بۇ يازمىنى
ئادۋۇكات توربېكىتى دا ئوقۇغۇچىلىرىمىز ئۈچۈن ئېلان قىلغان ئىدىم، باشقا تورداشلارنىڭمۇ پايدىلىنىشى ئۈچۈن مىسرانىمغا كۆچۈرۈپ كەلدىم.
ئەگەر تورداشلارغا ئەدلىيە ئىمتىھانى يىللىق سوئاللىرى لازىم بولسا
ئادۋۇكات توربېكىتىغا كىرسەڭلار چۈشۈرۈش تەمىنلەنگەن
دىققىتىڭلار يازمىدا بولسۇن.
بۈگۈن 9-ئاينىڭ 5-كۈنى، دۆلەتلىك ئەدلىيە ئىمتىھانىغا يەنە 12كۈن قالدى. جىددىيلىشىۋاتامسىز؟ ئۇنىسى ئەلۋەتتە ئېنىق، بۇنداق چوڭ ئىمتىھان ئالدىدا ھەرقانداق ئادەم جىددىيلەشمەي قالمايدۇ، بىراق جىددىيلىشىشنىڭ سەۋەبى بۇنداق بولماسلىقى مۇمكىن. چۈنكى سىزنىڭ ئەندىشىڭىز شۇكى كىتاپنى كۆرىسىڭىز ھەممىنى بىلگەندەكلا، ئەمما ياپقاندىن كېيىن كاللىڭىز قۇپقۇرۇق.
توغرا تاپتىممۇ؟ ھا ھا ھا، مەن ئەۋلىيا ئەمەس كۆڭلىڭىزدىكىنى بىلىدىغان، ئەمما بۇنداق ئەھۋالغا چۈشۈپ قالغان بىر سىزلا ئەمەس. ماڭا خېلى كۆپ ساۋاقداشلار مۇشۇ ھەقتە دەردىنى تۆكۈپ بەردى، بۇ دەل ئىمتىھان ئالدىدىكى زىيادە جىددىيلىشىشتىن ۋە چارچاشتىن كېلىپ چىققان ئەھۋال. ئەمەلىيەتتە ھەممسى سىزنىڭ كاللىڭىزدا بار، دەماللىققا يادىڭىزغا ئېلىپ بولالمىدىڭىز شۇ.
بۇنداق ئەھۋالدىن قانداق قۇتۇلۇش كېرەك؟
بىردىنبىر چارە، سوئال ئىشلەپ مەشق قىلىڭ. ئىشلىگەندىمۇ تەقلىدىي سۇئال ئەمەس، يىللىق سوئاللارنى ئىشلەڭ، چۈنكى تەقلىدىي سوئالنى قانچە قىلغان بىلەن ئۇ يەنىلا ئەدلىيە ئىمتىھانى سۇئالىغا يېقىنلىشىشى تەس، يىللىق سوئاللار ئارقىلىق سىز سوئال چىقارغۇچىلارنىڭ تەپەككۈر يولىنى، سوئال چىقىرىشتىكى بىلىم نۇقتىسىنى ھېس قىلالايسىز. سوئال ئىشلەش بىلەن كىتاپ كۆرۈشنى بىرلەشتۈرۈش ئەڭ ياخشى ئۇسۇل، ئاۋۋال سوئال ئىشلەپ ئۆزىڭىزدىكى كەم نۇقتىلارنى تېپىپ چىقىپ كىتاپ كۆرگەندە شۇلارنى تولۇقلاپ مېڭىڭ، بولسا دەپتەرگە تاللاش سوئاللىرىدىن تارتىپ نېمە ئۈچۈن Aجاۋاپنى تاللىمىغانلىقىڭىز، نېمە ئۈچۈن Bجاۋاپنى توغرا قىلغانلىقىڭىزنىڭ ئاساسىنى تەپسىلىي يېزىپ مېڭىڭ.
ئەمدى بارا-بارا كاللىڭىزدىكى سانلىق مەلۇماتلارنى ئەسلىگە كېلىۋاتقاندەك ھېس قىلىۋاتامسىز؟
سوئال ئىشلەشتە قىينالدىڭىزمۇ؟
سوئال ئىشلەش جەريانىدا سىز ھۆل خىشقا دەسسەپ قىلىشىڭىز مۇمكىن، سوئالدا سىزنى ئازدۇرىدىغان، سىز بىلىدىغان يەرلەردىمۇ ئېزىپ كەتكەنلىكىڭىزنى بايقايسىز. ھېچقىسى يوق، چۈنكى بۇ سوئالنى چىقىرىۋاتقانلار نەچچە يىلدىن بىرى سوئال چىقىرىپ پىشىپ قاقۋاش بولۇپ كەتكەنلەر، ئۇلار مەخسۇس سىزنى ھۆل خىشقا دەسسىتىش ئۈچۈن بارلىق ئاماللارنى قوللىنىدۇ، شۇنداق قىلىپ ئەدلىيە ئىمتىھانىنىڭ ئۆتۈش نىسبىتىنى %10ئەتراپىدا كونتىرول قىلمىسا بولمايدۇ، بولمىسا ‹جۇڭگۇدىكى بىرىنچى تەس ئىمتىھان›بولمايدۇ-دە.
بۇنىڭغىمۇ ئامال بار. لوگىگىلىق تەپەككۈرگە ماھىر بولۇڭ، سىزدىن نېمىنى تەلەپ قىلىۋاتىدۇ، ئەگىتىپ بايان قىلىۋاتقان بايانلىرىدا نېمىنى يوشۇرۇن ئىپادىلەۋاتىدۇ، سىزگە ئاسان تۇيۇلغان يەردە نېمىنى تىقىپ قويدى، شۇلارنى بىلىشكە تىرىشىڭ.
مەسىلەن:
قاسىم بۇلاڭچىلىق جىنايىتى ئۈچۈن ئۆلۈم جازاسى بېرىلىپ ئىككى يىل كېچىكتۈرۈپ ئىجرا قىلىشقا ھۆكۈم قىلىنغان، تۈرمىدىكى مەزگىلىدە ئۇ باشقۇرۇشقا بويسۇنماي زور تالاپەت ھادىسىسى جىنايىتىنى سادىر قىلغان، بۇنىڭغا ئائىت بايانلاردىن توغرا بولغىنى قايسى؟
a:قاسىمنى يۇقىرى سوتنىڭ تەستىقى بىلەن ئىككى يىل توشماستىنلا ئۆلۈم جازاسىنى ئىجرا قىلىش كېرەك.
b: ئىككى يىل توشقاندا ئۆلۈم جازاسىنى ئىجرا قىلىش كېرەك.
c:ئىككى يىل توشقاندىن كېيىن جازانى مۇددەتسىز قاماق جازاسىغا چۈشۈرۈش كېرەك.
‹زور تالاپەت ھادىسىسى جىنايىتى›دېگەن خەتنى كۆرۈپلا قېنىڭىز قىزىپ ئۇنى دەرھال ئىجرا قىلدۇرۇشقا ياكى 2يىل توشقاندا ئىجرا قىلىشقا ھۆكۈم قىلماڭ، ئالدى بىلەن زور تالاپەت ھادىسىسى جىنايىتىنىڭ خارەكتېرىنى ۋە ئۆلۈم جازاسىنى 2يىل كېچىكتۈرۈپ ئىجرا قىلىشتىكى بىلىم نۇقتىلىرىنى ئەسلەپ بېقىڭ، ئۆلۈم جازاسىنى ئىككى يىل كېچىكتۈرۈپ ئىجرا قىلىشتا جىنايەتچى ئىككى يىل ئىچىدە قەستەنلىك جىنايىتى سادىر قىلسا ئۆلۈم جازاسىنى دەرھال ئىجرا قىلىش تەدبىقلىنىدۇ دەپ ئۆگەنگەن ئىدىڭىز، ئەمما بۇ يەردىكى سوئال چىقارغۇچى سىزنىڭ كۆزىڭىزگە قورقۇنچلۇق كۆرسىتىۋاتقان ‹زور تالاپەت ھادىسىسى جىنايىتى› بولسا سەۋەنلىك جىنايىتى خالاس. دېمەك ئىكى يىل كېچىكتۈرۈپ ئىجرا قىلىندىغان ئۆلۈم جازاسى ئىككى يىلدىن كېيىن مۇددەتسىز قاماق جازاسىغا ئۆزگىرىدۇ دېگەن گەپ.
ھەيرانلىقتا يوغان ئېچىۋالغان ئاغزىڭىزنى يۇمۇۋىلىڭ، بۇنداق ئاسان نۇقتىدا كەتكۈزۈپ قويۇش ھەرقانداق ئىمتىھان بەرگۈچىنىڭ ئىچىنى ئىيتىشتۇرىدىغان ئىش ئەلۋەتتە، يۇقاردا بايان قىلغىنىم بولسا دەماللىققا ئېسىمگە كەلگەن ئەڭ ئاددىي ئادەم ئازدۇرۇش ئۇسۇللىرى خالاس.
قانداق؟ بۇ قاقۋاشلار بىلەن تۇتۇشماقنىڭ تەسلىكىنى بىلىپ يەتكەنسىز؟ گەپنى يورغىلىتىپ قىلنى كۆزىڭىزگە پىل قىلىپ كۆرسىتىدۇ، ئالدانماڭ، بۇنداق كۆپتۈرگەن يەردە چوقۇم بىر توزاق بار.
ئىمتىھان بەرگۈچىلەرنىڭ يەنە بىر كەتكۈزۈپ قويىدىغان يېرى بولسا خاتانى تاللاش بىلەن توغرىسىنى تاللاشتا ئېزىقىپ كېتىش. مۇشۇ سەۋەبتىنمۇ خېلى كۆپ ساۋاقداشلار زىيان تارتىپ كەتتى، بۇنىڭ ئامالى بولسا سوئال قەغىزىدىكى ‹توغرىنى تاللاڭ›، ‹خاتاسىنى تاللاڭ› دېگەن خەتلەرنىڭ ئۈستىگە قېرىنداش بىلەن ئۆزىڭىز بىلىدىغان بەلگۈلەرنى سېلىپ مېڭىڭ، قەغەز تاپشۇرىدىغان ۋاقىتتا ئۆچۈرگۈچ بىلەن ئۆچۈرۋەتسىڭىزلا بولىدۇ، كومىسسىيەلەرمۇ بۇنىڭغا يول قويىدۇ.
سوئال ئىشلەشتە بەلكىم سوئاللاردا خاتالىقنى بايقايسىز، بۇنىڭدىنمۇ ئەنسىرىمەڭ، يىلىغا 10نۇمۇرلۇق سوئالدا مۇشۇنداق خاتالىق ساقلىنىۋاتىدۇ، بۇنداق چاغدا كەيپىياتىڭىزنى بۇزىۋالماسلىقىڭىزنى ئەسكەرتىمەن. چۈنكى ئۇ 10نومۇرنى سىزگە قوشۇپلا بېرىۋىتىدۇ.
يۇقارقىلار ئىمتىھاندىكى ئەڭ كىچىك تاكتىكىلار خالاس، قالغان جەڭ تاكتىكىلىرىنى رىزۋانگۈل مۇئەللىم دەرس سۆزلىگەندە سىزگە ئەسكەرتىپ ماڭغان، شۇلارنى بىر-بىرلەپ ئەسلەپ چىقىڭ.
رىزۋانگۈل مۇئەللىمنىڭ دەرس باشلىغان ۋاقىتتىلا كىتاپنى ۋاقتىدا كۆرۈش توغۇرلۇق قىلغان سۆزلىرىنىڭ تىگىگە ئەمدى يەتكەندەك قىلدىڭىزمۇ؟