خاتىرەمدىكى خىياللار

turkinaz0992

	خىياللىرىم مېنىڭ ھەمراھىم ، ھاياتىمنىڭ بىر قىسمى ! خىيالسىز ياشاشنى تەسەۋۋۇر قىلالمايمەن .  باشقىلار  ئۈچۈن بېشىنى كۆتۈرۈپ قاراپ قويۇشقىمۇ  ئەرزىمەيدىغان  بەزى  ئىشلار   نېمىشقىدۇر مېنى تەگىسىز خىياللار قوينىغا باشلايدۇ ...                مېنى ئازاپ دۇنياسىغا غەرق قىلغان ، ئىچىمنى ئاچچىق قىلغان  بەزى خىياللىرىم بىلەن بۈگۈن نېمىشقىدۇر مۇنبەرداش دوستلار بىلەن ئورتاقلاشقۇم كېلىپ قالدى . سىلەرنىڭ تېمامنى ئەستايىدىللىق بىلەن كۆرۈپ چىققاندىن كېيىن مۇنبەردە پىكىر ئالماشتۇرۇپ باقساق دېگەن ئۈمىدتىمەن . بەلكىم بۇ بىر ئەخمىقانە خىيالدۇر ، ياكى ئويلىنىپ باقساق بولىدىغان خىيالدۇر ...                                                      ئاياللار بايرىمىدىكى خىياللار                        ئايال - دۇنيادىكى ئۇلۇغ كىشى . ئۇ ئىنسانىيەتنى ئاپىرىدە قىلغۇچىسى . دۇنيانى ئاياللارسىز تەسەۋۋۇر قىلغىلى بولمايدۇ ...بۇ ھەقتە ھەممىمىز ئەڭ قايىل قىلارلىق ، دەبدەبىلىك سۆزلەرنى قىلالايمىز . ئايالنىڭ جەمىيئەتتىكى ، ئائىلىدىكى ئورنىنىڭ مۇھىملىقىنى چوڭقۇر ھېس قىلالايمىز .                   ئەمما ، ئاياللارنىڭ جىسمانىي ۋە مەنىۋىي ھوقۇقى ئەسلىگە كەلتۈرۈلگەن خاتىرە كۈنى ، يەنى ھەر يىلقى 8 - مارت كۈنى كوچىلارغا ،  رېستۇرانلارغا ، ئاشخانىلارغا پاتمىغان ھالدا « بايرام » ئۆتكۈزىۋاتقان ئەشۇ ئاياللار توپىغا - ئۇيغۇر ئاياللار توپىغا قاراپ قەلبىمدە ئىپادىلىگۈسىز ئاچچىق تۇيغۇلار ئىسيان كۆتۈرىلىدۇ .              جەمىئيىتىمىزدە بۇ بايرامنىڭ ئەشۇنداق تۈستە تەبرىكلىنىشىنىڭ ئومۇملىشىپ قالغانلىقىنى 2003 - يىلى چوڭقۇر ھېس قىلدىم .( بەلكىم ئائىلە ، خىزمەت بېسىمى بىلەن  شۇ مەزگىلگىچە ھېس قىلالمىغان بولسام كېرەك.. )                 شۇ يىلقى ئاياللار بايرىمى كۈنى يېرىم كۈن دەم ئالغاچقا ، بالامنى بىر قېتىم بولسىمۇ بالدۇر ئەكىلىش ئۈچۈن يەسلىگە چاپتىم . ئوغلۇمنىڭ يىتەكچى ئوقۇتقۇچىسى ئوغلۇمنى ماڭا تاپشۇرغاچ  : « سەن بۈگۈن بايرام ئۆتكۈزۈپ  ئوينىغىلى بارمامسەن ؟ » دېگەن سۆزىگە غۇژژىدە ئاچچىغىم كەلدى : « ئادەمنى زاڭلىق قىلغاندەك دەۋاتقان گېپىنى ما نىڭ ...»دېگەندەك نارازىلىق خىياللار كاللامدىن لىپ قىلىپ ئۆتۈپ كەتتى .                  ...بىراق ، يەسلى دەرۋازىسىدىن چىقىپلا ئۇنىڭ سۆزلىرىدىن نارازى بولۇشقا  قىلچە ھەققىم يوقلۇقىنى ھېس قىلىپ قالدىم .رەڭگارەڭ كىيىنىۋالغان ئۇيغۇر ئاياللار ( چوڭلارمۇ، ياشلارمۇ،، قىزلارمۇ  بار ئىدى ) توپ -توپ بولۇشۇپ  ئالدىراش كېتىپ باراتتى . ھېچقانچە ماڭمايلا ئەشۇ ئاياللار توپى ئىچىدە تېخى 3 كۈن  ئىلگىرى ئوغلىنىڭ  ئاتا - ئانىلار يىغىنىغا  : « دادام سىرتقا كىرا قىلىپ چىقىپ كەتكەن ، ئاپامنىڭ ۋاقتى يوقكەنتۇق شۇڭا ...» دەپ تىرنىقىنى تاتلاپ دۇدۇقلاپ باھانە كۆرسەتكەن ئوقۇغۇچۇمنىڭ ئاپىسىمۇ ئۇچرىشىپ ئۈلگۈردى ۋەتېخىمۇ ئىچىم ئاچچىق بولدى .( ھەر مەۋسۈم بېشىدا ئاتا - ئانىلار سۆھبىتى ئېلىپ بېرىپ بۇ مەۋسۈملۈك پىلانلارنى بىرلىكتە تەھلىل قىلاتتىم )                    1. بىز ئەسلى بايراملارنى بۇنچە ئۆتكۈزگىدەك قانچىلىك ئەھۋالدا ياشاۋاتىمىز ؟   بىزنىڭ ئىقتىسادىي ئەھۋالىمىز قانچىلىك ؟  ئۇ كۈنلەردە ( ئاياللار بايرىمى كۈنى ) ساتىراچخانا ، ھۆسىن تۈزەش ئورۇنلىرىنىڭ قانچىلىك ئۆچرەتلىكىنى ۋە بۇنىڭغا كەتكەن  پۇلنى دېمەيلا قوياي ، كەتكەن ۋاقىتچۇ ؟ بىزنىڭ ۋاقتىمىز شۇنچە ئەرزانمۇ؟ خالىغانچە ئۆرپ - ئادىتىمىزگە يات بايراملارنى  ئۆتكۈزگىدەك ؟ ھازىر قايسى دەۋر ؟ بىز قايەرگە بارماقچى ؟ مەنزىلىمىز زادى نەدە ؟   بىز كاللىمىزنىڭ شۇنچە ئاددىيلىقىدىن ، يوقىلاڭ ئىشلارغا ھېچقانداق تارتىشمايلا ۋاقتىمىزنى سەرىپ قىلالايدىغان « مەرت » لىكىمىزدىن ، شۆھرەتپەرەسلىكىمىزدىن ئائىلىمىز بىچارە ، مىللىتىمىز بىچارە ، مائارىپىمىز بىچارە  ھالغا چۈشۈپ قېلىۋاتمامدۇ ؟  بۇنى بىلىۋاتىمىز ، بىلگەچكە بىر قىسىم ئەرلىرىمىز ئەقىلنى بۇلغىغۇچى ئىسپېرت  بىلەن نېرۋىسى تورمۇزلانغاندا  شالىنى چاچرىتىپ سۆزلەيدىغان بوپ قالمىدىمۇ ؟  ئەمما كاللىمىز ساق ، ئىمانىمىز ساق ۋاقتىدا ئويلىنىپ باقتۇقمۇ ؟ كونىلاردا : « ئۆزۈڭگە چىڭ بول ، خوشناڭنى ئوغرى تۇتما »دىگەن ماقال بار . بىز ئۆزىمىزگە چىڭ بولالمىدۇق ، شۇڭا بارلىق نەرسىلىرىمىزنى بىلىپ -بىلمەي يۈتتۈرۈپ قويدۇق ھەم يۈتتۈرىۋاتىمىز . ئەتە -ئۆگۈن ھەممە نېمىسىدىن ئايرىلىپ قالغان ئەۋلاتلىرىمىز كىملەرنى ئوغرى تۇتۇپ كىملەردىن زارلىنىپ ياشاركىن ، ئۇلار كىملەردىن نەپرەتلىنەركىن ؟...                    2 . ئۇيغۇرلار ئەزەلدىن پەردىشەپكە دىققەت قىلىدىغان ، چوڭلارنىڭ ئالدىدىن توغرا ئۆتۈشنىمۇ توغرا كۆرمەيدىغان ناھايىتى ئەخلاقلىق مىللەت ئىدى .  بۇغۇ ھازىرقى بىر قىسىم پەرزەنتلەر ۋە ياشلار ئۈچۈن « كۈل قىز   » نىڭ چۆچىكىدەك ئاڭلىنىدىغان بولۇپ قالدىمىكىن دەپ ئويلايمەن . ھازىرچۇ ؟ رېستۇرانلاردا بىر شىرەدە ئانىسى ،يەنە بىر شىرەدە قىزى ھەتتا كېلىن ، قىينئانا دېگەندەك ئولتۇرۇپ قىقاس سۈرەن سېلىپ رېستۇراننى بېشىمىزغا كىيۋاتقان ، ئويناۋاتقان ... قېنى بىزنىڭ قېيىن ئانىنىڭ كۆزىگە تىكىلىپ قارىمايدىغان  كېلىن جۇۋانلىرىمىز ؟ ھايالىق قىزلىرىمىز ؟ ھەممىمىزنىڭ ئاغزىدا ھازىرقى ياشلار ، قىزلار ھاياسىز دېيىشىمىز ، جەمىيئەت بۇزدى دېيىشىمىز ،پەردىشەپسىز ئائىلىدە چوڭ بولغان قىزلىرىمىز قانچىلىك بولماقچىدى ؟ شۆھرەتپەرەسلىكنى ، ھاياسىزلىقنى ئۆگىنىدۇ ،داۋاملاشتۇرىدۇ ،خالاس .                     شۇنداق ،  ئايال بىر قولىدا بۆشۈكنى تەۋرەتسە يەنە بىر قولىدا دۇنيانى تەۋرىتىدۇ . بىراق بىزدە دۇنيانى تەۋرىتۋاتقانلار قانچىلىك ؟ دۇنيانى نېمە ئارقىلىق تەۋرىتىشى كېرەكلىكىنى بىلىدىغانلار قانچىلىك ؟                  دەۋرىمىزدە ئامىنە خانىمدەك  دېرىكتورلار ، راھىلە داۋۇتتەك ئالىملار ،رەيھان ئاپپايدەك مېھرىبان ئانىلارنىڭ    ( بىر -بىرلەپ ساناپ ئولتۇرمايمەن ) چىقىۋاتقانلىقىغا كۆز يۇمالمايمىز ، ئەمما قانچىلىك ؟ بۇ يەردە ئاياللار ھەممىسى دېرىكتور ، ئالىم... بولۇشى كېرەك دېمەكچى ئەمەسمەن ، پەقەت ھەقىقىي ئاياللاردەك ، مىللەتنىڭ ئانىسىدەك ياشايلى ! چۈنكى ئەۋلادلار بىزگە مۇھتاج ، ئۆينىڭ تۈۋرۈكى ، مىللەتنىڭ تۈۋرۈكى بولغان ئەرلەرمۇ بىزگە مۇھتاج ، مىللىتىمىز ھەقىقىي ئاياللارغا مۇھتاج . شۇنداق ئېيتالايمەنكى  ، پەرزەنتنى ياخشى تەبىيىلەشنىڭ ئۆزى مىللەتكە قوشقان ئەڭ زور ، ئەڭ ئۇلۇغ تۆھپە ! بۇ بىزنىڭ قولىمىزدىن ، ھەر قانداق بىر ئايالنىڭ قولىدىن كېلىدۇ !                                    ئاخىرىدا ئائىلىگە ئۈن - تىنسىز بارلىقىنى بېغىشلاۋاتقان ،ھەم ئائىلىنىڭ يۈكىنى كۆتۈرۈپ ھەم ھەر قايسى ساھەلەردە ئۆزىنىڭ بىر كىشىلىك ھەسسىسىنى قوشۇۋاتقان  ئاياللاردىن بۇ  خىياللىرىمنى توغرا چۈشىنىشىنى ئۈمىد  قىلىمەن .                                                           بالىلار  ۋە ئانا تىل                                ئىيۇل ئايلىرىنىڭ ئىسسىق بىر كۈنى ، ئوغلۇم بىلەن قىزىم ئۈچەيلەن كىتاپخانىدىن قايتىش يولىدا ، " ئاۋرال ماروژنىخانىسى " غا كىرىپ ماروژنى يەپ قايتماقچى بولدۇق . ھاۋا ئىسسىق بولغاچقا ئالاھىدە بېزەلگەن بۇ ماروژنىخانا ئادەمگە لىق تولغانىدى . يېنىمىزدىكى ئورۇندا ئوتتۇرا مەكتەپتە مەندىن بىر قارار يۇقىرى ئوقۇغان ئۈچەيلەن باللىرى بىلەن ئولتۇراتتى .  بىز ئۆز ئارا باش لىڭشىتىپ سالام قەرزىنى ئادا قىلغاندىن كېيىن ،ئۇلارنىڭ يېنىدىكى شىرەگە كېلىپ جايلاشتىم . ئۇلارنىڭ  باللىرى خەنزۇچە مەكتەپلەردە ئوقۇسا كېرەك بىر - بىرى بىلەن خەنزۇچە پارڭلىشىشقا باشلىدى ، تۇيۇقسىزلا  ئەمدىلا  4 كە كىرگەن قىزىمنىڭ يۇقىرى ئاۋازدا : " ئاپا ، نېمانداق قىلىدۇ ماۋۇ ئاكاشلار يەيدىغان نەرسىنىمۇ  بىسىممىللا دەپ يېمەي..." دېگەن سۆزى بىلەن تەڭ ئەتراپتىكىلەر بىزگە قاراشتى ۋە كۈلۈپ كېتىشتى . مەنمۇ ئۆزۈمنى تۇتالماي كۈلۈپ كەتتىم ، بۇ كۈلكىنىڭ ئىچىدە قىزىمنىڭ زېرەكلىكىدىن سۈيۈنۈش ھېسسىياتى ۋە ئاۋۇ ئولتۇرغان بالىلارغا ئېچىنىش ھېسسىياتىمۇ قوشۇلۇپ كەتكەنىدى .                شۇنداق ، مەنمۇ بىر ئوقۇتقۇچى . تىل ئۆگىنىشنىڭ تەخىرسىز تەلىپىنى تولىمۇ چوڭقۇر چۈشىنىمەن .  ئەمما ، "  باشقا مىللەتنىڭ تىلىنى ئۆگىنىش شەرەپ ، ئانا تىلنى ئۆگىنىش جىنايەت " ئىكەنلىكىنى تېخىمۇ چوڭقۇر چۈشىنىمەن . ئابدۇقادىر جالالىدىن ئۇستازنىڭ قايسىبىر ماقالىسىدا يېزىلغان مۇنۇ قۇرلار مېنى تولىمۇ قايىل قىلىدۇ : " ئانا تىل بىر ئادەمنىڭ ئادىمىيلىكىنى بەرپا قىلىشتا كەم بولسا بولمايدىغان ئامىل . كېيىنكى مۇرەككەپ بىلىشلەرنىڭ ئاساسىي پەقەت ئانا تىل بىلەنلا سېلىنىدۇ . ئانا تىل ئادەمگە ئادەم بولۇشنى ، نېمىنى سۆيۈش ۋە نېمىدىن نەپرەتلىنىشنى ئەڭ ياخشى ئۆگىتىدۇ . ئىنسان خاراكتېرى ئانا تىل ئارقىلىقلا ئۆزىنىڭ تاكامۇللىقىنى يارىتىدۇ .... "          مېنىڭ باشقىلارنىڭ باللىرىنى خەنزۇ چە مەكتەپلەردە ئوقۇتۇشىغا قارشى تۇرۇش ياكى پىكىر بېرىش ھوقۇقۇم يوق . مېنىڭ دېمەكچى بولغانلىرىم : بىز دۇنياغا پەقەت بىرلا قېتىم كېلىمىز ، بىرلا قېتىم ئاتا - ئانا بولۇشتەك ئۇلۇغ ھوقوققا ئېرىشەلەيمىز . باللىرىمىزغا تىل ئۆگىتىشنىڭ مۇھىملىقىنى چۈشەنگەندەك  پەرزەنتلىرىمىز ئۈچۈن ئېتىقاد ،  ئانا تىل ، ئۆرپ - ئادەت ،  قاتارلىقلارنىڭمۇ  ھاۋادەك  زۆرۈر ئىكەنلىكىنى چۈشىنەيلى . بۇ جەھەتتىكى تەربىيىنى ئائىلىدە كۈچەيتەيلى !             باللىرىمىز كىچىكىدىنلا ئۆز مىللىتىنىڭ تىلىنى پۇختا بىلىشكە ئانا مەدەنىيىتىنى چۈشىنىشكە ، ئۆز  ئەجداتلىرىنىڭ تارىخىنى بىلىشكە ، ئۆز خەلقىنىڭ ئېتىقادى بويىچە  قىممەت قارىشى يېتىلدۈرۈشكە ، ئېتىقادىنى مۇستەھكەملەشكە پۈتۈنلەي ھوقوقلۇق !!                                                         كۈندىلىك خاتىرەمدىن ئۈزۈندە                                        بۇ ئەتىيازنىڭ ھاۋاسىغا ھەقىقەتەن بىر نېمە دېمەك تەس جۇمۇ ؟ ئەتىگەن شۇنداق سەت تۇتۇلغان ھاۋا چۈشكە يېقىن پەرەڭدەك ئېچىلىپلا كەتتى ، لېكىن بوران چىقىۋاتىدۇ ، ئاڭلىساق ئۈرۈمچىدە قاتتىق بوران چىقىۋېتىپتۇ ............               خىزمەت يەنە شۇنداق ئالدىراش ، 9 - ئايدىن باشلاپ 1 - يىللىقلارنىڭ ئېلىپبە دەرىسىنى ۋە سىنىپ مەسئۇللىقىنى ئالغاندىن بېرى خىزمەت بېسىمىم تېخىمۇ ئېغىرلاپ كەتتى  . ئوماق قارا كۆزلىرىمگە شۇنداق ئامراقمەن ، ئۇلارنىڭ ئۆگىنىش بېسىمى ھەققىدە بەزىدە چوڭقۇر خىياللارغا چۆكىمەن . « قوش تىللىق » دەرسلىكلەر بالىلارنىڭ يەلكىسىنى ئوبدانلا بېسىۋالدى ، ئەممازە ، مەن دەرسكە كىرسەم بىچارە بالىلار ئاق قۇشقاچتەك ۋېچىرلىشىپ كېتىدۇ ،ئانا تىلدىن دەرىس بەرگەچكە كۆزىگە ئانىسىدەك كۆرۈنۈپ كېتەمدىمەنكىن تاڭ ؟ بىراق  باشقا پەنلەرنى بېرىدىغان ئوقۇتقۇچىلار بولسا قاقشاپلا چىقىدۇ ،  « بالىلار ھېچنىمە بىلمەيۋاتىدۇ ، ھازىر ئۆگەتكىنىمنى ھازىر  دەپ بېرەلمەيۋاتىدۇ ...» دەپ قاخشىغىنى قاخشىغان .... قانداق قىلارمىزكىن تاڭ ؟ تىل ئۆگىنىش ياخشى ئىش ، قانداقلا بولمىسۇن تىلنى بىلىمنىڭ ئورنىغا دەسسىتىۋالمىساق بولاتتى ، باللىرىمىز پەقەت جۇڭگو تىلىنىلا بىلىدىغان ،  ئىلىم - پەندىن ، بىلىمدىن خەۋىرى يوق ياكى چالا خەۋەردار بولۇپ چىقمىسىلا بولاتتى ............               دەرس ۋاقتىدا ، سىنىپىمدىكى  يادىكار  ئىسىملىك ئوقۇغۇچۇمنىڭ ئوڭ مەڭزىدىن بويلاپ قۇلىقىغىچە كۆكىرىپ قالغىنىنى  كۆرۈپ قالدىم ، تەنەپۇستە سىرتقا ئېلىپ چىقىپ نېمە بولغىنىنى سورىدىم. بىچارە بالىنى يەنە ئۆگەي ئاپىسى ئۇرۇپتۇ ....... ( بۇ ئىش ئالدىنقى مەۋسۇم بىر قېتىم يۈز بەرگەن ئىدى ) كىچىك بالىنى شۇنداقمۇ ئۇرغان بارمۇ ئەمدى ؟  ئانا بولماق ، بولۇپمۇ ئۆگەي بالىغا ئانا بولماقمۇ ئاسان ئەمەس ، ئەمما ، قانداقلا ئويلىماي پەقەت ئىدىيەمدىن ئۆتمىدى ، ئۆز بالىسى بولسا ھەر قانچە ئىش بولسىمۇ بۇنچە ئۇرماس ئىدى دەپ ئىچىم ئاچچىق بولدى ھەم ئاچچىقىم كەلدى . ئاچچىقىدا ئاتقان نەرسە تېگىپ كەتكەن بولسىدى ...  ئەمما بۇ كۆك قولدىن، بولۇپمۇ توختىماي تەگكەن قولنىڭ ئىزىدىن باشقا نەرسە ئەمەس ئىدى !...  ئۆزۈمنى تۇتالماي دادىسىغا تېلىفۇن قىلدىم  ، ئوغلىنىڭ يۈزىنىڭ  قۇلاقنىڭ كەينىگىچە كۆكىرىپ قالغانلىقىنى ، بۇ مەكتەپتە بولمىغان ئىش ئىكەنلىكىنى ، سۈرۈشتۈرۈپ مۇۋاپىق بىر تەرەپ قىلىپ ، دوختۇرغا كۆرسىتىپ بېقىشى كېرەكلىكىنى ئېيتتىم ، دادىسى ئارتۇق گەپ قىلمىدى .                     بۈگۈن بىر كۈن ئىچىم ئاچچىق بولدى ، ئاتا - ئانىلارغا شۇنداق دېگۈم كېلىدۇ : ئاتا - ئانىلار ، ئاجراشماڭلار ! بالىلىرىڭلار ئۈچۈن بولسىمۇ ئېغىر - بېسىق ، كەڭ قورساق بولۇڭلار، سىلەر مەيلى ساراڭ بولۇڭلار ياكى ئوڭ بولۇڭلار باللىرىڭلارنىڭ تۈۋرۈكى ،باللىرىڭلارنىڭ جەننىتى سىلەر ! ئېغىر - بېسىقلىق بىلەن ئويلاپ باقساڭلار ئاجرىشىش سەۋەبىڭلارنىڭ قانچىلىك ئاددىي ئەمما قانچىلىك شەخسىيەتچىلىك سەۋەبىدىن ئىكەنلىكىنى ھېس قىلىپ قالىسىلەر ، چۈشىنىپ قالىسىلەر . ئاتا - ئانا بولغۇچى ئۈچۈن يۈرەك پارىسى بولغان ئەشۇ بالىدىن ئارتۇق يەنە نېمە بار ؟ سىلەر تالاشقان ياكى ئاجرىشىشقا مەجبۇر قىلغان سەۋەپلەر ئەشۇ يۈرەك پارەڭلەردىنمۇ ئارتۇقمۇ ؟                 بالىلارنىڭ يۈكى بارغانسېرى ئېغىرلاشماقتا ،  كۆتۈرىۋالغان سومكىلىرى يەلكىسىنى باسقان ،  تاپشۇرۇق ، كۇرسلار بالىلارنى بالىلارچە خىياللاردىن ، بالىلارچە ئويۇنلاردىن يىراقلاشتۇرغان ھەم ئايرىۋەتكەن . ئەجىبا ، سىز ئۇلارنى دۇنيادىكى ئەڭ  ئىللىق ئائىلە مېھرىدىنمۇ ئايرىماقچىمۇ ؟ بۇنىڭلىق بىلەن سىلەر  نېمىلەرگە ئېرىشمەكچى ؟ بالىڭىز ئۈچۈن ، يۈرەك پارىڭىز ئۈچۈن بەردەم بولۇڭ ، قەيسەر ، سەۋىرچان بولۇڭ ، كەڭ قورساق بولۇڭ ، جۆرىڭىز ياكى تۇرمۇشتىكى ئۇششاق چۈششەك ئىشلار چۇقۇم ئۆتۈپ كېتىدۇ ، ئەمما بالىنىڭ مىسكىنلىكتە ، تىرىك يېتىمچىلىكتە ئۆتكەن كۈنلىرى ئۆتۈپ كەتسە بولمايدۇ ، ئۇلارنىڭ ھەر مىنۇتىغا جاۋاپ بېرىش بىز ئاتا - ئانىلارنىڭ ئەڭ يۈكسەك بۇرچى ۋە مەجبۇرىيىتى  !..............                  مەنبە :  خىياللىرىم

篮球美女

	ئەسسالامۇ ئەلەيكۇم سىز ھېلىقى ئالمىزاردىكى تۈركىناز شۇمۇ ياكى مەن خاتا تونىۋالدىممۇ ؟ئەمما بۇ خاتىرىڭىزدىكى بارلىق مەزمۇنلارنى كۆرۈپ نۇرغۇن نەرسىلەرنى ھېس قىلىپ يەتتىم ھەم جەمىيتىمىزدىكى بەزى ئىشلارغا قاراپ ئۇف دەپ چارچاپ قالدىم دىسە ......... خاتىرىڭىزدە خىلى بەلەن مەزمۇن بار چىغى بىزدىن ئايىماي يوللاپ تۇرغايسىز

nap--rat

	ئاتا - ئانىلارغا شۇنداق دېگۈم كېلىدۇ : ئاتا - ئانىلار ، ئاجراشماڭلار ! بالىلىرىڭلار ئۈچۈن بولسىمۇ ئېغىر - بېسىق ، كەڭ قورساق بولۇڭلار، سىلەر مەيلى ساراڭ بولۇڭلار ياكى ئوڭ بولۇڭلار باللىرىڭلارنىڭ تۈۋرۈكى ،باللىرىڭلارنىڭ جەننىتى سىلەر ! ئېغىر - بېسىقلىق بىلەن ئويلاپ باقساڭلار ئاجرىشىش سەۋەبىڭلارنىڭ قانچىلىك ئاددىي ئەمما قانچىلىك شەخسىيەتچىلىك سەۋەبىدىن ئىكەنلىكىنى ھېس قىلىپ قالىسىلەر ، چۈشىنىپ قالىسىلەر . ئاتا - ئانا بولغۇچى ئۈچۈن يۈرەك پارىسى بولغان ئەشۇ بالىدىن ئارتۇق يەنە نېمە بار ؟ سىلەر تالاشقان ياكى ئاجرىشىشقا مەجبۇر قىلغان سەۋەپلەر ئەشۇ يۈرەك پارەڭلەردىنمۇ ئارتۇقمۇ ؟

bugrafizikanit

	ئانا تىل        ھەقىقەتەن   بىر  ياخشى  تىما  ئىكەن   ،ئۆز  ئانا  تىلىمىز  ئۈچۈن  ئۆزىمىز   بىر  كىشلىك  ھەسسە قوشايلى  ،  ئانا تىلىمىز نىڭ  قەدىر -قىممىتى  ئۈچۈن  تىرشايلى.................!!!!!!!!!!!!!!!!!!!

sumayya0996

hiyal0097

	سىزمۇ ماڭا ئوخشاش ‹‹ خىيال›› چى ئىكەنسىز ھە ! بەك ياخشى يېزىپسىز !

sazguri

	sumayya0996 يوللىغان ۋاقتى  2012-4-3 09:17 PM ساۋادىڭىز يوقما ؟؟؟؟  ياكى قولىڭىز چوناقمۇ ؟؟

sazguri

	ھەقىقەتەن جەميەتنى كۆزتىش ئىقتىدارىڭىز يوقىرىكەن ....مەنمۇ بەزى ۋەقەلەرگە شۇنداق  كاللا يۈگۈرتۈپ كىتىمەن لىكىن خاتىرلەي دىگەندە ھېچنىمە كاللامدا يوق

nima︿japa

	ياخشى تىما يۇللاپسىز

jassurman

	راس، جەمئىيەتنى، باشقىلارنى چۈشنىشكە، كۈزتىشىكە ئۇستىكەنسىز. مىنىڭ سىزگە ھەۋىسىم كەلگەن يېرىم، 4 ياشقا كىرگەن قىزىڭىزنى شۇ دەرىجىدە ياخشى تەربىيلىگەنلىكىڭىز. بارلىق ئوقۇتقۇچىلارنىڭ سىزدەك ئوقۇغۇچى، پەرزەنتلەرگە ھەقىقى بىر ئۇستاز، يىتەكچى سۈپتىدە توغرا يولغا باشلىيالايدىغانلاردىن بولۇشىنى تىلەيمەن!