يېڭى يىل لېرىكىسى (مەخمۇت ئاۋۇت)

ongmas

	يېڭى يىل لېرىكىسى    مەخمۇت ئاۋۇت (ongmas)    ئۇتۇقلاردىن داستانلار پۈتۈپ، كەتتى ئۇزاپ قىران كونا يىل؛ دىلغا بۈيۈك ئارزۇلار پۈكۈپ،   كەلدى قانات قېقىپ يېڭى يىل.    ئۆتكەن يىلدا قالغان ئارمانلار،   تاپار ۋىسال يېڭى يىل بىلەن؛   ئىشقا ئاشماي سۇلغان پىلانلار،   ئۈمۈدلەنگەي مەدەت كۈي بىلەن!       يېڭى يىلنىڭ ھارپىسى بىلەن، يېڭى بۈيۈك پىلان تۈزۈلدى؛    دىلغا سىغماس ئارزۇلار بىلەن،   مۇساپىگە ئوقتا ئۈزۈلدى .   يېڭى يىلدا كۆپتۇر يېڭى ئوي، يېڭى زەپەر قۇچساق دەيدىغان؛ ئالىيجاناپ خىسلەتلەرگە باي، ئەل-ۋەتەننىڭ غېمىن يەيدىغان.      يېڭى يىلدا پۇرسەت،خىرىس كۆپ،   ئىرادىنى سىنايدۇ ھەردەم؛ يېڭى ئۇتۇق باقىدۇ كۈلۈپ،  پۇختا، مەزمۇت بېسىلسا قەدەم.    يېڭى يىلمۇ كەلدى ئالدىراپ،   قېتىپ ياشقا يېڭىدىن بىر ياش؛    يېڭى تۈسكە كىردى يەر شۇتاپ،   يېڭىچىلا چىقتى ھەم قۇياش.      يېڭى يىلمۇ تىلەيدۇ ئەجىر، . بارچىدىن ئۇ كۈتەر تەر-مېھنەت؛ ھورۇنلارنى شاللايدۇ ئاخىر، ئىشچانلارغا ھەمراھ قىپ ئامەت.     كونا يىلنى سۈردى،ھەيدىدى،   شان-ئۇتۇققا ھەمراھ يېڭى يىل؛  بوش قويمىساق ئالتۇن ۋاقىتنى، ئېچىپ قۇچاق بەخت يايرار دىل.      يېڭى«جەڭ»گە چۈشتۇق بىز مانا،    قانائەتتىن بولايلى يىراق؛ ھاياتىمىز تاپار چىن مەنا،   غەيرىتىمىز سۇلمىسا ھەرۋاق.   بىزگە ئامەت تىلە يېڭى يىل،   دولقۇنلىرىڭ قوينىغا ئالسۇن؛  ئەجرىمىزدىن بولسۇن ئەل قايىل،   باسقان ئىزلار گۈللەرگە تولسۇن!       شېئىرىنىڭ ئاپتورى : باي ناھىيىسىدىن : مەخمۇت ئاۋۇت (ongmas)

ongmas

	سايلايدۇ (ongmas) رەھبەرلىككە -باشچىغا يارىغاننى سايلايدۇ، ھەر كىشىگە تەڭ كۆزدە قارىغاننى سايلايدۇ. ئەل-ئاھامغا ئۈلگە بوپ، ئالسا قەدەم پۇختا-خوپ، كەلسە سىناق ئۆزىنى  سورىغاننى سايلايدۇ رەھبەر دېگەن ئەل بېشى، ئۇندا ئاسان ئەل ئىشى، بوپ قاياشى ئاۋامنىڭ جورىغاننى سايلايدۇ. مەرىپەتنى ياقىلار، نادانلىقنى قامچىلار، ئىلىم-ھېكمەتتىن دىلى يورۇغاننى سايلايدۇ. ھەقىقەتنى كۆزلىگەن، ئاۋام ئۈچۈن سۆزلىگەن، نەپسانىيەت-ئىللەتنى تورىغاننى سايلايدۇ. كۆپ ئىش ئۆتكەن بېشىدىن، قىلماس مىننەت ئىشىدىن، ئەجىر - مېھنەت يولىدا خورىغاننى سايلايدۇ. يۇرتنىڭ بېشى -يۈزى بار، لەۋزى ھالال سۆزى بار، دىلنى ئەلنىڭ ئارمىنى ئورىغاننى سايلايدۇ ئەل-ئاۋامغا مېھرى بار، شۇم نىيەتكە قەھرى بار، ھەم«يامان»غا يامان بوپ قورقمىغاننى سايلايدۇ. ھاللىنىشقا يول ئاچقان، نامراتلىققا ئوت ئاچقان، ئەلنى بەخىت نۇرىغا ئورىغاننى سايلايدۇ. شېئىرىنىڭ ئاپتورى : باي ناھىيىسىدىن : مەخمۇت ئاۋۇت(ongmas)

ongmas

	ۋەتەن مەخمۇت ئاۋۇت(ongmas) تاجۇ-تەختىم، كانىمسەن ۋەتەن، تەندە يۈرەك پارىمسەن ۋەتەن؛ كېلەچىكىم، بارىمسەن ۋەتەن، مېھرى ئىللىق ئانامسەن-ۋەتەن. كۈلدى يايراپ سەندە جانۇ-تەن، ئۆسكەچ ئەركىن مېھرىڭ قېنىپ مەن؛ بەخىت ياردۇر بولغاچ يۆلەك سەن، مېھرى ئىللىق ئانامسەن-ۋەتەن. سەن دىلىمغا نۇر بەرگەن قۇياش، ئىقبالىمسەن، بەختىمسەن قاياش؛ بولغاچقا سەن كۆزۈم كۆرمەس ياش، مېھرى ئىللىق ئانامسەن-ۋەتەن. قوينۇڭدا شاد ئۆستۈم ئەركىلەپ، رەتكە قوشتۇڭ شۇنچە پەپىلەپ؛ سەمدە كامال تاپتىم ھەسسىلەپ، مېھرى ئىللىق ئانامسەن-ۋەتەن. ئۆز قەۋمىڭگە ئوتتەك مېھرىڭ بار، رەقىبىڭگە جۇتسەن قەھرىڭ بار؛ ئېنىق سەندە شەرەپ،نومۇس-ئار، مېھرى ئىللىق ئانامسەن-ۋەتەن. سەندە كۈلۈپ يايرىدى دىلىم، ئۇزاردى ھەم سۆزلەشكە تىلىم؛ پۈتمەس سەنسىز دىل ئارمانلىرىم، مېھرى ئىللىق ئانامسەن-ۋەتەن. ئەرىك بەردىڭ،كۈچ بەردىڭ ماڭا، بەردىڭ قانات كۆكتە ئۇچۇشقا؛ باش قويسام گەر ئەرزىيدۇ ساڭا، مېھرى ئىللىق ئانامسەن-ۋەتەن. جەننەتنى تەڭ قىلمايمەن ساڭا، تۇپراق-تېشىڭ بولغاچ تۇتىيا؛ سۈيۈڭ ئابى-زەمزەمدۇر گويا، مېھرى ئىللىق ئانامسەن-ۋەتەن. ئۆزگە ئەلگە باقمايمەن قىيا، كەلمەس ئۇندىن زەررىچە ۋاپا؛ جاھان ئىچرە ئۇلۇغسەن ماڭا، مېھرى ئىللىق ئانامسەن-ۋەتەن. ئەجرىڭ ھەرگىز كەتمەيدۇ بىكار، قىلمايمەن خار ئۆزگىگە زىنھار؛ ئەزىزلەيمەن جاندىن ئەتىبار، مېھرى ئىللىق ئانامسەن-ۋەتەن. سېنى گۈللەش قەرزىمدۇر مېنىڭ، ھۇجۇدۇمغا سىڭگەچكە قېنىڭ؛ ئەقىدەڭنى ئاقلايمەن سېنىڭ، مېھرى ئىللىق ئانامسەن-ۋەتەن! شېئىرىنىڭ ئاپتورى : باي ناھىيسىدىن : مەخمۇت ئاۋۇت(ongmas)

kakkuk11

	1-جى شېئىرغا: باسقان ئىزلار گۈللەرگە تولسۇن!   بولۇپ مىراس داستان قىلىنىپ. ئەجىر قىلىش مېھنەت تۆكۈشلەر، تۇرسۇن ئەبەد قارشى ئېلىنىپ. 2-جى شېئىرغا: كاتتىلارغا سۈركەلمەي، زىياپەتكە يۈگەرمەي، گىدەيمەي ئۆزىن ئۆزى سورىغاننى سايلايدۇ. 3-جى شېئىرغا: سۆيدۈم سېنى يۈرەكتىن ۋەتەن، بولماس سەنسىز كېلەچەك ئەتەم. قوينۇڭ باھار، چۆلۈڭمۇ گۈزەل، سېنى قوغداش مەڭگۈلۈك ۋەدەم.

axek13999649893

	يېڭى يىلنىڭ ھارپىسى بىلەن، يېڭى بۈيۈك پىلان تۈزۈلدى؛    دىلغا سىغماس ئارزۇلار بىلەن،   مۇساپىگە ئوقتا ئۈزۈلدى

kurash117

	كۈلدى يايراپ سەندە جانۇ-تەن، ئۆسكەچ ئەركىن مېھرىڭ قېنىپ مەن؛ بەخىت ياردۇر بولغاچ يۆلەك سەن، مېھرى ئىللىق ئانامسەن-ۋەتەن.