جىگدىلەر پىچىرلايدۇ

nazila998

	جىگدىلەر پىچىرلايدۇ                                                                  ( ھىكايە )                                                              زوردۇن    سابىر                                                                                                                                                 سىزنىڭ مىنگەن ئىتىڭىزنىڭ ،                                                                   بوينى ئالا قاشقا .                                                                    بىز ئىككىمىز بىرگە بولساق ،                                                                    ھىچنىم لازىم ئەمەس                                                                     بىر قاپاق سۇدىن باشقا .                                                                                        ( مەكىت خەلىق قوشاقلىرى )                                                              1        بۇ خەۋەرنى ئاڭلاپ ئۇنىڭ ۋۇجۇدى خۇددى توك ئۇرۋەتكەندەك سىلكىندى ، كۆڭلى خۇددى چىۋىن يۇتىۋالغاندەك ئەسكى بولدى ، ئۇنىڭ دايىم كۈلكە يىغىپ تۇردىغان ، تاڭ سەھەردە ياقا يىرىتقان قىزىل گۈل غۇنچىسىدەك ئوماق لەۋلىرى كۆكەردى ، ياشلىق غۇرۇرى ، بەخىت لەززىتى بىلەن ئويناپ ، يىگىتلەر يۈرۈكىگە ئوت چىچىپ ، نەيزىدەك قادىلىدىغان يوغان، قاپقارا خۇمار كۆزلىرىدىن يىپى ئۈزۈلگەن ئۈنچىلەردەك مەرۋايىت تامچىلار تۆكۈلدى ، ئۇ زىلۋا بويىغا ياراشقان توم ئىككى ئۆرۈم چىچىنى چۇۋۇپ - ئۆرۈپ تۇرۇپ ئەسەبىلىك بىلەن : << دادامنى ھەقىقەتچىلەرنىڭ ھەقىقەتچىسى دەپ بىلەتتىم ، ئانامنىڭ مىھرىنى قۇياشقا ئوخشىتاتتىم ، خاتالاشقان ئىكەنمەن ، مىنىڭ مەيلىمنى بىلمەيلا ، بىر ئىغىز پىكىر ئالمايلا مىنى خۇددى قۇشتەك ساتماقچى ، كونا كىيىمدەك بېرۋەتمەكچى بوپتۇ ، ئالى مەكتەپكە بارالمىغىنىمنىڭ جازاسىمۇ بۇ ياكى ئەتىۋارلىق قىز بولغىنىمنىڭ مۇكاپاتىمۇ ؟ >>      ئۇ كەچكى تاماقنىمۇ يىمەستىن ئۆز خانىسىنىڭ ئىشىكىنى ئىچىدىن ئىلىۋالدى - دە ئۆزىنى ئازاپلىغان بۇ خەۋەر ئىسكەنجىسىدىن قۇتۇلۇش ئۈچۈن يول ئىزدىدى ، << ئۆلۈش كىرەكمۇ ؟ ئەلۋەتتە بۇ ئاخىرقى چارە ، كۆڭلۈم تارتمىغان بىرسىنىڭ ئايالى بولۇشتىن ئۆلۈش ئەۋزەل ، لىكىن مەن نۇرغۇن گۈزەل نەرسىلەرنى ئويلىغانتىمغۇ ؟ ئۇلارمۇ مەن بىلەن بىللە ئۆلەمدۇ ؟ >>      قىز ئۆرە ئەينەككە قارىدى ، ئۇ ئاۋال دادىسى ئۈرۈمچىگە يىغىنغا بارغاندا ئىلىپ كەلگەن ئاق ياقۇت مارجاننى كۆردى ، مارجان ئۇنى ياشاشقا ، باشقىلار ئالدىدا ئۆز ئۈستۈنلىكى بىلەن ماختىنىشقا ئۈندەيتتى ، ئۇ ئانىسى ئەتىۋارلاپ تىكتۈرۈپ بەرگەن ئىسىل كوڭلىكىدىن ئالتۇن بۇلاپكىسىغا قارىدى ، بۇ يالتىراق زىننەت بويۇمى ئۇنىڭغا غەمكىن كۆرۈندى ، ئۆزىنىڭ رامكىغا ئىلىنغان رەڭلىك سۈرىتىگە قارىدى ، سۈرەتتىكى قىز كۈلۈپ تۇراتتى ، قىزنىڭ ئاپپاق چىشلىرى ئاۋۇ بوينىدىكى مارجاندەك گۈزەل ، ئۆلسە ئۇنىڭ گۈزەل جىسمى بىر سىقىم توپىغا ئايلىنىدۇ ،      << ياشاش كىرەكمۇ ؟ دادىسىغا قارشى ئىسيان كۆتەرسىچۇ ؟ مەسلەن : باش ئىلىپ قىچىپ كەتسىچۇ ؟ ياكى ناھىيىلىك پارتىكوم سىكرىتارىغا بېرىپ دادىسىنى چاقسىچۇ ؟ ئۇ چاغدا دادىسى ئەيىپلىنىدۇ ، دادىسىنىڭ يۈزىگە ئۆز قىزى قارا سۇۋىغان ، ئۇنىڭ مەنسىپىنى كۆزلەپ يۈرگەنلەرگە ياردەم قىلغان بولىدۇ .......... ئاتا - ئانىسىنىڭ مەسلىھەتىگە قۇلاق سالسىچۇ ؟ تەۋەككۇل قىلىپ كۆڭلى چۈشمىگەن بولسىمۇ ئەشۇ يىگىتكە ماقۇل بولسىچۇ ؟ ئەلچىنىڭ سۆزى ئۇنىڭ قۇلىقىدا : يىگىت بۇلارنىڭ تۇققىنى ، يىگىرمە تۆت ياش ، چىرايلىق ، ئىغىر - بىسىق ، ئوقۇغان ، ھەممە قىزلانىڭ كۆزى ئۇنىڭدا ، ئەڭ مۇھىمى دادۇي پارتىيە ياچايكا سىكرىتارىنىڭ يالغۇز ئوغلى ، سىكرىتار شۇنچىلىك بايكى ، ئوغلىغا ئاتاپ ئىككى قەۋەتلىك ئۆي ، باغ ياساتقان ، گىلەملەر زاكاز ، تىلىۋىزور رەڭلىك ، ئۆي جابدۇقلىرى دوب ياغىچىدىن ، ئۆيى ئەتىر پۇرايدۇ ، ئاشۇ يىگىتنىڭ ئايالى ، ئاشۇ ئۆينىڭ خوجايىنى بولسىلا ھەرقانداق قىز ئۆزىنى بەخىتلىك ھىساپلايدۇ >>      قىز ئويلاپ شۇ يەرگە كەلگەندە ئۇنىڭ يادىغا ساغۇچ كوڭلەك ، ھاۋا رەڭ شىم كىيگەن ، زىلۋا ، چىرايلىق كەلگەن  باشقا بىر يىگىت كەلدى - دە ، قىز يۈزىنى تۇتۇپ ڭىغلىۋەتتى ،      _ پەرھات _ دىدى قىز دېرىزىدىكى گۈللەرگە يۈزىنى يىقىپ _ نىمەڭگە قىزىققاندىمەن ؟ چىرايىڭ ئۇنىڭغا يەتمەيدۇ ، بىلىمدە تىخى يوق ، بايلىق سىنىڭ ئۈچۈن قول يەتمەيدىغان يۇلتۇز ، قىلىدىغان ئىشىڭچۇ ؟ تۆمۈرچىنىڭ شاگىرتى ، كۈيىگە مىلەنگىنىڭ مىلەنگەن ، ئاناڭ تۇل خوتۇن ، ئۆيۈڭگە كىرسە ئادەمنىڭ بىشى ئايلىنىدۇ ، قىزلار قىزىققۇدەك ھىچنىمە تىپىلمايدىغان بىر ساياق بالا تۇرۇپ نىمىشقا مىنى ئۇسۇلغا تارىتتىڭ ؟ ئۇسۇل ئويناۋىتىپ نىمىشقا سىنىڭ كۆزلۈرۈڭگە قاردىم ؟  سىنىڭ راۋابىڭ بىلەن ناخشاڭ نىمىشقا يالغۇز مىنىڭلا ئۇيقۇمنى قاچۇردۇ ؟ شۇ كۈنى نىمىشقا ئەتەي ئىشتىن كەچ قايتتىم ، ؟ ھېلىقى جىگدىلىككە كەلگەندە قولۇمنى تۇتساڭ نىمىشقا قارشىلىق قىلمىدىم ، ؟      قىز قىزارغان يۈزىنى ئالقانلىرى بىلەن سىلىدى ، ئۇ خۇددى يىگىت لىۋى تۇنجى قىتىم تەككەن جايلاردىكى سۆيگۈ ئىزناسىنى ئۆچۈرۋەتمەكچى بولغاندەك ياغلىقى بىلەن سۈرتتى ،       قىز ئۇخلىيالمىدى ، تولغاندى ، ئويلاندى ، يىغلىدى .......يىرىم كىچىدە ئىچ كوڭلەك بىلەن ئولتۇرۋىلىپ خەت يازدى ،       << ئۆگۈنلۈككە تويۇم بولىدۇ ، بۈگۈن بىزنىڭ نىكاھ قەغىزىمىزنى ئىلىپ كەپتۇ ، سىز بىلىسىز ، مىنىڭ دادام ھەممە ئىشنى باشقىلارغا قىلدۇرىدۇ ، نىكاھ قەغىزىمىزنىمۇ باشقىلار ئىلىپ كەپتۇ ، كۆڭلۈم تارتمىغان بىرىنىڭ قانۇنلۇق ئايالى بوپتىمەن ، لىكىن مەن ئېرىمنى كۆرۈشتىن بۇرۇن ئۆلمەكچىمەن ، نىمىشقا ؟ سەۋەبى مەن خورلاندىم ، خورلۇقتىن ئۆلۈم ياخشى ، ئۆلۈم ئاخىرقى خورلۇقتىن قۇتۇلۇش يولى ، ئۆلمەسلىك ياخشى ئىدى ، مەن ئۆلۈشنى خالىمايتتىم ، ياشاشنى ، ئىشلەشنى . بەخىتلىك بولۇشنى ئەجەپمۇ ئارزۇ قىلاتتىم ، لىكىن بىز قىزلار ئىرادىسىزكەنمىز ، بەخىتسىزلىكتىن قۇتۇلۇشنىڭ يولىنى بىلمەيدىكەنمىز ، ماڭا يول كۆرسىتىدىغان ، قولۇمنى يىتىلەپ ماڭىدىغان ئادەم تولىمۇ لازىم بولىۋاتىدۇ ، ناۋادا سىز ئىنسان بولسىڭىز ھېلىقى جىگدىلىكتە قىلغان گىپىڭىزنى ئۇنۇتماڭ ، سىز مەن ئۈچۈن ھىچنەرسىڭىزنى ئايىمايدىغان بولغان ، مىنى ھەقىقى ياخشى كۆرسىڭىز ، جىنىڭىزنى قولىڭىزغا ئىلىڭ ، ھېلىقى جىگدىلىككە كىلىڭ ، قارار قىلالمىسىڭىز كەلمەڭ ، مەن سىزنى كۈندىكى جايدا يەنە شۇ چاغدا يىرىم سائەت كۈتىمەن ............ >>     قىز دادىسىغا يەنە بىر پارچە خەت يازدى :      << ھۆرمەتلىك دادا ، مىنىڭ رازىلىقىم سىزنى قانچىلىق خۇشال قىلىشنى بىلىمەن ، سىز مىنىڭ رازىلىقىم بىلەن كۆپچىلىك ئىچىدە شۆھرەت، نام ، ھەتتا ئورۇنغا ئىگە بولالايسىز ، سەۋەبى كۆپچىلىك سىزنى شۈنچە چوڭ كادىر تۇرۇپ قىزىنى دىخانغا ياتلىق قىلدى دەپ ماختىشىدۇ ، ئەمگەكچىلەرگە راستىن مۇھاببىتى باركەن دىيىشىدۇ ، دىھقاننى قوللاش تازا بازىرى بار ئىش بولغانلىقى ئۈچۈن سىزنى بەلكىم بۇ قىتىم ھاكىملىققا سايلىشار ........ مەن سىزگە شۈنچىلىك ياردەم قىلالغىنىم ئۈچۈن خۇشال ، بالا ئۆز خۇشاللىقىنى ئاتا _ ئانىسى ئۈچۈن قۇربان قىلالىشى بولۇپمۇ ئاتىسىنىڭ مەرتىۋىسى ئۈچۈن ئۆز بەختىنى تەقدىم قىلالىسا ، بالا بالىلىققا يارىغان بولار - ھە ؟ كىلەر يىلى ئالى مەكتەپكە بارالايتتىم ، كەلگۈسىدە بىلىملىك ئادەم بولالايتتىم  ، لىكىن ئۇ چاغدا سىزنى ھازىرقىدەك رازى قىلالىشىم ناتايىن ئىدى ، بازار تاپقان سودىگەرلەردەك خۇشال بولۇڭ ، سالامەتلىك ، شۆھرەت ، مەنسەپ ، ئورۇن سىزگە يار بولسۇن ......... >>     توخۇلار چۇرۇكلىشىپ ئەتىكى تاڭدىن دىرەك بەرگەندىلا قىزنىڭ قۇرۇمىغان كىرپىكلىرى بىر _ بىرىگە جۈپلەشتى ، قىز ئۇيقىغا كەتتى ،    داۋام بار ، داۋامى ئىنكاس شەكلىدە يوللىنىدۇ                                       مەنبە : زوردۇن سابىرنىڭ  << قەرىزدار >> ناملىق ھىكايىلەر توپلىمىدىن

مارشال

	داۋامىنى تېزراق يوللىۋىتىڭ،تۈركىيەنىڭ كىنۇسىدەك تەقەززا بوپ كەتمەيلى،ھېكايە تۇلۇق بولغاندىكىن،ئەجرىڭىزگە رەھمەت.

bazarbay

	مەن بېشىنى ئوقمىپتىمەن چۈشەنمىدىم

nazila998

	مارشال يوللىغان ۋاقتى  2012-5-3 10:48 PM داۋامىنى تېزراق يوللىۋىتىڭ،تۈركىيەنىڭ كىنۇسىدەك تەقە ... چوقۇم ئەڭ تىز سۈرئەتتە يىزىپ يوللايمەن ، ئەسلى تولۇق يازاي دىگەنتىم ، ھەجمى سەل كۆپرەك ئىكەن ، كۆزۈم چىدىماي قالغۇدەك ،

izqi.mardan

	ئاللا ئاللا ...ئەمدى قىزىغاندا....................

BEHTIYAR

	بۇ ھىكايىدىكى پىرسوناژلانىڭ ھەممسى تۇنۇيمەن،ئەپسۇن بۇ مۇھەببەت بىر تىراگىدىيە بىلەن ئاخىرلىشىدۇ !مەكىىتتە يۇز بەرگەن ۋەقە بۇلۇپ  ھىكايە تۇگگەندە بۇ بىر جۇپلەرنىڭ ئاخرى قانداق بولغانلىقىنى مەن ئىيتىب بىرەمەن .

arginakun

	بەك پەيزى بۇ پوۋسىت ئەينى چاغدا تارىم ژۇرنىلىدا ئىلان قىلىنغان كىمدە مۇھەممەت باغراشنىڭ «ئاقساق بۇغا» دىگەن پوۋسىتى بار

kalamiy

	ھەقىقەتەن ئېسىل ھېكايىلەرنىڭ بىرى ئىدى ھە بۇ ...ئاپتۇرنىڭ ياتقان يېرى جەننەتتە بولسۇن ..ئامىن ..

meyinshamal

	ساقلاپ قۇيۇپ كىيىن بىراقلا ئۇقۇي.

ئاھو

	زوردون سابىرنىڭ ئەسەرلىرى بەك ئىسىل جۇمۇ؟!