ئىچىگە كىرىپ ھەسەن – ھۈسەن نۇرىنىڭ شەكىللىنىشىگە ئاساس سالدى، ياخشى نىيەت، ياخشى تىلەكتە ياشاۋاتقان، پاسائەتلىك مىسرالار ئارقىلىق خەلقنىڭ قەلب ئېتىزىغا مۇھەببەت ئۇرۇقىنى تېرىپ، ئەلنىڭ سۆيۈشىگە مۇيەسسەر بولغان، ئوتتۇرا ئاسىيادا بەلگۈلۈك تەسىر قوزغىغان شائىر بۇغدا ئابدۇللا ئاكىمۇ شائىرانە قەلبى، ئېسىل خىسلىتىنى نامايەن قىلىپ ساخاۋەت چەمبىرىكىگە يۈگۈرۈپ كىردى.    يەر شارىنىڭ تارتىش كۈچىدىنمۇ كۈچلۈك بولغان مېھرى مۇھەببەت چەمبىرىكى، شائىر ھاجى مۇختەر بۇغرا، ئەنىۋەر ئابدۇرېھىم ئاكىنىمۇ ئۆزىگە تارتتى، چەمبىرەك بارا – بارا چوڭىيىۋاتاتتى.     ئۇلۇغلۇق بىر ئادەمنىڭ دۇنيانى زىل – زىلىگە كەلتۈرگۈدەك ئىشلارنى قىلغانلىقى، ئالىم، شائىر، دوكتۇر بولغانلىقى بىلەن گەۋدىلەنمەيدۇ ئەلۋەتتە.    ساخاۋەت چەمبىرىكى بارغانسېرى يوغىناپ ئەتراپقا مېھرى – مۇھەببەت نۇرى چاچماقتا ئىدى، چەمبىرەك روھىي دۇنياسى پاكلىققا، چىنلىققا تولغان، تەبىئەت ئاتا قىلغان نازۇ – نېمەتلەردىن جىسمىنى تاۋلاپ، ئاتا – ئانىنىڭ مېھرى – مۇھەببىتىدىن روھىنى سۇغۇرۇپ چوڭ بولغان مەرت – مەردانە ئەركەكلەرنى ئىزدەۋاتقاندەك قىلاتتى.    18 مىڭ ئالەمگە سېخىلارچە نۇر چېچىپ ئىنسانىيەتتىن بىر قېتىممۇ ھەق تەلەپ قىلىپ باقمىغان، ئۆزىنىڭ ئەجرى ئەمگىكىگە بىرەر قېتىممۇ مېھنەت قىلىپ باقمىغان «قۇياش» ساخاۋەت چەمبىرىكىگە قاراپ كۈلدى ۋە :«ئىنسانلار بۇ دۇنياغا ئەسلىدىنلا ياخشى ئىش قىلىپ ئۆز قىممىتىنى ياراتقىلى، مېھرى – شەپقەت ئۇرۇقىنى چېچىپ ئىنسان خىسلىتىنى نامايەن قىلغىلى كەلگەنئىدى. ئەمما بۈگۈنكى كۈنگە كەلگەندە ئىنساپ، دىيانەت كۆتۈرۈلۈپ، ئېتىقاد سۇسلاپ، ئەقىدە پەرىشتىسى غازاڭدەك سارغىيىپ، شەخسىيەتچىلىك ئەۋجى ئېلىپ، بايلار «پىخسىقلىق» كېسىلىگە، نامراتلار «تاماخورلۇق» كېسىلىگە گىرىپتار بولغان بۈگۈنكى كۈندە، سېنىڭ ئۆز مەجبۇرىيىتىڭنى ئادا قىلىش ئۈچۈن ئۇيقۇدىن ئويغانغىنىڭ ياخشى بولدى، داۋاملىق يوغان! بىر تەرەپتىن ئاجىزلارغا ئۈمۈت، ئۇسسۇزلارغا سۇ، ئاغرىقلارغا دەۋا... نىشانسىز، غايىسىزلارغا ماياك بولۇش مەجبۇرىيىتىڭنى ئادا قىلساڭ يەنە بىر تەرەپتىن ماددىي بايلىقى تولۇپ تاشقان ئەمما تۇيغۇ ھالەتتە تۇرۇۋاتقان ئىنسانلارنى ئويغات دەپ خىتاپ قىلاتتى. ____________________ تۇرسۇن ھەسەن مۇئەللىمنىڭ سۆزى تۈگەندىن كېيىن ھەسەنجان ئابدۇراخمان ئەپەندىم سۆز قىلدى ۋە مېھرىبان ئانىلار كوللىكۋى نامىدىن سوۋغا قىلىنغان گۈلنى تاپشۇرىۋالدى. بۈگۈنكى يىغىلىشتا كىم ئارتۇق قىلىپ سېتىش پائالىيتى ئېلىپ بېرىلىپ 4 پارچە ئەسەر 43000 يۈەنگە سېتىلدى.بۇ پۇل خەيرى- ساخاۋەت ئىشلىرىغا ئىشلىتىلىدۇ! پائالىيەت جەريانىدا شىرئەلى ئەلتېكىن ،ئىمىن نىياز ،ئۆمەرجان ئالىم،ئابلاجان ئاۋۇت ئايۇپ قاتارلىقلار  لىرىك ناخشىلىرىنى كۆپچىلىككە سۇندى.شۇنداقلا پائالىيتىمىزگە لوندون ئولىمپىك مۇسابىقىسىگە قاتنىشىش سالاھىيتىگە ئېرىشكەن مەمەتتۇرسۇن چوڭمۇ ئالاھىدە قاتنىشىپ ،ساخاۋەتچى ئاتىلار بىلەن بىرگە ساما ئوينىدى. رەسىمنى چوڭايتىپ كۆرۈڭ! ساخاۋەتچى ئاتىلار كوللېكتىپىنى 2003 – يىلى 3 – ئايدا ھەسەنجان ئابدۇراخمان قۇرۇپ، 2008 – يىلى 10 – ئاينىڭ 8 – كۈنى ئۈرۈمچى خەيرى ساخاۋەت باش جەمئىيىتىگە ئەنگە ئالدۇرغان قانۇنلۇق كوللېكتىپ بولۇپ، ئۈرۈمچى شەھىرىدە ئىئانە توپلاش ئارقىلىق ھەرمىللەر خەلق ئاممىسىغا ئەمەلىي نەپ يەتكۈزىدىغان ئاممىۋى جامائەت پاراۋانلىق تەشكىلاتىدۇر. ھازىر دائىملىق ئەزاسى 158 نەپەردىن ئاشىدۇ. ئۇلار باش مەسلىھەتچى، مەسلىھەتچى، ھەيئەت ئەزالىرى ۋە ئەزالاردىن تەركىپ تاپىدۇ.     ئۈرۈمچى خەيرى- ساخاۋەت باش جەمئىيتى ساخاۋەتچى ئاتىلار كوللېكتىۋىنىڭ مەسئۇلى: ھەسەنجان ئابدۇراخمان     باش مەسلىھەتچى: مىجىت ناسىر ئاكا      مەسلىھەتچىلار: (1) بۇغدا ئابدۇللا (2) ئەنىۋەر ئابدۇرېھىم (3) مۇختار بۇغرا (4) تۇرسۇن ھەسەن    ھەيئەتلەر: (1) ئابدۇراخمان تۇرسۇن (2) ئەزىمەت ئەمىنتەي(3) ئابدۇراخمان ئابدۇللا   (4)غۇلام مۇھەممەت تۆمۈر   (5) مەمەتجان خالىمەت  (6) ئەنىۋەر توختى (7) ئالىمجان ئابدۇقادىر (8) جاپپار مەمەت (9) ئابدۇرېھىم توختى ساخاۋەتچى ئاتىلار بىربىرلەپ ئۆزلىرىنى تونۇشتۇرۇپ ئۆتتى كىشىلەر دائىم ئوغۇل تۇغۇلسا زىمىن تىترەيدۇ، قۇياش كۈلىدۇ، تەبىئەت ۋارقىرايدۇ دەيدۇ.    چۈنكى زىمىن: مېنى ئۆزگەرتىدىغان، دۇنيانى بىزەيدىغان ئەركەك تۇغۇلدى دەپ تىترىسە، قۇياش: جىسمىدىن كۈچ قۇۋۋەت ئۇرغۇپ تۇرىدىغان باتۇر، قەيسەر، يېڭىلمەس كۈچ بارلىققا كەلدى دەپ كۈلىدىكەن.    تەبىئەت ـ مەن  ۋە ئىنسانلار بىلەن ئىناق ئۆتەلەيدىغان ئادەم بول دەپ ۋارقىرايدىكەن.    ئوغۇل، ئەر دېگەن سۆز تىلىمىزدا ئادەتتە قىز، ئايال بىلەن جىنس جەھەتتىن پەرقلىنىدىغان سۆز بولۇپ ئۇنىڭغا «بالا»، «كەك» قوشۇمچىسى ئۇلۇنۇپ «ئوغۇلبالا»، «ئەركەك» سۆزى ياسىلىپ، ئوغۇل ۋە ئەرنىڭ فىزىئولوگىيىلىك ئالاھىدىلىكى ۋە پىسخىك ئالاھىدىلىكى ئەكس ئەتتۈرۈلىدۇ.     ئوغۇلبالا، ئەركەك دېگىنىمىز: مەرت – مەردانە، پىداكار، كەڭ قورساق، ئەپۇچان، قانائەتچان، سەۋىرچان، باتۇر، راستچىل، سەمىمىي، لەۋزىدە تۇرىدىغان، ئاجىزلارغا يار – يۆلەك بولىدىغان، جاپادا ئالدىدا، راھەتتە كەينىدە تۇرىدىغان، ئەل ۋەتەننىڭ بېشىغا كۈن چۈشكەندە كۆكرەك كېرىپ ئوتتۇرىغان چىقالايدىغان كىشىلەرنى كۆرسىتىدۇ.    ئوغۇل كۆپ، ئوغۇلبالا ئاز، ئەر كۆپ، ئەركەك ئاز بولۇۋاتقان بۈگۈنكى كۈندە، ئىسمى – جىسمىغا لايىق ئەركەكلەرنىڭ ساخاۋەتچى ئاتىلار چەمبىرىكىنى شەكىللەندۈرۈشى، ئادەمنى ھەقىقەتەن خۇشال قىلىدۇ ئەلۋەتتە.        . پائالىيەت ئاخىىرىدا  بارلىق يېڭى ئەزالار ئوتتۇرىغا چىقتى، باش مەسلىھەتچى، مەسلىھەتچىلەر، ھەيئەتلەر ئۇلارنىڭ ئىلتىماسىنى تەستىقلاپ تەبرىكلىدى.    بۈگۈنكىدەك بايرام تەنتەنىسىدە بىزدىن ئايرىلغان مەرھۇم ھاجى ئىمىن تۇرسۇن ئاكا، يۈسۈپجان ئەخمىدى ئاكىنى ئەسلىمەي تۇرالمايمىز، ئۇلار ھايات ۋاقتىدا ئۆزىنىڭ ئادىمىيلىك پەزىلىتى ئارقىلىق بىزنىڭ ساخاۋەت ئىشلىرىمىزدا ياخشى مەسلىھەتلەرنى بېرىپلا قالماي، ساخاۋەت ئىشلىرىنىڭ تەرەققىياتى ئۈچۈن زور كۈچ چىقاردى، ئۇلارنىڭ نۇرغۇن ئارزۇ – ئارمانلىرى بار ئىدى، بۇنىڭدىن كېيىن بىز ئۇلارنىڭ ئېسىل خىسلىتىگە ۋارىسلىق قىلىپ، ساخاۋەت چەمبىرىكىنىڭ نۇرىنى پۈتكۈل دۇنياغا تارىتىمىز.     مەرھۇملارنىڭ ياتقان يېرى جەننەتتە بولغاي!         بىز ھەممىمىز ھاياتلىق بانكىسىنىڭ لېدىرلىرى، ئەمما ھاياتلىق بانكىمىزدا قانچىلىك ۋاقتىمىزنىڭ قالغانلىقى، يەنە كېلىپ قاچان، قەيەردە، قانداق سەۋەپ بىلەن ھاياتىمىزنى ئاخىرلاشتۇرىدىغانلىقىمىزنى بىلمەيمىز، شۇڭا ھەرقانداق ئىنسانغا نىسبەتەن ئېيتقاندا ھايات بەك قىممەتلىك، كۈندۈلۈك تۇرمۇشتا ھاياتنى قەدىرلەشنىڭ كونكرېتنى ئىپادىسى ۋاقىتنى قەدىرلەشتە ئىپادىلىنىدۇ.     ۋاقىتنى باشقىلاردىن ئارىيەت ئالغىلى، بانكىغا رەنىگە قويغىلى بولمايدۇ، شۇڭا چەكلىك ھاياتىمىزدا ئىمكان بار كۆپرەك ياخشى ئىش قىلىپ، ئۆز قىممىتىمىزنى يارىتىشىمىز كېرەك. رېئال تۇرمۇشتا بىر قىسىم كىشىلەر پۇلنى تاللىۋالىدۇ، مۇنداق كىشىلەر پۇل ئۈچۈن ھېچ قانداق ۋاسىتە تاللىمايدۇ، غۇرۇر ۋە ۋىجداننى بىر چەتكە قايرىپ قويىدۇ، ئەمما پۇل، مال دۇنيا، ماشىنا، داچا، ئۆي ئىمارەتنى ئۇ دۇنياغا ئېلىپ كەتكىلى بولمايدىغانلىقىنى بىلمەيدۇ ياكى ئېسىدىن چىقىرىپ قويىدۇ. رېئال تۇرمۇشتا، پۇل ئۆز نۆۋىتىدە يەنە بىر قىسىم كىشىلەرنى تاللىۋالىدۇ، يەنى ئەقىل ئىدرەكتە كامىل، ۋىجدانلىق، مەرت – مەردانە كىشىلەرنى تاللىۋالىدۇ، دەل مۇشۇ خىل كىشىلەرنىڭ قولىدىكى پۇل ئىنسانلار ئوتتۇرىسىدىكى مېھىر – مۇھەببەت كۆۋرۈكىنى تۇتاشتۇرۇشتا مۇھىم رول ئوينايدۇ. مانا مۇشۇ سورۇندىكى بارلىق ساخاۋەتچى ئاتىلارنى پۇل تاللىۋالغان، شۇڭا سىلەر ماددىي قىممەت يارىتىش ئارقىلىق باشقىلارغا يار – يۆلەك بولۇش بەدىلىگە مەنىۋى قىممەت يارىتىپ، ئىنسانلار ئوتتۇرىسىدىكى مېھرى – مۇھەببەتنىڭ ئۇلۇغ ئابىدىسىنى يازدىڭلار. سىلەردىن ئاتا – ئاناڭلار، بالا – چاقاڭلار، يۇرت – جامائەت، خەلق، دۆلەت رازى. سالامەتلىك، بەخت – سائادەت، خاتىرجەملىك سىلەرگە مەڭگۈ يار بولسۇن. پائالىيەتتە ئەزالار رەسىمگە چۈشتى   ، ساخاۋەتچى ئاتىلىرىمىزنىڭ ساخاۋەت روھىي ئىناق جەمىئيەت بەرپا قىلىشقا كۈچلۈك تەسىر كۆرسەتتى  . ساخاۋەتچى ئاتىلىرىمىزنىڭ نامىراتلارنى يۆلەش ،مائارىپنى قوللاش روھىي كىشىلەرنىڭ ، بولۇپمۇ ياش - ئۆسمۈرلەرنىڭ قەلبىگە چوڭقۇر يىلتىز تارتتى . شۇڭا ساخاۋەتچى ئاتىلار كوللىكتىپىغا بولغان ھۆرمەت ، قىزىقىش ھەم ئىنتىلىش  ھازىر جەمىئەتتىكى بىر خىل ئومۇمىي كەيپىياتقا ئايلىنىپ قالدى . مېنىڭچە بۇ بىزنىڭ خىزمىتىمىزگە ۋە كۆللىكتىپىمىزغا بولغان ئەڭ ياخشى ، ئەڭ ئىشەنچىلىك مۇئەييەنلەشتۈرۈش . ساخاۋەتچى ئاتىلار ، دوسلار ، ئاتا دېگەن ئائىلىنىڭ تۈۋرۈكى ، ئاتىلار بىلەن بالىلارنىڭ تاغدەك يۆلەنچۈكى ، ئاتىلارنىڭ زىممىسىگە  جەمئىيەتنىڭ ، جۈملىدىن ئائىلىسىنىڭ تەڭداشسىز ئېغىر يۈكى يۈكلەنگەن  . مانا بۇ ساخاۋەتچى  ئاتىلىرىمىز ئۆزلىرىنىڭ زىممىسىدىكى بۇ خىل ۋەزىپىنى  ئاڭلىق ھالدا باشلامچىلىق  بىلەن ئادا قىلىپ كېلىۋاتقان مەسئۇلىيەتچان ئاتىلاردۇر . ئاتىلار ئائىلىسىنىڭ تۈۋرۈكى ، جەمئىيەتنىڭ تۈۋرۈكى ، تۈپ جەھەتتىن ئېلىپ ئېيتقاندا ئاتا مىللەتنىڭ تۈۋرۈكى ، ئاتىنىڭ ئوبرازى - مىللەتنىڭ ئوبرازى  . جەمئىيەت مەنىۋى دۇنياسى پاكلىققا ، چىنلىققا تولغان ، روھىي دۇنياسى مەسئۇلىيەت ۋە مەجبۇرىيەت  تۇيغۇسى كۈچلۈك بولغان ئاتىلارغا مۇھتاج . سىلەر دەل شۇنداق بۈيۈك مەسئۇلىيەتنى ئۈستىگە ئالغان ئاتىلار . چېھرىڭلاردا تەبەسسۇم ۋۇجۇدۇڭلاردا ساخاۋەت نۇرى مەڭگۈ چاقنىسۇن  !

narkos

	پىژغىرىم ئىسسىقتا يۈرىكىگە قۇياشنى سولاپ تۇرۇپ ، ئېتىزلىقتا ھەربىر تۈپ گىياھقا ئۆز مۇھەببىتىنى بېغىشلاۋاتقىنى ئەنە شۇ ئاتا ، تۆمۈر بىلەكلىرى بىلەن توختىماي بازغان ئۇرۇپ ، پولاتنى ئەۋرىشىم ھالەتكە ئېلىپ كېلىۋاتقىنى ئەنە شۇ ئاتا ؛ تالاي مۇشكۈللەردە ، ئىللىق سىماسى بىلەن بىزگە مەدەتكار بولۇپ ، ئىشەنچ ۋە ئۈمىد بىغىشلاۋاتقىنى ئەنە شۇ ئاتا ؛ مەغلۇبىيەت تاغلىرى يەلكىمىزدىن باسقاندا  ، مىيقىدا كۈلۈمسىرىشى بىلەن ، ھەممىگە چىدىۋەتكەن ئەنە شۇ ئاتا ؛ مۈشكۈللەردە ، ھەققانىيەت يوللىرىدا مەيدىسىنى كىرىپ ئوتتۇرغا چىققان ئەنە شۇ ئاتا؛ .......ئەنە شۇ ئاتا !!! شۇ ئۇلۇغ ئاتىلىرىمىزنىڭ ئەزىز تېنى ئامان بولسۇن، ھەربىر ئىشلىرى بەرىكەتلىك بولسۇن.

natik

	بارلىق ئاتىلارنىڭ باللىرنى ياخشى تەربيلشنى ئۈمۈد قىلمەن.

salkindax

	يىزىدا پىژغىندا ئىشلەۋاتقان شۇ ئاتىلارنىڭمۇ بايرىمىغا مۇبارەك

bugaltir

	دۇنيادا بالىسىنى ياخشى كۆرمەيدىغان ئاتا-ئانا بولمايدۇ. ئاتا مېھرى بالىنىڭ ھايات مۇساپىسىدە ئانا مېھرىگە قارىغاندا تېخىمۇ يۇقىرى، تېخىمۇ مۇھىم ئورۇندا تۇرىدۇ. چۈنكى ھەر بىر بالا ئۆز ئاتىسىدىن قەيسەرلىكنى، باتۇرلۇقنى، مەرتلىكنى ئۆگىنىدۇ. ئەگەر بالا ئاتا مېھرىگە تولۇق ئېرىشەلمىسە، ئانا مېھرىنى ھەر قانچە بەرگەن بىلەنمۇ، ئاتا مېھرىنىڭ ئورنىنى باسالمايدۇ-دە، بالىنىڭ روھىي چۈشكۈن بولۇپ قالىدۇ. ئاتا قۇياشقا ئوخشايدۇ، ئەگەر بالىنىڭ تۇرمۇشىدا ئاشۇ قۇياش كەم بولۇپ قالسا، بالىنىڭ سىرتقى دۇنيا بىلەن بولغان ئالاقىسى ھەم ئىجتىمائىي ئالاقە دائىرىسى تار بولۇپ قالىدۇ. شۇنىڭ ئۈچۈن بۇ جەھەتتە ئاتىنىڭ رولىغا سەل قاراشقا بولمايدۇ.

bananas

	تارىخقا تۆھپىكار ئاتىلار، بىلسەڭ ، دەۋرلەر شۇلارسىز ئالماشقان ئەمەس. شۇلارمۇ مەپىلەر سۆرىگەنلەرمۇ، بىنالار شۇلارسىز قاملاشقان ئەمەس. ئاتىلار تەرىدەك مۇقەددەس تەر يوق، مۇبارەك ئىزلىرى تامام چىمەنزار. جاھاندا ئادەملەر ئۆزى بىر قوشون، ئاتىلار قۇماندان، ئاتىلار سەردار. تارىخنىڭ قايسىبىر سەھىپىسىنى ، ئېيىقىنا ،قان بىلەن شۇلار يازمىغان؟! چۆرەڭدە قايسى كان ،قايسى بىر خاڭنى ، قولىدا مىتىنلار ،شۇلار قازمىغان؟! ئاتىلار قەددىدۇر ئېگىز بىنالار، ئەجرىدىن تۈن بولماس شەھەرلەرمۇ ھەم. پەرزەنتلەر كېلىمىز  شۇلار كەينىدىن، بۇ ھايات يولىدا تۇتۇپ تۇغ-ئەلەم. تالاي ئىش شۇلاردىن مىراستۇر بىزگە، ئاتىلار ئۈگەتكەن يەر ھەيدەشنىمۇ . سوغوققا ئوت ئۇلار ،تۇمۇزغا سالقىن، ئاتالار قىزدۇرغان ئاددىي مەشنىمۇ. ئاتىلار ئىزىدا نىجاتلىق گۈلى، ئاتىلار ئويغاتقان تەبىئەتنىمۇ . ئاتىلار قەلبىدىن بىلدۇق ئۈگەندۇق، بۇ ئۇلۇغ ھاياتقا مۇھەببەتنىمۇ. ئاتالار ئاغزىدىن ئالدى كۆپ ھېكمەت، ئاڭلىساڭ ،بىرىدىن بىرى تەسىرلىك. ئاتىلار ئەجرىسىز نەدە گۈلىستان، بولمايدۇ دۇنيامۇ باغلىق، قەسىرلىك. ئانىلار قەلبىدە شۇڭا ئۇلارغا، تەشەككۈر باغلېرى ئېچىقلىق دائىم . مۇھەببەت يىپىدا ئۆزلىرى تىككەن، بىر لەۋھە ھەم شۇنداق ئېسىقلىق دائىم. زېمىندىن يۈكسەكلىك تالاشقان تاغلار، بۇلالماس ئاتىلار ئەجرىگە تەڭداش. پارلايدۇ ئالەمدە شۇلارنىڭ ئەجرى ، كائىنات سۇلتانى —قۇياشقا رەڭدار. *         *          * ئانىلار ھەققىدە داستانلار يازساق، ئاتىلار ئۇنىڭدىن زوقلىنار شۇنچە. ئاتىلار ھەققىدە يازساق قەسىدە، ئانىلار شادلىنىپ روھلىنار شۇنچە.                                                  مۇھەممەدجان  راشىدىن

xaydajan

	مىڭ يىگىتنىڭ ھېكمەت لەرزى بار، قولىدىكى ھەر بىر  قاداقتا. ھەر كۈلكەمنىڭ پۈتمەس قەرزى بار، ئۇ ئىشلەتكەن خەنجەر ساداقتا. ئانا ئايىقىدا جەننەت بار، ئاتا ئايىقىدا بەرىكەت بار.

wenas

	ئۇلۇغ ئاللاھ ئاشۇ ئەزىزلەرنىڭ تېنىنى ئامان قىلسۇن!!!

hekmat-uyghur

	رەھمەت.  مۇشۇ  تاپتا  ئاتا - ئانامنى  تولىمۇ  سېغىندىم