ئۇزۇن-قىسقا خىياللار

ketmenbay

	ئۇزۇن-قىسقا خىياللار ساداقەتجان ھاجى (بىر نەچچە كۈندىن بىرى بۇرۇنقى كىتاب-ماتىرىياللىرىمنى رەتلەش جەريانىدا، ئوقۇغۇچىلىق ۋاقتىمدا يېزىپ قويغان بىر تۈركۈم ئەسەرلىرىمنى تاپتىم. بۇ «ئۇزۇن-قىسقا خىياللار» - ئاشۇ ئۆتكەن كۈنلەردىكى ئويلىرىمنىڭ ئۇۋاقلىرى، خالاس.) (1) ئۈستۈنكى كىرپىك بىلەن ئاستىنقى كىرپىپ شۇنداق دىيىشەرمىش: ئەگەر ئارىمىزدا كۆز بولمىغان بولسا، بىز مۇرادىمىزغا يەتكەن بولاتتۇق. (2) قان تۆكۈش - ۋەھشىلىك، ياش تۆكۈش - نۇمۇس. لىكىن ياش تۆكۈشتىن قان تۆكۈش ئەۋزەلرەك. چۈنكى، كىم ياش تۆكۈشنى خالايدۇ؟ (3) يەر شارىنى چۆرگىلىتىۋاتقانلارغا ھەۋىسىم كىلىدۇ، لىكىن ئۇلاردىن نەپرەتلىنىمەن. يەر شارىدا چۆرگىلەۋاتقانلارغا ئاچچىقىم كېلىدۇ، لىكىن ئۇلارغا ھىسداشلىق قىلىمەن. (4) ئەگەر ئىشەنچ بولمىغان بولسا ئىدى، خۇدا ئىنسانلارغا رەھىم قىلمىغان بولاتتى. ئىنسانلارمۇ خۇداغا پىسەنت قىلمىغان بولاتتى. (5) سەن پەقەت ئۆزۈڭگىلا نەپرەتلىنىشكە ھەقلىقسەن! (6) شائىرنىڭ كۆرگەن چۈشى - چىنلىق. (7) مەن كىشىلەرنى بەك چۈشىنىپ كەتكەنلىكىمدىن، كىشىلەر مېنى چۈشىنەلمەيدۇ. (8) مەن گەرچە ئۆزۈمگە ئىشەنسەممۇ، ئۆزۈمگە تەئەللۇق بولغان كۆزۈم بىلەن قۇلىقىمغا ئىشەنمەيمەن. (9) توۋا، ئاسمانغا چىقىپ كەتكەنلەرنىڭ روھى يەرگە كىرىدىكەن. يەرگە كىرىپ كەتكەنلەرنىڭ روھى بولسا ئاسمانغا چىقىدىكەن. (10) بالىلىق - كېچە كۆرگەن چۈش. ياشلىق - چۈشنىڭ بۇزۇلىشى. قېرىلىق - چۈشكە بېرىلگەن تەبىر. (11) نادانلارنىڭ ئەقلى دۇنياغا سىغمايدۇ. دانىشمەنلەرنىڭ ئەقلىگە دۇنيا سىغمايدۇ. (12) گۈزەللەر ھەسەتخور كېلىدۇ. (13) ئاسمان يىغلىسا دەردىنى يەر كۆتۈرىدۇ. يەر يىغلىسا دەردىنى كىم كۆتۈرىدۇ؟ (14) ئەقىل بىلەن ھىسسىيات بىر-بىرىنى چۈشەنمەيدىغان دوستلاردۇر. (15) رەھىمدىللىق - ئاجىزلىقنىڭ ئالىجاناپ پەردىسى. (16) رەزىللىككە ھامىلدار بولغان تۇنجى ئايال - مۇھەببەت. گۈزەللىكنى تەشۋىق قىلغان تۇنجى ئەر - نەپرەت. (17) شائىر - ھەسەتخور، پەيلاسوپ - تەكەببۇر كېلىدۇ. ئەگەر شائىر پەيلاسوپ بولسا، تادانغا ئايلىنىدۇ. پەيلاسوپ شائىر بولسا، شەيتانغا ئايلىنىدۇ. (18) شۆھرەت تاماسى يوق ئادەم - مەڭگۈ ئالغا باسمايدىغان ئادەمدۇر. ★★★★★ (1989-يىلى 2-ئاي. قەشقەر) ★★★★★

yidayat164

	ئەگەر ئىشەنچ بولمىغان بولسا ئىدى، خۇدا ئىنسانلارغا رەھىم قىلمىغان بولاتتى. ئىنسانلارمۇ خۇداغا پىسەنت قىلمىغان بولاتتى. «ئىشەنچ»دىگەننى «ئىمان»دەپ چۈشەنسەك تولىمۇ جايىدا بولغۇدەك

sabinur

	ھە ،‹‹سەن پەقەت ئۆزۈڭگىلا نەپرەتلىنىشكە ھەقلىقسەن!›› بۇ ياخشىكەن

jassurman

	رەزىللىككە ھامىلدار بولغان تۇنجى ئايال - مۇھەببەت ..... بۇ نىمە دىگەن گەپ ئۆزى؟

amira

	راخمەت جاپا چىكىپ سىز

13629982958

	jassurman يوللىغان ۋاقتى  2012-4-13 04:08 PM رەزىللىككە ھامىلدار بولغان تۇنجى ئايال - مۇھەببەت ..... ب ... مەنمۇ چۈشنەلمىدىم

ilmi

	ياخشى يازمىلاركەن   قەلىمىڭىزگە بەرىكەت تىلەيمەن ..........

nazila998

	ئۈستۈنكى كىرپىك بىلەن ئاستىنقى كىرپىپ شۇنداق دىيىشەرمىش: ئەگەر ئارىمىزدا كۆز بولمىغان بولسا، بىز مۇرادىمىزغا يەتكەن بولاتتۇق بىز ئۇخلىغاندا كۆزىمىز يۇمۇلۇپ بۇ ئاستى - ئۈستى كىرپىكلەر بىر يەرگە كىلىدىغۇ ؟ بۇنىڭغا قانائەت قىلمامدىغاندۇ - يە ؟

parwinaz

	بالىلىق - كېچە كۆرگەن چۈش. ياشلىق - چۈشنىڭ بۇزۇلىشى. قېرىلىق - چۈشكە بېرىلگەن تەبىر.

سۈمەييە

	سەن پەقەت ئۆزۈڭگىلا نەپرەتلىنىشكە ھەقلىقسەن! مەن كىشىلەرنى بەك چۈشىنىپ كەتكەنلىكىمدىن، كىشىلەر مېنى چۈشىنەلمەيدۇ. بۇ ئىككىسى ھەقىقەتەن ياخشىكەن ، ساقلىۋالايچۇ ؟