بۇندىن ئاي بۇرۇن، يەنى قۇتلۇق نورۇزدا ئەلداۋا ساغلاملىق تورى ئۆزىنىڭ «
ئەلداۋا ساغلاملىق ئېكرانى» پىروگراممىسىنىڭ تۇنجى سانىنى كەڭ تورداشلارنىڭ ھۇزۇرىغا سۇنغان ئىدى (
تۇنجى ساننى بۇ جايدىن كۆرۈڭ).
مانا شۇ تاپتا «ئەلداۋا ساغلاملىق ئېكرانى» نىڭ 2-سانى سۈرەتكە ئېلىنىش ئالدىدا تۇرۇپتۇ. بىز بۇ ساندا، ئۇيغۇر بۈگۈنكى زامان تېببىي خادىملىرىنىڭ پېشۋاسى ، مۆھتەرەم ئۇستاز دوختۇر روزى ھاجى مۇھەممىدى ئاكىمىز بىلەن يۈرەك كېسەللىكلىرى، شۇنداقلا تېببىي خادىملارنىڭ ئەخلاق-ساپاسى، خەلق ئالدىدىكى بۇرىچلىرى، ئۇستازنىڭ تېببىي پەن ئۆگىنىۋاتقان ۋە بۇ ساھەگە ئەمدىلا كىرىشكەن بوغۇنلاردىن كۈتىدىغان ئۈمىدلىرى ھەققىدە مۇڭداشماقچىمىز.
تورداشلار مۇتەخەسسىس دوختۇر روزى ھاجى مۇھەممىدى ئاكىمىزدىن سورىماقچى بولغان يۈرەك كېسەللىكلىرى ۋە باشقا تېببىي ساھەگە ئائىت كەسپىي ۋە ئىجتىمائىي سوئاللىرىنى مۇشۇ تېمىدا ئىنكاس سۈپىتىدە ئوتتۇرىغا قويسا، بىز بۇ سوئاللارنى رەتلەپ،
سۆھبەت داۋامىدا مۇۋاپىق دەپ قارىغانلىرىمىزنى ئۇستازدىن سوراپ، تورداشلارغا قانائەتلىنەرلىك جاۋاب بەرگەيمىز!
دىققەت: سۆھبەت 22-ئاپرېل (يەكشەنبە) چۈشتىن كېيىن سۈرەتكە ئېلىنماقچى. شۇڭا، سوئال سورىماقچى بولغانلارنىڭ ۋاقىتنى چىڭ تۇتۇپ، سورىماقچى بولغانلىرىنى ئىنكاس قالدۇرۇشىنى ئۈمىد قىلىمىز.
ئۇستاز دوختۇر روزى ھاجى مۇھەممەدنىڭ تەرجىمىھالى
شىنجاڭ تېببىي ئۇنىۋېرسىتېتى قارمىقىدىكى 1-دوختۇرخانا ئىچكى بۆلۈم يۈرەك كېسەللىكلىرىنىڭ مۇدىر ۋىراچى، پىروفېسسور، مەملىكەتلىك يۈرەك قان تومۇر كېسەللىكلىرى ئىلمىي جەمئىيىتىنىڭ ئەزاسى، ئاپتونوم رايونلۇق يۈرەك قان تومۇر كېسەللىكلىرى ئىلمىي جەمئىيىتىنىڭ مۇئاۋىن باشلىقى،ئىچكى كېسەللىكلىرى ئىلمىي جەمئىيىتىنىڭ دائىمىي ئەزاسى رۇزى ھاجى مۇھەممەد 1934-يىلى 12-ئايدا قەشقەردە تۇغۇلغان. 1956-دىن 1962-يىلغىچە شىنجاڭ تېببىي ئىنستىتۇتى (ھازىرقى شىنجاڭ تېببىي ئۇنىۋېرسىتېتى) داۋالاش فاكۇلتېتىدا ئوقۇپ، شۇ مەكتەپ قارمىقىدىكى 1-دوختۇرخانىسىنىڭ ئىچكى كېسەللىكلەر بۆلۈمىگە تەقسىم قىلىنغان.
ئۇ خىزمەتكە قاتناشقاندىن بېرى بىر تەرەپتىن داۋالاش بىلەن شۇغۇللانسا، يەنە بىر تەرەپتىن ئاسپىرانت تەربىيەلىگەن. «ئىچكى كېسەللىكلەردىكى جىددىي كېسەللىكلەرنى داۋالاش»، «يۈرەك كېسەللىكلىرى»، «يۈرەك رىتىمسىزلىقىنى داۋالاش»، «يېزىلاردا كۆپ ئۇچرايدىغان كېسەللىكلەرنى داۋالاش»، «رېماتىزم قىزىتمىسى ۋە رېماتىزم يۈرەك كېسەللىكى»، «يۈرەك كېسەللىكلىرىگە ئىشلىتىلىدىغان دورىلار»،«ياشانغانلاردا كۆپ ئۇچرايدىغان كېسەللىكلەر»، «سالامەتلىك ھەققىدە مەسلىھەت» قاتارلىق 12 پارچە كىتاب يېزىپ نەشر قىلدۇرغان.بۇنىڭدىن ئالدىنقى ئۈچ پارچىسى سەھىيە نازارىتىنىڭ 3-دەرىجىلىك مۇكاپاتىغا ئېرىشكەن. يۇقىرىقىلاردىن باشقا «جىددىي ئۆلۈم توغرىسىدا»، «تاجىسىمان ئارتېرىيە قېتىشىش كېسەللىكىنىڭ ئالدىنى ئېلىش»، «يۇقىرى قان بېسىم كېسەللىكىنىڭ ئالدىنى ئېلىش» قاتارلىق يۈرەك قان تومۇر كېسەللىكلىرىگە ئائىت 100 پارچىدىن ئارتۇق ئىلمىي ماقالە ئېلان قىلدۇرغان. بۇلاردىن «جىددىي ئۆلۈم توغرىسىدا» ناملىق ماقالىسى ئاپتونوم رايون بويىچە 1-دەرىجىلىك مۇنەۋۋەر ئىلمىي ماقالە مۇكاپاتىغا ئېرىشكەن. ئۇ يەنە مەملىكەت بويىچە ئېچىلغان دۇنيا سەھىيە تەشكىلاتى چاقىرغان ئىلمىي مۇھاكىمە يىغىنلىرىغا قاتناشقان. تېببىي ئۇنىۋېرسىتېتى 1-دوختۇرخانىسى بويىچە سەككىز نەپەر داڭلىق مۇتەخەسسىس قاتارىدىن ئورۇن ئېلىپ، «سەككىز چوڭ ئاتاقلىق دوختۇر» دېگەن نامغا ئېرىشكەن. ئۇ ھازىر گوۋۇيۈەننىڭ ئالاھىدە تەمىناتىدىن بەھرىمەن بولغۇچى شەخس، 20-نۆۋەتلىك سەھىيە ئىلمىي جەمئىيىتىنىڭ ئەزاسى، شىنجاڭ تېببىي ئۇنىۋېرسىتېتى ئىلمىي ژۇرنىلىنىڭ باش مۇھەررىرى، شىنجاڭ تېببىي ئۇنىۋېرسىتېتى 1-دوختۇرخانا يۈرەك قان تومۇر كېسەللىكلىرى مەخسۇس مۇتەخەسسىسلەر گۇرۇپپىسىنىڭ ئەزاسى.
دىققەت: سۆھبەت 22-ئاپرېل (يەكشەنبە) چۈشتىن كېيىن سۈرەتكە ئېلىنماقچى. شۇڭا، سوئال سورىماقچى بولغانلارنىڭ ۋاقىتنى چىڭ تۇتۇپ، سورىماقچى بولغانلىرىنى ئىنكاس قالدۇرۇشىنى ئۈمىد قىلىمىز.
ئەلداۋا ساغلاملىق تورى
2012-يىلى 4-ئاينىڭ 20-كۈنى
يوللىغان ۋاقتى 2012-4-20 05:17:41 PM
