بىر ئاتىنىڭ ئوغلىغا يازغان خېتى

DOPPIQI

	بىر ئاتىنىڭ ئوغلىغا يازغان خېتى ئەسەر ئاپتورى: dawirdax مىكروفون ئالدىدا: قۇربانجان ئىسمايىل كىرىشتۈرگۈچى: مەخمۇتجان ئابدۇجېلىل(رىۋايەت)     ئەسسالامۇ ئەلەيكۇم ئوغلۇم، ياخشىمۇ سەن، تېنىچ-ئامان تۇرۇۋاتامسەن، ئوقۇشلۇرۇڭ ئۇتۇقلۇق،كۈنلىرىڭ مەنىلىك ئۆتۈۋاتقاندۇ؟ بىزلەردىن ئەھۋال سوراشنى خالىساڭ،بىزمۇ ئوبدان تۇردۇق، سەن ئۆتكەن تەتىلدە قايتىپ كەلمىگەچ ئاپاڭ سېنىڭ سۈرىتىڭگە قاراپ پات-پات كۆز يېشى قىلىدىغان بوپ قالدى، بەلكىم سېنى سېغىنغاندۇ، سىڭلىڭ داۋاملىق سېنىڭ ئوتتۇرا ۋە باشلانغۇچ مەكتەپلەردە ئالغان تەقدىرنامىلىرىڭنى كۆتۈرۈپ، مەنمۇ ئاكامدەك ياخشى ئوقۇيمەن دەيدۇ، مەھەللىدىكىلەر ۋە ئۇرۇق-تۇققانلار داۋاملىق سېنى سورايدۇ، ھەممىمىز سېنى سېغىندۇق. ئەمدى مەخسەتكە كەلسەك:     ئەسلى بۇ گەپلەرنى ساڭا دېمەي دېگەن ئىدىم بالام، بىراقسېنى بېقىپ چوڭ قىلغان دادا بولۇش سۈپىتىم بىلەن، ۋەتەن-خەلققە،مىللەتكە ياراملىق بىر ئوغلان تەربىيەلەش ۋەزىپىسىنى زىممەمگە ئارتقان ئاتا بولۇش سۈپىتىم بىلەن ساڭا دىيىشنى لايىق كۆردۈم، لېكىن ئېسىڭدە بولسۇن بالام مەن بۇ گەپلەرنى ھېچكىمگە دىگىنىم يوق، خوشنىمىزنىڭ قىزى ئالمىرە چەتئەللىكلەرنى باشلاپ كەپتىكەن، مەن ھەممە ئەھۋالنى شۇ قىزدىن بىلدىم، مەن بۇ گەپلەرنىڭ يالغان بوپ قېلىشىنى چىن دىلىمدىن ئۈمىت قىلغان ئىدىم بىراق رەھىمسىز رېئاللىق مېنى ئىشەندۈرۈشكە مەجبۇر قىلدى ئوغلۇم!!     مەن سېنىڭ ئۆتكەندە مېنى ماشىنا سوقۇۋەتتى، شوپۇر قېچىپ كەتكەچكە ساقچىلارمۇ ئامال قىلالمىدى، داۋالىنىش راسخودىنىڭ يېرىمىنى مەكتەپ كۆتۈردى، قالغان يېرىمىگە سىلەر بىر ئامال قىلساڭلار دەپ بىزدىن 3000 كوي پۇل ئالغىنىڭنىڭ ئەسلى يالغان ئىكەنلىگىنى، سېنىڭ ئۇ پۇللارغا، ئېنتىرنېتتا تونۇشقان بىر قىز دوستۇڭنىڭ تۇغۇلغان كۈنىنى قىز دوستۇڭنىڭ توسۇشىغا قارىماي،ھەشەمەتلىك ئۆتكۈزۈپ بېرىپ، ئۇ قىزنىڭ ۋە ئۇنىڭ دوستلىرىنىڭ ھۆرمىتىگە ئېرىشكەنلىكىڭنى بىلدۇق،يەنە ياتاقتىكى ھەممە ساۋاقداشلىرىمنىڭ كومپىيوتۇرى بار، پەقەت مېنىڭلا يوق، دەرسلىكلەرنى كومپىيوتۇر بىلىملىرىگە بىرلەشتۈرۈپ ئۆگەنسە بەك كاللىسىغا چۈشىدىكەن، ھەم بۇندىن كېيىن كومپىيوتۇر بىلمىگەنلەرنىڭ كۆزى ئوچۇق قارىغۇ بوپ قالىدىغانلىقىنى، ساۋاقداشلىرىڭنىڭ كومپىيوتۇرىنى سوراۋىرىپ خىجىل بولغانلىقىڭنى ۋە بۇندىن كېيىن دەرىسلەردە ناھايىتى تىرىشىدىغانلىقىڭنى بىلدۈرۈپ تالاي گەپلەر بىلەن بىزنى ئالداپ7500 كويغا داڭلىق ماركىلىق كومپىيوتۇر ئالدۇرغانلىقىڭنىڭ، ئەسلىدە ئېنتىرنېت تورىدا قىزلار بىلەن مۇھەببەتلىشىش ئۈچۈن ئىكەنلىگىنى بىلىپ قالدىم ئوغلۇم!!! ھازىر ياتاقتا پەقەت سېنىڭكىدىن باشقا ھېچكىمنىڭ كومپىيوتۇرى يوق ئىكەن، سىنىپىڭدىكى بىر قىسىم ئوغۇللار بىلەن كۈندە دېگۈدەك دەرىسكە قاتناشماي، كومپىيوتۇر ئالدىدا ئولتۇرۇپ،دەرىسكىمۇ تولۇق قاتناشماي، كېچىلىرىمۇ ئۇخلىمايۋاتقانلىقىڭنىمۇ بىلدىم ئوغلۇم، سېنىڭ كومپىيوتۇر ئالمىغان چاغدا تورخانىلاردا، كومپىيوتۇر ئالغاندىن كېيىن بولسا ياتاقتا،كېچە-كۈندۈز ئۇخلىماي، تاماقنىمۇ ۋاقتىدا يىمەي، تورغا چىقىپ ئورۇقلاپ كەتكەنلىكىڭنى، دەرىستىمۇ ئارقىغا چېكىنىپ كەتكەنلىكىڭنى بىلدىم بالام.مۇشۇ تاپتا كۆز ئالدىمغا سېنىڭ تاماكىنى قىڭغىر چىشلەپ كومپىيوتۇر ئېكرانىغا قاراپ ئولتۇرغان ھالىتىڭ كېلىۋاتىدۇ.     ئوتكەن تەتىلدە سىنىپتىكى بالىلار بىلەن ئېنگىلىز تىلى كۇرسىدا ئوقۇيدىغان بولدۇم، بۇ تەتىل ئۆيگە قايتمايمەن، دىگەن ۋاقتىڭدا، گەرچە سېنى شۇنداق سېغىنغان بولساقمۇ، سېنى ياراملىق ئادەم بولسۇن دەپ كۆزىمىزگە ياش ئېلىپ ماقۇل بولغان ئىدۇق، مەن شۇ ۋاقىتتا تېلفۇن نومۇرىڭدىن گۇمان قىلغان بولساممۇ بىراق سېنى بىزنى ئالدىماس دەپ ئويلاپتىكەنمەن، ئەمىلىيەتتە بولسا سېنىڭ جەمئىيەتتىكى بالىلار بىلەن ئېنتىرنېتتا تونۇشقان قىزلارنى دەپ باشقا شەھەرلەرگە بېرىپ كەلگەنلىكىڭنى بۈگۈن ئۇقتۇم بالام. بالام!!! سەن ھازىرمۇ كومپىيوتۇر ئالدىدا ئولتۇرامدىغانسەن،قۇلىقىڭغا خوش ياقمىسىمۇ ساڭا دىيىشكە مەجبۇرمەن، سېنى تۆت يىلدىن بۇيان ئوقۇتىمىز دەپ ئائىلىمىزدە ئىقتىساد تۈگەپ قالدى، مەن بۈگۈن بېرىپ كۆزۈمگە ياش ئالغان ھالدا سىڭلىڭنىڭ مەكتەپتىن چېكىنىش رەسمىيەتلىرىنى بېجىرىپ كەلدىم، تولۇق ئوتتۇرامەكتەپلەرنىڭ ئوقۇش خىراجىتىمۇ شۇنداق يۇقىرى ئىكەن، ئامال قىلالمىدۇق ،سىڭلىڭ بىر شىركەتنىڭ باسمىخانىسىدا ئايلىقىغا 350 كوي مۇئاش بىلەن ئىشلىمەكچى، ئۇ ماڭا مەيلى دادا ئاكام ئوقۇش پۈتتۈرۈپ كېلىپ ياخشى يەردە خىزمەت قىلىپ يۇقىرى مۇئاش ئالغاندا مېنى ئوقۇتىدۇ، ھازىر ئاكامنىڭ تاماق پۇلىنى مەن ئۈستۈمگە ئالاي دېدى، مەن قىزىمغا يۈز كېلەلمەيمەن، بالىلارنى ئوقۇتۇش مېنىڭ بۇرچۇم ئىدى مەن ئادا قىلالمىدىم ئوغلۇم، ئاكاڭ رەھمىتى ھايات بولغان بولسا بۇنداق كۈنلەرگە قالماس ئىدۇق ئوغلۇم، ھازىر پۈتۈن بىر ئائىلە پەقەت مېنىڭ پىنسىيە مۇئاشىمغىلا قاراشلىق بوپ قالدۇق بالام، سېنى باشقىلار ئالدىدا يەرگە قاراپ قالمىسۇن كومپىيوتۇر ئېلىپ بېرىمىز دەپ ئۇرۇق-تۇققانلاردىن، خولۇم-خوشنىلاردىن قەرز ئالغان ئىدۇق،ئۆتكەندە ماشىنا سوقۇۋەتتى دېگەن ۋاقتىڭدا پۇت-قولىمىزدا جان قالمىدى، بېرىپ قەرز سورىمىغان يەرلىرىمىز قالمىدى، بىزدەك سېرىقتال تۇرمۇش كەچۈرىدىغانلارغا ھازىر ھېچكىم قەرز بېرىپ تۇرمايدىكەن، ئاخىرى ئامال قىلالماي ئاپاڭ بىچارىنىڭ ئالتۇن زىبۇ-زىننەتلىرىنى سېتىشقا مەجبۇر بولدۇق. بۇنداق گەپلەر دېسەم يەنە بار ئوغلۇم......!!!!!     بىلەمسەن ئوغلۇم، بىز سەندىن نۇرغۇن ئۈمىتلەرنى كۈتكەن ئىدۇق، ھېلىھەممۇ ئۇ ئۈمىت ئۇچقۇنلىرى ئۆچكىنى يوق،ساڭا يەنە پۇرسەت بار ئوغلۇم،سېنىڭ خېتىمنى كۆرگەندىن كېيىن، كومپىيوتۇرنى ئېنتىرنېتتا قىزلار بىلەن سۆزلىشىشكە ئەمەس، بەلكى بىلمىگەننى ئۆگىنىشكە ئشلىتىشىڭنى، باشقا كومپىيوتۇر ئاجايىپ مۆجىزىلەرنى يارىتىۋاتقان بالىلارغا ئوخشاش سېنىڭمۇ مۆجىزە يارىتىشقا تىرىشىشىڭنى، دەرىسلەرگە ئۆزۋاقتىدا تولۇق قاتنىشىپ، بىلمىگەننى سوراپ، ساۋاقداشلىرىڭ بىلەن ئۆز-ئارا ياردەمدە بولۇپ، سىنىپتىكى ئەلاچى ئوقۇغۇچىلاردىن بولۇشىڭنى ئۈمىت قىلىمەن بالام،     بالام سېنىڭ ھازىر مۇھەببەت دەيدىغان ۋاقتىڭ ئەمەس، راستىنى دېسەم مۇھەببەت دېگەنگە مەنمۇ تولۇق تەبىر بېرەلمەيمەن، شۇڭا مۇھەببەت خىياللىرىنى ئوقۇش پۈتتۈرۈپ كېلىپ، خىزمەتكە ئورۇنلاشقان ۋاقتىڭدا ئويلاشساڭمۇ كېچىكمەيسەن ئوغلۇم.     بالام بىزدە ئارتۇق گەپ ئىشەككە يۈك دەيدىغان بىر گەپ بار، شۇڭا ئارتۇق گەپ قىلماي، ئۆزۈڭ ياخشىراق ئويلىنىپ كۆرەرسەن، ئاكاڭ رەھمىتىنىڭ جان ئۈزۈش ئالدىدا دېگەنلىرىنى،ئۇنىڭغا بەرگەن ۋەدىلىرىڭنى ئۇنۇتما ئوغلۇم!!     ئۇنداق قىلمىساڭ ئاكاڭ رەھمىتىگە يۈز كېلەلمەيسەن، سېنى ئويلاپ بىر تېرە، بىر ئۇستىخان بوپ قالغان ئاپاڭغا يۈز كېلەلمەيسەن، سېنى دەپ ۋاقىتلىق ئوقۇش پۇرسىتىدىن مەھرۇم بولغان سىڭلىڭغا، ۋەتەن-خەلققە، مىللەتكە يۈز كېلەلمەيسەن ئوغلۇم!!!!!     مەن ئىشىنىمەن، سەن چوقۇم ئۆزگىرىپ ياخشى ئادەم بولالايسەن، سىنىپىڭدا ئەلاچىلار قاتارىدىن ئورۇن ئالالايسەن،بىزنىڭ كۈتكەن ئۈمىدىمىزنى چوقۇم ئاقلىيالايسەن، خەير ئوغلۇم ئۇلۇق ئاللاھتىن ساڭا ئىنساپ تىلەيمەن،ئامان بولغىن، ساڭا ئۇتۇق تىلەيمەن. سېنى ئەسلەپ:                                            ئاتاڭدىن؛ ئاۋازلىقىمۇ بار ئىكەن ،يوللىيالمىدىم ئاۋازلىقىمۇ بەك تەسىرلىككەن باشقۇرغۇچىلار قوشۇپ قويساڭلار بوپتىكەن! مەنبە:خۇشدىل مۇنبىرىhttp://huxdil.com/bbs/forum.php?mod=viewthread&tid=644

nur96

	جاپاكەش ئاتا -ئانىلا

oyhanogul

	توۋاھ..................................   ئى سۈرەتكە قاراپ بەك خىجىل بۇلۇپ كەتتىم

13629982958

jassurman

	بەكلا تەسىرلىككەن. ھەي بىچارە ئاتا-ئانىلار! بەلكىم ئارمىزدىمۇ شۇنداق كەچۈرمىشى بارلار يوق ئەمەستۇ، ئۆزمىزگە كۆرۈنمەيدۇ. ئۇلۇق ئاللاھتىن ئاتا-ئانلارنىڭ ئۆمۈرلىرىنىڭ ئۇزۇن بولىشىنى، ساقايماس كېسەللەردىن خالى بولشىنى، ئىمانلىرىنىڭ مۇكەممەل بولۇشىنى تىلەيمەن!

sabaat

	ئۇقۇپ بولغىچە كۆزلىرىمىدىن ياش چىقىپ كەتتى. بەك تەسىرلىك چىقىپتۇ.

سۇمۇرۇغ

	بەكلا تەسىرلىك ئىكەن،بۇنى كۆرۈپ ۋە ئاڭلاپ ئۆزۈمنى خۇددى ئاشۇ بالىدەك ھېس قىلىپ قالدىم. ھەي جاپاكەش ئاتا ئانىلار،بىز قانداق قىلساقمۇ سىلەرنىڭ بىزگە قىلغان ئەجرىڭلارنى قايتۇرۇپ بۇلالمايمىز.بىز سىلەرنى مەڭگۈ سۈيىمىز.

Nishanem

	ئاتا -ئانا رازى خۇدا رازى !! ھايات ۋاختىدا ئۇلارنىڭ قەدرىگە يېتەيلى!!

Kk2266257

	ھەقىقەتەن  تەسىرلىككەن  ...

bayhenim

	سۇمۇرۇغ يوللىغان ۋاقتى  2012-4-19 02:22 PM بەكلا تەسىرلىك ئىكەن،بۇنى كۆرۈپ ۋە ئاڭلاپ ئۆزۈمنى خۇد ... مەن مۇ شۇنداق ئويلاپ قالدىم ھەم يىراقتىكى ئاتا ئانامنى بەكمۇ سېغىندىم