مۇنبەر ئەزاسى HARSAN بىلەن مىسرانىمدا سۆھبەت

ARKZAT

	خەتتات  HARSAN  بىلەن مىسرانىمدا  سۆھبەت خەتتاتلىق-گۈزەل-سەنئەتكە مەنسۇپ ئىلىم بولۇپ، ئۇ ھەر مىللەت خەلقىنىڭ مەدەنىيەت تارىخىدا خېلىلا مۇھىم ئورۇن تۇتىدۇ. جۈملىدىن ئۇيغۇر خەتتاتلىق سەنئىتىمۇ ئۇزۇن شانلىق تارىخقا ئىگە بولۇپ، ئۇ خۇددى ئەدەبىيات-سەنئەتنىڭ باشقا ھەممە تۈرلىرىگە ئوخشاشلا خەلقىمىزگە تەربىيە بەرگەندىن  باشقا، كىشىلەرگە ئىستېتىك زوق بېغىشلاپ كەلمەكتە. خەلقىمىزنىڭ باي مەدەنىيەت تارىخىدىن ئەبەدىيلىك ئورۇن ئالغان مەشھۇر ئالىملار، ئەدىبلەر، سەنئەتكارلار ۋە نۇرغۇنلىغان جامائەت ئەربابلىرى ئۆز زامانىسىنىڭ مەشھۇر خەتتاتلىرىدىن بولۇپ، ئۇلار  خەتتاتلىققا ئالاھىدە يۇقىرى باھا بەرگەن ۋە خەتتاتلىق ساھەسىدە ئەڭ يۇقىرى سەۋىيەنى ياراتقاندىن باشقا، ئۇلاردىن مۇتلەق كۆپچىلىكى دىۋان ۋە غەزەلياتلىرىنى  ھۆسنىخەتلەر بىلەن يېزىپ قالدۇرغان. بۇنىڭدىن شۇنى مۇئەييەنلەشتۈرۈشكىمۇ بولىدۇكى، خەتتاتلىق ھەرگىزمۇ سەل قاراشقا بولىدىغان كەسىپ ئەمەس. خەتتاتلىق-ھۆسنىخەتچىلىك ساھەسىدە نۆۋەتتىمۇ تەۋەرۈك ئانا تىلىمىزنىڭ پاساھىتىنى نامايەن قىلىدىغان خەتتاتلار ئارقا-ئارقىدىن يېتىشىپ چىقىپ، بۇ ساھەدە ياخشى نەتىجىلەرنى قولغا كەلتۈرمەكتە. مەن دەۋرىمىز خەتتاتلىرىنىڭ ئەجىر-مېھنىتىگە رەھمەت ئېيتىش ۋە شۇ خەتتاتلار ئىزىنى بېسىپ، خەتتاتلىق ساھەسىدە جاپالىق ئىزدىنىپ، توردىن ئىبارەت بۇ چەكسىز تەشۋىقات بوشلۇقىدا خەتتاتلىقىمىزنى دۇنيادىكى ئەللەرگە نامايەن قىلىش ۋە ئۇنى تېخىمۇ تەرەققىي قىلدۇرۇش يولىدا دادىل ئىزدىنىۋاتقان خەتتاتلىرىمىزغا بولغان مىننەتدارلىقىمنى بىلدۈرۈش، بۇ جەھەتتە ئىزدىنىۋاتقانلار ئۈچۈن ئاز بولسىمۇ پايدىسى تېگىپ قالار دېگەن مەقسەتتە مۇنبىرىمىزدىكى خەتتات HARSAN ئەپەندى بىلەن ئۇيغۇر خەتتاتلىقى ھەققىدە سۆھبەت ئېلىپ باردىم. بۇ خالىس ئەمگىكىم خەتتاتلىقتىن ئىبارەت بۇ دېڭىزغا بىر قەترە بولۇپ قوشۇلالىسا، بۇ-مەن ئۈچۈن تولىمۇ زور خوشاللىق، خالاس!     خوش، ئەزىز قېرىنداشلار، ئەمدى دىققەت- نەزىرىڭلار تۆۋەندىكى سۆھبەت مەزمۇنىدا بولغاي.    ARKZAT :ئەسسالامۇ ئەلەيكۇم! HARSAN ئەپەندى، مەن بۇ قېتىمقى ئەزالار زىيارىتى ئارقىلىق  سىزنىڭ مۇنبىرىمىزدىكى نامىڭىزنىڭ مەنىسى، ھەقىقىي ئىسىم-فامىلىڭىز، خىزمەت، تۇرمۇش ۋە ئىجادىي پائالىيەتلىرىڭىز ھەققىدە  مۇنبەرداشلارنى خەۋەردار قىلسام قانداق قارايسىز؟  ئەگەر بۇ تەكلىپىمگە قوشۇلسىڭىز، مۇشۇ ھەقتە  قىسقىچە سۆزلەپ بېرەمسىز! HARSAN :ۋەئەلەيكۇم ئەسسالام!بولىدۇ. مۇنبەردىكى نامىم HARSAN ، بۇنىڭ باشقا ئالاھىدە مەنىسىمۇ يوق. مېنىڭ بۇ نامنى قوللىنىشىمدا مۇنداق بىر ئىش بار: مەن 2007-يىلى-5ئايلاردا بولسا كېرەك، تور دۇنياسىغا تۇنجى قېتىم قەدەم قويدۇم. شۇ چاغلاردا ئۇيغۇرچە ئۇلىنىش تورىنىڭ بارلىقىنى ئاڭلىغانىدىم.كېيىن مەنمۇ تورغا چىقىتىم، دەسلەپ ئۇلىنىشنى ئاران تېپىپ قارىسام، ئۇنىڭدا نۇرغۇن ئۇيغۇرچە توربىكەتلەر بار ئىكەن، باشتا بىر مەزگىل خالىغان توربىكەتلەرنى زىيارەت قىلىپ تۇردۇم .بىركۈنى  تاسادىپىي بىر تور بىكەتكە كىرىپ، «ئۇيغۇر خەتتاتلىقى» سەھىپىسىگە كۆزۈم چۈشۈپ قېلىپ، ئۇنى ئاچسام، نۇرغۇن ھۆسنخەت ئەسەرلىرى بار ئىكەن، بۇنى كۆرۈپ  خۇددى ئالتۇن تېپىۋالغاندەك  بەكلا خوشال بولۇپ كەتتىم. كېيىن  شۇ تور بىكىتىگە دائىم كىرىپ تۇرىدىغان بولدۇم. ئەپسۇس، كىرگىنىم بىلەن ئەزا بولمىغانلىقىم ئۈچۈن بەزى تېمىلارنى كۆرەلمەي يۈردۈم ۋە قانداق ئەزا بولۇشنىمۇ بىلمەي، يەنە بىر مەھەل گاڭگىراپ  يۈرۈپ، بىر كۈنى قارسام، توساتتىنلا « ئەزا بولۇش» دېگەن كۆزنەككە كۆزۈم چۈشۈپ قالدى-دە، بەكمۇ خۇرسەن بولۇپ كەتكەچكە، شۇ خوشاللىقىمدا ئەزالىق نامى دېگەن ئىسىم يازىدىغان يەر چىققاند، ھېچبىر ئىككىلەنمەيلا HURSAN دەپلا  يازسام، كىم بىلسۇن؟ كۈتمىگەندە،  «باشقىلار تىزىملىتىپ بولغان، باشقا ئىسىم تاللاڭ» دەپ چىقىۋىدى، بۇ ئىسىمنى باشقىلار ئىشلىتىلىپ بوپتۇ، ئەمدى قېنى بىرەر ھەرپنى ئۆزگەرتىپ سىناپ باقاي دەپ، HARSAN دەپ يېزىپ باقسام «مۇبارەك بولسۇن» دەپ چىقتى، ئەزا بولالىغان خوشاللىقىمدا، بۇ سۆزنىڭ  نېرى-بېرىسىنى سۈرۈشتۈرمەيلا تىزىملىتىپ، تاكى ھازىرغىچە خېلى كۆپ مۇنبەرلەردە مانا شۇ ئىسىمنى ئىشلىتىۋاتىمەن. ئەمدى، ئۆزۈم ھەققىدە توختالسام، مېنىڭ ئىسىم- فامىلەم:تۇرسۇنجان سابىر ،1968-يىلى 7-ئاينىڭ 27-كۈنى قەشقەر يېڭىشەھەردە دېھقان ئائىلىسىدە تۇغۇلغان.1976-يىلى ئائىلىمىز  ئىلى ئوبلاستىنىڭ مۇڭغۇلكۈرە ناھىيەسىگە تۇغقان يوقلاش سەۋەبى بىلەن بېرىپ، شۇ يەردە ئولتۇراقلىشىپ قالغان. باشلانغۇچ ۋە تولۇقسىز ئوتتۇرىنى مۇڭغۇلكۈرەدە تاماملاپ، 1985-يىلى شىنجاڭ ئاشلىق مەكتىپىنىڭ مالىيە بوغاتىرلىق كەسپىگە قوبۇل قىلىنىپ، 1988-يىلى قەشقەر يېڭىشەھەر ناھىيەلىك ئاشلىق ئىدارىسىغا خىزمەتكە تەقسىم قىلندىم.مەن ئەسلىي ئوقۇش تاماملىغاندىن كېيىن، مۇڭغۇلكۈرەگە قايتىمەن دەپ تۇرغان مەزگىلدە، ئاتا- ئانام مەكتەپ تەشكىلىگە ئىلتىماس قىلىپ، مېنىڭ قەشقەرگە قايتىشىمنى، ئۇلارمۇ ئارقامدىن كېلىدىغانلىقى توغرىسدا بىر پارچە خەت يېزىپتۇ.مەن ئەھۋالنى مەكتەپ تەشكىلىگە ئېيتقاندىن كېيىن، ئۇلار ئويلىشىپ باقىدىغانلىقىنى ئېيتتى ۋە كۆپ ئۆتمەستىن ئىلتىماسىمنىڭ تەستىقلىنىپ، قەشقەرگە كېلىپ، يېڭىشەھەر ناھىيەلىك ئاشلىق ئىدارىسىگە خىزمەتكە چۈشتۈم.كېيىن تۈرلۈك سەۋەبلەر بىلەن ئائىلىمىز قەشقەرگە قايىتىپ كېلەلمەي قالدى،شۇنىڭ بىلەن مەنمۇ تۇرمۇشلۇق بولۇپ، ئائىلە قۇرۇپ، پەرزەنتلىك بولۇپ خىزمىتىمنى داۋاملاشتۇرىۋەردىم. 1998-يىلى ئاشلىق ئوبروت تۈزۈلمە ئىسلاھاتىىدىن كېيىن، ھازىرقى خىزمەت ئورنۇم- يېڭىشەھەر ناھىيەلىك ئاشلىق- ماي سېتىۋېلىش، ساقلاش شىركىتىدە مالىيە باش بوغالتىرلىق خىزمىتىنى ئىشلەپ كېلىۋاتىمەن. مەن 1985-يىلىدىن باشلاپ خەتتاتلىققا چوڭقۇر ئىشتىياق باغلىدىم. 1987-يىلى ئۈرۈمچى شەھىرى بويىچە ئۆتكۈزۈلگەن نەق مەيداندا خەتتاتلىقتىن ماھارەت كۆرسىتىش مۇسابىقىسىدە ياشلار گۇرۇپپىسى بويىچە  3 -دەرىجىلىك مۇكاپاتقا ئېرىشىپ شەرەپ گۈۋاھنامىسى ئالدىم. 1992-يىلى «قەشقەر گېزىتى»دە بىرقانچە پارچە  ھۆسىنخەت ئەسىرىم ئېلان قىلىنغاندىن تارتىپ ھازىرغىچە بىر قىسىم مەتبۇئات ئورۇنلىرىدا ئاز-تولا  ھۆسىنخەت ئەسەرلىرىنى ئېلان قىلدۇردۇم. 2002-يىلى ناھىيەمىزدە ئۆتكۈزۈلگەن ھۆسنخەت ئەسەرلىرى مۇسابىقىسىدە بىرىنچى دەرىجىلىك مۇكاپاتقا ئېرىشتىم. 1998-يىللىرى دۆلەت ئىلكىدىكى كارخانىلار كەسكىن رىقابەتكە دۇچ كېلىپ ئىسلاھات دۇنقۇنلىرىدا گاھ چۆكۈپ، گاھ لەيلەپ،تۇرمۇش، خىزمەت ھەلەكچىلىكى بىلەن بولۇپ كېتىپ، ئۇزۇن مەزگىل خەتتاتلىق مەشىقى ۋە ئىجادىيەت ئىشلىرىنى ئىزچىل داۋاملاشتۇرالماي قالدىم. يەنە بىر سەۋەب- بۇ مەزگىلدە كىشلەر كومپىيۇتېردىن ئىبارەت بۇ دۇنياۋىي يېڭى تېخنىكىنى قوبۇل قىلىشقا باشلىدى. شۇنىڭ بىلەن تۈرلۈك ئېلان ،ۋىۋىسكا، تەشۋىقات ئىشلىرى كومپىيۇتېرلىشىپ كېتىپ،  كىشلەرنىڭ كۆزىنى ئالا-چەكمەن قىلىۋەتتى، خەتتاتلىقمۇ ئاستا-ئاستا پەسكويغا چۈشۈپ قالدى.مەن بۇ مەزگىلدە مەتبۇئاتلارغا  تۈزۈكرەك  ئېلان قىلمىغان بولساممۇ، ئەمما مەشىق قىلىشنى ئىزچىل داۋاملاشتۇرۇپ  كەلدىم.    ARKZAT :بىلىشىمچە، سىز  مەتبۇئاتلاردىمۇ خېلى كۆپ ھۆسن خەت ئەسەرلىرىنى ئېلان قىلىش بىلەن بىرگە، ئۇيغۇر مۇنبەرلىرىدىمۇ كۆپلىگەن  ھۆسن خەت ئەسەرلىرىنى ئېلان قىلىپ، بۇ جەھەتتە بەلگىلىك نەتىجىلەرنى ياراتتىڭىز. ئۇنداقتا، ئۇيغۇر خەتتاتلىقىنىڭ بۈگۈنى ۋە كەلگۈسىگە قانداق قارايسىز؟ مەنمۇ بىر تىل-يېزىق خىزمىتى بىلەن شۇغۇللىنىدىغان خادىم بولۇش سۈپىتىم بىلەن، مەيلى ھۆسن خەت ئەسەرلىرى، باشقا ئەسەرلەر ئىجادىيىتى ياكى كۈندىلىك خەت-ئالاقە ئىشلىرىمىزدا بولسۇن، تەۋەرۈك ئانا تىلىمىزنىڭ ھۆرمىتى ئۈچۈن بولسىمۇ، ئىملاغا دىققەت قىلىش-ھەممىمىزنىڭ يۈكسەك مەسئۇلىيىتى ۋە بۇرچى دەپ قارايمەن. بۇ نۇقتىدىن ئالغاندا، سىزنىڭ ھۆسن خەت يازغۇچىلارغا بۇ جەھەتتە قانداق تەكلىپلىرىڭىز بار؟ HARSAN: مەن يۇقىرىدا ئوتتۇرىغا قويغىنىمدىكىدەك 2007-يىلى تور دۇنياسىغا قەدەم قويۇپ، داڭلىق خەتتاتلار ۋە بەزى  ھەۋەسكارلارنىڭ ھۆسىنخەت ئەسەرلىرىنى كۆرۈپ، كونا ھەۋسىم قايتا قوزغالغاچقا، يەنە قولۇمغا قەلەم ئېلىپ مەشىىق ۋە ئىجادىيەت بىلەن شۇغىنلىنشقا باشلىدىم ۋە ئەسەرلىرىمنى مەبۇئات ۋە تور بەتلەرگە،  بولۇپمۇ، توربەتلەرگە ئىزچىل يوللاپ تۇردۇم. بۇ جەرياندا تورداشلارنىڭ ماڭا ياردىمى  خېلىلا زور بولدى. ئۇلار ھەر بىر ئەسرىمگە رەڭنى قانداق ماسلاشتۇرۇش،خەت نۇسخا ئۆلچىمى،ئىملا توغرىسىدا دائىم تەكلىپ ۋە تەنقىدىي پىكىرلەرنى بېرىپ تۇردى. بۇنىڭ مەن ئۈچۈن پايدىسى ئىنتايىن زور بولدى. مەن مۇشۇ پۇرسەتتە مېنىڭ ئەسەرلىرىمىگە دوستانە تەكلىپ ۋە تەنقىدىي پىكىر بەرگەن بارلىق تورداشلارغا چوڭقۇر رەھمىتىمنى بىلدۈرىمەن! مەن شۇنداق ئويلاپ قالدىم: بىز يېڭى شەيئىلەر بىلەن ئۇچىراشقاندا، ھامان قوبۇل قىلىشىمىز تېز بولىدىكەن، بۇنىڭدىن ھېچبىر ئىنسان ئەسلا مۇستەسنا ئەمەس.بىز كومپىيتردىن ئىبارەت بۇ دۇنياۋىي يېڭىلىقنى قوبۇل قىلىغاندىن كېيىن، ئۇنىڭ ئىقتىدارىغا قول قويماي تۇرالمىدۇق،بۇنى كۆپ سۆزلىسەم، تېمىدىن چەتنەپ كەتمەي يەنە. گەرچە ئۇيغۇر خەتتاتلىقنى مەن چوڭقۇر قېزىپ تەتقىق قىلىپ باقمىغان بولساممۇ، ئۇ ھەممىمىزگە تونۇش بولغىنىدەك خەلقىمىزنىڭ قىممەتلىك سەئەت بايلىقى.گەپ- بۇ سەنئەتكە قانداق ۋارىسلىق قىلىش، قانداق قوغداش ۋە قانداق راۋاجلاندۇرۇشتا! بۇنى خەتتاتلارغا تايىنىپلا  ساقلاپ قالغىلى، ۋارىسلىق قىلغىلى، راۋاجلاندۇرغىلى بولمايدۇ. بۇ، ئانا تىل- يېزىقىمىزنىڭ ئىگىسى بولغان ھەر بىرىمىزنىڭ ئاسىرىشى، پەرۋىش قىلىشى، كۆيۈنىشىگە باغلىق. شۇنداق بولغاندا، ئۇيغۇر خەتتاتلىق سەنئىتىمۇ ئۆز ئورنىنى، ئكز قىممىتىنى، پارلاق ئىستىقبال يپلىنى تاپىدۇ. يەردە  ئالاھىدە شۇنى تىلغا ئالىمەن: تۇغلان تور بىكىتنىڭ       بۇ جەھەتتىكى خىزمەتلىرىنى مۇئەييەنلەشتۇرۈشكە بولىدۇ.  ئۇ- كەڭ ھەۋەسكارلار ئۈچۈن ياخشى بولغان ئۈگىنىش مۇھىتى بىلەن تەمىلەپ، كەڭ تورداشلارنىڭ ياخشى باھاسىغا ئېرىشىپ كېلىۋاتىدۇ. ھازىر كۆپ ساندىكى تور بىكەت ناملىرى، شۇنداقلا بىر قىسىم دۇكان- سارايلارنىڭ  ۋىۋىسكىلىرى ھەمدە يېقىنقى يىللاردىن بۇيان نەشر قىلىنغان كىتاب مۇقاۋىلىرى، كىنو-تېلېۋىزىيە فىلىم ناملىرى ئاساسەن ئۆلچەملىك ھۆسىنخەت شەكىلدە يېزىلىۋاتىدۇ، بۇ كىشلىرىمىزنىڭ يەنىلا خەتتاتلىق سەنئىتىنى ئىتىراپ قىلغانلىقىنىڭ ئىپادىسى دەپ قارايمەن.  ئەمما بۇ جەھەتتە ساقلانغان مەسىلىلەرمۇ يەنىلا بار. شۇڭا مەن خەتتاتلاردىن، جۈملىدىن مەيلى قەلەم ياكى كومپىيۇتېردا خەت يازىدىغان ھەر بىر قېرىندىشىمدىن تىل-يېزىقىمىزنى توغرا ئىشلىتىشنى سەمىمىي ئۈمىد قىلىمەن.   ARKZAT  :ئەگەر مۇۋاپىق كۆرسىڭىز،  مىسرانىم مۇنبىرىمىزگە   خۇددى سىزگە ئوخشاش ھۆسن خەت ئەسەرلىرىنى يوللاپ كېلىۋاتقان يازما(تېما) ئىگىلىرى( ئەزالار) دىن ئۆزىڭىزگە بەلگىلىك تەسىر كۆرسەتكەن، مۇنبىرىمىز تېمىلىرىنىڭ كۆرۈلۈش قېتىم سانىنى ئاشۇرۇش ۋە مىسرانىم مۇنبىرىنىڭ بۈگۈنكىدەك  ئۇنىۋېرسال ئىقتىدارغا ئىگە نوپۇزلۇق مۇنبەرلەرنىڭ بىرى بولۇپ چىقىشى ئۈچۈن تۈرتكىلىك رول ئوينىيالىدى، دەپ قارىغان ئەزا ۋە تېما(ئەسەرلەر)لاردىن  ئۆزىڭىزنىڭ كۆز قارىشىڭىز بويىچە بىر قانچىنى كۆرسىتىپ  باقسىڭىز.HARSAN:مىسرانىم مۇنىرىگە ئىزچىل ھۆسىنخەت يوللاپ كېلىۋاتقان ئەزالاردىن calligrapher (ياسىن كېرىم)، xjksxettati، ilqin قاتارلىق بىر قانچىلا ئەزا بار. يېقىندا يەنە تەبرىزى(يۇنۇس قۇدۇس)، hiyal0097(شىرئەلى ئابلا)قاتارلىق تورداشلىرىمىزمۇ  بۇ سەپكە قوشۇلدى. مەن تېخىمۇ كۆپ خەتتات قېرىنداشلارنىڭ ئەزالىرى كۆپ، كۆرۈلۈش قېتىم سانى جىق، يوللانغان ئەسەرلەرگە ھەر قايسى جەھەتتىن ئەمەلىي باھا بېرەلەيدىغان ئۇقۇمۇشلۇقلار سانى كۆپ توپلاشقان مىسرانىمدەك مۇنبەرلەرگە مەرھەمەت قىلىشىنى تىلەيمەن.     ARKZAT: سىز  مىسرانىم مۇنبىرىگە دائىم دېگۈدەك  ھۆسن خەت ئەسەرلىرىنىلا يوللايدىكەنسىز. يوللانغان ئەسەرلىرىڭىزگە دىققەت قىلغاندا، ھۆسن خەت ئەسەرلىرى قىلىپ يېزىش ئۈچۈن تاللىغان ھېكمەتلىرىڭىز خېلى مەزمۇنلۇق ئىبارىلەر ئىكەنلىكىنى ھېس قىلىشقا بولىدۇ. بۇنىڭدا بىرەر «سىر»بارمۇ، قانداق؟ مۇۋاپىق كۆرسىڭىز، بۇ ھەقتىمۇ ئازراق چۈشەنچە بەرسىڭىز. HARSAN:  مەن ھەر بىر ھۆسىنخەت ئەسىرى  چوقۇم  ئۆزى ئىپادىلىگەن مەزمۇنغا لايىق بولۇشى كېرەك، دەپ قارايمەن. مەن ھۆسىنخەت ئەسىرى قىلىپ يېزىش ئۈچۈن كۆپۈنچە ئۇيغۇر خەلق ماقال-تەمسىللىرى ۋە ھېكمەتلىك سۆزلەرنى تاللايمەن. چۈنكى ئۇنىڭ بىر تەرەپتىن كىشلەرگە بولغان تەربىيەۋىي ئەھمىيىتى يۇقىرى بولسا، يەنە بىر تەرەپتىن ئۇ كىشىلەرنى زوقلاندۇرىدۇ. مەنلا ئەمەس، باشقا خەتتاتلارمۇ ئاساسەن، مانا مۇشۇنداق ئوبراشلىق ئىبارىلەرنى ھۆسن خەت ئەسەرلىرى قىلىپ يېزىش ئۈچۈن تاللايدۇ. شۇڭا بۇنىڭدا ھېچقانداق «سىر» يوق، پەقەت رەڭلا بار.            ARKZAT :سىز مىسرانىم مۇنبىرىگە ئەزا بولۇپ تىزىملىتىپ كىرىپ، ئىككى يىلغا توشمىغان قىسقىغىنە ۋاقىت ئىچىدە ئاددىي  بىر يېڭى ئەزادىن  مۇنبىرىمىزنىڭ ئالىي ئەزاسىغا، تېخىمۇ پەخىرلىنىشكە ئەرزىيدىغىنى- مۇنبىرىمىزدىكى  خەتتاتلىق ساھەسىدە خېلى تونۇلىۋاتقان  ئۈمىدلىك بىر خەتتات بولۇپ قالدىڭىز . مانا  مۇشۇ جەرياندا ئېنتىرنېت تور دۇنياسىدىن ھېس قىلغانلىرىڭىزنى تورداشلار بىلەن ئورتاقلىشىپ باقساق قانداق؟  سىزچە، مىسرانىم مۇنبىرىگە يەنە قانداق سەھىپىلەرنى قوشۇش ۋە قانداق سەھىپىلەرنى ئەمەلدىن قالدۇرۇش كېرەك؟  يەنە قانداق قىلغاندا،  مىسرانىم مۇنبىرى تېخىمۇ تاكامۇللىشدۇ؟ HARSAN:  بارا-بارا تېخىمۇ بىلىشكە باشلىدىم: تور دۇنياسى ئىتايىن كەڭ دائىرىدە بولىدىكەن. بىزدە نۇرغۇن تور بېكەتلەر بار ئىكەن، مەن دەسلەپتە  باشقا مۇنبەرلەرنىڭ ھەممىسنى دېگۈدەك بىر قۇردىن ئارىلاپ چىقىپ، ئاخرى مىسرانىم مۇنبىرنىڭ دائىملىق ئەزاسى بولۇپ قالدىم ۋە تېمىلىرىمنىمۇ ئاساسەن مىسرانىم مۇنبىرىگە يوللاپ كەلدىم. مېنىڭچە، مىسرانىمنىڭ نۆۋەتتىكى سەھىپىللىرىنى خېلى تولۇق دېيىشكە بولىدۇ. بىلىشىمچە،مىسرانىم مۇنبىرىدە ھازىر ئون چوڭ سەھىپە بار بولۇپ، تارماق سەھىپىلىرىمۇ  70 كە يېقىن. مىسرانىم مۇنبىرى مۇشۇ سەھىپىلەرنى ئاساس قىلىپ تەرەققىي قىلسا، تېمىلار تەكرارلىقتىن ساقلانسا دېگەن ئۈمىدتە مەن.  ھازىر «سىرداشلار كۆزنىكى» بەكلا ياخشى ئېلىپ بېرىلىۋاتىدۇ.  لېكىن ئارىلىقى بەك ئۇزۇن بولۇپ كېتىۋاتقاندەك ھېس قىدىم. ئەگەر شارائىت يار بەرسە، ئايدا بىر سان ئىشلىنىشكە كاپالەتلىك قىلنسا، «ئەزالار زىيارىتى سەھىپىسى» ئەسلىگە كەلتۈرۈلسە، بۇ ئارقىلىق تېخىمۇ كۆپ توداشلار بىلەن ئورتاقلىشىپ تۇرساق دەپ ئويلايمەن.    ARKZAT :  ئىگىلىشىمچە، سىز ئاشلىق ماي شىركىتىنىڭ مالىيە بوغالتىرلىق خىزمىتى بىلەن شۇغۇللىنىدىكەنسىز ھەم كۈنلىرىڭىز تولىمۇ ئالدىراشلىق ئىچىدە ئۆتىدىكەن، بۇ راستمۇ ؟ ئەمما قارىسام، دائىم دېگۈدەك مۇنبىرىمىزگىمۇ كىرىپ، خېلى ئەھمىيەتلىك تېما ۋە ئىنكاسلارنى يوللاپ تۇرىسىز. ئەگەر راست بولسا،  شۇنچە ئالدىراشلىق ئىچىدىن ئىجادىيىتىڭىز ئۈچۈن قانداق ۋاقىت چىقىرىپ بولايسىز؟ تۇرمۇشتىكى جىددىيچىلىك بىلەن خىزمەت ۋە باشقا ئىجتىمائىي پائالىيەتلەرنىڭ مۇناسىۋىتىنى قانداق قىلغاندا، مۇۋاپىق بىر تەرەپ قىلغىلى بولىدۇ؟   HARSAN : راست، مەن ئادەتتە بەكلا ئالدىراش ئۆتىمەن. شۇنداقتىمۇ، خىزمەتنى بىرىنچى ئورۇنغا قويىمەن. چۈنكى خىزمىتىمنىڭ مەسئۇلىيەتچانلىقى ئىنتايىن كۈچلۈك. خىزمەتتىن ئارىسال بولۇپ  قالساملا، دائىم مۇنبەرنى زىيارەت قىلىپ تۇرىمەن،كۆپىنچى چاغلاردا، كەچلەردە ئىجادىيەت ئىشلىرى بىلەن شۇغۇللىنىمەن ياكى مۇنبەردىكى بۇرۇن كۆرۈشكە ۋاقىت چىقرالمىغان تېمىلارنى كۆرىمەن. بۇنداق چاغلاردا خىزمەتتكى چارچاشلار تۈگەيدۇ.لېكىن ئۆزۈمنى زورمۇ -زور ئىجادىيەت قىلىشقا مەجبۇرلىمايمەن. ئادەم خىزمەت بىلەن دەم ئېلىشنى، دەم ئېلىش بىلەن ئۆزىنىڭ قىزىقىش-ھەۋىسىدىكى ئىشلارنى بىرگە ئېلىپ بېرىشقا ماھىر بولسا، سىرتتىكى كەلسە-كەلمەس باردى-كەلدىلەر، يانچۇق ئەل-ئاغىنىلىرى ۋە يەنە ئاللىقانداق مەنىسىز ئىشلار بىلەن ئۆمرىنى بىھۇدە ئۆتكۈزۈپ، كېيىن پۇشايماندا قالىدىغان تۇرمۇش ئۆكۈنۈشلىرىدىن ساقلىنىپ قالالايدۇ-دە، ھېچ بولمىغاندا، ئۆزىگە بولسىمۇ يۈز كېلەلەيدۇ.   ARKZAT  : سىز بىر مالىيە خادىمى بولۇش سالاھىتىڭىز بىلەن ئۆزىڭىزنىڭ كەسپىي جەھەتتىكى ئالاھىدىلىكى بويىچە، ئائىلە ئىقتىسادىنى قانداق باشقۇرۇش، ئۇنىڭدىن قانداق پايدىلىنىش، پەرزەتنتلەردە كىچىكىدىن باشلاپ پۇلغا نىسبەتەن قانداق قاراش تۇرغۇزۇش كېرەكلىكى ھەققىدە قاراشلىرىڭىزنى ئوتتۇرىغا قويۇپ باقسىڭىز.          HARSAN: مېنىڭچە، ئائىلە ئىقتىسادىنى باشقۇرۇشتا كىرىمگە قاراپ چىقىم قىلىش ،تېجەشلىق بولۇش ،كەلدى-باردى ئىشلارنىڭ خراجىتىنى نورمال يوسۇندا ئېلىپ بېرىش،ئىقتسادنى تاينى يوق ئىشلارغا  بىھۇدە بۇزۇپ-چېچىۋەتمەسلىك، تىجەشلىك قىلىمەن دەپ پىخسىقلىق قىلماسلىق، ھەممە ئىشنى ئۆز لايىقىدا ئېلىپ بېرىش، پەرزەنلەرگە ئائىلە ئىقتىسادىنىڭ قانداق جاپادا كېلىدىغانلىقىنى بىلدۈرۈش، مىڭ تەستە تېپىۋاتقان شۇ پۇلنىڭ قانداق ئىشلارغا ئىشلىتىلىۋاتقانلىقنى ۋە ئىشلىتىلسا بولىدىغانلىقىنى بىلدۈرۈش زۆرۈر. شارائىت بولسا، ئۇلارغا ئۆزى ئەمگەك قىلىپ پۇل تېپىش  پۇرسىتىنى يارىتىپ بېرىش، شۇ ئارقىلىق ئۇلاردا پۇلغا بولغان توغرا كۆز قاراشنى يېتىلدۈرۈش، بەزىدە يەنە پەرزەنتلەرگىمۇ نۆۋەت بىلەن ئائىلە ئىقتىسادىنى باشقۇرۇپ بېقىش پۇرسىتى يارىتىپ بېرىش كېرەك.شۇنداق بولغاندا، بالىلاردا تۇرمۇشقا نىسبەتەن كىچىكىدىن باشلاپ،بەلگىلىك تەجرىبە-ساۋاقلار يارىتىلىدۇ.   ARKZAT:  سىز مۇنبىرىمىزنىڭ كۈندىلىك ئەزىز ئىشتىراكچىلىرىنىڭ بىرى. نېمىلا بولمىسۇن،  دائىم دېگۈدەك تېما، ئىنكاسلىرىڭىز مۇنبىرىمىزدىن ئۈزۈلمەيدۇ. ھازىرمۇ مۇنبىرىمىزگە يوللىغان تىما-ئىنكاسلىرىڭىز 1250 پارچىدىن ئاشىدىكەن. مۇنبەر دېگەن مانا مۇشۇنداق دائىمىي ئەزالار بىلەن ئاۋاتلىشىدۇ. خالىسىڭىز، مۇنبەرداشلىرىمىزنى ئۆزىڭىزنىڭ بۇنىڭدىن كېيىنكى ئىجادىيەت  تەسەۋۋۇر-پىلانلىرىڭىز ھەققىدە ئاز-تولا چۈشەنچىگە ئىگە قىلامسىز؟ HARSAN: ئادەم ھامان  گۈزەل غايە، تولىمۇ كۆپ ئارزۇ- ئارمانلار بىلەن ياشايدۇ. مەنمۇ ئكز قىزىقىشىم بويىچە،  ۋاقىت تاپساملا ھۆسنىخەت ئەسەرلىرى يازىمەن، مۇنبەرگە يوللايمەن، ئۆزۈمگە ياققان مەزمۇنلاردىكى ئەسەرلەرگە قارىتا ئۆز كۆز قاراش-باھالىرىنى لىللا ئوتتۇرىغا قويىمەن. مۇنداقچە ئېيتقاندا، خەتتاتلىق بىلەن تور دۇنياسىنى سەير ئېتىش مېنىڭ دائىمىيلىق ئادىتىم. ئەمدى مەن ئۆزۈمنىڭ تىرىشچانلىقى، مۇنبەرداشلىرىمنىڭ سەمىمىي ياردىمى ۋە كۈچلۈك ئىلھاملىرى ئارقىلىق تېخىمۇ كۆپ نادىر ئەسەرلەرنى بارلىققا كەلتۈرۈپ، پۇرسەت پىشىپ يېتىلسە، ئۆزۈمنىڭ خەتتاتلىق ئەسەرلىرى كۆرگەزمىسىنى ئۆتكۈزسەم، ئەسەرلىرىمنى توپلاپ، كېيىنكى ئەجدادلىرىمىز ئۈچۈن يالداما سۈپىتىدە بىر توپلام قىلىپ نەشر قىلدۇرسام دەيدىغان ئارزۇ-ئارمىنىم بار. ARKZAT :مەن مىسرانىم مۇنبىرىمىز نامىدىن سىزنىڭ قىممەتلىك ۋاقتىڭىزنى چىقىرىپ، مۇنبەرداشلىرىمىزغا  ئۆزىڭىز ۋە خەتتاتلىقىمىز ھەققىدە  ئەتراپلىق  چۈشەنچە بەرگىنىڭىز ئۈچۈن رەھمەت ئېيتىش بىلەن بىرگە،  تېنىڭىزگە سالامەتلىك، خىزمىتىڭىزگە ئۇتۇق، بۇنىڭدىن كېيىنكى  ئىجادىيىتىڭىزگە مۇۋەپپەقىيەتلەرنى تىلەيمەن. HARSAN: مېنىڭ ئىجادىيىتىم ئۈچۈن كەڭرى سەھنە ھازىرلاپ بەرگەن مىسرانىم مۇنبىرىگە، ئاددىي  ھۆسنىخەت ئەسەرلىرىمنى ياقتۇرۇپ كۆرگەن بارلىق مۇنبەرداشلىرىمغا  مەنمۇ سەمىمىي رەھمىتىمنى بىلدۈرىمەن. ئويلىغانلىرىمنى يېزىچە ئىپادىلەش جەھەتتىكى ئىقتىدارىمنىڭ ئانچە يۇقىرى بولماسلىقى، ئەركزاتنىڭ بۇ قېتىمقى زىيارەتتە مەندىن سورىغان سوئاللىرىغا نىسبەتەن جاۋاب تەييارلاش پۇرسىتىمنىڭ  يېتەرلىك بولماسلىقى سەۋەبلىك جاۋابلىرىم تاققا- تۇققا بولۇپ قالغان بولۇشى مۇمكىن. شۇڭا تورداشلار ۋە كەسىپداشلىرىمنىڭ توغرا چۈشىنىشى، ماڭا، مېنىڭ ئىجادىيىتىمگە يېقىندىن مەدەت بېرىشى ۋە خەتتاتلىق جەھەتتىكى نۇقسانلىرىمنى كۆرسىتىپ بېرىپ، بۇنىڭدىن كېيىنكى ئىجادىيىتىمدە تېخىمۇ ياخشى ئەسەرلەرنى مۇنبەرداشلار ۋە بارلىق خەلقىمگە تەقدىم ئېتىشىم ئۈچۈن ماڭا قىممەتلىك تەكلىپ-پىكىرلەرنى بېرىشىنى  سورايمەن.                       سەمىمىي ئەسكەرتىش: ▲ مۇنبەردىشىمىز  HARSAN  ئەپەندىنىڭ تېمىلىرىنى كۆرۈشكە قىزىقسىڭىز، تۆۋەندىكى ئۇلىنىش ئادرېسىنى چېكىڭ:   /thread-65419-1-1.html خەتتات  HARSAN نىڭ يېڭى ھۆسنىخەت ئەسەرلىرى ئىنكاس سۈپىتىدە مۇشۇ تېما ئاستىغا يوللىنىدۇ. مۇنبەرداشلارنىڭ بۇ ھۆسنىخەت ئەسەرلىرىدىن بەھىرلىنىشىنى، ئاپتورنىڭ ئەسەرلىرىگە سەمىمىي تەكلىپ-پىكىرلەرنى، ئىلھام-مەدەتلەرنى بېرىپ، ئۇنىڭ بۇنىڭدىن كېيىنكى خەتتاتلىق ساسەسىدە تېخىمۇ ياخشى نەتىجىلەرنى قولغا كەلتۈرۈشى ئۈچۈن سەمىمىي تىلەكلەردە بولۇشىنى ئۈمىد قىلىمىز.   ▲  «ئەزالار زىيارىتى»نىڭ كېيىنكى سانلىرى ئۈچۈن ئۆزىڭىز ۋە باشقىلارنى نامزات قىلىپ كۆرسىتىشنى خالىسىڭىز، تېما ئاخىرىغا بۇ ھەقتە ئىنكاس يېزىپ قويۇڭ ياكى مەزكۇر تېما ئاپتورىغا ئۇچۇر قىلىڭ. «ئەزالار زىيارىتى»نىڭ تېخىمۇ مول ۋە ئەھمىيەتلىك مەزمۇنلار بىلەن تويۇنغان 4-سانىدا كۆرۈشەيلى!

harsan

	ئەسسالامۇ ئەلەيكۇم!مىىسرانىمنىڭ قىزغىن ئىشتىراكچىللىرى ياخشىمۇ سىلەر!كەمىنە تۇرسۇنجان سابىردىن  بارلىق تورداشلارغا ئالى سالام! مۇشۇ مۇناسىۋەت بىلەن مېنى قوللىغا ن بارلىق تورداشلارشا چوڭقۇر رەھمىتىمنى بىلدۈرۈپ تورداشلار ھوزۇرىغا ئاددى بولسىمۇ بۇ ئەسەرلىرىمنى سۇندۇم! تەكلىپ پىكىر بېرەرسىلەر.

كارۋان

	harsan يوللىغان ۋاقتى  2012-2-13 03:04 PM ئەسسالامۇ ئەلەيكۇم!مىىسرانىمنىڭ قىزغىن ئىشتىراكچىللى ... ۋەئەلەيكۇم ئەسسالام ئاكا مەنمۇ بىر قىسىم تورداشلارغا ئوخشاش سىزنىڭ ئەسەرلىرىڭىزنى ياقتۇرىمەن، ھەم ئىز قوغلاپ كۆرىمەن،اللا تىنىڭىزنى سالامەت ئىشلىرىڭىزنى ئۇڭۇشلۇق قىلسۇن.بۇ تېمىدىن سىزنى تېخىمۇ تۇلۇق چۈشەنگەنلىكىمدىن تولىمۇ خۇرسەنمەن.

kilyang

	ئەسسىلامۇ  ئەلەيكۇم سىزگە ھەم ئائىلىڭىزدىكىلەرگە سالامەتلىك بەخىتلىك تۇرمۇش يار بولسۇن ! مەن ئەدەبىياتچى يەنى ئىجتىمائىي پەنچى بولساممۇ  ھۆسىيىن خەتكە بەكمۇ قىزىقىمەن ھەم ياقتۇرۇپ ئوقۇيمەن ھەم ساقلايمەن ! نىيازكىرىم شەرقىي ئەپەندىم بلەنمۇ ئۈرۈمچى قاينام رىستۇرانى 3 - قەۋەتتە تۇنجى ئۇچراشقان ۋاقتىم ھازىرغىچە ئىسىمدە پەقەت كىبىرى يوق يەنى ئاچىچىقىنى بىر پارچە ھۆسىن خەت ئارقىلىق خۇشاللىققا ئايلاندۇرالايدىغانلىقىنى سۆزلەپ بەرگەن ئىدى تۇرسۇنجان سابىر ئەپەندىمنىڭمۇ ئىغىر بىسىق خۇش چىراي ئىكەنلىكى ئۆزىنى كەسىپكە ئاتىغانلىقى چىراي ئىپادىسىدىن چىقىپ تۇرىدۇ ! ھۆسىن خەت ئارقىلىقمۇ ئىنسانىيەتنى توغرا يولغا باشلىغىلى قەلبىنى ئىرىتكىلى بولىدۇ  سىزگە سالامەتلىك تىلەپ

hiyal0097

	بۇرادىرىمىز تۇرسۇنجان سابىر ئاكا بىلەن بىزنى تەپسىلى تۇنۇشتۇرغان مىسرانىمغا رەخمەت ، قەلىمىڭىز ھارمىسۇن قېرىندىشىم

XIJAAT520

	تۇرسۇنجان سابىر ئاكىمىزنىڭ تىنىنىڭ سالامەت ئىشلىرنى ئۇتۇقلۇق بولۇشىنى تىلەيمەن。

شاتئاي

	ئالدى بىلەن بىزگە خارسەن ئاكىمىزنى تەپسىلى تونۇشۇش پۈرسىتى يارىتىپ بەرگەن ئەرىكزات ئاكىمىزغا چىن دىلىمدىن رەھمىتىمنى بىلدۈرىمەن. ئەجىرنىڭ تىگى راھەت دېگەن ھەقىقەتەن توغرا. خارسەن ئاكىمىزنىڭ ئەسەرلىرىنى ياقتۇرۇىمەن. ھەمدە بۇنىڭدىن كېيىنكى بارىلىق ئىشلىرغا ئۇتۇق تىلەيمەن:qiray126

Kulkam803

	قولىڭىز ھەقىقەتەن گۈللەرگە تولغان ئىكەن ! بۇ سۆھبەت ئۈچۈن جاپالىق ئىزدەنگەن بارلىق «مىسرانىم»يۇرت ئەھلىگە ئالىي ئېھتىرام !   بۇ بىر پارچە مېنى تۇنجى ھاياجانلىق ھېسياتقا كەلتۈرگەن !!

dil@wur

	رەھمەت ...ئاكىمىزنىڭ تېنىگە سالامەتلىك . ئائىلىسىگە خاتىرجەملىك تىلەيمەن. ھەقىقەتەن ئېسىل چىقىپتۇ......

iltebir

	نېمىشقىكىن مۇشۇ ھۆسنىخەت ئەسەرلىرىنى كۆرسەم دىلىم باشقىچە يايراپ كىتىدۇ دىسە!