ئىتنىڭ بېشىنى تەخسىگە ئالسا تۇرماپتۇ

kichikoghul

	ئىتنىڭ بېشىنى تەخسىگە ئالسا تۇرماپتۇ (ھېكايە) 1 - ئەسسالامۇ ئەلەيكۇم! - ۋەئەلەيكۇم ئەسسالام، مەن خۇدابەردى شوجاڭ،بىزنىڭ ئۆيگە دىككىدە بىر چىقىڭە ئۇكام! - كىيىم-كېچىكىمنى سېلىپ، يېتىپ بولغانتىم. - يېتىپ بولسىڭىزمۇ ئۇخلىماپسىزغۇ! باھانە كۆرسەتمەي دىككىدە چىقىڭ! - جىددىي ئىش بولمىسا، ئەتە كۆرۈشسەك بولۇپتىكەن، بۈگۈن مىجەزىم يوق، شۇڭا بالدۇر يېتىۋالغانتىم. - مىجەزىڭىز بولمىسا، دورىسىنى قىلىمىز خەلپىدىن مۇئەللىم، ياش تۇرۇپ ئۇنداق ئېرىنچەكلىك قىلماي، تېز چىقىڭ!قىزلارمۇ چىقىپ بولدى. ئۆيدە يېزىنىڭ مائارىپ ياچېيكا شۇجىسى بىلەن شاڭجاڭ بار. - شوجاڭ مېنى تەڭلىك قىلمىغان بولسىلا ،ئۇلار بولسا، مەن تېخىمۇ چىقالمىغۇدەكمەن. ئۆزلىرى بىلىلا، مەن ئىچمەيمەن. ئۇلارنى خاپا قىلىپ قويماي، شۇڭا چىقماي! - سىزنىڭ ئىچمەيدىغانلىقىڭىزنى ئۇلارغا ئېيتىمەن. سەي-پەي يىگەچ ئولتۇرۇشۇپ بەرسىڭىز بولىدۇ. - شاڭجاڭ بىلەن شۇجى زورلاپ تۇرىۋالارمىكىن، بولسا مەن چىقمىغان بولسام شوجاڭ! - بولمايدۇ، بولمايدۇ! مېنىڭ يۈزۈمنى قىلمىسىڭىزمۇ رەھبەرلەرنىڭ ھۆرمىتىنى قىلىپ بولسىمۇ چىقىڭ. ئۇلار بىزنىڭ مەكتەپكە ھەر كۈنى كېلىپ ئولتۇرمايدۇ. ھەرقايسىڭلار بىلەن مەكتەپ خىزمىتى ھەققىدە سۆھبەتلەشكىلى كېلىپتۇ. - ماقۇل كىيىمىمنى كېيىپ چىقاي، رەھبەرلەر ھاراق زورلاپ قالسا، ماڭا بىر ئارا تۇرغان بولسىلا. - چاتاق يوق، تېزراق چىقىڭ ئەمىسە! - ماقۇل. 2 - ئەسسالامۇ ئەلەيكۇم! - ۋەئەلەيكۇم ئەسسالام، كېلىلى-كېلىلى خەلپىدىن مۇئەللىم! - ھوي مىراپ! يېڭى مېھمانغا بىر رومكا قويىلى! - مەن ئىچمەي! - ئاۋۋال بىرنى ئىچىۋېتىڭ! ئاندىن ئىچمەي دېسىڭىز قاملىشىدۇ. - شۇنداق قىلىڭ، باياتتىن پات كىرمەي بىزنى بەك ساقلىتىۋەتتىڭىز، كېچكىپ كىرگەن گۇناھىڭىز ئۈچۈن بىر رومكا ئىچىڭ! - شۇجى مېنى تەڭلىك قىلمىغان بولسىلا، مەن پەقەت ئىچىپ باقمىغان. - ھېچكىم ئانىسىنىڭ قورسىقىدا ھاراق ئىچىپ بېقىپ تۇغۇلمايدۇ ئۇكام. ھاراق دېگەننى مۇشۇنداق سورۇندا ئىچىپ باقىدىغان گەپ. - ئۇغۇ شۇنداق، مەن ئىچمەي شاڭجاڭ. - ئۇكام، بۇندىن كېيىن ئىچمەڭ، لېكىن بۈگۈن كا شاڭجاڭنىڭ قولىدىن ئىچمىسىڭىز پەقەت قاملاشمايدۇ. شاڭجاڭ دېگەن دادىڭىزنىڭ ئورنىدىكى ئادەم. - مەن دادامنىڭ قولىدىنمۇ ھاراق ئىچمىگەن شوجاڭ! - دادىڭىز دېگەن پايتىمىسى سۆرۈلۈپ قالغان بىر دېھقان، ئىچسىڭىز-ئىچمىسىز بەرىبىر. كا شاڭجاڭ بولسا پۈتۈن يېزىمىزنىڭ باشلىقى، سىزمۇ قولىدىن بىرەر رومكا ئىچىپ قويمىسىڭىز بولمايدۇ. - شوجاڭ مەن رەئىسنىڭ قولىدىمۇ ئىچىپ باقمىغان. - ھا-ھا!…ئۇكامەي، ئوغۇل بالىمۇسەن!؟ - ئوغۇل بالا!!! - ھاراق دېگەن ئوغۇل بالا ئىچىدىغان نەرسە، ئوغۇل بالا بولساڭ، ئىچە تولا ناز قىلماي! - ناز قىلىدىغان مەن سىلىنىڭ قىزلىرى ئەمەس، ئىچمەيمەن دېدىم ئىچمەيمەن، قانداق!؟ - ئېيتە، نېمىشقا ئىچمەيسەن؟! - مەن دېگەن ئوقۇتقۇچى، ھاراقكەش ئەمەس، شۇڭا ئىچمەيمەن! - بىز ھاراقكەشمىكەنمىز؟! - ھاراقكەشمۇ، ئەمەسمۇ ئۆزلىرى بىلەلا، مەن بىلمەيمەن. - بىلمىسەڭ بىلىپ قال، بەش ۋاق ناماز ئوقۇيدىغان موللا ھاراق ئىچمەيدۇ، بالا ئوقۇتىدىغان مۇئەللىم ئىچىدۇ! - شۇنداق قانۇن بولسا، ماڭا بىر كۆرسەتسىلە، ئاندىن ئىچەي مەن! - ئالدىرىما ئەتە-ئۆگۈنلا كۆرۈپ قالىسەن. - ئۇكامەي، ئىچمەيدىغان ئادەم نېمىشقا كىرگەن بۇ سورۇنغا، ئىچمىسەڭ، تولا كەيپىمىزنى ئۇچۇرماي چىقە ماۋۇ سۆرۇندىن، سەندەك لاتا غىلاپ ئوغۇل بالىدىن ماۋۇ قىزلار ياخشىراقكەن. - لەنەت، سەندەك گېپىدە تۇرمىغان شوجاڭغا. 3 - ئىتنىڭ بېشىنى تەخسىگە ئالسا تۇرماپتۇ،دېگەن شۇ،-دە! - خۇدابەردى شوجاڭ، ساراڭمۇ نېمە ماۋۇ مۇئەللىمىڭلا؟! - شۇنداق، شۇنداق شاڭجاڭ، ئۇنىڭ كاللىسىنىڭ بىر-ئىككى ۋېنتىسى يا كەم يا ئارتۇق. خىزمەتكە چۈشكەن بىر يىلدىن ياقى پەقەتلا ھاراق ئىچۈرەلمىدۇق ئۇنىڭغا. - ئۇنىڭ  ئىدىيسىدە ئازراق مەسىلە بار چوقۇم. - ناماز ئوقۇمدىغاندۇ-يە؟! - شۇنى دەيمەن. - سېلە ئوبدانراق كۆز-قولاق بولسىلا بولغىدەك. - خۇدابەردى شوجاڭ ئۇنىڭغا ئوبدان كۆز قولاق بولۇپ تۇرمىساق بولمىغىدەك. ئويناشنى بىلمىگەن ئادەم خىزمەت قىلىشنىمۇ بىلمەيدۇ. باتۇر شۇجى ئەتىلا ئۇقتۇرۇش يېزىپ، ئوتتۇرا مەكتەپتىن كەپتەرخانا باشلانغۇچ مەكتەپكە چۈشۈرۋېتىڭلار! ماۋۇ يېزىمىزدا قانداق قانۇنلارنىڭ بارلىقىنى بىر كۆرۈپ قالسۇن!ئاندىن يەنە كەپتەرخانا مەكتەپنىڭ شۇجىسىغا ئورۇنلاشتۇرۇپ قويۇڭلا، ئۇنى ئەتىسى-ئاخشىمى يوشۇرۇن نازارەت قىلسۇن. - ماقۇل شاڭجاڭ. - ماۋۇ گەپ مۇشۇ يەردە قالسۇن، ئەمدى خۇشال-خورام ئولتۇرۇپ ھارىقىمىزنى ئىچەيلى! - شۇنداق قىلىلى، ھارىقىمىزنىمۇ ئىچىلى،تانسىمۇ ئوينىغاچ ئولتۇرايلى، قىزلىرىمىزنىڭ تاپىنىمۇ  قىزىپ كەتتى بۇ چاغقا. 1999-يىل مەنبە: ئۆز قەلەم

1670154432

	ۋاي ئاللا مۇنداق ئىشلارمۇ بار دەڭ تېخى؟ ئۇلارنىڭمۇ جاجىسىنى يەيدىغان بىر كۇنلەر كىلىدۇكى ،ئۆزىنىڭ نىمە بولغانلىغىىنى بىلىپ بولغىچە تەخسىدە تۇرمىغان ئىشىتنىڭ كاللىسى، نەق ئۆزلىرى ئىچكەن ھاراقنىڭ قۇسىقىغا چىلىنىپ ئارام تاپىدۇ.   مۇشۇنداق مۇناپىقلار دەۋېر سۇرگەن جەمىيەتتە ،يەنە قانچىلىغان ئىرادىسى ئاجىزلار پاتقاققا پاتار ھە؟

axikim721

	لەنەت ئاشۇ يېزا باشلىقى، مەكتەپ مۇدىرلىرىغا......................................

ئەسلىمە

	مىنىمۇ ئىدارىنىڭ پارتىكوم شۈجىسى، ئىدارە باشلىقى  ھاراققا زورلاپتى، مەن -ئىچمەيمەن دىسەم، -باشقا يالاقچىلىرى نىمە دەيدۇ دىمەمسىلەر؟ -باشلىق سورايدۇ؟ -ھاراق ئىچەمدۇ- ئىچمەمدۇ؟ -باشقىلار دەي-دەي بىلەن دەيدۇ. -بۇرۇندىن باشلاپ ھاراقكەش بۇ دىگەن، بۈگۈن يۇۋاش بولىۋاپتۇ. -باشلىق دەيدۇ؛ -ئىچە ماۋۇ بىر رومكا ھاراقنى؛ -مەن راستىنلا ئىچىپ باقمىغان مەن؛ ھەم بۇندىن كىيىنمۇ ئىچمەيمەن. -ئۆزلىرى مەن ئىچكەن ھىساپتا ئىچىۋەرسىلە؛ -يالاقچىلار دەيدۇ؛ -مۇشۇ بىر رومكا ھاراقنى ئىچىۋىتە، ئوغول بالا دىگەن ئىچىدۇ، ئوينايدۇ، ئىچمىگەن، ئوينىمىغان ئادەم ئوغال بالا ئەمەس دەيدۇ. -شۇنىڭ بىلەن باشلىقنىڭ ئاچچىقى كىلىپ؛ - مەن  كىمۇ؟ مەن ساڭا ھاراق تۇتسام ئىچمىدىڭيا! مەن بەك سەندىن خاپا بولدۇم، دەپ كەيپى يوق ئاچچىقى بىلەن ئولتوروپ، كەينى-كەينىدىن تاماكا چىكىدۇ. - باشلىقتىن يالاقچى ئەسكى، قوغونچىدىن شاپاقچى ئەسكى.

yehya

	باشلىقتىن يالاقچى ئەسكى، قوغونچىدىن شاپاقچى ئەسكى. جىڭ گەپ ماۋۇ.

aldawr

	ھاراقنى ھارام دەيمىزيۇ  يەنە نىمشقا ئىچمىز ؟  چۈنكى ئۇ ئاشلىقتن ئىشلەنگىنى ئۈچۈنمۇ ؟!!!

fiyat920

	‹‹تاماكا دورامچىنىڭ ،ھاراق زولامچىنىڭ ››دەپ زورلاپ كېتىشلىرىچۇ بۇخەقنىڭ.

tahdassira

	ئومەر ھەييامنىڭ بىر رۇبائىسى ئېسىمگە كېلىپ قالدى:                      مېنىڭدىن مۇھەممەد رەسۇلغا سالام.                      يەتكۇزۇپ ئېيتسىڭىز مۇنداق بىر كالام.                      نە ئۈچۈن شەرىئەتتە شۇنچە ئېچىغان،                      ئايران ئۇ ھالالۇ، پاكىز مەي ھارام؟        ئېيتىشلارغا قارىغاندا، ئومەر ھەييام ئۆمرىدە بىرمۇ قېتىم ھاراق ئىچىپ باقمىغان ئىكەن.