30 ياشتىكى ‹مۇھەببەت › كەچمىشى

shoruq

	(ئەسكەرتىش بۇ ئەسەر مېنىڭ تور دۇنياسىدا يازغان تۇنجى ھېكايەم. ھەرقانداق مۇنبەر، تور بىكەت، بىلوگلارغا يۆتكەپ ئىشلىتىشكە بولمايدۇ)     بۇ ھېكاينى راست يۈز بەرگەن دەپ ئويلىسىڭىزمۇ مەيلى، توقۇلما دەپ ئويلىسىڭىزمۇ مەيلى. ئەمما ئەيسا بىلەن بەرنانىڭ ئۈچ ئاي جەريانىدىكى كەچۈرمىشلىرى ۋە ئۇلارنىڭ ھايات مۇساپىسىدىكى كىشىنىڭ يۈرەك تارىنى ئەزگۈدەك ئەسلىمىلىرىنىڭ ھەرقايسى يەرلەردە بىلىم ئاشۇرىۋاتقان كادىرلىرىمىزغا، ئالى مەكتەپتە ئوقۇۋاتقان ئوقۇغۇچىلىرىمىزغا ئىبرەت ھەم تەربىيە بولۇپ قېلىشى ئۈچۈن كومپېيۇتېر ئالدىدا كۆپچىلىك ئۈچۈن قەلەم تەۋرىتىپ ئولتۇرۇپتىمەن. بۇ ھېكايە بەكمۇ ئۇزۇن، بەكمۇ ئۇزۇن. تورداشلار خالىسا ھەم قوللاپ بەرسە تەپسىلى ھەم قىسقا ۋاقىت ئىچىدە يېزىپ تۈگىتىشكە تېرشىمەن. تورداشلاردىن ئوتۇنۇشۇم، ھېكايىنىڭ ئاخىرى چىققۇچە ھېكايىنىڭ يېشىمى توغرىسىدا قالايمىقان پەرەز قىلىمىسا.         بۇ ھېكايە ئىچكىرى ئۆلكىنىڭ مەلۇم مەركىزى شەھرىدە يۈز بەرگەن.                                                                           (  1 )       ئەيساجان، ئەر، 30 ياش، ئالى مەكتەپنىڭ تولۇق كۇرس سەۋيىسىگە ئىگە.ساياھەت قىلىشقا ئامراق، تۇلا كىتاب بىلەن ھەپىلەشكەچكە تولىمۇ رومانتىك. قارىماققا سىرتقى كۆرۈنۈشى شۇنداق ئاددى، ئەمما ئىچكى دۇنياسى سەل- پەللا ئىلىشىپ قالغان ئادەمنى مەپتۇن قىلماي قالمايدۇ. ئالتە يىل ئىلگىرى توي قىلغان. شۇنداق ئۇماق ئىككى بالىسى بار. جەنۇبى شىنجاڭنىڭ مەلۇم شەھرىدە خىزمەت قىلىدۇ. خىزمەت ئىھتىياجى بىلەن ئىچكىرى ئۆلكىگە ئۈچ ئايلىق بىلىم ئاشۇرۇشقا كەلگەن.      بەرنا، 29 ياش، ئالى مەكتەپنىڭ تولۇق كۇرس سەۋيىسىگە ئىگە. ئۇ  نۇرغۇنلىغان جەبىر- جاپالاردا تاۋلىنىپ  قەيسەر، ئىرادىلىك چوڭ بولغان بولسىمۇ ھاممىسىنىڭ تەسىرى بىلەن ئوچۇق، شوخ مىجەزنى يېتىلدۇرگەچكە  چاقچاق- يۇمۇرلارنى، ناخشا- ئۇسۇللارنى خېلىلا كەلتۈرۈپ قويىدۇ. ئۇ نىمىشىقىدۇر يېشىغا قارىغاندا ئوبدانلا كىچىك كۈرۈنىدۇ. ئۇزۇن سۇمبۇل چاچلىرى، بىر جۈپ زىناقلىرى، چۆچۈرىدەك قۇلاقلىرى،شەھلا كۆزلىرى ئۇنى شۇنداق ئۇماق كۆرسىتىپ تۇرىدۇ.ئىككى يىل ئىلگىرى توي قىلغان،شۇنداق تاتلىق بىر بالىسى بار. شىمالىي شىنجاڭنىڭ مەلۇم شەھرىدە خىزمەت قىلىدۇ. ئەيساغا ئوخشاشلا خىزمەت ئىھتىياجى بىلەن ئىچكىرى ئۆلكىگە بىر يىللىق بىلىم ئاشۇرۇشقا كەلگەن.     تەقدىر مانا مۇشۇنداق ئۇسۇللار بىلەن بۇ ئىككى قەھرىمانىمىزنى بىر مەكتەپنىڭ ئىككى سىنىپىغا ئەكىلىپ تاشلىدى. ئۇلار بۇ كاتتا، گۈزەل، قەدىمىي شەھەرگە تۇنجى قېتىم كەلگەن بولغاچقا ئۆزلىرىنىڭ خۇشاللىقىنى باسالماي قېلىشتى. بولۇپمۇ ئەيسا جەنۇبى شىنجاڭدىن كەلگەچكە،ئىلگىرى شۇنچە كۆپ يەرلەرنى ساياھەت قىلغان بولسىمۇ  يەنىلا سۇ- دەريالارغا، يىشىل ئورمانلار بىلەن پۇركەنگەن يىل بويى بىر خىل تۇرىدىغان تاغلارغا، بىر كۈندىمۇ ئايلىنىپ تۈگەتكىلى بولمايدىغان باغچىلارغا ئۇنىڭ باغرى قانمايلا ئۆتۈپ كېتىۋاتقان ئادەم. بەرنامۇ بۇ گۈزەللىكتىن بەھىرلىنىشنى ئوخشاشلا قولدىن بېرىشنى خالمايدۇ. مانا مۇشۇنداق ئىچكى تۇيغۇلار، گۈزەل مەنزىرىلەر ئۇلارنىڭ تونۇشۇشى ئۈچۈن يىتەرلىك شارائىت يارىتىپ بېرىدۇ.   مەكتەپكە كېلىپ 10 كۈنلەردىن كېيىن بۇ شەھەرنىڭ ئوي- چوڭقۇرلىرىنى ئانچە- مۇنچە چۈشىنىپ قالغان، بىر قانچە باغچا- ساياھەت ئورۇنلىرىغا بېرىشقا ئۈلگۈرگەن ئەيسانى يالغۇزلۇق ھېسلىرى چىرمىۋالىدۇ. شۇڭا ئۇ دائىم، شۇنچە چوڭ كۆللەرنى، كۆلدىكى قولۋاقلارنى ئۆزى يالغۇز ئايلانسا نېمە دېگەن مەنىسىز-ھە؟ ئايالىم بولسا، نىمىدېگەن پەيزى بولاتتى، بىراق ئايالىمنىڭ بۇنداق يىراق يەرگە كەلمىكى ئاسان ئەمەستە... ، دېگەندەك خىياللار ئىچىدە يۈرۈيدۇ. ئەيسا بىر كۈنى چۈشتىن كىيىن مەكتەپ ئەتراپىدىكى بىر  دەرىجىدىن تاشقىرى تاللا بازىرىنى ئايلىنىۋاتقاچ تۇنجى قېتىم بەرنانى ئۇچرىتىدۇ. ئىچكىرى ئۆلكىلەرگە كەلگەنلەر بىلسە كېرەك. بۇ يەردە بىرەر ئۇيغۇرنى ئۇچىرىتىش شۇ ئادەمگە شۇ كۈندىكى ئەڭ مەنىلىك، ئەڭ كاتتا ئىش بولۇپ قالىدۇ. ئەيسا بۇ مەكتەپكە شىمالىي شىنجاڭدىنمۇ بىر تۇركۇم بىلىم ئاشۇرىدىغان ئوقۇغۇچىلارنىڭ كەلگەنلىكىنى ئاڭلىغان بولسىمۇ، بىرى  تەربىيلىنىش مەزمۇنى ئوخشىمايدىغانلىقى، يەنە بېرى بۇ مەكتەپ ناھايىتى چوڭ بولغانلىقى سەۋەبلىك ئۇلار بىلەن كۈرۈشۈپ باقمىغان ئىدى. ئۇنىڭ ئۈستىگە 10 نەچچە كۈندىن بىرى بىكار بولسىلا سىرتقا قاتراپ ساياھەت بىلەن ئالدىراش بولۇپ كەتكەچكە ئۇلار بىلەن دوقۇرۇشۇپ قېلىش پۇرسىتىمۇ بولمىغان ئىدى. ئۇنىڭ بىلەن بىللە كەلگەنلەرنىڭ كۆپ قىسمى ئۆزىدىن چوڭ بولغانلىقى ھەم ئۇلارنىڭ ساياھەت قىلساق ھېرىپ قالىمىزكەن، كۆپ ساياھەت قىلغاننىڭ نىمىگە پايدىسى دېگەندەك توخۇ تۈكىدەك تايىنى يوق سەۋەبلىرى بىلەن ئەيسانىڭ ئىچ- پۇشۇقى تېخىمۇ ئەدەپ كەتكەنىدى.    ئەيسا ئانچە گۈزەل بولمىسىمۇ ئۆزىدىن خېلىلا كىچىك، ئۇماققىنە ئۇيغۇر قىزىنى كۆرۈپ دەماللىققا نىمە قىلارنى بىلەلمەي قالدى. بىر ئاز ئۆتكەندىن كېيىن ئۆزىنى تۇتىۋېلىپ بالىلار كىيىم- كىچەكلىرىنى مۇنداقلا كۆرۈپ قويۇۋاتقاندەك مەخسەتسىز ئايلىنىپ يۈرگەن قىزغا سالام قىلدى: - ئەسسالامۇئەلەيكۇم!   قىز  ئۇنى بايقىمىغان بولسا كېرەك. ئويلىمىغان سالامدىن چۈچۈپ كەتتى ۋە ئوتتۇرا بويلاردىكى يۇرتدىشىنى كۈرۈپ مەڭزى  بىر ئاز  قىزاردى ۋە تىرنىقىنى تاتلاپ تۇرۇپ، پەس، ئەمما يېقملىق ئاۋازدا سالام قايتۇردى.  ئەيسا قىزنىڭ سالامنى ئىلىك ئالغاندىن كىيىن - بۇ يەردە سىزنى كۆرۈپ ھەم ھەيران قالدىم ھەم خۇشال بولدۇم. يۇرتتىن ئايرىلغان ئون نەچچە كۈندىن بېرى يۇرتنى، يۇرتداشلارنى شۇنداق سېغىنغان ئىدىم. سىزنى كۆرۈپ تەشنالىقىم سەل بېسىلغاندەك بولدى، كەچۇرۇڭ، سىزنى كۆرۈپ ھاياجىنىمنى باسالماي جىقراق سۆزلەپ قويدۇم،دىدى. - سىزنى كۆرۈپ مەنمۇ خۇشال بولدۇم. پەرىزىم خاتا بولمىسا سىز مەكتىپىمىزگە جەنۇبىي شىنجاڭدىن تەربىيلىنىشكە كەلگەنلەرنىڭ بىرى، شۇنداقمۇ؟ - ھا، ھا، شۇنداق. ئۇنداق بولسا، سىزمۇ شىمالىي شىنجاڭدىن تەربىيلىنىشكە كەلگەنلەرنىڭ بىرى ئىكەنسىز-دە؟ ياق، سىز شۇنچە كىچىك تۇرۇپ قانداقمۇ خىزمەتكە چىقىپ، بۇ يەرگە تەربىيلىنىشكە كېلىشكە ئۈلگۈرگەنسىز-ھە؟ - كىچىكتەك تۇرامدىم، ھا، ھا، سىزدەك ‹چوڭ › لەرغا دەرس ئۆتكىچىلىكىمىز بار جۇمۇ، ئۆزىڭىزنى بەك چوڭ چاغلاپ بىزنى مەنسىتمىگەن يەرلىرىڭىزكەندە، بۇ!      ئەمەلىيەتتە مەنمۇ بەك چوڭ چىراي ئەمەس ئدىم. ئىككىمىز مۇشۇنداق يېرىم ئەستايىدىل، يېرىم چاقچاق گەپلىرىمىز بىلەن تونۇشۇپ قالدۇق. ئۇ قىزمۇ ئۆزىنىڭ ھەمرالىرى ئىچىدە ئەڭ كىچىكى ھېسابلىنىدىكەن. بۇ ‹‹ كىچىك›› لىكتىن ئىبارەت ئورتاقلىق بىزنىڭ تونۇشىشىمىزنى تېخىمۇ تىزلەشتۈردى. مېنىڭ ھاياتىمدىكى ئەڭ رومانتىك ئەمما  خىيانەت بىلەن تولغان كۈنلىرىم باشلاندى... داۋامى بار مەنبە : ئۆزۈم

babrim

	ياخشى باشلىنىۋاتىدۇ  ... لىكىن ئازىراق تەسىراتىمنى سۆزلۇگۇم باتتى بىراقلا سۆزلەي...دۋامىنى ساقلاپ قالدىم

0000bahar

	ئاخىرى يوق يازمىلارنى كۆرگۈم كەلمەيدىغان بولۇپ قالدى.  قايسىسىسنىڭ ئاخىرى قايسى ئېلىشىپلا كىتىدىكەن. بولسا تىزراق يوللاڭ قىرىندىشىم.

adina317

	تىرىشڭ......بەك ياخىشى باشىلاپىسز!!!!

peyaz

	داۋامىغا تەشنابىز !

laylinilka

	بۇ تېمىغا ئىنكاس يىزىش چەكلەندى، بولدى تېتىقسىز ئىنكاسلارنى يوللىماي تۇرساڭلار، لام جىم پەش، ئاخىرى چىققاندا ئىچ باغرىڭلارنى بىراقلا تۆكۈڭلار، بولمىسا بەت ئارىلاپ چارچاپ كېتىدىكەنمىز، ماقۇلمۇ؟

shoruq

	(2) بەرنا بىلەن تونۇشقان كۈننىڭ ئەتىسى چۈشتىن كېيىن بىزگە دەرس يوق ئىدى. شۇنىڭ بىلەن چۈشلۈك تاماق يەپ بولۇپ تۇنۈگۈن ئۇ دەپ بەرگەن قول تىلفۇن نومۇرىغا تىلىفۇن قىلدىم. تەلىيىمگە ئۇلارنىڭمۇ چۈشتىن كېيىن دەرسى يوق ئىكەن. مەن ئۇنى چىڭخۇەي دەرياسىنىڭ مەكتەپ ئەتراپىغا يېقىن جايدىكى مەنزىرە رايۇنىغا بېرىپ ئايلىنىپ كېلىش تەكلىپىنى بەردىم. ئۇ باشتا ناز قىلىدى بولغاي، چۈشتىن كېيىن كىر يۇياتتىم، دېگەندەك تۇتامى يوق بانالار بىلەن تەكلىپىمنى رەت قىلىدى. مەنمۇ بوش كەلمەي تەكلىپىمدە چىڭ تۇردۇم. ئاخىرى بىلىق قارماققا ئىلىندى. مەن تېخى ئاخشاملا يۇيۇنغان بولساممۇ قايتا يۇيۇنۇپ، ئەزەلدىن تارىمايدىغان چاچلىرىمنى قولۇم بىلەن تاراپ،   ئەڭ يارىشملىق كىيىملىرىمنى كېيىپ كەمدىن كەم چاچىدىغان ئەتىۋارلىق ئەترىنى ئوبدانلا چېچىپ، دېيىشىپ قويغان ۋاقىتتىن 10 مىنۇت ئىلگىرى چىقىپ ئۇنى كۈتۈپ تۇردۇم. ئۇيغۇرلىرىمىزنىڭ ۋاقىت ئېڭىنىڭ تۆۋەنلىكى  بۇ قىزدىمۇ  ئوخشاشلا ئۆز ئىپادىسىنى تاپقان ئىكەن. مېنى 40 مىنۇت ساقلاتتى. مەن ئەڭ ئۆچ كۈرىدىغان ئىشلارنىڭ بىرى ۋاقىتقا رۇئايە قىلماسلىق بولغاچقا ئاچچىقلاشقا ھەقلىق بولساممۇ، يەنىلا  ئۇنىڭغا خۇشخۇي مۇئامىلە قىلدىم. ئۇ سالاملىشىپ بولغاندىن كېيىن تاتلىققىنە كۈلۈمسىرەپ قويۇپ، كېچىكىپ قالغانلىقىدىن خىجىل بولغانلىقىنى ئېيتتى. ئۇمۇ ياسىنىشقا خېلىلا ۋاقىت سەرپ قىلغان بولسا كېرەك، كېيگەن كېيىملىرى ئۇنىڭ رەڭگى-رويى ۋە گىرىملىرىگە ماسلىشىپ ئۇنى تېخىمۇ گۈزەللەشتۇرىۋەتكەن ئىدى. بىز دەريا بويى تەرەپكە قاراپ يۇرۇپ كەتتۇق. مەكتەپتىن سەل يىراقلىغاندىن كېيىن ئۇ  ئايالىمدەكلا قولىنى مېنىڭ بېلىكىمدىن ئۆتكۈزۈپ مېنى قۇچاقلاپ دېگۈدەك ماڭدى. بۇ تۇيۇقسىز ئىلتىپاتتىن يۈرۈكۈمنىڭ سوقۇشى بىردىنلا تىزلىشىپ كەتتى. مەنمۇ لىۋىمنى يالاپ قويۇپ ئۇنىڭغا ماسلىشىپ پاراڭلاشقاچ ماڭدىم.    دەريا بويى ھەقىقەتەن چىرايلىق ئىدى. كەڭ كەتكەن دەريا ساھىلى، ئىككى قىرغاقتىكى ئۇچلىرى سۇغا چىلىشىپ تۇرغان مەجنۇن تاللار، دەريادا ئۈزۈپ يۈرگەن ھەرخىل قولۋاقلار، كىچىك تىپتىكى كىمىلەر، سۈزۈك ئاسمان، كىشىنىڭ زوقىنى كەلتۈرەتتى. دەريا بويىنىڭ شۇنچە گۈزەللكىگە قارىماي، ساياھەت قىلىدىغان ئادەملەر شۇنچە ئاز ئىدى.بۇ شەھەر خەلقىنىڭ ئەيساغا  ئەڭ يارىغان يېرى، ئۇلار خىزمەت قىلغاندا شۇنچە ئەستايىدىل ھەم ئىنچىكە. ۋاقىت كۆز قارىشى كۈچلۈك، خىزمەت ئۈنۈمى  يۇقىرى. خىزمەت ۋاقتىدا خىزمەتكە مۇناسىۋەتسىز ھەرقانداق ئىش- پائالىيەت بىلەن شۇغۇللانمايدىكەن. ھەممىسىنىڭ ئالدىدا تورلاشقان كومپىيۇتېر بولسىمۇ شەخسى ئىشقا، قۇرۇق پاراڭلار، تور دۇنياسىنى قالايمىقان ئاختۇرۇپ يۈرۈيدىغان ئىشلار يوق دىيەرلىك ئىكەن. چۈشتە ئاساسەن ئۆيىگە قايتماي، ئىشخانىدىلا سىرتتىن تاماق ئەكەلدۈرۈپ يەپ خىزمىتىنى داۋاملاشتۇرۇپ كېتىدىكەن. ئەمما ئىشتىن چۈشۈپ، تاماق يەپ بولغاندىن كېيىن ئۇلار باللىرىنى يىتىلەپ، ئائىلە بويىچە تاماق سىڭدۇرگەچ سەيلە قىلىدىكەن ياكى يىقىن ئەتراپتىكى تەنتەبىيە مەيدانلىرىغا بېرىپ ئۆزىنىڭ قىزىقىشى بويىچە  تەنتەربىيە تۈرلىرىنىڭ بىرىنى تاللاپ چېنىقىدىكەن. بىز سەيلىگە چىققان ۋاقىت ئۇلارنىڭ خىزمەت قىلىدىغان ۋاقتىغا توغرا كەلگەچكە 7 مىليۇندىن ئارتۇق نۇپۇس بار بۇ چوڭ  شەھەردىكى ساياھەت رايۇنىدا ساياھەتچىلەرنىڭ شۇنچە ئاز بولۇشىمۇ ئەجەبلىنىدىغان ئىش ئەمەس ئىدى.     ئەيسا ھاياجان ئىلىكىدە قىز تەرىپىدىن يېرىم قۇچاقلىنىپ كېتىۋاتىدۇ. ئۇنىڭ كاللىسىدىن ئايالى، ئىككى بالىسى تامامەن چىقىپ كەتكەن. قىزمۇ ئۆزىنىڭ خۇشچاقچاق مىجەزى، يۇمۇرستىك سۆزلىرى بىلەن ئۆزىنىڭ تەبئەتنىڭ بۇ گۈزەل مەنزىرىلىرىدىن ھوزۇرلىنىۋاتقانلىقىنى ئىپادىگەچ ئۆزىنى ئۇنۇتقان ھالدا سەيلىسىنى داۋاملاشتۇرىۋاتىدۇ. ئۇ ئىككىسىنى ئەيىپلەيدىغان ئۇيغۇر جامائىتى، كۈنلەيدىغان ئەر، خوتۇنلىرى يىراقتا قالغان، كاللىسىدا ئەندىشە دېگەن مەۋجۇت ئەمەس. ئەيسا ئۆزىنىڭ چوڭقۇر بىلىمى، كۆپنى كۆرگەنلەرگە خاس مول تەجرىبىسى، يېتىشكەن ئەرلەرگە خاس ئېغىر- بېسىق، تەمكىنلىكى بىلەن بەرناغا يېقىپمۇ قالغان ئىدى. شۇڭا بەرنا بارلىق ئەندىشە- ۋەھىمىلەردىن خالى ھالدائۆزىنى تاشلاپ ئەركىن كېتىۋاتتى. ئۇلار دەريا قېنىغا ئىككى مېتىر كىرگۈزۈپ ياسىغان ياغاچ كۆۋرۈكتە بىر سائەتكە يېقىن مېڭىشتى. قىز سەل ھارغىنلىق ھىس قىلغان بولسا كېرەك ھەر ئەللىك مىتىردا بىر ئۇچىرايدىغان ياغاچ ئورۇندۇقتا ئارام ئېلىشنى تەلەپ قىلدى. ئەيسامۇ قىلچە تارتىشماي ماقۇللۇق بىلدۇردى. ئىچكىرى ئۆلكىلەردە مۇسۇلمانچە يىمەكلىك تېپىش ئانچە ئاسان ئەمەس. شۇڭا بۇنداق سەيلى- ساياھەت قىلغان چاغلاردا يىمەكلىكنى بىللە ئېلىپ يۇرۇشكە توغرا كېلىدۇ. ئەيسا بۇ تەرەپلەرنى ئانچە ئويلاشمىغان بولسا كېرەك. ئۇنىڭ قولىدا ھېچنەرسە يوق ئىدى. قىزلار تۇرمۇشتا ناھايىتى ئىنچكە كېلىدۇ. بەرنا سومكىسىدىن ئاۋۋال كىچىككىنە ياغىلىق چىقىرىپ ئىككىسىنىڭ ئوتتۇرىسىدىكى بوش يەرگە سالدى. ئاندىن بىر سۇلياۋ خالتىدىن قۇرۇق ئۈزۈم، بادام، پىچىنە- پىرەنىك ئېلىپ ياغلىق ئۈستىگە يايدى.  قىز بۇ ئىشلارنى گەپ قىلماستىن ئۇرۇندىدى. ئەيسا قىزنىڭ بۇ ئەستايىدىللىقىدىن سۇيۇنگەچ جىمجىت قاراپ تۇردى. - سومكام كىچىك بولغاچقا ئاران مۇشۇنچىلىك تەييارلىق قىلالىدىم. ئاز كۆرمەي بېقىڭە. - ھېلىمۇ بەك جۇۋاپ كېتىپسىز، مېنىڭ خىيالىمغىمۇ كەلمەپتۇ بۇ ئىشلار. سىز ئىشلارنى بەك ئەتراپلىق ئويلايدىكەنسىز. سىزگە قايىل بولدۇم. - بۇنداق كىچىك ئىشلارغا قايىل بولغىلى تۇرسىڭىز قايىل بولۇش توشامدۇ؟ تۈزۈت قىلماي ئېلىڭە. مۇنۇ پىچىنە- پىرەنىكلەرنى ئۆزەم پۇشۇرغان. - شۇنداقمۇ، بۇ پىچىنە بەك ئوخشاپتۇ، قۇلىڭىز تاتلىق ئىكەن جۇمۇ،  بىر تامچە سۇدىن قوياشنىڭ ئەكسىنى كۆرگىلى بولغاندەك كىچىككىنە ئىشلاردىنمۇ ئادەملەرنىڭ خاراكتېرىنى بىلىپ يەتكىلى بولىدۇ. شۇنداق پاراڭلار بىلەن خېلى ئولتۇردۇق. مېنىڭ كاللامدا بۇ قىزنىڭ ئەھۋالىنى بىلىش ئىستىكى تۇغۇلغان ئىدى. شۇڭا يۈرۈكۈمنى توم قىلىپ قىزدىن سورىدىم. - بىر سۇئال سورىسام خاپا بولارسىزمۇ، سۇرىماي دىسەم كۆڭلۈم ئۇنىمىدى -سۇراڭ، كۆڭلۈمگە كەلمەيدۇ. قارىماققا نازۇكتەك كۈرۈنگىنىم بىلەن خېلى كۆتۈرۈشلۈك  ئايالمەن. - نىمە ئايالمەن؟ سىز توي قىلغانمۇ؟؟ مەن ھەيران بولۇپ سورىدىم. -ھا، ھا، سىز مېنى قىز دەپ ئويلاپ قاپسىزدە، مەن توي قىلغان، تېخى ئوماق بىر قىزىم بار، بۇ يىل بىر ياشقا كىردى. قانداق مېنى بۇ يەرگە تەكلىپ قىلغىنىڭىزدىن پۇشايمان قىلىۋاتامسىز؟   قىزنىڭ جاۋابى مېنى راستىنلا تەمتىرىتىپ قويدى. بۇ مۇمكىنمۇ؟ بۇ قىز قانداقمۇ تويل قىلسۇن. قارىماققا 22- 23 ياشلارغا كىرگەندەك كۈرۈنىدۇ، مەن تېخى ئالى مەكتەپنى پۈتتۈرۈپلا ئۇياندىن ئىشقا ئورۇنلىشىپ، بۇياندىن تەربىيلىنىشكە كەلگەن دەپ پەرەز قىلغان ئىكەنمەن. مېنىڭ داڭ قېتىپ قالغانلىقىمنى كۆرگەن قىز قاقاقلاپ كۈلدى ۋە كۈلكىسىنى تەستە بېسىقتۇرۇپ : - ئالۋاستىغا ئۇچراپ قالغاندەك  قېتىپ قالدىڭىزغۇ ، كۆپ ھەيران بولماڭ. كۆڭلىڭىزدىكى تۈگۈنلەرنى يېشىۋىتەي، مەن ئوقۇش پۈتتۈرگەنگە ئالتە يىل بولدى. خىزمەتكە چىققانغىمۇ تۆت يىل بولدى. بۇ يىل 29 ياشقا كىردىم. بەلكىم ئىككىمىز تەڭ ياشلاردا بولساق كىرەك، - دېدى. - بۇ قانداقمۇ مۇمكىن بولسۇن سىز ماڭا 22، 23 ياشلارغا كىرگەندەك كۆرۈندىڭىز، تېخى ئالى مەكتەپ ئوقۇغۇچىسىدەكلا. - مېنى تۇنجى كۆرگەن كۆپلىگەن كىشلەر شۇنداق دەپ ئويلايدۇ، چىرايىم كىچىك كۈرۈنگەن بىلەن ياش بىر يەرگە باردى. ئىچىم لىق دەرت بىلەن توشقان. دەرتلىرىمنى ئاڭلىسىڭىز مېنى 40 ياشلارغا كىرگەندەك ھىس قىلىسىز. بولدىلا بۇنداق خۇشال كەيپىياتنى تاپماق تەستە تاپقان ۋاقتىمدا كۆڭۈلسىز گەپلەرنى دىمەي. ئۇنىڭ ياش لىغىرلاپ قالغان كۆزلىرىدىن ئۆزەمنى قاچۇرۇش ئۈچۈن 200 مېتىر نېرىدىن كۆرۈنگەن ساياھەت مۇلازىمەت پۇكىيىدىن ئىچىملىك ئېلىپ كېلىشنى بانا قىلىپ ئۇنىڭ يېنىدىن ۋاقتىنچە ئايرىلدىم.    مەن قايتىپ كەلگەندە ئۇنىڭ كەيپىياتى ئەسلىگە كېلىپ بولغانىكەن. يەنە چاقچاقلىشىپ، پاراڭلىشىپ دېگۈدەك ساياھىتىمىزنى داۋاملاشتۇردۇق. مېنىڭ بىلىكىم يەنىلا ئۇنىڭ قولى تەرىپىدىن كونترول قىلغان ھالەتتە ئىدى. مەن بىلىقنى چۈچۈتۈپ قويماسلىق ئۈچۈن ساياھەت جەريانىدا قارماقنى مىدىرلاتماي ماڭدىم. بىلىپ بىلمەي ئەتراپ قاراڭغۇلاشتى. بەرنا مەكتەپكە قايتىشنى تەلەپ قىلدى. مەن بۇ شەھەردىكى خېلى داڭلىق شىنجاڭلىقلارنىڭ ئاشخانىسىغا بېرىپ مىھمان قىلىشنى تەكلىپ قىلساممۇ ھەرگىز ئۇنىمىدى. مەنمۇ ئارتۇقچە زولاپ كەتمەي تاكسى شوپۇرىغا مەكتەپ ئادرىسىنى ئېيتىپ بەردىم. مەكتەپكە كەلگەندىن كېيىن بەرنا بۈگۈنكى ساياھەتتىن بەكمۇ خۇشال بولغانلىقىنى ئېيتىپ ماڭا مىننەتدارلىقىنى بىلدۈرۈپ خوشلاشتى. مەنمۇ يەنە تىلفۇن قىلىدىغانلىقىمنى ئېيتىپ خوشلاشتىم. ۋە ئاۋازسىز قىلىپ قويغان تىلفۇنىمغا قارىدىم ئايالىمدىن 4 قېتىم تىلىفۇن، بىر قېتىم ئۇچۇر كەلگەن ئىكەن. مەن تىلىفۇن قايتۇرۇپ يىغىندا بولغاچقا تىلىفۇن  قايتۇرالمىغانلىقىمنى ئېيتتىم. شۇنىڭ بىلەن مېنىڭ يالغانچىلىق بىلەن تولغان ئۈچ ئايلىق رومانتىك ئەمما، خىيانەتكە تولغان تۇرمۇشىم باشلاندى...    داۋامى بار.

erxat627

	بولسا تىزراق يوللىسىڭىز قىرىندىشىم. قاچان داۋامى چىقار؟

ANWAR425

	داۋامىنى داۋاملىق كۈتىمىز لىكىن تىزراق  پۆتتۈرشىڭىزنى ئۈمىد قىلىمەن !

pista~kiz

	ئاخىرىنى قاچانمۇ يازاسىز ! ئوقىغىنىمغا پۇشايمان قىلمىساملا بولاتتىغۇ.