مېنىڭ دادامنىڭكىدەك پۇلۇم يوق !

nim-japa

	بەللىرى سەل مۈكچەيگەن ، كىيىنىشلىرى شۇنچىلىك ئاددى بۇ كىشى مېنىڭ مېھرىبان دادام . قەھرىتان سوغۇقتا تۇمىقىنى چۆكۈرۈپ كىيىپ تۈگۈلۈپ مېڭۋاتقان ، كەينىگە يېنىش-يېنىشلاپ قاراپ < سوغۇقتا تۇرماي كىرىپ كەت ، سېنى ئاللاھقا تاپشۇردۇم > دەپ كېتۋاتقان شۇ ئاددى كىشى مېنىڭ دادام . كۆڭلۈم شۇنداق يېرىم بولدى . مېنىڭ ئىشقا چۈشىدىغان خەۋىرىمنى ئاڭلاپ خۇشاللىقىدا ئىشىم بار ئىدى دېمەي ، سوغۇقنى سوغۇق دېمەي كەلگەن شۇ دادامنى بېكەتكە ئەچىقىپ يولغىمۇ سېلىپ قويالماي قېقىپ قويغان قوزۇقتەك تۇرۇپ قالدىم ، دادامنىڭ يىراقلاۋاتقان سىماسىغا قاراپ ، كۆز ياشلىرىم تۆكۈلدى ، دادامغا نېمە قىلىپ بېرەلەرمەن ھە ؟ بايا تېخى ئىشخانىدا ئولتۇرسام بىر ناتونۇش نومۇردىن تېلفۇن كەلدى ، - ئەسسالامۇ - ئەلەيكۇم . - ۋەئەلەيكۇم - ئەسسالام ، بالام ، مەن ! - دادا ؟ - ھە مەن ؟ - ھە ، سىز نەدە ؟ - مەن ئىدارەڭنىڭ ئالدىدا ، بالام ، بۈگۈن ماڭاي دېگەن ، شۇڭا ئۆينىڭ ئاچقۇچىنى ساڭا بەرگەچ خوشلىشاي دەپ چىقىشىم . 5 مىنۇت ۋاقتىڭنى چىقىرىپ چىقساڭ خىزمىتىڭگە تەسىر يېتەرمۇ ؟ - ياق ، ياق ، مەن ھازىر چىقاي . چاپىمنىمنى كىيىپلا ئىدارىنىڭ ئالدىغا يۈگۈردۈم . - ئاستا ماڭ ، ئاستا . ما بالىنى ، چوپچوڭ بولغاندىمۇ يۈگۈرۈپ يۈرەمسەن ؟ ھاسىرغىنىمچە دادامنىڭ ئالدىغا كېلىپ توختىدىم . - نېمانداق تۇيۇقسىز كېتىدىغان بولۇپ قالدىڭىز ؟ - دۇككان بەك تاقىلىپ كەتتى بالام ، بۇ يەردە بىكار يۈرەمدىم ئىشى يوق ئادەمدەك ، سەنمۇ بىر چىرايلىق ئىشقا چۈشتۈڭ ، مەنمۇ خاتىرجەم بولدۇم . - ئەمسە ساقلاپ تۇرۇڭ ، مەن رۇخسەت سوراپ چىقاي . - ياق ، ياق ، ما بالىنى ، گەپ ئاڭلا ، قايسى كۈنى بىر مۇنچە تەربىيە قىلدىم ، ياىشى ئىشلە ، كۈن ئۆتكۈزمە .......... - يەنە بىرەمدە چۈش بولىدۇ ، مەن بىلەن بىللە ئىشخانىغا كىرىپ ئولتۇرۇپ تۇرۇڭ ، چۈشلۈك تاماقنى بىللە يەپ ئاندىن مېڭىڭ . - بولدى ، باشقلىڭنىڭ ئالدىدا سەت تۇرىدۇ ، مە ما ئاچقۇچنى ، ما پۇلنى مۇئاشىڭ چىققۇچە ئىشلىتىپ تۇر . دادام ئۇنىمىغانغا ئۇنىماي پۇلنى قولۇمغا تۇتقۇزدى . - ئەجەپبىر دادا ، يولدا نېمە يەيسىز ؟ سوغۇقتا چىقىپ يۈرمىسىڭىزمۇ بولاتتى ، يېقىن بولمىسا يە ئارلىقمۇ . - سەن بىلەن خوشلىشىپ ماڭاي دېدىم . نان بىلەن چاي ئېلۋالدىم ، يولنىڭ تامىقىنى يېسەم زىيان قىلىدىكەن . دادام سومكىسىنى ئېچىپ ماڭا كۆرسەتتى . دىماقلىرىم ئېچىشتى . ئاخشام مەن ئىچىپ تاشلاپ قويغان ئىچىملىكنىڭ قۇتىسىغا چاي قاچىلىۋاپتۇ . ئارتۇق گەپ قىلالمىدىم . دادام بۇ يەرگە ئىككى ئابتۇبوس ئالمىشىپ كېلىدۇ ، ئەگەر مەن بولسام كېلەمتىم ؟ تېخى ئاپتۇبۇستا . ئۈچ تاش بېكەتكە قانچىنجى يول ئاپتۇبۇسى بارىدىغانلىقى سورىۋېلىپ مېنى قايتا - قايتا ئاللاھقا تاپشۇرغانلىقنى جېكىلەپ كېتىپ بارغان دادام..... كەينىمگە قايتتىم ، دادام ياشىنىپ قاپتۇ . بۇرۇن دادامنىڭ مېڭىشىغا يېتىشەلمەي پېشىگە ئېسىلىپ كېتىدىغان مەن ، مانا ھازىر دادامنىڭ ئېغىرلاشقان قەدەملىرى ، شۇنچە تېز ماڭسىمۇ ماڭا يېتىشەلمەي ھاسىراشلىرى .... مېنىڭ دادامدەك پۇلۇم يوق ، يەنە ئولتۇرۇشۇم تاكسى . مېنىڭ دادامدەك پۇلۇم يوق ، يەنە سەپەرگە ئېلىپ مېڭىشىم تەييار يېمەكلىك ۋە گازلىق ئىچىملىك . مېنىڭ دادامدەك پۇلۇم يوق ، يەنە بىرەر قېتىم ئاممىۋى تېلفۇندىن ئۇرمايمەن . مېنىڭ دادامدەك پۇلۇم يوق ، يەنە دوسلىرىم بىلەن تالىشىپ تۇرۇپ پۇل تۆلەيمەن . مېنىڭ دادامدەك پۇلۇم يوق ، يەنە تېخى ئۇچى ئاقرىپ كەتكەن ، پاشنىسى ئۇپرىغان ئاياقنى ھەرگىز كەيمەيمەن . مېنىڭ دادامدەك پۇلۇم يوق ، يەنە كۆكتاتلارنى يايمىدىن ئەمەس تاللا بازىرىدىن سېتۋالىمەن . مېنىڭ دادامدەك پۇلۇم يوق ، يەنە كىيىم ئالسام باھاسىغا قارىماي ماركىسىغا قارايمەن . مېنىڭ دادامدەك پۇلۇم يوق ، يەنە تېلفۇنۇمنىڭ سىرى چۈشۈپ كەتكىچە ئىشلەتمەيمەن . مېنىڭ دادامدەك پۇلۇم يوق ......................... ئەجەپ ۋاپاسىز بالىكەنمەن ، مېنى دەپ كەلگەن دادامنى < يۈرە دادا > دەپ قولىدىن تۇتۇپ ئاپىرىپ بېلەتنى ئېلىپ يولغا سېلىپ قويالمىدىم . ئەجەپ ۋاپاسىز بالىكەنمەن ، مېنى دەپ كەلگەن دادامنى < يۈرە دادا > دەپ قولىدىن تۇتۇپ ئاشخانىغا باشلاپ ئىسسىق بىر قاچا تاماق سۇنالمىدىم . ئەجەپ ۋاپاسىز بالىكەنمەن ، مېنى دەپ كەلگەن دادامنى < يۈرە دادا > دەپ قولىدىن تۇتۇپ تاكسىغا سېلىپ قويالمىدىم . بۇرۇن ، خىزمەتكە چىقسام دادام - ئاپامنى ئانداق باقىمەن ، مانداق باقىمەن دەپ ئويلاپ كېتەتتىم ، بىرىنىمۇ قىلالىمىدىم . دادامنىڭ كەينىگە يېنىش - يېنىشلاپ قاراپ < سوغۇقتا تۇرماي كىرىپ كەت ، سېنى ئاللاھقا تاپشۇردۇم > دېگەن ئاۋازى قۇلىقىمدىن كەتمىدى ، دادام مېنى دەپ شۇنچە يىراق يەردىن كېلەلىدى ، مەن نىمىشقا ئاپتۇبۇس بېكىتىگە بولسىمۇ بارمىدىم ؟ بۈگۈن دادامنىڭ سىماسى كۆز ئالدىمدىن كەتمەي شۇنداق بىئارام بولدۇم ، ئۆزەمنىڭ ۋاپاسىزلىقىدىن خىجىل بولغان ئوخشايمەن ، مېنى مۇشۇ ھەيۋەتلىك دەرۋازىنىڭ ئىچىدە ئىسسىق ئىشخانىدا ئولتۇرۇپ ئىشلەشكە ئېرىشتۈرگەن شۇ دادامنىڭ مېھنىتى ، دادامنىڭ پۇلى . لېكىن مەن بۇنى ئۇنتۇپ قېلۋاتامدىم قانداق ؟ ئېھ ئۇلۇغ ئاللاھ ، دادامنىڭ تېنىنى ئامان قىلغايسىز ، دادامنى بېقۋېلىشقا ، بالا باققانىڭ راھىتىنى كۆرسىتىشكە پۇرسەت بەرگەيسىز ، ئۇلۇغ ئاللاھ ، مېنىڭ دادامدەك پۇلۇم يوق ،لېكىن دادامنى ياخشى باققۇم بار ......... مەنبە : قاپاق كاللام . ( راس بولغان ئىش ، كۆڭلۈم بەك يېرىم بولغاچقا تاققا تۇققا چىقىپ قالسا توغرا چۈشىنىپ ئوقارسىلەر )

nawa

	ھۇ قاپاق كاللا.

doppamkok

	مىنڭ دادامدەك پۇلۇم يوق،بىنادا ئولتۇرمەن،،،،،،،،،،،،

پاۋىل

	مىنىڭ دادامدەك پۇلۇم يوق ئەمما كىچىك ماشىنىدا ئولتۇرۇپ ئىشقا بارىمەن . ئەمما دادم قەھرىتان قىشتىمۇ ئۈچ چاقلىق توكلۇك ھارۋىدا ئىشقا بارىدۇ.       مەن بۇنى نىمانداق كىچىكىپ ھىس قىلغان دىمەن.................ھە؟ نىم -جاپا ؟    بۇ سىزنىڭ نىمە دىگەن تەسىرلىك بايقىشىڭىز -ھە!   قېنى تورداشلار  سىلەر ئۈزۈڭلەردىن نىمىلەرنى بايقىدىڭلار؟

yawayi-0998

	ۋاي مىنىڭ دادامدەك پۇلۇم يوق . قاچان دادامدەك بولامە ... ئويلاپ باقسام دادامغا بىرەر نەرسە ئەپ بەرمەپتىمەن . بار ۋاقتىدا قەدرىگە يىتىلى . كەتكەندە بولسا يىغلاپ تۇردىغان گەپ . زىيان قىلدىكەن چىشىم ئاغرىيدىكەن . دوختۇر يىمە دىگەن ھەممىسى قۇرۇق گەپكە . بالام يىسۇن بالام كەيسۇن دىگەندەك . كىچىكىمىزدە بىلمەپتۇق ئەمدە ئويلىساق دە قويۇپتىكەن ئەمەسمۇ . ئاللاھ بارلىق  پەرزەنتلەرنىڭ كۆڭلىگە  ئىنساپ ھىدايەت ئاتا قىلسۇن...

xah!

	ئەسەرلىرىگە قايىلمەن بۇ قىزنىڭ

zapar

	شۇنداق تەبئى چىقپتۇ، ئۇقۇغان كىشىمۇ تەبئىيلا ئەسەرگە سىڭىپ كىتىكەن، دادىڭىزغا نىم جاپا دەيمەن.ھەي:qiray132

albax

	دادامنىڭ مىنىڭدەك پۇلى يوق ، پۇللىرىنىڭ ھەممىنى بىزنى ئۇقۇتىمەن دەپ تۈگىتىپتىكەن !  خىزمەتكە چىققاندىن كىيىن  مىنىڭ تاپقىنىمنى قانداق ئىشلەتسە مەيلى دىسەم ئەمدى دادام  يوق ! كۆڭلۇمگە تەسەللى بىرىدىغىنى ھەرھالدا ئاپام بار ، لېكىن مىنى ئاياپ مىنىڭ بەرگەن پۇلۇمنى ئاساسەن ئىشلەتمەيدۇ !

turgun0997

	مىنىڭ دادامدەك پۇلۇم يوق لىكىن كۈندە تورغانىدا ئوينايمەن ،دادام بولسا رادىئونى يىنىدىن ئايرىمايدۇ. مىنىڭ دادامدەك پۇلۇم يوق لىكىن كۈندە ئولتۇرۇشلاردىن قالمايمەن، دادام بولسا ھەر كۈنى ئاشۇ مەھەللىمىزنىڭ دوقمۇشىدا دوست يارەنلىرى بىلەن مىنىڭ كەلگۈسۈم توغرىلىق پاراڭلىشىدۇ . ھەي توۋا بىز ئۆزگەردۇقمۇ ياكى زامان ئۆزگەردىمۇ  ۋەياكى زامان بىزنى ئۆزگەرتتىمۇ.

ARKZAT

	«مېنىڭ دادامدەك پۇلۇم يوق»مۇ ياكى«مېنىڭ دادامنىڭكىدەك پۇلۇم يوق»مۇ؟  ئەگەر  «مېنىڭ دادامدەك پۇلۇم يوق » بولغاندا، ئۇنداقتا،«دادا-پۇل»مۇ؟   ئەسەر يېزىشتىن ئاۋۋال، شۇ ئەسەردىكى ھەر بىر ئېغىز گەپ-سۆزلەرنىڭ لوگىكىغا ئۇيغۇن، تىل ئادىتىمىزگە ماسلاشقان، راۋان، مۈجىمەللىكتىن خالىي بولۇشىنى كاپالەنلەندۈرۈپ بولۇپ، ئاندىن ۋەقەلىك-بايانلىرىغا ئاتلانساق. چۈنكى تەۋەرۈك ئانا تىلىمىز بىزدىن توغرا ئىشلىتىشنى تەلەپ قىلىدۇ!    ئەسلى تەھرىرلەپ قويۇشنىمۇ ئويلىغانتىم، ئەمما ئاپتورنىڭ ئاپتورلۇق ھوقۇقىغا ھۆرمەت قىلىپ، سەمىمىي تەكلىپ بەردىم. باشقا مۇنبەرداشلىرىمىزمۇ بۇ ھەقتە ئويلىنىپ باقسا بولىدۇ!

mesranjan

	مىنىڭ دادامنىڭكىدەكدەك پۇلۇم يوق:qiray10چىقىشىم تاكسى، دادامغاتاكسىغاچىقايلى دىسەم يول مىڭىش سالامەتلىككە پايدىلىق دەيدۇ. مىنىڭ دادامنىڭكىدەكدەك پۇلۇم يوق،ئشلىتىشىم ئسىل تىلفۇن:qiray128دادىدەك جاپاكەش ئنسان، ھەقىقەتەن قەدىرلەشكە ئەرزىيدۇ:qiray161:qiray146 http://www.tudou.com/v/bTco4wN9I7I/&resourceId=0_04_02_99/v.swf بۇنىمۇ كۆرۇپ قويايلى!!!

Jim

	ھەممىمىزنىڭ ئەتراپىدا بار ئەمما ھىس قىلىپ دىققەت قىلمايۋاتقان ھەقىقى ئىشلاركەن .   قېرىلار يالغۇزسىراپ قالمىسۇن ،ئۇلارنى يوقلاپ تۇرىلى ،ۋاقتىم ئالدىراش دىگەنلەر ساپ يالغانچىلار. ئاتا-ئانىمىز قېرىغاندا بىزنىڭ كۆيۈنىشىمىزگە ،ھالىدىن خەۋەر ئېلىشىمىزغا كۆپرەك بىللە بولىشىمىزغا ...مۇھتاج.

peyaz

	قاپاق كاللانىڭ بۇ ئىشى ھەقىقەتەن تەسىرلىك چىقىپتۇ . يىڭى خىزمەتكە چىققىنڭىزنى تەبرىكلەيمەن ، ئەمدى چوڭلارغا تايىنىۋالماي ئۆز ئالدىڭىزغا ياشاشنى ئۇگىنىڭ ، دەم ئىلىش مەزگىلىدە يۇرتىڭىزغا قايتقاندا دادىڭىزغا ئاددى بولسىمۇ سوۋغا ئىلىشنى ئۇنۇتماڭ !! ياخشى ئىشلەڭ ، ئىقتىسادچان بولۇڭ !! ھۇ قاپاق باش !!

nim-japa

	ARKZAT يوللىغان ۋاقتى  2012-1-11 09:31 AM «مېنىڭ دادامدەك پۇلۇم يوق»مۇ ياكى«مېنىڭ دادامنىڭكىد ... ئەسسالامۇ - ئەلەيكۇم ، ئاخشام شۇ ناچار كەيپىياتتا يازغان بولغاچقا لوگىكىلارغا تازا دىققەت قىلالماپتىمەن . دېگىنىڭىز  توغرىكەن . بۇندىن كېيىن دىققەت قىلاي .

datba

	بۇ تەسىرلىك بايقاشلىرىڭىزدىن بەك تەسىرلەندىم ، شۇنداقلا مىنى چوڭقۇر ئويغا سېلىپ قويدى، ھېلىمۇ دادىڭىز ھايات ۋاختا ھېس قىپ يىتىپسىز ...... ئۇلار كەتكەندە پۇشايمەن قىلساقمۇ ئورنىغا كەلمەيدۇ .