قىزىمغا دەيدىغانلىرىم

gulbar5

	قىز ئۇ ئېچىلمىغان سىر، بېسىلمىغان ئىز. قىزلارنىڭ بايلىقى ئۇنىڭ شەرمى–ھاياسى، ئەدەپ–ئەخلاقى بىلەن خاراكتېرلىنىدۇ. قىزلارنى گۇلگە ئوخشاتساق، ئەدەپ –ئەخلاق دەل ئۇنىڭ ئۆتكۈر تىكىنى. بۇ ئۆتكۈر تىكەن ئۆزىنىڭ ئۆتكۈرلىكىنى ساقلاپ قالالىسىلا ھەر قانداق قارا قول ئۇنىڭغا چېقىلالمايدۇ. سەن مەن بەرپا قىلغان گۈزەل باغدىكى ئەڭ يارقىن ،ئەڭ خۇشپۇراق گۈل . مەن ئۇزۇندىن بېرى سېنى ھەم سېنىڭ ئۆتكۈر تىكەنلىرىڭنى تومۇز ئىسسىقتىن، جۇت–شىۋىرغانلاردىن ساقلاپ كەلدىم، ئەمدى كۆڭۈل قەسىرىڭنىڭ ئالتۇن ئاچقۇچىنى ئۆز كۈچىڭگە تايىنىپ قوغدايدىغان ۋاقتىڭ كەلدى. سەن بىر ئەرگە ئايال بولىسەن، بىر بالىغائانا بولىسەن، بىراق شۇنىمۇ ئۇنتۇپ قالما، سەن ماڭا ئوخشاش بىرئانىغا كېلىنمۇ بولىسەن. سەن مېنىڭلا قىزىم ئەمەس، بەلكى سەن سۆيگەن، سېنى سۆيگەن ئەرنى بۇ دۇنياغا ئاپىرىدە قىلغان ئانىنىڭمۇقىزى. پەرزەنتنىڭ ئەڭ چوڭ ئارزۇسى ئاتا–ئانىسىنى رازى قىلىش.لېكىن بۇنىڭدىنمۇ ئۇلۇغ بىر ئارزۇ ھەم بۇرچ بار،ئۇ بولسىمۇمەيلى كۈيئوغۇل بولسۈن ياكى كېلىن بولسۇن قېيناتا–قېينانىسىنىڭ رازىلىقىنى ئېلىش. سېنىڭ كۆپرەك ۋاقتىڭ شۇلار بىلەن بىرگە ئۆتىدۇ،ئۇلارنىڭ رازىلىقىسىز سەن روناق تاپالمايسەن. ئۇلارنىڭ كۆڭلىنى رەنجىتىپ قويغان بولساڭ،ئۇلاردىن تۆۋەنچىلىك بىلەن كەچۈرۈم سورا،ئەگەر ئۇلار سېنىڭ دىلىڭنى رەنجىتىپ قويسا بەك كۆڭلۈڭگە ئېلىپ كەتمە. ئۇلارنىڭ دېگىنى توغرا بولىشىمۇ مۇمكىن، ئەشۇ بىر قېتىملىق دىل رەنجىتىشتىن سەن يېڭى بىر ھايات لوگىكىسىنى يەكۈنلەپ چىقالىشىڭ مۇمكىن. 　　قىزىم، ئەدەپ–ئەخلاقلىق،شەرم–ھايالىق بولۇشتىن باشقا يەنە شېرىن سۆزلۈك،گۈزەل تەبىئەتلىك بولۇشمۇ قىزلارغا خاس خۇسۇسىيەت. مەيلى زامان قانچە تەرەققى قىلسۇن ، كىشىلەر قانچىلىك دەرىجىدە ئۆزگەرسۈن، زامان قانچە رەڭدارلاشسۇن سېنىڭ چاچلىرىڭدىكى قارىلىق، مەڭزىڭدىكى قىزىللىق، قەلبىڭدىكى ئاقلىق ھەرگىز ئۆزگەرمىسۇن. چاچلىرىڭدىكى قارىلىقنى كۆرۈپ، يولدىشىڭ ئۆزىنىڭ مىللىي غۇرۇرىنى، كۈچلۈك ئېتىقادىنى ھەرۋاقىت ئەستە ساقلايدۇ؛ مەڭزىڭدىكى قىزىللىقنى كۆرۈپ، يولدىشىڭنىڭ كۆزلىرىدە مۇھەببەت– نەپرەت ئۇچقۇنلىرى ئۇچقۇندايدۇ؛ قەلبىڭدىكى ئاقلىقنى كۆرۈپ يولدىشىڭ ئائىلە ۋە جەمئىيەتكە بولغان مەسئۇلىيەتچانلىق تۇيغۇسىنى ھېس قىلىدۇ. ئۇلار يەنە پەرزەنتلىرىڭگە قانداق ياشاشنى ،قانداق ئادەم بولۇشنى،باشقىلارغا قانداق مۇئامىلە قىلىشنى ئۆگىتىدۇ. سۆزۈڭ شېرىن بولسا مۇز يۇرەكلەرنىمۇ ئېرىتەلەيسەن. شېرىن سۆز،كەڭ قورساق،ئەپۇچان بولساڭ ھەممىنىڭ ئېتىراپ قىلىشىغا ئېرىشەلەيسەن، قېينانا–قېيناتاڭمۇ تەبىئىيلا ساڭا ئامراق بولۇپ قالىدۇ. دۇنيادا ئۆز–ئارا كۆيۈنۈشتىنمۇ ئارتۇق مېھىر– مۇھەببەت، بەخت يوق قىزىم. سەن ئۆزئەمەلىيىتىڭ ئارقىلىق بەخت ۋە خۇشاللىق كۆزئالدىدىلا تۇرسىمۇ تۇتالمىغانلارغا ئۇنى قانداق تۇتۇشنى ئۆگىتىپ قويىشىڭ كېرەك. 　　قىزىم، ئاياللارنىڭ ئانا بولغاندىن كېيىنىكى ھاياتى ئۆزى ئۈچۈن ئەمەس، بەلكى يولدىشىڭ ۋە پەرزەنتلىرى ئۈچۈن داۋاملىشىدۇ. شۇڭا تۇرمۇشىڭدا ھەممىدىن ئاۋۋال ئېرىڭ ۋە پەرزەنتىڭنىڭ مەنپەئىتىنى ئالدىنقى ئورۇنغا قويىشىڭ كېرەك. مۇۋەپپەقىيەت قازانغان ئەرنىڭ ئارقىسىدا بىر قابىل، كۆيۈمچان، كەڭ قورساق ئايال بولىدۇ. بۇنىڭدىن كېيىنكى ھايات مۇساپەڭلاردا پەقەت سەنلا يولدىشىڭنىڭ بىردىنبىر قوللىغۇچىسى، ياردەمچىسى، يار يۆلىكى بولىسەن، شۇڭا سەن ئۇنىڭغا تېخىمۇ كۆپ مۇھەببەت ئاتا قىلىشىڭ كېرەك.   قىزىم، بالىنىڭ قانداق ئادەم بولۇپ چىقىشى ئانىنىڭ ئەخلاق پەزىلىتى بىلەن مۇناسىۋەتلىك. دادىنىڭ سۆز ھەرىكىتى قانچە مۇلايىم، مەدەنىي بولسىمۇ ئانىنىڭ ئەخلاقى ياخشى بولمىسا بالىنىڭ ياراملىق ئادەم بولالىشى تولىمۇ قىيىن. سېنىڭ قىممەت باھالىق كىيىم–كېچەكلىرىڭ، ئالتۇن جابدۇقلىرىڭ زىننەت ئەمەس، بەلكى ئالغان تەربىيەڭ زىننەتتۇر.ئالغان تەربىيەڭ قانچە مول ھەم ئەتراپلىق بولسا ئۇ سېنى تېخىمۇ گۈزەللەشتۇرىدۇ. قىزىم باشقىلارغا مۇلايىم، سىلىق سىپايە مۇئامىلە مۇئامىلە قىل. سېنىڭ مۇلايىملىقىڭ يولدىشىڭغا ئەرلىك خاراكتېر ئاتا قىلىدۇ. سېنىڭ ھەر بىر سۆز ھەرىكىتىڭ يولدىشىڭغا قانداق ئادەم بولۇشنى ئۆگىتىدۇ. سەن ئارقىلىق يولدىشىڭ ھۆرمەت تاپىدۇ. بۇنىڭ بىلەن سەنمۇ ھۆرمەتكە ئېرىشىسەن ،دەۋرنىڭ گۈلى بولىسەن. قېيناتا–قېيناناڭمۇئۆزىنىڭ سىلەردەك بىرجۈپ خۇشپۇراق گۈلىنىڭ باغۋىنى بولغانلىقىدىن ئىپتىخارلىنىدۇ. 　　قىزىم، قىزلار سىرىنى يوشۇرغانسېرى دانالىشىدۇ، جىسمىنى يوشۇرغانسېرى گۈزەللىشىدۇ، سەن سىرىڭنى باشقىلارغا ئېيتمىساڭلا، باشقىلار ھەرگىز سېنىڭ سىرىڭنى ئوغۇرلىۋالالمايدۇ، سىرىڭ سېنى دانالاشتۇرىدۇ، سىرىڭنىڭ بارلىقى قىممىتىڭنىڭ بارلىقىنى بىلدۇرىدۇ.جىسمىڭنى ھەر ۋاقىت يات كۆزلەردىن يوشۇر، قىسقا كىيىم بەدەننى ئېچىپ قويسا، كالتە پىكىر نادانلىقنى ئېچىپ قويىدۇ. 　　قىزىم ئاخىرىدا ساڭا دەيدىغىنىم ، مەيلى قانداق ئائىلىگە كېلىن بولۇپ كىرگىن ھەر ۋاقىت چوڭلارنى ھۆرمەتلە، كىچىكلەرنى ئىززەتلە،ئىشلاردا سەمىمىي، راستچىل، دادىل بول. تىلىڭ ھەر ۋاقىت شېرىن سۆزلۈك بولسۇن، ھەقنى سۆزلىسۇن،باشقىلار سېنىڭ تۇتقان ئۆيۇڭگە قاراپ ئەمەس، سېنىڭ تەربىيىلەپ يېتىشتۇرگەن بالاڭغا قاراپ ساڭا باھا بېرىدۇ. ھەر قانداق ئىشنى ئۆزۈڭدىن باشلا نەتىجىسىنى باشقىلاردىن سورا، شۇندىلا سەن پەرزەنتىڭ مەدھىيلىگەندەك ئانا، قېيناتا–قېيناتاڭ پەخىرلەنگۈدەك كېلىن، ئۆمۈرلۈك ھالال جۈپتىڭ ئىپتىخارلانغۇدەك ئايال بولالايسەن. (ئاپتور: قەشقەر يېڭىشەھەر ناھىيىلىك 1–ئوتتۇرا مەكتەپتە ) مەنبە <<شىنجاڭ  ئاياللار>>ژۇرنىلى  تورى

abdulahad

	تولىمۇ پاساھەتلىك سۆزلەر بىلەن تولغان ،تەربىيىۋى ئەھمىيەتكە ئىگە تىما بوپتۇ

SaN_Siz

	ياخشى يېزىلغان ماقالە ئىكەن ، ئەخلاق _پەزىلەت  شەرمى ھايا  ئىنساننىڭ ئېسېل مەنىۋى گۆھەرلىرى..

coral

	مانا بۇ ھەر بىر ئانىنىڭ قىزىغا دەيدىغان يۈرەك سۆزى بولسا كېرەك ، ئەمما ئۆيدىن ئايرىلىپ ياقا يۇرۇتتا سەرگەردان ئۇقۇغۇچى بولغاندىن كۈندىن  باشلاپ بۇ سۆزلەر بەزىدە ئىسىمزدىن چىقىپ كەتسە كېرەك ، مەنغۇ ئۇنچىۋالا ياغاچ قۇلاق ئەمەس لىكىن بەزىدە ئاپامنىڭ ماڭا بۇرۇن دائىم ‹كوتۇلداپ›دەيدىغان پەنىد-نەسھەتلىرىنى سېغىنىپ قالىمەن، ئەمدى چۈشەندىمكى ئۇمۇ ئەسلىدە بىر مىھر-مۇھەببەتكەن...!:qiray146

xungkarkader

	رھمەت تېمىڭىزغا!

شاھلالە

	ئوغلۇم ساڭا دەيدىغانلىرىمىنى قوشۇپلا يوللىۋەتىسڭىز جۈپى بولاركەن تاق بولۇپ قاپتۇ ھى ھى

سابا

	ئاللاھ  رەھمەت قىلسۇن  قېرىندىشىم ، ئىسىل تېما يوللاپسىز .  ھەر بىر ئانا بولغۇچىنىڭ قىزىغا دەيدىغان يۈرەك سۆزئىكەن  بۇ .

yamgur12

	راستلا ياخشى يېزىلىپتۇ.ئەجرىڭىزگە تەشەككۈر!

mosajan0997

	تولىمۇ پاساھەتلىك سۆزلەر بىلەن تولغان ،تەربىيىۋى ئەھمىيەتكە ئىگە تىما بوپتۇ

kokdangz

	رھمەت تېمىڭىزغا!تولىمۇ پاساھەتلىك سۆزلەر